Marakusi 15 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu i lindoꞌna Mágáuꞌ Pilatu

¹ Kahalona mepulo-pulo, upu-upu Topepáresáꞌ Mahile Agama Iahudiꞌ, iamoheꞌ kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna, mogómbóheꞌ. I pogómbóraꞌ iti, himpuduheꞌ {mampeliꞌ rárá to ina ratarima topopárentá Roma, bona Iesu rahuku mate}. Roo onoꞌ, Iesu ratimpuku wopiꞌi, haneꞌi raꞌánti lao i lindoꞌna Mágáuꞌ Pilatu.

² Kahaweꞌraꞌ ionoꞌ, mekuneꞌ miꞌi Pilatu i Iesu, “Ba Io mpuꞌui daturaꞌ toIahudiꞌ?” Nahániki Iesu, “Io haduduámu to manguliꞌ noꞌonoꞌ.”

³ Hangko ionoꞌ, kapalaꞌ-kapalaꞌ tadulako menómbá mopahaweꞌ i Pilatu mampopengaa to rasalaꞌiá Iesu.

⁴ Onoꞌ miꞌi haneꞌi mekuneꞌ wopiꞌi Pilatu i Hia, nauliꞌ, “Handaꞌ pákáꞌna to rasalaꞌiáKoꞌ. Tiꞌara paꞌi Nuꞌundeꞌ mohánikiheꞌ?”

⁵ Agáiáná kehapiꞌ Iesu tiꞌara ara salaꞌNa, Ia tiꞌara mau mohánikiheꞌ, onoꞌ miꞌi haneꞌi napohele ntepuꞌu Pilatu.

⁶ Pare-parena i Alo Mahile Posusa Paska, Pilatu biásána mokábáhá hadua tauna to ratarungku, mouláꞌ heáná to rapembiáꞌ tauna to handaꞌ.

⁷ I pare iti, ara hadua to ratarungku láwiꞌ moewaꞌ topopárentá Roma. Hangaꞌna Baraba. Ia hai rángána mopapateheꞌ tauna i kalaoraꞌ moewaꞌ topopárentá.

⁸ Tempó iti, handaꞌmoheꞌ tauna to lao i Pilatu, mantepuꞌuheꞌ membiáꞌ bona nakábáhá hadua tauna to ratarungku nodo to biásá nabábehi i pare-parena.

⁹ Agáiáná nakuneꞌheꞌ Pilatu, nauliꞌ, “Noumbá, ba niundeꞌ ane kukábáháꞌákou daturaꞌ toIahudiꞌ deꞌe?”

¹⁰ Pilatu manguliꞌ noꞌonoꞌ láwiꞌ naisá kapalaꞌ-kapalaꞌ tadulako menómbá mohuhuꞌ Iesu i hia ánti kamahiniꞌraꞌ peá {láwiꞌ handaꞌ ntepuꞌu tauna to meuláꞌ i Hia}.

¹¹ Agáiáná kapalaꞌ-kapalaꞌ tadulako menómbá mopamaꞌamuꞌ laluraꞌ tauna to handaꞌ bona rapembiáꞌ Baraba riꞌi to rakábáhá, tiꞌara Iesu.

¹² Mewaliꞌ, napekuneꞌ wopiꞌi Pilatu i tauna to handaꞌ, “Ane noꞌonoꞌi, kupanoumbá miꞌi tauna to niuliꞌ daturaꞌ toIahudiꞌ deꞌe?”

¹³ Mongangamoheꞌ tauna to handaꞌ, rauliꞌ, “Pakuꞌmode!”

¹⁴ Napekuneꞌ Pilatu, “Salaꞌ apa riꞌi to Nabábehi?” Agáiáná napokamonganga-ngangamoheꞌ, rauliꞌ, “Pakuꞌmode!”

¹⁵ Bona malulu peá laluraꞌ tauna to handaꞌ, onoꞌ miꞌi haneꞌi Pilatu mampeuláꞌi peundeꞌáraꞌ. Mewaliꞌ ia mokábáhá mpuꞌu miꞌi Baraba. Roo onoꞌ, nahuoꞌ miꞌi surudadoꞌna mohepe-hepe Iesu hai gulaꞌ, haneꞌi nahuhuꞌámoheꞌ bona rapakuꞌ i kau mombehape.

