Marakusi 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iohane Toperiu mopatimama rárá

¹ Deꞌe miꞌi Ngkóráꞌ Marasa mokana i katueꞌna Iesu Kerisitu Ánáꞌna Pueꞌ Ala.

² Daritakáná mantepuꞌu hangko i kahaweꞌna Iohane Toperiu. Kaꞌina haweꞌna Iohane iti, napahaweꞌ miꞌi nabiꞌ Iesaia hangkoia. I lalu surana Iesaia, Pueꞌ Ala mohángáꞌá node: “Deꞌe miꞌi huoꞌáNgkuꞌ to ina Kuhuoꞌ moioru hangko i Hio. Ia to ina mopatimama ráráMu.” (Maleaki 3:1)

³ “Ia miꞌi to molaluita napasimbuku i pádá loriꞌ, nauliꞌ: ‘Ina haweꞌ miꞌi Pueꞌ! Nipatimama lalumi nodo tauna to mopakanoroꞌ rárá to ina napoliui datu.’ ” (Iesaia 40:3)

⁴ To naukiꞌ nabiꞌ Iesaia iti, tebukeki miꞌi i kahaweꞌna Iohane Toperiu i pádá loriꞌ. Ia mopahaweꞌ ngkóráꞌna Pueꞌ i tauna to handaꞌ, nauliꞌ, “Menosoꞌmokou hai mampoperiumokou, bona dósámi ina naꞌámpungi Pueꞌ Ala.”

⁵ Handaꞌ tauna to lao i pádá loriꞌ láwiꞌ mampoinaoheꞌ mohádi laluitana Iohane. Araheꞌ to hangko i humalele tampoꞌ Iudá, tepasuaꞌ kótá Ierusale. Laoheꞌ mopangákuꞌ dósáraꞌ, haneꞌi nariuheꞌ Iohane i uwai Iarade.

⁶ Waruꞌna Iohane rabábehi hangko i wulu untá, pámpouna hangko i koliꞌ. Pandeꞌna katupeeꞌ hai tináháꞌ.

⁷ Napahaweꞌ Iohane, “Ina haweꞌ hadua tauna to melumbuꞌ kuasaꞌNa hangko i kódóꞌ. Mogalo riꞌi mewaliꞌaꞌ hawiꞌNa to mokekehi petakaꞌ sandaleNa, tiꞌaraꞌaꞌ hintotoꞌ.

⁸ Kódóꞌ moriukou hai uwai, agáiáná Ia ina moriukou hai Inao to Magasaꞌ.”

Iesu nariu Iohane hai nakeloꞌ Datu Tokadake

⁹ I tempó iti, Iesu mopálehi wánuá Nasare i tampoꞌ Galilea, lao mampoperiu i Iohane i uwai Iarade.

¹⁰ Pesorena Iesu hangko i uwai, Ia moita langiꞌ tebungkáhi hai Inao to Magasaꞌ mendáulu i Hia nodo tádáhi manggebodoꞌ.

¹¹ Roo onoꞌ, rahádi miꞌi wambaꞌna Pueꞌ Ala hangko i langiꞌ to manguliꞌ, “Io miꞌi ÁnáꞌKuꞌ to Kupokaꞌahiꞌ hai Kupokagóeꞌ.”

¹² Hangko ionoꞌ, ánti peteteꞌna Inao to Magasaꞌ, Iesu lao i pádá loriꞌ.

¹³ Ia toroꞌ ionoꞌ iba puloꞌna alona kamaruena, hai ionoꞌ Ia ara i oloꞌraꞌ binataꞌ to maila, hai nakeloꞌ oaꞌ Datu Tokadake. Roo onoꞌ, Ia rakádipurá malaꞌeka.

Iesu lao i tampoꞌ Galilea

¹⁴ Tiꞌara marue hangko ionoꞌ, Datu Herode Antipa mohakaꞌ Iohane Toperiu haneꞌi natarungku. I tempó iti, Iesu lao i tampoꞌ Galilea mopahaweꞌ Ngkóráꞌ Marasa to hangko i Pueꞌ Ala,

¹⁵ Nauliꞌ, “Haweꞌ miꞌi tempó to napakanótó Pueꞌ Ala. Tiꞌara piꞌi marue Pueꞌ Ala ina mopatongawaꞌ popárentáNa i duniáꞌ! Mewaliꞌ menosoꞌmokou hangko i dósámi hai nipoinálái Ngkóráꞌ Marasa.”

