Marakusi 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mampolaluita ádá pohamboko hai ádá pogááꞌ

¹ Iesu hai topeguruNa pohuꞌmoheꞌ mopálehi wánuá Kapenau laoheꞌ i tampoꞌ Iudá, agáiáná moliuheꞌ i tampoꞌ to ara tándáꞌ i hambali uwai Iarade. Handaꞌ ntepuꞌu tauna to haweꞌ motolelingi Iesu, hai Ia mopaturoꞌheꞌ nodo biásána.

² Araheꞌ bahangapa toParisi to haweꞌ mampeliꞌ kamanawoꞌána Iesu. Mewaliꞌ mekuneꞌheꞌ, “Mouláꞌ áturá ágámántaꞌ, peisá paꞌi tobaleilo mampogááka toinána?”

³ Nauliꞌ Iesu, “Párentá apa to naweꞌikou nabiꞌ Musa?”

⁴ Rahániki toParisi, “Musa mopaliu tobaleilo mampogááka toinána, asalaꞌ nabábehi sieruꞌ sura pogááꞌ.”

⁵ Nauliꞌ Iesu, “Musa moukiꞌ párentá iti ánti kamatuꞌana lalumi.

⁶ Agáiáná hangko i pewaliꞌána duniáꞌ, nodo to teukiꞌ i lalu Sura Magasaꞌ: ‘I tempóna Pueꞌ Ala mampopewaliꞌ tauna, Ia mampopewaliꞌheꞌ tobaleilo hai towawine.

⁷ Onoꞌ miꞌi haneꞌi hadua tobaleilo hangaa-ngaa mopálehi umána hai inána, haneꞌi tueꞌ hingkakani hai toinána,

⁸ bona to rodua iti mewaliꞌheꞌ hawátá-wátá.’ Mewaliꞌ, i peitána Pueꞌ Ala, tohamboko tiꞌarapoheꞌ rodua, agáiáná mewaliꞌmoheꞌ nodo to hadua.

⁹ Onoꞌ miꞌi haneꞌi Kuhángáꞌáꞌákou, heáná to napahintuwuꞌ miꞌi Pueꞌ Ala, tiꞌara mpuꞌu peisá napopogááꞌ tauna.”

¹⁰ Roo onoꞌ, Iesu hai topeguruNa mesuaꞌheꞌ i lalu támbi. Tangaꞌraꞌ ionoꞌ, mekuneꞌ wopaheꞌ topeguruNa i Hia kana i ádá pogááꞌ.

¹¹ Nahángáꞌáheꞌ Iesu, “Tobaleilo to mampogááka toinána hai mampotoina towawine to ntániꞌna, lempóna mobualosi toinána to rungu-runguna.

¹² Noꞌonoꞌ woꞌo towawine to mampogááka toámána haneꞌi mohamboko wopiꞌi hai tobaleilo ntániꞌna, ia woꞌo mobualosi toámána to rungu-runguna.”

Iesu mowátiꞌ ánángkóiꞌ

¹³ Hangkani tempó, araheꞌ tauna to moánti ánáꞌraꞌ i Iesu bona Napekamaꞌheꞌ hai Nawátiꞌheꞌ. Agáiáná topeguruNa mokámbáróáheꞌ tauna iti.

¹⁴ Kanaitána Iesu apa to rabábehi topeguruNa, Nakabukoꞌiheꞌ, Nauliꞌ, “Nipatodáhimoheꞌ ánángkóiꞌ iti mai i Kódóꞌ. Ineeꞌheꞌ nikóntó, láwiꞌ tauna to nodo ánángkóiꞌ deꞌe ina mewaliꞌheꞌ taunána Pueꞌ Ala i lalu popárentáNa.

¹⁵ Toꞌu ntepuꞌu laluitaNgkuꞌ deꞌe: Pueꞌ Ala ina mepárentá i laluraꞌ tauna to mopaisarenga katueꞌraꞌ i Hia, nodo ánángkóiꞌ to mopaisarenga katueꞌna i tosaena.”