Iesu rapopohalaꞌ-halaꞌ surudadoꞌ

¹⁶ KarooNa rahepe-hepe, surudadoꞌ moántiheꞌ Iesu lao i tangabaa támbi kadatuána Mágáuꞌ, hai mokióꞌheꞌ upu-upu rángáraꞌ bona hirámpuheꞌ ionoꞌ.

¹⁷ Iesu rapopekumbá to makámumu nodo to rapakeꞌ datu, rapobábehiá hambuaꞌ tatali hangko i dui, rapanodo tatali datu, haneꞌi ratataliá Iesu.

¹⁸ Roo onoꞌ, ratepuꞌu miꞌi rapopohalaꞌ-halaꞌ iti Iesu, rahángáꞌá, “KibiláꞌKoꞌ, daturaꞌ toIahudiꞌ!”

¹⁹ Rabóbáꞌ-bóbáꞌ wuáꞌNa hai laiꞌ, ratitinuduhi, hai molingkuduheꞌ i lindoꞌNa, mampe to rabiláꞌ.

²⁰ Karooraꞌ mampopohalaꞌ-halaꞌ, rawehángi miꞌi kumbá to makámumu to rapakeꞌá ininá, hai rabadui miꞌi huleꞌ hai waruꞌNa haduduáNa, haneꞌi Iesu raꞌánti miꞌi lao i rawa kótá bona rapakuꞌ i kau mombehape.

Iesu rapakuꞌ i kau mombehape

²¹ I tangaꞌ rárá, ara hadua tauna to hangko haweꞌ i kótá Ierusale. Tauna iti rahangaꞌ Simoꞌ toKirene. Ia miꞌi umáraꞌ Alesande hai Rupuꞌ. Simoꞌ iti rapasaꞌ surudadoꞌ toRoma mopáháꞌá kau popakuꞌána Iesu.

²² Tiꞌara marue, haweꞌmoheꞌ i katoroꞌá to rahangaꞌ Gologota, lempóna: Buluꞌ Bangaꞌwuáꞌ.

²³ Ionoꞌ, Iesu rapopainu anggoroꞌ to ragalo hai mire, agáiáná Ia tiꞌara mau moinu {láwiꞌ Naundeꞌ mani mantódihá kapári}.

²⁴ Roo onoꞌ, Iesu {ralosui haneꞌi} rapakuꞌ i kau mombehape, hai surudadoꞌ mobolobiaꞌ bona raisá heáná to ina molámbiꞌ waruꞌNa.

²⁵ KarapakuꞌNa i kau mombehape, tintiꞌ hahioꞌ mepulo.

²⁶ I hambóhóꞌ pata, rapoukiꞌi apa to rasalaꞌiá Iesu haneꞌi rahuku. Pata iti rapatakaꞌ i kau popakuꞌáNa i wongko wuáꞌNa. Ukiꞌna node: Daturaꞌ ToIahudiꞌ.

²⁷ Ara woꞌo rodua toperampaꞌ to rapakuꞌ i kau mombehape, hadua tándáꞌ i kuánána Iesu, hadua tándáꞌ i kabeoꞌNa. [

²⁸ Mewaliꞌ, apa to mewaliꞌ iti mobukeki apa to teukiꞌ hangkoia i lalu Sura Magasaꞌ to manguliꞌ node: “Datu Topehómpóꞌ ina terekeꞌ tauna to kadake.”]

²⁹ Tauna to melempó ionoꞌ, mobibiliheꞌ mopakóiꞌ Iesu, rauliꞌ, “Ee! Nuꞌuliꞌ ina mogeroKoꞌ Támbina Pueꞌ Ala hai ina Nuaró huleꞌ i lalu tálu peá alona!

³⁰ Ane noꞌonoꞌi, Nupelae wátáMu haduduáMu! MendáulumoKoꞌ hangko i kau mombehape iti!”

³¹ Noꞌonoꞌheꞌ woꞌo kapalaꞌ-kapalaꞌ tadulako menómbá hai guru-guru agama mopakóiꞌheꞌ oaꞌ Iesu. Molaluitaheꞌ hadua hai hadua, rauliꞌ, “Tauna ntániꞌna Natulungiheꞌ, agáiáná wátáNa haduduáNa tiꞌara Nabuku Natulungi!

³² Nauliꞌ kaꞌIana Datu Topehómpóꞌ, Daturaꞌ toSáráeliꞌ! Ane noꞌonoꞌi, rángina miꞌi mendáulu hangko i kau popakuꞌáNa iti, bona taita hai tapoinálái!” Mogalo tauna to rapakuꞌ woꞌo i kau mombehape, mohuwáráheꞌ laluita to mopakóiꞌ Iesu.

