Lukasi 5 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mopileꞌi topeguruNa to rungu-runguna

¹ Hangkani tempó, tangaꞌna Iesu meángkáꞌ i wiwi rano Galilea, handaꞌheꞌ tauna to haweꞌ mombegaeꞌ-gaeꞌmoheꞌ láwiꞌ rapoinao mampehádingi ngkóráꞌna Pueꞌ Ala to napahaweꞌ Iesu.

² I tempó iti, Iesu moita rombuaꞌ duanga i wiwi rano. Pueꞌ duanga iti mendáulumoheꞌ hangko i duangaraꞌ bona mobahoꞌiheꞌ dáláraꞌ.

³ Lao miꞌi Iesu mengkaheꞌ i duanga to hambuaꞌna, duangana Simoꞌ Peturuꞌ, hai Napembiáꞌ bona Simoꞌ mobuhulá duangana bona menggesuꞌ hantóiꞌ hangko i wiwi rano. Roo onoꞌ, Iesu mehoda i duanga haneꞌi mopaturoꞌ tauna to handaꞌ.

⁴ Roo miꞌi mepaturoꞌ, nauliꞌ Iesu i Simoꞌ, “Nuwose miꞌi duangamu lao i kakaladuána, haneꞌi nitende miꞌi dálámi ionoꞌ bona molámbiꞌkou bouꞌ.”

⁵ Nahániki Simoꞌ, “Guru, hambengiámongkaiꞌ modálá oaꞌ, agáiáná tiꞌara ara haweꞌ hambaꞌa to kilámbiꞌ. Agáiáná kehapiꞌ noꞌonoꞌ, ina kutende wopiꞌi dálángkuꞌ, láwiꞌ Io miꞌi to mohuoꞌangkaiꞌ.”

⁶ Hangko ionoꞌ, ratende mpuꞌu miꞌi dáláraꞌ, hai handaꞌ ntepuꞌu bouꞌ to kana, álána dáláraꞌ mantepuꞌu miꞌi mahepaꞌ.

⁷ Hangko ionoꞌ, mokawemoheꞌ rángáraꞌ to i lalu duanga ntániꞌna bona laoheꞌ medurei. Lao mpuꞌumoheꞌ medurei. Duangaraꞌ to rombuaꞌ iti raóntóki bouꞌ duuꞌna ina tiri ánti kamatimina.

^8-9 Tingkáráꞌmoheꞌ Simoꞌ Peturuꞌ hai rángána moita apa to pewaliꞌ iti, onoꞌ haneꞌi molingkudu miꞌi Peturuꞌ i lindoꞌna Iesu, nauliꞌ, “Pueꞌ, ineeꞌaꞌ Nuhungkuki, láwiꞌ kódóꞌ deꞌe tauna to madósá.”

¹⁰ Araheꞌ rodua rángána Simoꞌ Peturuꞌ to tingkáráꞌheꞌ woꞌo moita apa to pewaliꞌ iti. Hangaꞌraꞌ Iakobu hai Iohane, ánáꞌnaheꞌ Sebedeu. Mobágóꞌheꞌ hingkakani hai Simoꞌ Peturuꞌ. Nauliꞌ Iesu i Simoꞌ, “Ineeꞌkoꞌ malááꞌ. Mantepuꞌu deꞌe-deꞌe, tiꞌara piꞌi bouꞌ to nupeliꞌ, agáiáná tauna riꞌi to ina nupeliꞌ {bona mewaliꞌheꞌ woꞌo topeuláꞌKuꞌ}.”

¹¹ Roo onoꞌ, duangaraꞌ radiiꞌ miꞌi lao i lorena hai rapálehi upu-upu párewáraꞌ, haneꞌiheꞌ meuláꞌ i Iesu.

Iesu mopakauriꞌ hadua tauna to ketánggáꞌ

¹² Hangkani tempó, Iesu ara i hambuaꞌ kótá. Ionoꞌ ara hadua tauna to ketánggáꞌ i humalele wátána. Kamoitána Iesu, ia molingkudu motóngkóꞌ i bitiNa membiáꞌ tulungi, nauliꞌ, “Pueꞌ, kuisá kaNubukuna mopakauriꞌaꞌ. Ane Nupokanai, Nupakauriꞌaꞌ wongkódóꞌá!”

¹³ Iesu mampekamaꞌ tauna iti, Nahángáꞌá, “Kupokana. Mauriꞌmokoꞌ!” Hakiꞌ to metitidiꞌi iti kásáliu matántá.