¹⁶ KarooNa molaluita noꞌonoꞌ, Nakápuimoheꞌ ánángkóiꞌ iti, Napágá wuáꞌraꞌ haneꞌiheꞌ Nawátiꞌ.

Maꞌángkárá ntepuꞌu topebuku mewaliꞌ taunána Pueꞌ Ala

¹⁷ Kaꞌina pohuꞌna Iesu hai topeguruNa mopaliliu polumaoraꞌ, haweꞌ wopiꞌi hadua tauna to melangka lao i Iesu. Liliu molingkudu i bitiNa haneꞌi mekuneꞌ, nauliꞌ, “Guru to maroꞌa. Apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

¹⁸ Nauliꞌ Iesu, “Moapa riꞌi haneꞌi nuꞌuliꞌ Kódóꞌ deꞌe tauna to maroꞌaꞌAꞌ? Tiꞌara ara hadua tauna to maroꞌa, bateꞌna peá Pueꞌ Ala.

¹⁹ {Agáiáná ina Kuhániki pekuneꞌmu.} Nuisá miꞌi hawaꞌ to teukiꞌ i lalu Hawaꞌna Musa: ‘Ineeꞌ mepapate, ineeꞌ mebualosi, ineeꞌ manako, ineeꞌ mosabiki dongkoꞌ, ineeꞌ mebagiuꞌ, hai nubiláꞌ inámu hai umámu.’ ”

²⁰ Nauliꞌ tauna iti, “Guru. Upu-upu hawaꞌ iti, ambiꞌna miꞌi kupeuláꞌi hangko i kamaleheꞌkuꞌ mani.”

²¹ Agáiáná Iesu mampeita tauna iti hai Napokaꞌahiꞌ ntepuꞌu, onoꞌ miꞌi haneꞌi Nahángáꞌá, “Ara mani hampákáꞌ to hangaa-ngaa nubábehi. Mesuleꞌmokoꞌ sieruꞌ mampobaluꞌ párewámu, hai dóiꞌ hólóna nugáláꞌ-gáláꞌáheꞌ tauna to meahiahiꞌ tueꞌraꞌ. Ane nubábehiꞌi noꞌonoꞌ, ina mahile háwángina to nulámbiꞌ i lalu surugáꞌ. Roo onoꞌ, maimokoꞌ meuláꞌ i Kódóꞌ.”

²² Kanahádina tauna to pebuku iti laluitana Iesu, masusa laluna haneꞌi pohuꞌ, láwiꞌ handaꞌ ntepuꞌu tampoꞌna hai párewána.

²³ Iesu motótói topeguruNa to meángkáꞌheꞌ mantoleli, haneꞌi Nahángáꞌáheꞌ, “Maꞌángkárá ntepuꞌu tauna to pebuku mewaliꞌ taunána Pueꞌ Ala i lalu popárentáNa.”

²⁴ Rapotingkáráꞌ topeguruNa mohádi laluitaNa iti {láwiꞌ rapekiri tauna mewaliꞌ topebuku ánti pewátiꞌna Pueꞌ Ala}, mewaliꞌ Nahángáꞌá wopaheꞌ Iesu, “ÁnáꞌKuꞌ, maꞌángkárá ntepuꞌu mewaliꞌ taunána Pueꞌ Ala i lalu popárentáNa.

²⁵ Madoli mani hambaꞌa untá mesuaꞌ i lalu kalolu daru, haneꞌi topebuku mewaliꞌ taunána Pueꞌ Ala i lalu popárentáNa.”

²⁶ Karahádina peá topeguruNa laluitana Iesu, rapotingkáráꞌ ntepuꞌu haneꞌi rauliꞌ, “Ee! Ane maꞌángkárá tauna to pebuku mewaliꞌ taunána Pueꞌ Ala, apa mani tauna ntániꞌna! Heáná paꞌi to nabuku molámbiꞌ katueꞌ to maroꞌa to tiꞌara mokahópóꞌá?”

²⁷ Natótóiheꞌ Iesu haneꞌi Nauliꞌ, “Tiꞌara ara to peisá nabábehi tauna bona mewaliꞌheꞌ taunána Pueꞌ Ala. Agáiáná Pueꞌ Ala peá to peisá mohómpóki dósá tauna, láwiꞌ upu-upuna Nabuku Nabábehi.”

