Marakusi 14 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tadulakoraꞌ toIahudiꞌ moliwo ina mopapate Iesu

¹ Rongalo rái ina haweꞌ miꞌi Alo Posusa Paska hai Posusa Rótiꞌ to Tiꞌara Raragiꞌi. Tempó iti, kapalaꞌ-kapalaꞌ tadulako menómbá hai guru-guru agama tangaꞌraꞌ mampeliꞌ rárá mohakaꞌ ngkábuni Iesu bona rahuku mate.

² Rauliꞌ, “Ineeꞌ sieruꞌ tahakaꞌ i minggu mahile deꞌe, bona tiꞌara ara pohiho i oloꞌraꞌ tauna to handaꞌ.”

Hadua towawine mobubuha mina-mina to mawongi i wuáꞌna Iesu

³ I tempóna Iesu i wánuá Betania, Ia ara i támbina hadua tauna to rahangaꞌ Simoꞌ, to hangkoia kana hakiꞌ tánggáꞌ. Tangaꞌraꞌ mandeꞌ, haweꞌ miꞌi hadua towawine moánti hambuaꞌ butoloꞌ to bukeꞌ mina-mina narawastu to mawongi hai masuliꞌ ntepuꞌu hólóna. Towawine iti mopiheꞌ tambólóna butoloꞌ, haneꞌi nabubuha mina-mina to mawongi iti i wuáꞌna Iesu, tandaꞌ pebiláꞌna.

⁴ Araheꞌ bahangapa tauna ionoꞌ to tiꞌara mampokana apa to nabábehi towawine iti. Molaluitaheꞌ hadua hai hadua, rauliꞌ, “Moapa riꞌi haneꞌi mina-mina to mawongi hai masuliꞌ iti natibe mbero peá?

⁵ Ane rápáꞌna mina-mina to mawongi iti rapobaluꞌ, hólóna hangaa-ngaa lábi hangko i tálu átuna dóiꞌ peráꞌ. Rángina miꞌi rapobaluꞌ bona dóiꞌ hólóna raweꞌiheꞌ tauna to meahiahiꞌ tueꞌraꞌ.” Onoꞌ miꞌi haneꞌi mokabukoꞌiheꞌ towawine iti.

⁶ Agáiáná nahángáꞌáheꞌ Iesu, “Nipatodáhi peá. Moapa riꞌi haneꞌi nipakasusa laluna towawine deꞌe? To nabábehi i Kódóꞌ deꞌe, maroꞌa,

⁷ láwiꞌ Kódóꞌ, tiꞌaraPoꞌ marue hingkakani hai kómu. Ane tauna to meahiahiꞌ, ara mani tempómi motulungiheꞌ láwiꞌ arantoheꞌ oaꞌ i oloꞌmi.

⁸ Towawine deꞌe mobábehi apa to nabuku nabábehi. NabubuhiAꞌ hai mina-mina to mawongi, lempóna ia mopatimama ami wátáNgkuꞌ i kaꞌina ratawuNgkuꞌ.

⁹ Bona niꞌisá: i humalele duniáꞌ, iumbá peá Ngkóráꞌ Marasa rabámbári, apa to nabábehi towawine deꞌe bateꞌna ina tekábelái hai rabuhinao oaꞌ.”

Iudasiꞌ mampobaluꞌ Iesu i ewáliNa

¹⁰ I tempó iti, hadua hangko i topeguruna Iesu to hampuloꞌ hai rodua, to rahangaꞌ Iudasiꞌ Isikarioꞌ, lao i kapalaꞌ-kapalaꞌ tadulako menómbá. Tunggáiána ina mampobaluꞌ Iesu.

¹¹ Góeꞌ ntepuꞌuheꞌ mohádi apa to nauliꞌ Iudasiꞌ iti, mewaliꞌ radándiá miꞌi ina raweꞌi dóiꞌ. Hangko ionoꞌ, Iudasiꞌ mampeliꞌ tempó to maroꞌa mohuhuꞌ Iesu i hira bona rahakaꞌ.

Iesu mandeꞌ pandeꞌ Posusa Paska hingkakani hai topeguruNaheꞌ

¹² I alo Popatimama Posusa Rótiꞌ to Tiꞌara Raragiꞌi, i tempóna dimbá Paska rasambale, topeguruna Iesu mekuneꞌ i Hia, “Pueꞌ, mouláꞌ peundeꞌáMu, iumbákeꞌ ina mandeꞌ pandeꞌ Paska bona kiꞌisá kipatimama?”

