Marakusi 12 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌ pándiriꞌ kana i topobágóꞌ i hinoe anggoroꞌ

¹ Karoona Iesu mampolaluitaꞌáheꞌ tadulakoraꞌ toIahudiꞌ, Ia mopahaweꞌáheꞌ hampákáꞌ ngkóráꞌ pándiriꞌ, Nauliꞌ, “Ara hadua tauna to mantudaꞌ anggoroꞌ i hinoena. Hinoena iti nabosoꞌ mantoleli, mokae tampoꞌ popieꞌána anggoroꞌ, hai moaró woꞌo pangka pokámpáiá. Roo onoꞌ, mosaromoheꞌ bahangapa tauna bona mokámpái hinoena, haneꞌi pohuꞌ lao i tampoꞌ to karaoꞌ.

² Tempóna miꞌi mopupu wuaꞌ anggoroꞌ, ia mohuoꞌ miꞌi hadua hawiꞌna lao membiáꞌ gáláꞌna hangko i topokámpái hinoena.

³ Agáiáná kahaweꞌna hawiꞌna iti i hinoe, menggoli riꞌi rahakaꞌ topokámpái hai rapahái haneꞌi rahuoꞌ mesuleꞌ ntooꞌ.

⁴ Hangko onoꞌ, pueꞌ hinoe iti mohuoꞌ wopiꞌi hadua hawiꞌna. Haweꞌ ionoꞌ, ia woꞌo bateꞌna peá rapapahái duuꞌna bela wuáꞌna hai rawitaꞌ-witaꞌ.

⁵ Hangko ionoꞌ, nahuoꞌ wopiꞌi hadua hawiꞌna. Haweꞌ ionoꞌ, ia rapapate riꞌi. Noꞌonoꞌ aha karabábehina i upu-upu hawiꞌna pueꞌ hinoe iti. Araheꞌ to rabóbáꞌ-bóbáꞌ, araheꞌ woꞌo to rapapate.

⁶ Tiꞌara piꞌi ara to ntániꞌna to peisá nahuoꞌ pueꞌ hinoe iti, bateꞌna rái ánáꞌna to haduduána to napokaꞌahiꞌ. Kaupuána, ánáꞌna iti to nahuoꞌ miꞌi lao i topokámpái hinoena. Nauliꞌ pueꞌ hinoe i laluna, ‘Bateꞌna ina mengkoruꞌheꞌ láwiꞌ ánáꞌkuꞌ miꞌi haduduángkuꞌ.’

⁷ Agáiáná, i tempóraꞌ topokámpái hinoe moita ánáꞌna iti, mogómbómoheꞌ, rauliꞌ, ‘Peita! Domi maiꞌo ánáꞌna, ia to ina mewaliꞌ pueꞌ sosora hinoe deꞌe. Maroꞌa ane tapapate, hai taꞌala hinoena hai upu-upu óntóꞌna.’

⁸ Mewaliꞌ, rahakaꞌ mpuꞌu miꞌi ánáꞌna iti, rapapate haneꞌi ratibe i rawa hinoe.”

⁹ Roo onoꞌ, nakuneꞌmoheꞌ Iesu tadulakoraꞌ toIahudiꞌ iti, Nauliꞌ, “Mewaliꞌ, apa to ina nabábehi pueꞌ hinoe iti? Bateꞌna ina mai mopapateheꞌ topokámpái hinoena iti, hai ina nasaro wopaheꞌ tauna ntániꞌna bona mokámpái hinoena iti.

¹⁰ Tiꞌara mani paꞌi nibásá i lalu Sura Magasaꞌ to manguliꞌ node: ‘Watu to ratibe topoaró támbi, watu iti to mewaliꞌ pehodaꞌá támbi.

¹¹ Iti mewaliꞌ hintotoꞌ hai peundeꞌána Pueꞌ Ala, hai maroꞌa ntepuꞌu apa to nabábehi Pueꞌ Ala iti!’ ” (Sura Petóiá 118:22-23)

¹² Karahádina tadulakoraꞌ toIahudiꞌ laluitana Iesu, rapoinao wopiꞌi ina rahakaꞌ láwiꞌ raisá kahirana to Natunggái hai ngkóráꞌ pándiriꞌ iti. Agáiáná tiꞌaraheꞌ pebáiꞌ mohakaꞌ, láwiꞌ mampokalááꞌheꞌ tauna to handaꞌ, onoꞌ miꞌi haneꞌi pohuꞌ peheꞌ.