¹⁴ Roo onoꞌ, Iesu molaluita i tauna iti, Nauliꞌ, “Ineeꞌ nupolaluita i heáná peá apa to mewaliꞌ deꞌe. Laomokoꞌ sieruꞌ nupetudeꞌá wátámu i tadulako menómbá bona naita kamauriꞌmu miꞌi, hai hangaa-ngaa nuánti popenómbámu mouláꞌ párentá to teukiꞌ i lalu Paturoꞌna Musa, bona tongawaꞌ i upu-upu tauna kamauriꞌmu miꞌi. {Roo onoꞌ, peisámokoꞌ moromu-romu hai menómbá hingkakani hai tauna.}”

¹⁵ Agáiáná kehapiꞌ noꞌonoꞌ, kamopakauriꞌna Iesu tauna to ketánggáꞌ iti tebámbári iumbá-umbá peá, álána handaꞌ ntepuꞌu tauna lao i Iesu bona mampehádingi laluitaNa, hai Ia mopakauriꞌheꞌ hangko i hakiꞌraꞌ.

¹⁶ Agáiáná Iesu paka lao haduduáNa i katoroꞌá to tepataniꞌ bona mekakae ionoꞌ.

Iesu mopakauriꞌ hadua topaluꞌ

¹⁷ Hangkani tempó, tangaꞌna Iesu mopaturoꞌ tauna to handaꞌ i hambuaꞌ támbi, araheꞌ woꞌo bahangapa toParisi hai guru-guru agama to mehoda ionoꞌ. Tauna iti haweꞌ hangko i wánuá-wánuá i tampoꞌ Galilea, tampoꞌ Iudá, hai araheꞌ woꞌo to hangko i kótá Ierusale. Kuasaꞌna Pueꞌ Ala ara i Iesu, onoꞌ miꞌi haneꞌi Nabuku mopakauriꞌ to tiꞌara nalalu.

¹⁸ I tempó iti, haweꞌheꞌ woꞌo bahangapa tauna to mokowaꞌ hadua topaluꞌ. Mampeliꞌheꞌ rárá bona peisáheꞌ mesuaꞌ i lalu támbi, láwiꞌ mampoinaoheꞌ moánti rángáraꞌ lao i Iesu.

¹⁹ Agáiáná tiꞌaraheꞌ peisá mesuaꞌ láwiꞌ támbi iti bukeꞌ miꞌi tauna. Onoꞌ miꞌi haneꞌi rapengkáheka topaluꞌ iti lao i wumbu támbi, haneꞌi atuꞌna ragero. Topaluꞌ iti raulu noꞌu hante aleꞌna duuꞌna tóá i oloꞌraꞌ tauna to handaꞌ i lindoꞌna Iesu.

²⁰ Kanaitána Iesu pepoináláiraꞌ, Ia molaluita i topaluꞌ iti, Nauliꞌ, “HalaluNgkuꞌ, teámpungi miꞌi dósámu.”

²¹ Bahangapa guru agama hai toParisi mohádiheꞌ laluitana Iesu iti, onoꞌ miꞌi haneꞌi mampekirimoheꞌ hadua-hadua, “Heáná ripaꞌi tauna deꞌe to pebáiꞌ mopakóiꞌ Pueꞌ Ala? Tiꞌara ara hadua tauna to peisá moámpungi dósá, bateꞌna peá Pueꞌ Ala!”

²² Naisá miꞌi Iesu apa to ara i laluraꞌ, onoꞌ miꞌi haneꞌi Napekuneꞌ, “Moapa riꞌi haneꞌi noꞌonoꞌ pampekirimi?

²³ Umbána to magampaꞌ rauliꞌ, ‘Teámpungi miꞌi dósámu,’ ba ‘Pearó, molumaomokoꞌ’.

²⁴ Deꞌe-deꞌe ina Kupatongawaꞌákou kaꞌárána kuasaꞌna Ánáꞌ Mánusiá moámpungi dósá i duniáꞌ.” Hangko ionoꞌ, mehaileꞌ miꞌi i topaluꞌ haneꞌi Nahángáꞌá, “Mearómokoꞌ, nulóló miꞌi aleꞌmu hai mesuleꞌmokoꞌ lao i támbimu!”

²⁵ Topaluꞌ iti kásáliu mearó mpuꞌu miꞌi i lindoꞌraꞌ tauna to handaꞌ, nalóló miꞌi aleꞌna, hai mesuleꞌ lao i támbina. I tangaꞌ rárá, ia motóiá oaꞌ Pueꞌ Ala.