²⁸ Mekuneꞌ miꞌi Peturuꞌ, nauliꞌ, “Noumbámongkaiꞌ? Kipálehi miꞌi hinángkáꞌna bona meuláꞌangkaiꞌ i Hio.”

²⁹ Nauliꞌ Iesu, “Bona niꞌisá: heáná to mopálehi halaluna, inána ba umána, ánáꞌna ba támbina, ba hinoena, ánti peuláꞌna i Kódóꞌ hai ánti Ngkóráꞌ Marasa,

³⁰ bateꞌna ina molámbiꞌ háwángina to mahile. I duniáꞌ deꞌe ia ina molámbiꞌ hangatu kánina kahandaꞌna támbina, halaluna, inána, ánáꞌna, hinoena, hai ina molámbiꞌ woꞌo pepopeahiahiꞌ. Agáiáná i alo to ina haweꞌ, bateꞌna ina molámbiꞌ katueꞌ to maroꞌa to tiꞌara mokahópóꞌá.

³¹ Handaꞌ tauna to tepaioruá miꞌi tueꞌraꞌ deꞌe-deꞌe, ina mewaliꞌ to tepaibókóka i alo to ina haweꞌ. Hai handaꞌ woꞌo tauna to tepaibókóka tueꞌraꞌ deꞌe-deꞌe, ina mewaliꞌ to tepaioruá i alo to ina haweꞌ.”

Iesu mampolaluita wopiꞌi kana i kaꞌina mateNa

³² Iesu hai topeguruNa mopaliliu polumaoraꞌ lao i Ierusale, hai tempó iti, Iesu molumao ioru {láwiꞌ nodo to rapahumpeꞌ}. Tingkáráꞌheꞌ topeguruNa, hai tauna to handaꞌ to meuláꞌ i bókóꞌ malááꞌheꞌ. Nakióꞌ wopaheꞌ Iesu topeguruNa to hampuloꞌ hai rodua Napataniꞌheꞌ haneꞌi Napahaweꞌáheꞌ apa to hangaa-ngaa ina mewaliꞌ i Hia.

³³ Nauliꞌ, “Nipehádingi maroꞌa! Deꞌe-deꞌe, tangaꞌtaꞌ lao i Ierusale. Ionoꞌ miꞌi Ánáꞌ Mánusiá ina rahuhuꞌ i kapalaꞌ-kapalaꞌ tadulako menómbá hai guru-guru agama, hai ina rabutusi bona rahuku mate. Roo onoꞌ, ina rahuhuꞌ i tauna to tiꞌaraheꞌ toIahudiꞌ.

³⁴ Ina rapopohalaꞌ-halaꞌ, ratitinuduhi, rahepe hai gulaꞌ, haneꞌi rapapate. Agáiáná i katáluna alona, Ia ina tueꞌ huleꞌ.”

Tauna to mengkaiwóiꞌ, hira miꞌi to mahile tueꞌraꞌ i peitána Pueꞌ Ala

³⁵ Iakobu hai Iohane ánáꞌna Sebedeu laomoheꞌ mengkahungkuꞌ i Iesu, haneꞌi rauliꞌ, “Guru. Ara hampákáꞌ to kipoinao kipembiáꞌ i Hio.”

³⁶ Nauliꞌ Iesu, “Apa to nipembiáꞌ i Kódóꞌ?”

³⁷ Rahániki, “Ane mewaliꞌKoꞌ Datu to meawaꞌ, Nupaliuangkaiꞌ mehoda hai mepárentá hingkakani hai Io, hadua tándáꞌ i kuánáMu, hadua tándáꞌ i kabeoꞌMu.”

³⁸ Nahángáꞌáheꞌ Iesu, “Kómu, tiꞌara niꞌisá apa to nipembiáꞌ. Nibuku paꞌi mantódihá kapári to hangaa-ngaa Kutódihá? Nibuku paꞌi mantódihá to ina Kutódihá?”