¹³ Mewaliꞌ Iesu mohuoꞌ rodua topeguruNa, Nahángáꞌáheꞌ, “Laomokou i lalu kótá Ierusale. Ionoꞌ ina nilámbiꞌ hadua tobaleilo to moánti gumbaꞌ to moꞌóntóꞌ uwai. Meuláꞌmokou i hia.

¹⁴ Ane mesuaꞌkou i lalu támbi, nihángáꞌá pueꞌ támbi iti, ‘Napekuneꞌ Guru: Ba iumbá peisáꞌAꞌ mandeꞌ pandeꞌ Posusa Paska hingkakani hai topeguruNgkuꞌheꞌ?’

¹⁵ Pueꞌ támbi iti ina motudeꞌákou hambuaꞌ lintuꞌ to mahile i wongko. Lintuꞌ iti timama miꞌi ami, hai upu-upu párewá to ina taparaluu, aramoheꞌ woꞌo. Mewaliꞌ ionoꞌ miꞌi nikádipuráꞌákeꞌ ina mandeꞌ pandeꞌ Paska.”

¹⁶ Lao mpuꞌumoheꞌ topeguruNa to rodua iti, mesuaꞌheꞌ i lalu kótá. Kahaweꞌraꞌ ionoꞌ, upu-upu mewaliꞌ hintotoꞌ hai apa to nahángáꞌáheꞌ Iesu, hai mopatimamaheꞌ pandeꞌ Posusa Paska.

¹⁷ Káindina, haweꞌ miꞌi Iesu hingkakani hai topeguruNa to hampuloꞌ hai rodua i lintuꞌ to rapatimama miꞌi.

¹⁸ Tangaꞌraꞌ mehoda, nauliꞌ Iesu, “Bona niꞌisá: hadua hangko i oloꞌmi to tapohingkakaniá mandeꞌ deꞌe-deꞌe, ina mohuhuꞌAꞌ i ewálingkuꞌ.”

¹⁹ Karahádina topeguruNa laluitaNa, masusa laluraꞌ, hai mekuneꞌmoheꞌ hadua-hadua i Iesu, rauliꞌ, “Tiꞌara woa paꞌi kódóꞌ to Nutunggái, Pueꞌ?”

²⁰ Nahániki Iesu, “To ina mohuhuꞌAꞌ i ewálingkuꞌ, ia miꞌi hadua hangko i oloꞌmi to hampuloꞌ hai rodua deꞌe to motubuká rótiꞌ hingkakani hai Kódóꞌ i hambuaꞌ taboꞌ.

²¹ Ánáꞌ Mánusiá bateꞌna ina mate nodo to tepakanótó miꞌi ami i lalu Sura Magasaꞌ. Agáiáná ina rumihi karahukuna tauna to mohuhuꞌAꞌ i ewálingkuꞌ. Rángina miꞌi tauna iti tiꞌara rapoánáka.”

Iesu mogáláꞌ-gáláꞌ rótiꞌ hai anggoroꞌ i topeguruNa

²² Tangaꞌraꞌ Iesu hai topeguruNa mandeꞌ pandeꞌ Posusa Paska, Iesu moala miꞌi rótiꞌ haneꞌi mekakae i Pueꞌ Ala. Roo onoꞌ, Nabiseꞌ-biseꞌ miꞌi rótiꞌ iti hai Nagáláꞌ-gáláꞌáheꞌ, haneꞌi Nauliꞌ, “Deꞌe miꞌi wátáNgkuꞌ. Niala miꞌi hai niandeꞌ.”

²³ Roo onoꞌ, Ia moala miꞌi painuá anggoroꞌ, mekakae i Pueꞌ Ala, haneꞌi Nahuhuꞌáheꞌ topeguruNa. Upu-upuheꞌ mainu hangko i mangku iti.

²⁴ I tempó iti, Iesu mohángáꞌáheꞌ, “Anggoroꞌ deꞌe mampopotandaꞌ waheꞌKuꞌ to ina mabubu i kamateNgkuꞌ. WaheꞌKuꞌ deꞌe mopakaróhó podándi to woꞌu to ina napaꞌara Pueꞌ Ala, bona moliu waheꞌKuꞌ, handaꞌ tauna peisá mohintuwuꞌ hai Pueꞌ Ala.

²⁵ Bona niꞌisá: mantepuꞌu deꞌe-deꞌe, tiꞌara piꞌi ina Kuinu anggoroꞌ, duuꞌKuꞌ ina mainu anggoroꞌ to woꞌu i lalu popárentána UmáNgkuꞌ.”

²⁶ Roo onoꞌ, monaniheꞌ nani petóiá. Karooraꞌ monani, pohuꞌmoheꞌ hangko i kótá lao i Buluꞌ Saitu.