Iesu mokióꞌ topeguruNa to rungu-runguna

¹⁶ Hangkani tempó, Iesu molumao i wiwi rano Galilea. Ia moita Simoꞌ hai ádina to rahangaꞌ Andaria tangaꞌraꞌ modálá, láwiꞌ iti bágóꞌraꞌ.

¹⁷ Nahángáꞌáheꞌ Iesu, “Maimokou hai meuláꞌmokou i Kódóꞌ! Kómu deꞌe, tiꞌara piꞌi bouꞌ to nipeliꞌ, agáiáná tauna riꞌi to ina nipeliꞌ {bona mewaliꞌheꞌ woꞌo topeuláꞌKuꞌ}.”

¹⁸ Rapálehi mpuꞌu miꞌi bágóꞌraꞌ, hai mantepuꞌu i alo iti, meuláꞌmoheꞌ i Iesu.

¹⁹ Roo onoꞌ, napaliliu miꞌi Iesu polumaoNa, hai moita wopiꞌi rodua topohalalu, iamoheꞌ Iakobu hai Iohane ádina, ánáꞌna Sebedeu, to tangaꞌraꞌ mopakaroꞌangi dáláraꞌ i lalu duanga.

²⁰ Nakióꞌheꞌ Iesu bona meuláꞌheꞌ i Hia. Mewaliꞌ, hira mopálehi mpuꞌumoheꞌ umáraꞌ i lalu duanga hingkakani hai topobágóꞌna to ntániꞌna, haneꞌi meuláꞌmoheꞌ woꞌo i Iesu.

Iesu mopakauriꞌ tauna to napesuaꞌi tokadake

²¹ Hangko ionoꞌ, Iesu hai topeguruNa laoheꞌ i wánuá Kapenau. I alo penómbáꞌáraꞌ toIahudiꞌ, Iesu mesuaꞌ miꞌi i lalu támbi penómbáꞌá hai mantepuꞌu mepaturoꞌ.

²² Tingkáráꞌmoheꞌ tauna to mohádi paturoꞌNa, láwiꞌ Ia tiꞌara mouláꞌ paturoꞌraꞌ tauna ntániꞌna nodo guru-guru agama, agáiáná Ia mepaturoꞌ hangko i kuasaꞌNa haduduáNa.

²³ I tempó iti, ara hadua tauna to napesuaꞌi tokadake mesuaꞌ woꞌo i támbi penómbáꞌá, hai monganga napasimbuku, nauliꞌ,

²⁴ “Ee, Iesu toNasare! Ina Nupoapaꞌangkaiꞌ? Ba maiKoꞌ ina mopakarugiꞌangkaiꞌ? Kuisá kaꞌIona mpuꞌu Huoꞌá to Magasaꞌ to hangko i Pueꞌ Ala.”

²⁵ Agáiáná Iesu mokámbáróá, Nauliꞌ, “Maniiꞌkoꞌ! Mesuwuꞌmokoꞌ hangko i tauna iti!”

²⁶ Tokadake iti mampoporidiꞌ-ridiꞌ wátána tauna iti haneꞌi monganga napasimbuku hai mesuwuꞌ.

²⁷ Tingkáráꞌmoheꞌ upu-upu tauna to moita apa to pewaliꞌ iti, haneꞌi mombekuneꞌheꞌ hadua hai hadua, rauliꞌ, “Apa riꞌi noeneꞌ? Paturoꞌ deꞌe hangko eneꞌ katahádina, hai tauna deꞌe makuasaꞌ ntepuꞌu, mogalo riꞌi tokadake mampeuláꞌi hawaꞌNa!”

²⁸ Hangko ionoꞌ, apa to nabábehi Iesu tebámbári i humalele tampoꞌ Galilea.

Iesu mopakauriꞌ handaꞌ tauna

²⁹ Pesuleꞌraꞌ hangko i támbi penómbáꞌá iti, Iesu hai topeguruNa liliuheꞌ lao i támbiraꞌ Simoꞌ hai Andaria. Iakobu hai Iohane meuláꞌheꞌ woꞌo.