Tadulako agama Iahudiꞌ mekuneꞌ i Iesu kana i pobaiari ásele

¹³ Hangko ionoꞌ, tadulakoraꞌ toIahudiꞌ mampoinaoheꞌ mopakanawoꞌ Iesu moliu pekuneꞌraꞌ, onoꞌ miꞌi haneꞌi mohuoꞌheꞌ bahangapa toParisi hai taunána Datu Herode lao i Hia.

¹⁴ Kahaweꞌraꞌ i Iesu, rahángáꞌá, “Guru. Kiꞌisá kaꞌIona tauna to manótó. MepaturoꞌKoꞌ i katoꞌu-toꞌuána mouláꞌ peundeꞌána Pueꞌ Ala. Tiꞌara Nupeuláꞌi ba heáná peá, láwiꞌ tiꞌaraKoꞌ mampopontaniꞌ tauna. Onoꞌ miꞌi haneꞌi kipampekuneꞌiKoꞌ: mouláꞌ áturá ágámántaꞌ, ba hintotoꞌkeꞌ mobaiari ásele i Datu Mahile, ba tiꞌara?”

¹⁵ Naisá Iesu tunggáiána laluraꞌ kaꞌina mopakanawoꞌNa, onoꞌ miꞌi haneꞌi Nahángáꞌáheꞌ, “Moapa riꞌi haneꞌi nipeliꞌ kamasalaꞌna laluitaNgkuꞌ? Ánti mai dóiꞌ to biásá nipopobaiari ásele bona Kupeita.”

¹⁶ Rahuhuꞌá mpuꞌu miꞌi hampepaꞌ dóiꞌ peráꞌ, haneꞌi napekuneꞌ Iesu, “Lenggeꞌna hai hangaꞌna heáná to ara i dóiꞌ deꞌe?” Rahániki, “Lenggeꞌna hai hangaꞌna Datu Mahile.”

¹⁷ Nauliꞌ Iesu, “Ane noꞌonoꞌi, niweꞌi miꞌi datu apa to hintotoꞌ raweꞌi, hai niweꞌi woꞌo Pueꞌ Ala apa to hintotoꞌ raweꞌi.” Tingkáráꞌ ntepuꞌuheꞌ mohádi pehániꞌNa iti.

ToSaduki mekuneꞌ i Iesu kana i katueꞌna huleꞌ tomate

¹⁸ Roo onoꞌ, araheꞌ bahangapa toSaduki haweꞌ i Iesu. ToSaduki iti iamoheꞌ tadulako agama Iahudiꞌ to tiꞌara mampoinálái tauna to mate peisá rapatueꞌ huleꞌ.

¹⁹ Kahaweꞌraꞌ toSaduki iti, mampeliꞌheꞌ kamanawoꞌána Iesu, rauliꞌ, “Guru. Nabiꞌ Musa moukiꞌ i lalu sura áturá ágámántaꞌ node: ane arai tobaleilo to mate, agáiáná tiꞌara ara ánáꞌna, halaluna hangaa-ngaa mampohambokoá bembaꞌna, bona ara ánáꞌna, bona ara pemuleꞌána toámána to mate miꞌi.

²⁰ Mewaliꞌ, araheꞌ pitu topohalalu, paka tobaleiloheꞌ. To towutuꞌ mampotoina hadua towawine, agáiáná tiꞌara mani woia ara ánáꞌraꞌ, mate miꞌi towutuꞌ iti.

²¹ Mewaliꞌ, ádina mampohambokoá bembaꞌna. Tiꞌara mani woꞌo ara ánáꞌraꞌ, mate miꞌi. Noꞌonoꞌ woꞌo to mewaliꞌ i katáluna,

²² duuꞌna haweꞌ i kapituna. Matemoheꞌ upu-upu hai tiꞌara ara ánáꞌraꞌ. Kahópóꞌána, mate miꞌi woꞌo towawine iti.

²³ Mewaliꞌ i alo pobutusi, ane toꞌu-toꞌu tueꞌ huleꞌ upu-upu tomate, heáná miꞌi toámána towawine iti, láwiꞌ pitumoheꞌ to mampohambokoá?”