Iesu mampolaluita pesápuákana Peturuꞌ

²⁷ Tangaꞌraꞌ molumao lao i Buluꞌ Saitu, Iesu molaluita miꞌi i topeguruNa, Nauliꞌ, “Kómu upu-upu ina mopálehiAꞌ, láwiꞌ teukiꞌ miꞌi i lalu Ngkóráꞌna Pueꞌ Ala node: ‘Ina Kupapate topoewu, álána dimbáNa mahawuꞌ.’ (Sakaria 13:7)

²⁸ Agáiáná i katueꞌKuꞌ huleꞌ, ina moioruAꞌ lao i tampoꞌ Galilea, hai ina Kupegiákou ionoꞌ.”

²⁹ Nauliꞌ Peturuꞌ, “Pueꞌ, kehapiꞌ upu-upu tauna mopálehiKoꞌ, agáiáná kódóꞌ tiꞌara!”

³⁰ Nauliꞌ Iesu, “Peturuꞌ, toꞌu ntepuꞌu to Kuhángáꞌáꞌákoꞌ: káindi deꞌe, hangko tiꞌara mani motuturuꞌuá manuꞌ karongkánina, tálu miꞌi kánina nusápuákaꞌAꞌ.”

³¹ Agáiáná hangkani mani napakaróhó Peturuꞌ laluitana nauliꞌ, “Kehapiꞌaꞌ mate hingkakani hai Io, tiꞌara mpuꞌu ina kusápuáka kakuisáMu!” Noꞌonoꞌ woꞌo laluitaraꞌ topeguruNa to ntániꞌna.

Iesu mekakae i Gesemani

³² Roo onoꞌ, Iesu hai topeguruNa haweꞌheꞌ i hinoe to rahangaꞌ Gesemani. Ionoꞌ Iesu mohángáꞌáheꞌ topeguruNa, “Mehodamokou ieneꞌ, ina laoAꞌ hampaiꞌ mekakae.”

³³ Agáiáná Peturuꞌ, Iakobu hai Iohane Naꞌántiheꞌ bona meuláꞌ i Hia. I tempó iti, maꞌángkárá ntepuꞌu pehádiNa, onoꞌ miꞌi haneꞌi moridiꞌ miꞌi.

³⁴ Nahángáꞌáheꞌ, “Masusa ntepuꞌu laluNgkuꞌ, nodoAꞌ to ina mate. Ieneꞌmokou sieruꞌ hai maingáꞌ-ingáꞌkou. Ineeꞌkou letaꞌ!”

³⁵ Roo onoꞌ, Iesu lao kakaraoꞌ hantóiꞌ, haneꞌi mopalumbá mekakae. I lalu pekakaeNa, membiáꞌ bona ane peisái, tiꞌara ina molámbiꞌ kapári iti,

³⁶ Nauliꞌ, “UmáNgkuꞌ! Tiꞌara ara to tiꞌara Nubuku Nubábehi. Ane peisái, Nupakaraoꞌ kapári to ina morampeAꞌ deꞌe, agáiáná tiꞌara peundeꞌáNgkuꞌ to mewaliꞌ, ngkáliꞌna riꞌi peundeꞌáMu Umaꞌ.”

³⁷ Roo onoꞌ, mesuleꞌ miꞌi Iesu lao i topeguruNa to tálu. Nahumbaheꞌ tangaꞌraꞌ letaꞌ. Nauliꞌ i Peturuꞌ, “Simoꞌ! Ba letaꞌ pekoꞌ paꞌi? Tiꞌara paꞌi nubuku mamporángáꞌAꞌ, kehapiꞌ hajaa peá?

³⁸ Kómu upu-upu, maingáꞌ-ingáꞌkou hai mekakaekou, bona nibuku moewaꞌ pekeloꞌ to ina morampekou. I lalumi niundeꞌ ntepuꞌu mobábehi to maroꞌa, agáiáná wátámi maledeꞌ haneꞌi tiꞌara nibuku.”

³⁹ Roo onoꞌ, Iesu lao wopiꞌi huleꞌ mekakae. PekakaeNa iti hibali hai pekakaeNa to rungu-runguna.

⁴⁰ KarooNa mekakae, Ia mesuleꞌ wopiꞌi lao i topeguruNa. Naita letaꞌ wopaheꞌ ánti kamalelueraꞌ. Naruaꞌheꞌ Iesu, agáiáná tiꞌara raisá apa to hangaa-ngaa rauliꞌ.