³⁰ Ionoꞌ, pengántiꞌina Simoꞌ towawine maturu-turu láwiꞌ malengiꞌ. Rahángáꞌá Iesu katiꞌárána nalalu.

³¹ Mewaliꞌ Iesu lao i lalu lintuꞌna, Natibaaꞌ taena haneꞌi Napopearó. Kásáliu mauriꞌ, haneꞌi towawine iti mokádipuráheꞌ.

³² Támpu miꞌi alo, handaꞌ tauna lao i Iesu moánti upu-upu tauna to tiꞌara ralalu hai to rapesuaꞌi setáꞌ.

³³ Handaꞌ pueꞌ wánuá lao moromu-romu i tangabaana támbina Simoꞌ.

³⁴ Handaꞌ tauna to napakauriꞌ Iesu hangko i hakiꞌraꞌ to handaꞌ pákáꞌna. Handaꞌ woꞌo tauna to napesuaꞌi setáꞌ raꞌánti lao i Hia haneꞌi Napopesuwuꞌ setáꞌ iti. Agáiáná setáꞌ iti, tiꞌaraheꞌ napaliu Iesu molaluita, láwiꞌ moisá ntepuꞌuheꞌ kaheánáNa iti Iesu.

Iesu mepaturoꞌ i wánuá ntániꞌna

³⁵ Kahalona mepulo hungkuꞌ mabaa, mearó miꞌi Iesu haneꞌi pohuꞌ lao mekakae haduduáNa.

³⁶ Simoꞌ hai rángánaheꞌ lao motutuhá. I karalámbiꞌNa, rahángáꞌá miꞌi,

³⁷ “Guru. Handaꞌ tauna to mampeliꞌKoꞌ. {Mesuleꞌkeꞌ huleꞌ lao i Kapenau.}”

³⁸ Agáiáná Nahángáꞌáheꞌ, “Tiꞌara. Hangaa-ngaa laokeꞌ i wánuá-wánuá to hungkuꞌ, bona Kupahaweꞌ woꞌo i hira ngkóráꞌna Pueꞌ Ala, láwiꞌ iti miꞌi tunggáiáNgkuꞌ mai ieneꞌ.”

³⁹ Mewaliꞌ laomoheꞌ Iesu mopahaweꞌ ngkóráꞌna Pueꞌ Ala i wánuá-wánuá i tampoꞌ Galilea. Ia mepaturoꞌ i lalu támbi-támbi penómbáꞌá, hai mopakauriꞌheꞌ woꞌo tauna to napesuaꞌi setáꞌ.

Iesu mopakauriꞌ hadua tauna to ketánggáꞌ

⁴⁰ Ara hadua tauna to ketánggáꞌ to lao molingkudu i bitina Iesu, membiáꞌ tulungi, nauliꞌ, “Kuisá kaNubukuna mopakauriꞌaꞌ. Ane Nupokanai, Nupakauriꞌaꞌ wongkódóꞌá!”

⁴¹ Onoꞌ miꞌi haneꞌi maꞌahiꞌ laluna Iesu moita tauna iti. Mewaliꞌ Napekamaꞌ hai Nahángáꞌá, “Kupokana. Mauriꞌmokoꞌ!”

⁴² Kásáliu matántá hakiꞌna tauna iti.

⁴³ Roo onoꞌ, Iesu mohuoꞌ bona ia pohuꞌ, hai Nahángáꞌá,

⁴⁴ “Ineeꞌ nupolaluita i heáná peá apa to mewaliꞌ deꞌe. Laomokoꞌ sieruꞌ nupetudeꞌá wátámu i tadulako menómbá, bona naita kamauriꞌmu, hai hangaa-ngaa nuánti popenómbámu mouláꞌ párentá to teukiꞌ i lalu Paturoꞌna Musa, bona tongawaꞌ i upu-upu tauna kamauriꞌmu miꞌi.”

⁴⁵ Agáiáná, iumbá peá kalaoána tauna iti, napolaluita oaꞌ kanapakauriꞌna Iesu, álána Iesu tiꞌara piꞌi peisá mesuaꞌ i lalu wánuá. Onoꞌ miꞌi haneꞌi Ia toroꞌ perái i rawa wánuá i kamalaheꞌána. Agáiáná kehapiꞌ noꞌonoꞌ, handaꞌ tauna hangko i wánuá-wánuá to lao mampohidupaꞌá Iesu.