²⁴ Nahániki Iesu, “Salaꞌ ntepuꞌu pekirimi iti, láwiꞌ tiꞌara niꞌisá apa to teukiꞌ i lalu Sura Magasaꞌ, hai tiꞌara woꞌo niꞌisá kuasaꞌna Pueꞌ Ala.

²⁵ Láwiꞌ ane tueꞌheꞌ huleꞌ tauna to mate, katueꞌraꞌ nodo katueꞌraꞌ malaꞌeka i surugáꞌ, tiꞌaraheꞌ mohamboko.

²⁶ Tiꞌara paꞌi nibásá i lalu Sura Magasaꞌ laluita to mopakanótó katueꞌraꞌ huleꞌ tomate? I lalu surana Musa, tabásá noumbá Pueꞌ Ala mongkóráꞌ i nabiꞌ Musa hangko i lalu dui to roreꞌ. I tempó iti, Burahima, Isakiꞌ hai Iako maruemoheꞌ mate. Agáiáná kehapiꞌ noꞌonoꞌ, Pueꞌ Ala mohángáꞌá Musa, Nauliꞌ node: ‘Kódóꞌ miꞌi Pueꞌ Ala to rapenómbái oaꞌ Burahima, Isakiꞌ, hai Iako.’

²⁷ Mewaliꞌ, hangko i laluitana Pueꞌ Ala iti, taisá ntepuꞌu Burahima, Isakiꞌ hai Iako bateꞌna tueꞌ maniheꞌ, láwiꞌ tiꞌara riꞌi tauna to mate to menómbá i Pueꞌ Ala, agáiáná bateꞌna peá tauna to tueꞌ. Salaꞌ ntepuꞌu pekirimi {ane niuliꞌ tauna tiꞌara peisá rapatueꞌ huleꞌ}.”

Hadua guru agama mekuneꞌ kana i párentá apa to hangaa-ngaa rapaioru

²⁸ I tempó iti, ara hadua guru agama to mohádi pombekuneꞌ-kuneꞌraꞌ toSaduki hai Iesu, hai naisá kamaroꞌana pehániꞌna Iesu. Onoꞌ miꞌi haneꞌi ia woꞌo mekuneꞌ i Iesu, nauliꞌ, “Hangko i upu-upu párentá, párentá apa to hangaa-ngaa tapaioru ntepuꞌu?”

²⁹ Nauliꞌ Iesu, “Deꞌe miꞌi párentá to hangaa-ngaa tapaioru: ‘Nipehádingi toSáráeliꞌ! Pueꞌ Ala Pueꞌtaꞌ, hadua peá.

³⁰ Nipokaꞌahiꞌ Pueꞌ Ala Pueꞌmi, i sukáꞌna kabulána lalumi, i sukáꞌna pekirimi, i sukáꞌna kapándemi, hai i sukáꞌna róhómi.’ (Pohuleki 6:4-5) Iti miꞌi párentá to hangaa-ngaa tapaioru ntepuꞌu.

³¹ Hai párentá to karompákáꞌna to mobunduꞌ ntepuꞌu woꞌo, node: ‘Nipokaꞌahiꞌ hángká rángámi nodokou pampokaꞌahiꞌmi wátámi haduduámi.’ Tiꞌara ara párentá ntániꞌna to melumbuꞌ pobunduꞌána hangko i to rompákáꞌ iti.”

³² Nauliꞌ guru agama iti i Iesu, “Toꞌu ntepuꞌu Guru! Kana ntepuꞌu pehániꞌMu iti. Pueꞌ Ala bateꞌna hadua peá, tiꞌara ara to ntániꞌna.

³³ Hai hangaa-ngaa tapokaꞌahiꞌ Pueꞌ Ala i sukáꞌna kabulána laluntaꞌ, i sukáꞌna kapándentaꞌ, hai i sukáꞌna róhóntaꞌ. Hai hangaa-ngaa tapokaꞌahiꞌ hángká rángántaꞌ nodokeꞌ woꞌo mampokaꞌahiꞌ wátántaꞌ haduduántaꞌ. Ane tapaioru párentá to rompákáꞌ iti, melumbuꞌ ntepuꞌu kamaroꞌana hangko i upu-upu to tapopenómbá i Pueꞌ Ala, maroꞌa binataꞌ to raintu, maroꞌa popenómbá to ntániꞌna.”

