Marakusi 13 - Sura Magasaꞌ: Bahangapa sura Pototowiá to Sae hai Pototowiá to Woꞌu

To ina mewaliꞌ i kahópóꞌána duniáꞌ Iesu mampolaluita kaꞌina magerona Támbina Pueꞌ Ala

¹ Karoona Iesu mopaturoꞌ tauna, pohuꞌ miꞌi hai topeguruNa hangko i Támbina Pueꞌ Ala. Ara hadua hangko i topeguruNa to mohángáꞌá, “Guru. Peita támbi deꞌe! Peita watuna to mahile ntepuꞌu! Maróhó hai mababe ntepuꞌu!”

² Nauliꞌ Iesu, “Ba nipeita kamahilena hai kamababena Támbina Pueꞌ Ala deꞌe? Agáiáná Kuhángáꞌákou: ina haweꞌ tempóna, tiꞌara piꞌi ina ara hambuaꞌ watu to mentárá i katoroꞌána, bateꞌna ina ragero upu-upu.”

Iesu mampolaluita kamapáriraꞌ tauna to meuláꞌ i Hia

³ Roo onoꞌ, Iesu hai topeguruNa laoheꞌ i Buluꞌ Saitu. Tangaꞌna Iesu mehoda melindoꞌ tándáꞌ i Támbina Pueꞌ Ala, Peturuꞌ, Iakobu, Iohane hai Andaria laoheꞌ molaluita i Hia. Tempó iti, tiꞌara ara tauna to ntániꞌna.

⁴ Rauliꞌ, “Kipembiáꞌ bona Nuhángáꞌáꞌangkaiꞌ ba impirá pewaliꞌána upu-upu to Nuꞌuliꞌ ininá, hai tandaꞌ apa to ina mewaliꞌ ane haweꞌ miꞌi tempó pewaliꞌána.”

⁵ Nauliꞌ Iesu, “Maingáꞌ-ingáꞌkou, bona tiꞌarakou rapakanawoꞌ,

⁶ láwiꞌ handaꞌ tauna ina haweꞌ hai ina manguliꞌ kahirana Datu Topehómpóꞌ, álána handaꞌ tauna to ina rapakanawoꞌ.

⁷ Ane mohádikou to tangaꞌraꞌ mombeala hai bámbári pombeala, ineeꞌkou malááꞌ, hai ineeꞌ nipotingkáráꞌ, láwiꞌ upu-upu iti hangaa-ngaa mewaliꞌ sieruꞌ, agáiáná tiꞌara mani haweꞌ kahópóꞌá duniáꞌ.

⁸ Tampoꞌ ina mombeala hai tampoꞌ ntániꞌna, kadatuá ina moewaꞌ kadatuá ntániꞌna, hai iumbá-umbá peá ina ara linu hai rimi. Upu-upuna iti hangko pantepuꞌuána, agáiáná kapári iti ina tetámbái mani karumihina nodo kapári to nahádi towawine to tangaꞌna humádi.

⁹ Agáiáná kómu deꞌe, maingáꞌ-ingáꞌkou, láwiꞌ kómu ina rahakaꞌkou hai raꞌánti i lindoꞌraꞌ tadulako agama. Ina rahepekou i lalu támbi penómbáꞌá. Ánti peuláꞌmi i Kódóꞌ, ina rahuhuꞌkou i lindoꞌraꞌ topopárentá hai datu-datu. I tempó iti, ina raweꞌikou lógá mopahaweꞌáheꞌ kana i pepoináláimi i Kódóꞌ.

¹⁰ Hai Ngkóráꞌ Marasa hangaa-ngaa rapahaweꞌ sieruꞌ i humalele duniáꞌ, hangko mewaliꞌ riꞌi upu-upu tunggáiána Pueꞌ Ala.

¹¹ Ane rahakaꞌkou hai raꞌánti i lindoꞌraꞌ tadulako, ineeꞌkou malááꞌ ba noumbá pehániꞌmi. Ane haweꞌ tempómi molaluita, Pueꞌ Ala ina mopakanótóákou apa to hangaa-ngaa niuliꞌ, láwiꞌ apa to niuliꞌ i tempó iti, tiꞌara hangko i pekirimi haduduámi agáiáná ina mentóáꞌ hangko i Inao to Magasaꞌ.