³⁹ Rahániki Iakobu hai Iohane, “Kibuku!” Nauliꞌ Iesu, “Toꞌu, hangaa-ngaa nitódihá kapári nodo to ina Kutódihá.

⁴⁰ Agáiáná tiꞌara Kódóꞌ to mopakanótó heáná to ina mehoda tándáꞌ i kuánáNgkuꞌ hai heáná tándáꞌ i kabeoꞌKuꞌ. Pueꞌ Ala riꞌi to ina mopakanótó heáná tauna to ina mehoda ionoꞌ.”

⁴¹ I karahádina topeguruNa to hampuloꞌ pembiáꞌraꞌ Iakobu hai Iohane iti, mabukoꞌmoheꞌ,

⁴² Onoꞌ miꞌi haneꞌi Iesu mokióꞌ upu-upu topeguruNa, Nahángáꞌáheꞌ, “Niꞌisánto tauna to tiꞌara moisá Pueꞌ Ala, masodoheꞌ ane mopárentá tauna, hai tauna to mapángkáꞌ lántiꞌraꞌ iti pakaheꞌ mopasimbuku tauna bona mampeuláꞌi hawaꞌraꞌ.

⁴³ Agáiáná kómu, ineeꞌkou noꞌonoꞌ! Heáná to mampoinao bona i reá tueꞌna, hangaa-ngaa mewaliꞌ sieruꞌ hadua topekádipurá.

⁴⁴ Hai heáná to mampoinao bona tepaioruá, hangaa-ngaa mewaliꞌ sieruꞌ hawiꞌ i upu-upu tauna.

⁴⁵ Mogalo woꞌo Ánáꞌ Mánusiá mai i duniáꞌ deꞌe tiꞌara mewaliꞌ topohawaꞌ, agáiáná bona mewaliꞌ hawiꞌ, hai ina mohuhuꞌ wátáNa rapapate bona handaꞌ tauna peisá Nahómpóki hangko i huku dósáraꞌ.”

Iesu mopakauriꞌ Batimeu

⁴⁶ I polumaoraꞌ lao i Ierusale, Iesu hai topeguruNa haweꞌheꞌ i kótá Ieriko. Kapohuꞌraꞌ hangko i kótá iti, handaꞌ tauna meuláꞌ i hira. I wiwi rárá, mehoda hadua tauna to bilo topembiáꞌ-mbiáꞌ. Hangaꞌna Batimeu, lempóna: ánáꞌna Timeu.

⁴⁷ Kanahádina Batimeu Iesu toNasare moliu, mekióꞌ-kióꞌ miꞌi, nauliꞌ, “Iesu, pemuleꞌána Datu Daudiꞌ! Nupokaꞌahiꞌaꞌ, wongkódóꞌá!”

⁴⁸ Handaꞌ tauna mokabukoꞌi, rauliꞌ, “Maniiꞌkoꞌ!” Agáiáná tobilo iti mekióꞌ-kióꞌ peá napasimbuku, nauliꞌ, “Pemuleꞌána Datu Daudiꞌ, Nupokaꞌahiꞌaꞌ wongkódóꞌá!”

⁴⁹ Mengkaroo miꞌi Iesu, Nauliꞌ, “Nikióꞌ mai!” Rakióꞌ mpuꞌu miꞌi tobilo iti haneꞌi rahángáꞌá, “Nupatinda lalumu! Meángkáꞌmokoꞌ, láwiꞌ Nakióꞌmokoꞌ!”

⁵⁰ Meángkáꞌ miꞌi tobilo iti, mowálentáha kumbána, haneꞌi manggagu lao i Iesu.

⁵¹ Napekuneꞌ Iesu i hia, “Apa to nuꞌundeꞌ Kubábehi i hio?” Nahániki tobilo iti, “Guru. Kuꞌundeꞌ bona meitaꞌaꞌ!”

⁵² Nauliꞌ Iesu, “Laomokoꞌ, láwiꞌ ánti pepoináláimu i Kódóꞌ haneꞌikoꞌ mauriꞌ!” Ia kásáliu meita, haneꞌi meuláꞌ i Iesu.