³⁴ Kanahádina Iesu kamaroꞌana pehániꞌna tauna iti, Nauliꞌ, “Hungkuꞌmokoꞌ mewaliꞌ taunána Pueꞌ Ala!” Mantepuꞌu hangko ionoꞌ, tiꞌara piꞌi ara hadua to pebáiꞌ mampekuneꞌ ba apa-apa i Iesu bona mampeliꞌ kamanawoꞌáNa.

Iesu mekuneꞌ i toParisi heáná iti Datu Topehómpóꞌ

³⁵ I tempóna Iesu mepaturoꞌ i tangabaa Támbina Pueꞌ Ala, Nakuneꞌheꞌ toParisi to ara ionoꞌ, “Moapa riꞌi haneꞌi guru-guru agama manguliꞌ Datu Topehómpóꞌ Ia miꞌi pemuleꞌána Datu Daudiꞌ?

³⁶ Mole riꞌi Daudiꞌ haduduána mopakanótó Datu Topehómpóꞌ Ia miꞌi Pueꞌ to napenómbái. Ánti peteteꞌna Inao to Magasaꞌ, Daudiꞌ mampolaluita kana i Datu Topehómpóꞌ node: Pueꞌ Ala molaluita i Pueꞌkuꞌ to kupenómbái, Nauliꞌ: ‘MehodamoKoꞌ tándáꞌ i kuánáNgkuꞌ duuꞌna Kupopengkoruꞌheꞌ upu-upu ewáliMu i Hio.’ (Sura Petóiá 110:1)

³⁷ Mewaliꞌ, ane Datu Daudiꞌ manguliꞌ Datu Topehómpóꞌ Ia miꞌi Pueꞌ to napenómbái, noumbá haneꞌi Ia mewaliꞌ woꞌo pemuleꞌána Daudiꞌ?” Handaꞌ ntepuꞌu tauna to hirámpu i Támbina Pueꞌ Ala tempó iti góeꞌheꞌ mohádi paturoꞌNa.

Iesu mosalaꞌi tadulako agama Iahudiꞌ

³⁸ Tangaꞌna Iesu mopaturoꞌ tauna to handaꞌ, Nahángáꞌáheꞌ, “Maingáꞌ-ingáꞌkou, ineeꞌkou mampeuláꞌi bábehiáraꞌ guru-guru agama. Raundeꞌ molumao mopakeꞌ kumbá to malóe, {tandaꞌ kahirana tauna to mahile tueꞌraꞌ,} hai góeꞌheꞌ ane rabiláꞌ tauna to handaꞌ i pobaluꞌ-baluꞌá.

³⁹ Raundeꞌ rapopehoda i lindoꞌ i pehodaꞌá to raꞌádái i támbi penómbáꞌá hai i pehodaꞌá to maroꞌa i posusaꞌá,

⁴⁰ mole riꞌi pakaheꞌ mobagiuꞌ towawine to bembaꞌ bona morámpákiheꞌ támbiraꞌ hai óntóꞌna, haneꞌiheꞌ mekakae rapakarue bona motámbungi bábehiáraꞌ to kadake iti. Ina matimi ntepuꞌu karahukuraꞌ.”

Popenómbána hadua tobembaꞌ

⁴¹ Iesu mehoda hungkuꞌ i petiꞌ pemboliá dóiꞌ popenómbá, hai mampeita tauna to mopusaꞌ dóiꞌ popenómbáraꞌ. Handaꞌ tauna to pebuku mopusaꞌ dóiꞌ to handaꞌ.

⁴² I tempó iti, haweꞌ miꞌi hadua towawine to bembaꞌ to meahiahiꞌ tueꞌna, hai ia woꞌo lao mopusaꞌ dóiꞌ popenómbána. To napusaꞌ, rompepaꞌ peá dóiꞌ tembaga to hantóiꞌ ntepuꞌu imbaꞌna.

^43-44 Iesu mokióꞌ topeguruNa, Nahángáꞌáheꞌ, “Toꞌu ntepuꞌu to Kuhángáꞌákou: topebuku mampeweꞌi hantóiꞌ peá hangko i kapebukuraꞌ, agáiáná towawine iti, kehapiꞌ meahiahiꞌ tueꞌna, mampeweꞌi upu-upu to ara i hia to naparaluu woia i lalu katueꞌna alo-alona, mewaliꞌ melumbuꞌ popenómbána to bembaꞌ iti haneꞌi popenómbáraꞌ upu-upu tauna ntániꞌna.”