¹² Ina haweꞌ tempóna, handaꞌ tauna ina mampehuhuꞌá halaluraꞌ ba ánáꞌraꞌ bona rapapate ánti peuláꞌraꞌ i Kódóꞌ. Ara woꞌo ánángkóiꞌ to ina moewaꞌ tosaeraꞌ hai mampehuhuꞌá bona rahuku mate.

¹³ Noꞌonoꞌ woꞌo kómu. Ánti peuláꞌmi i Kódóꞌ, ina rakáhihiꞌkou handaꞌ tauna. Agáiáná tauna to mepoinálái oaꞌ i Kódóꞌ haweꞌ i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá.”

Iesu mampolaluita tempó kapári to rumihi

¹⁴ Iesu mopaliliu laluitaNa i topeguruNaheꞌ, Nauliꞌ, “Hangkoia nabiꞌ Danieli mampolaluita kaꞌina árána ‘To Kadake to Megero.’ Heáná to mobásá laluita deꞌe, hangaa-ngaa napekiri maroꞌa apa lempóna! Mewaliꞌ, ane niꞌita apa to natunggái Danieli iti meángkáꞌ i katoroꞌá to tiꞌara rapeweꞌi rakatoroꞌi, ránginamoheꞌ tauna to toroꞌ i tampoꞌ Iudá melangka lao i buluꞌ.

¹⁵ Tauna to mehoda-hoda i atuꞌ to hirante ineeꞌmoheꞌ lebaꞌ mesuaꞌ i lalu támbiraꞌ moala ba apa-apa.

¹⁶ Tauna to i hinoe, ineeꞌmoheꞌ lebaꞌ mesuleꞌ lao moala kumbáraꞌ. Hangaa-ngaa liliuheꞌ melangka!

¹⁷ Ina masusa ntepuꞌu tueꞌraꞌ towawine to morodua hai to mopahuhu ánáꞌraꞌ i tempó iti.

¹⁸ Mekakaekou i Pueꞌ Ala bona alo pelangkaꞌámi iti tiꞌara kana tempó udá.

¹⁹ Láwiꞌ i tempó iti, ina mewaliꞌ kapári to rumihi ntepuꞌu, to tiꞌara mani hangkani mewaliꞌ hangko i rungu-runguna i tempóna Pueꞌ Ala mampopewaliꞌ duniáꞌ duuꞌna deꞌe-deꞌe, hai tiꞌara piꞌi woꞌo ina mewaliꞌ huleꞌ i alo bókóꞌna.

²⁰ Agáiáná tempó kapári iti ina napakawiáꞌ Pueꞌ Ala, láwiꞌ ane tiꞌara Napakawiáꞌ, tiꞌara ina ara hadua to tueꞌ. Mewaliꞌ, ánti kamaꞌahiꞌna Pueꞌ Ala i tauna to Napileꞌi, onoꞌ miꞌi haneꞌi ina Napakawiáꞌ tempó kapári iti.

²¹ I tempó iti, ane ara to mohángáꞌákou, ‘Peita! Demiꞌe Datu Topehómpóꞌ!’ ba ‘Domi maiꞌo!’ ineeꞌheꞌ nipoinálái,

²² láwiꞌ ina haweꞌ handaꞌ tauna to mepakanawoꞌ to manguliꞌ kahirana Datu Topehómpóꞌ, ba to manguliꞌ kahirana nabiꞌ. Ina mobábehiheꞌ tandaꞌ kuasaꞌ hai tandaꞌ to mehelei bona mopakanawoꞌheꞌ tauna to handaꞌ. Mogalo riꞌi taunána Pueꞌ Ala to Napileꞌi miꞌi, ina rapehukáꞌ rapakanawoꞌ.

²³ Agáiáná kómu, maingáꞌ-ingáꞌkou! Kuhángáꞌámokou ami upu-upuna iti hangko tiꞌara mani mewaliꞌ.”