⁴¹ Mewaliꞌ lao wopiꞌi Iesu mekakae i katáluna kánina, hai roo onoꞌ, mesuleꞌ wopiꞌi i topeguruNa, Nahángáꞌáheꞌ, “Letaꞌ manikou paꞌi? Gáná miꞌi! Haweꞌ miꞌi tempóna Ánáꞌ Mánusiá ina rasápuáka hai rahuhuꞌ i taeraꞌ tauna to kadake.

⁴² Mearómokou! Laomokeꞌ! Peita! Tauna to ina mohuhuꞌAꞌ i ewálingkuꞌ haweꞌ miꞌi!”

Iesu rahakaꞌ hai topeguruNa melangkaheꞌ

⁴³ Tangaꞌna mani Iesu molaluita, haweꞌ miꞌi Iudasiꞌ, hadua hangko i topeguruNa to hampuloꞌ hai rodua, hingkakani hai handaꞌ tauna to moánti pihoꞌ hai pebóbáꞌ. Tauna iti rapohawaꞌáheꞌ kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna bona laoheꞌ mohakaꞌ Iesu.

⁴⁴ Nahángáꞌámoheꞌ ami Iudasiꞌ tandaꞌ bona raisá kaumbánaNa Iesu, nauliꞌ, “Heáná to kuángki, onoꞌ miꞌi tauna to nipeliꞌ. Nihakaꞌ haneꞌi niánti. Nikámpái ntepuꞌu.”

⁴⁵ Mewaliꞌ, i kahaweꞌraꞌ ionoꞌ, lao miꞌi Iudasiꞌ mampohidupaꞌá Iesu, nauliꞌ, “Guru!” haneꞌi naꞌángki.

⁴⁶ Mewaliꞌ rahakaꞌ mpuꞌu miꞌi iti Iesu.

⁴⁷ Hangko ionoꞌ, hadua tauna to meángkáꞌ hungkuꞌ i Iesu mobutuꞌ pihoꞌna motárási hawiꞌna Tadulako Menómbá Mahile. Kana peá talingana haneꞌi mawehángi.

⁴⁸ Nauliꞌ Iesu i tauna to mohakaꞌ, “Moapa riꞌi haneꞌi maiAꞌ nihakaꞌ moántikou pihoꞌ hai pebóbáꞌ? Ba niuliꞌ ripaꞌi tauna to kadakeAꞌ noeneꞌ?

⁴⁹ Alo-alona araꞌAꞌ hingkakani hai kómu i Támbina Pueꞌ Ala mepaturoꞌ. Moapa riꞌi haneꞌi tiꞌaraꞌAꞌ nihakaꞌ i tempó iti? Agáiáná upu-upu deꞌe hangaa-ngaa mewaliꞌ, bona tebukeki apa to teukiꞌ i lalu Sura Magasaꞌ.”

⁵⁰ Roo onoꞌ, upu-upu topeguruNa melangkaheꞌ mopálehi Iesu.

⁵¹ I tempó iti, ara woꞌo hadua ánáꞌntomoane to meuláꞌ i Iesu. Ánáꞌntomoane iti tiꞌara mewaruꞌ, mokómóki peá wátána hai báná. Karahakaꞌna,

⁵² ia molosu kómóꞌna iti haneꞌi melangka menggelá.

Iesu i lindoꞌna Topepáresáꞌ Mahile Agama Iahudiꞌ

⁵³ Hangko ionoꞌ, Iesu raꞌánti miꞌi lao i támbina Tadulako Menómbá Mahile. Ionoꞌ, upu-upu kapalaꞌ-kapalaꞌ tadulako menómbá, guru-guru agama hai totosaeraꞌ toIahudiꞌ to ntániꞌna hirámpumoheꞌ.

⁵⁴ Peturuꞌ meuláꞌ ngkaraoꞌ duuꞌna haweꞌ i tangabaa támbina Tadulako Menómbá Mahile. Ionoꞌ, ia mehoda menene hingkakani hai topekámpái.

⁵⁵ I tempó iti, kapalaꞌ-kapalaꞌ tadulako menómbá hai upu-upu Topepáresáꞌ Mahile mampeliꞌmoheꞌ sabiꞌ to ina mopakanótó kamasalaꞌna Iesu, bona peisá rahuku mate, agáiáná tiꞌara ralámbiꞌ salaꞌNa.

⁵⁶ Handaꞌ ntepuꞌu sabiꞌ to mosalaꞌi, agáiáná tongawaꞌ miꞌi dongkoꞌraꞌ peá láwiꞌ montaniꞌ-ntaniꞌ laluitaraꞌ.