²⁶ Upu-upu tauna tingkáráꞌheꞌ moita apa to pewaliꞌ iti hai rakamaleá ntepuꞌu, onoꞌ miꞌi haneꞌi motóiáheꞌ Pueꞌ Ala hai rauliꞌ, “Mehelei ntepuꞌu apa to pewaliꞌ i alo dehángálóá!”

Iesu mokióꞌ Lewi mewaliꞌ topeguruNa

²⁷ Roo onoꞌ, i kapohuꞌna Iesu hangko i támbi iti, Ia moita hadua toperóróꞌ ásele to mehoda i kantóróna. Hangaꞌna Lewi, {to rauliꞌ woꞌo Matiu}. Nahángáꞌá Iesu, “Meuláꞌmokoꞌ i Kódóꞌ.”

²⁸ Kásáliu meángkáꞌ miꞌi Lewi mopálehi upu-upu párewána, haneꞌi meuláꞌ i Iesu.

²⁹ Hangko ionoꞌ, Lewi mopaꞌara susa mahile i támbina, tandaꞌ kamobiláꞌna Iesu. I tempó onoꞌ woꞌo, handaꞌheꞌ toperóróꞌ ásele hai tauna ntániꞌna to mandeꞌ hingkakani.

³⁰ Bahangapa toParisi hai guru-guru agama to mampeuláꞌi paturoꞌraꞌ toParisi, mosalaꞌiheꞌ Iesu, rauliꞌ i topeguruNa, “Moapa riꞌi haneꞌi hingkakanikou mosusa hai toperóróꞌ ásele hai tauna ntániꞌna to tiꞌara maroꞌa?”

³¹ Nahániki, “Tauna to tiꞌara maduꞌa, tiꞌara paraluu mampeliꞌ sando. Ngkáliꞌna riꞌi tauna to maduꞌa to paraluu mampeliꞌ sando.

³² Noꞌonoꞌ woꞌo, tiꞌaraꞌAꞌ mai i duniáꞌ deꞌe bona mokióꞌ tauna to mampekiri manótó bábehiáraꞌ, agáiáná maiAꞌ mokióꞌ tauna to moisá kamadósáraꞌ, bona menosoꞌheꞌ hangko i salaꞌraꞌ.”

Topeguruna Iesu tiꞌaraheꞌ mopuasaꞌ i tempóna mani Ia ara hingkakani hai hira

³³ I tempó iti, araheꞌ bahangapa tauna to molaluita i Iesu, rauliꞌ, “Topeguruna Iohane pakaheꞌ mopuasaꞌ hai mekakae, noꞌonoꞌ woꞌo topegururaꞌ toParisi. Moapa riꞌi haneꞌi topeguruMu tiꞌarantoheꞌ mopuasaꞌ?”

³⁴ Iesu mohánikiheꞌ moliu ngkóráꞌ pándiriꞌ, Nauliꞌ, “Tauna to i posusaꞌá petauna, ba mopuasaꞌheꞌ i tempóna tobaleilo to ratauna ara mani i oloꞌraꞌ? Tiꞌara.

³⁵ Agáiáná ina haweꞌ tempóna, tobaleilo to ratauna iti ina raꞌala hangko i oloꞌraꞌ. I tempó iti riꞌi hangko ina mopuasaꞌheꞌ.”

To woꞌu tiꞌara peisá ragalo hai to sae

³⁶ Hai napahaweꞌáheꞌ woꞌo Iesu hampákáꞌ ngkóráꞌ pándiriꞌ, Nauliꞌ, “Tiꞌara ara hadua tauna to mohepaki badu to woꞌu bona motámpelei badu to sae, láwiꞌ ane nabábehi noꞌonoꞌ, ina makahakei peá badu to woꞌu iti. Hai tiꞌara woꞌo maroꞌa raita ane báná to woꞌui rapopotámpelei badu to sae.

³⁷ Noꞌonoꞌ woꞌo, tiꞌara ara hadua tauna to mokándó anggoroꞌ to woꞌu i pemboliá to sae. Láwiꞌ ane háwóái, ina mahepaꞌ pemboliá to sae iti, álána mabubu anggoroꞌ, hai marugiꞌ woꞌo pemboliána.

³⁸ Mewaliꞌ, anggoroꞌ to woꞌu hangaa-ngaa rakándó woꞌo i pemboliá to woꞌu.

³⁹ {Tauna to motibaaꞌ mani agama to sae, peisá rapándiriꞌ nodo} tauna to mainu peá anggoroꞌ to sae. Tiꞌara moundeꞌ mainu anggoroꞌ to woꞌu. Nauliꞌ, ‘Anggoroꞌ to sae iti matamaꞌ.’ ”