Iesu mampolaluita kana kaꞌina haweꞌNa huleꞌ

²⁴ “Mewaliꞌ i tempó iti, ane liu miꞌi tempó kapári, alo ina mambáliꞌ mewaliꞌ makáindi, wulá tiꞌara piꞌi ina mewangkaꞌ, betue ina manawoꞌ hangko i langiꞌ,

²⁵ hai Pueꞌ Ala ina mampopoenggo upu-upu to ara i langiꞌ.

²⁶ I tempó iti, upu-upu tauna ina moita Ánáꞌ Mánusiá mendáulu mai napótóꞌ gawu. Ina tongawaꞌ ntepuꞌu kuasaꞌNa hai peawaꞌna tueꞌNa.

²⁷ Ia ina mohuoꞌ malaꞌekaNa lao morámpu tauna to Napileꞌi hangko i humalele duniáꞌ, mantepuꞌu hangko i pembetoá alo duuꞌna haweꞌ i katámpuána alo.”

Ngkóráꞌ pándiriꞌ kana i kau ara

²⁸ “Nipailalu apa to Kupaturoꞌákou moliu pándiriꞌ hangko i kau ara. Ane niꞌita dáꞌána motumbeꞌ hai mantepuꞌu motaweꞌ, niꞌisá miꞌi kaꞌina haweꞌna tempó alo.

²⁹ Noꞌonoꞌ woꞌo, ane niꞌita pewaliꞌna upu-upu to Kupahaweꞌákou ininá, niꞌisá katiꞌárána piꞌi marue ina haweꞌ miꞌi kahópóꞌána duniáꞌ.

³⁰ Toꞌu ntepuꞌu to Kuhángáꞌákou: upu-upu to Kuꞌuliꞌ ininá bateꞌna ina mewaliꞌ hangko tiꞌara mani mate upu-upu tauna to tueꞌ tempó deꞌe.

³¹ Langiꞌ hai duniáꞌ hai upu-upu óntóꞌna ina magero, hai tiꞌara piꞌi ina ara, agáiáná laluitaNgkuꞌ bateꞌna ina ara oaꞌ haweꞌ i rue-ruena.”

Paturoꞌ bona maingáꞌ-ingáꞌ

³² Iesu mopaliliu laluitaNa i topeguruNa, Nauliꞌ, “Agáiáná ane alo hai jaa pewaliꞌna upu-upuna iti, bateꞌna peá UmáNgkuꞌ to moisá. Tiꞌara ara haweꞌ hadua tauna to moisá. Mogalo malaꞌeka to i surugáꞌ, tiꞌara woꞌo raisá. Hai Ánáꞌna Pueꞌ Ala, tiꞌara woꞌo Naisá.

³³ Mewaliꞌ hangaa-ngaa maingáꞌ-ingáꞌkou hai timamakou oaꞌ, láwiꞌ tiꞌara niꞌisá tempó pewaliꞌána.

³⁴ Pewaliꞌna nodo ngkóráꞌ pándiriꞌ deꞌe: Hadua pueꞌ támbi moliwo ina pohuꞌ lao i kótá to karaoꞌ. Hangko tiꞌara mani pohuꞌ, ia mampolaluitaꞌáheꞌ hawiꞌna, haneꞌi hadua-hadua naweꞌiheꞌ bágóꞌ. I topokámpái babaꞌ, nahángáꞌá, ‘Maingáꞌ-ingáꞌkoꞌ!’

^35-36 Mewaliꞌ, kómu woꞌo hangaa-ngaa timamakou, bona ane hangkaꞌ-hangkaꞌ perái haweꞌ pueꞌ támbi, tiꞌarakou ina nahumba tangaꞌmi letaꞌ. Láwiꞌ tiꞌara niꞌisá ba impirá kaꞌina haweꞌna pueꞌ támbi, ba mepulo, mabaa, kalumbaꞌ, ba i tangaꞌ káindi. Noꞌonoꞌ woꞌo kómu, hangaa-ngaa timamakou oaꞌ.

³⁷ Apa to Kuhángáꞌákou deꞌe, Kuꞌuliꞌ woꞌo i upu-upu tauna: Nipatimama lalumi!”