⁵⁷ Araheꞌ bahangapa tauna to meángkáꞌ mewaliꞌ sabiꞌ dongkoꞌ, rauliꞌ,

⁵⁸ “Tauna deꞌe, kihádi manguliꞌ node: ‘Ina Kugero Támbina Pueꞌ Ala to rabábehi tauna, hai i lalu tálu alona ina Kuaró huleꞌ to ntániꞌna, to tiꞌara rabábehi tae tauna.’ ”

⁵⁹ Agáiáná i karaposabikiraꞌ iti, tiꞌara woꞌo hibali polaluitaraꞌ.

⁶⁰ Meángkáꞌ miꞌi Tadulako Menómbá Mahile i lindoꞌraꞌ upu-upu tadulako, mekuneꞌ i Iesu, “Tiꞌaraheꞌ paꞌi Nuhániki to mosalaꞌiKoꞌ iti?”

⁶¹ Agáiáná Iesu tiꞌara mehániꞌ, mogalo hampákáꞌ laluita. Hangkani mani Tadulako Menómbá Mahile mekuneꞌ i Hia, “Ba Io mpuꞌui Datu Topehómpóꞌ, Ánáꞌna Pueꞌ Ala to hintotoꞌ ratóiá?”

⁶² Nahániki Iesu, “Toꞌu. Kódóꞌ miꞌi deꞌe. Ina niꞌita Ánáꞌ Mánusiá mehoda tándáꞌ i kuánána Pueꞌ Ala to Makuasaꞌ, hai ina niꞌita woꞌo mendáulu mai hangko i surugáꞌ napótóꞌ gawu.”

⁶³ Kanahádina Tadulako Menómbá Mahile apa to nauliꞌ Iesu, ia mohepaꞌ miꞌi baduna ánti kamabukoꞌna haneꞌi nauliꞌ, “Tiꞌara piꞌi mobunduꞌ ara sabiꞌ!

⁶⁴ Nihádi miꞌi polaluitaNa to mopahibali wátáNa hai Pueꞌ Ala. Mewaliꞌ noumbá miꞌi pobutusimi?” Upu-upuraꞌ manguliꞌ, “Masalaꞌ ntepuꞌu! Hangaa-ngaa rahuku mate!”

⁶⁵ Hangko ionoꞌ, araheꞌ to motinuduhi, araheꞌ woꞌo to mampopowadi-wadi: rapiriꞌ mátáNa haneꞌi ratampedaꞌ, rahángáꞌá, “Ee, nabiꞌ! Ane toꞌu-toꞌu Io toMásehi, Nuꞌuliꞌ ba heánái to motampedaꞌKoꞌ!” Mogalo riꞌi topekámpái motampedaꞌ woꞌo Iesu.

Peturuꞌ mosápuáka peuláꞌna i Iesu

⁶⁶ I tempóna mani Peturuꞌ i tangabaa, haweꞌ miꞌi hadua towawine to mobágóꞌ i támbina Tadulako Menómbá Mahile.

⁶⁷ Kamoitána Peturuꞌ menene, lao napelenggeꞌ haneꞌi nahángáꞌá, “Io woꞌo hadua rángána Iesu toNasare doꞌo.”

⁶⁸ Agáiáná nasápuáka Peturuꞌ, nauliꞌ, “Tiꞌara kuisá apa to nuꞌuliꞌ!” Hangko ionoꞌ melimbá miꞌi lao hungkuꞌ i babaꞌá. [Motuturuꞌuá manuꞌ.]

⁶⁹ Towawine iti moita wopiꞌi Peturuꞌ, hai mohángáꞌáheꞌ tauna to ara ionoꞌ, “Ia deꞌe to hingkakani hai Iesu.”

⁷⁰ Agáiáná Peturuꞌ mesápuáka wopiꞌi. Tiꞌara marue hangko ionoꞌ, tauna to meángkáꞌ ionoꞌ mohángáꞌá woꞌo, “Io mpuꞌu rángáNa, láwiꞌ io woꞌo toGalileakoꞌ!”

⁷¹ Mokambo miꞌi Peturuꞌ, nauliꞌ, “Mate-mateaꞌ. Tiꞌara mpuꞌu kuisá tauna to niuliꞌ iti!”

⁷² I tempó iti, motuturuꞌuá miꞌi manuꞌ karongkánina. Nabuhinao miꞌi Peturuꞌ laluitana Iesu to manguliꞌ, “Hangko tiꞌara mani motuturuꞌuá manuꞌ karongkánina, tálu miꞌi kánimu mosápuákaꞌAꞌ.” Onoꞌ miꞌi haneꞌi Peturuꞌ menggoli teriaꞌ.