Iesu mate

³³ Tintiꞌ hampuloꞌ hai duá kalialo, hangkaꞌ-hangkaꞌ perái makáindi i humalele tampoꞌ iti tálu jaa kamaruena.

³⁴ Tintiꞌ tálu kalumbaꞌ, meraruaꞌ miꞌi Iesu Napasimbuku, Nauliꞌ i lalu básá Árá, “Eloi, Eloi, lama sabakhtani?” Lempóna: “Pueꞌ AlaNgkuꞌ, Pueꞌ AlaNgkuꞌ, moapa riꞌi haneꞌiAꞌ Nupálehi?”

³⁵ Araheꞌ bahangapa tauna to meángkáꞌ hungkuꞌ i popakuꞌáNa. Mohádiheꞌ peraruaꞌNa, rauliꞌ, “Nipehádingi! Ia mokióꞌ nabiꞌ Eliá.”

³⁶ Hadua hangko i oloꞌraꞌ melangka lao moala hangkumuꞌ lómóꞌ, naeme i lalu anggoroꞌ to maisu, nahipika i wuntu dáꞌángkau, haneꞌi napopadumeá humena Iesu bona Nainu. Nauliꞌ tauna iti, “Pegiá sieruꞌ, tapeita ba ina haweꞌ mpuꞌui Eliá mokábáhá hangko i kau mombehape!”

³⁷ Hangko ionoꞌ, monganga wopiꞌi Iesu Napasimbuku, haneꞌi upu miꞌi inaoNa.

³⁸ I tempó iti, rindi báná to tetóe i lalu Támbina Pueꞌ Ala mahepaꞌ ntangaꞌ hangko i reá haweꞌ i wóiꞌ.

³⁹ Tadulako surudadoꞌ to meángkáꞌ molindoꞌ kau mombehape iti, moita noumbá pewaliꞌna kamatena Iesu, mewaliꞌ nauliꞌ, “Toꞌu-toꞌu mpuꞌu tauna deꞌe Ánáꞌna Pueꞌ Ala!”

⁴⁰ Ara woꞌo ionoꞌ bahangapaheꞌ towawine to mampeita ngkaraoꞌ. Hangaꞌna hadua, Maria toMadalena. Ara woꞌo Maria ináraꞌ Iakobu to maleheꞌ hai Iose. Hai hadua woꞌo, Salome.

⁴¹ Towawine itimoheꞌ to meuláꞌ i Iesu hai motulungi i tempóNa ara i tampoꞌ Galilea. Hai handaꞌ mani woꞌo towawine to ntániꞌna to meuláꞌ i Iesu hangko i tampoꞌ Galilea haweꞌ i kótá Ierusale.

Iesu ratawu

⁴² I tempó iti, ina támpu miꞌi alo. Hai alo iti ia miꞌi Alo Popatimamaꞌá, láwiꞌ kahalona ia miꞌi alo penómbáꞌá.

⁴³ Ara hadua tauna to rahangaꞌ Iusupu to hangko i wánuá Arimatea. Ia hadua tadulako agama Iahudiꞌ to rabiláꞌ hai to marue miꞌi mampegiá tempóna Pueꞌ Ala ina mepárentá i laluraꞌ tauna. Ia lao mengkabáiꞌ i Pilatu membiáꞌ wátámandoꞌna Iesu bona natawu.

⁴⁴ Tingkáráꞌ Pilatu mohádi Iesu mate miꞌi, onoꞌ miꞌi haneꞌi ia mokióꞌ tadulako surudadoꞌ, napampekuneꞌi ba toꞌu mate miꞌi Iesu.

⁴⁵ Kanahádina Pilatu laluitana tadulako surudadoꞌ iti, napaliu miꞌi Iusupu moala wátámandoꞌna Iesu.

⁴⁶ Iusupu mohóló báná to bulá to meálu ntepuꞌu. Roo onoꞌ, ia lao mampopendáulu wátámandoꞌna Iesu hangko i kau mombehape, hai nabungkuhi báná iti, haneꞌi napopaturu miꞌi wátámandoꞌna Iesu i lalu balamba popatawuá to rabóbeꞌ i pingkena buluꞌ watu. Roo onoꞌ, ia monduli hambuaꞌ watu to mahile napopotuko babaꞌ popatawuá iti.

⁴⁷ Maria toMadalena hai Maria inána Iose mopailalu iumbá karawoliána wátámandoꞌna Iesu.