Lukasi 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu nakeloꞌ Datu Tokadake

¹ Karoona Iesu rariu, Ia nakuasaꞌi Inao to Magasaꞌ haneꞌi pohuꞌ hangko i uwai Iarade hai naꞌánti Inao to Magasaꞌ lao i pádá loriꞌ.

² Iba puloꞌna alona kamaruena, Iesu nakeloꞌ oaꞌ Datu Tokadake. I tempóNa ionoꞌ, Iesu tiꞌara mandeꞌ kehapiꞌ ba apa peá. Liu miꞌi iba puloꞌna alona iti, Nahádiá miꞌi marimi.

³ Nauliꞌ Datu Tokadake i Iesu, “Ánti kaꞌIona Ánáꞌna Pueꞌ Ala, Nuhuoꞌ miꞌi watu deꞌe mewaliꞌ rótiꞌ!”

⁴ Agáiáná nahániki Iesu, “I lalu Sura Magasaꞌ ara to teukiꞌ node: ‘Tiꞌara peá pandeꞌ to mopatueꞌ tauna.’ ”

⁵ Roo onoꞌ, Datu Tokadake moánti Iesu lao i kapángkáꞌána, hai hangkapira mata napetudeꞌá upu-upu kadatuá i duniáꞌ.

⁶ Nauliꞌ, “Upu-upu kadatuá hai peawaꞌna duniáꞌ, ina kuweꞌiKoꞌ bona Nupárentái, láwiꞌ upu-upu deꞌe kódóꞌ pueꞌna, hai peisá woꞌo kuweꞌi i heáná peá to kuꞌundeꞌ.

⁷ Mewaliꞌ, hampákáꞌ peá to kupembiáꞌ hangko i Hio. Upu-upuna deꞌe ina kuweꞌiKoꞌ, ane menómbáKoꞌ i kódóꞌ.”

⁸ Agáiáná nahániki Iesu, “I lalu Sura Magasaꞌ ara to teukiꞌ node: ‘Hangaa-ngaa mengkoruꞌkoꞌ i Pueꞌ Ala, Pueꞌmu, láwiꞌ Ia peá to hintotoꞌ nupenómbái.’ ”

⁹ Roo onoꞌ, Datu Tokadake moánti wopiꞌi Iesu lao i wumbu Támbina Pueꞌ Ala i Ierusale, nauliꞌ, “Ánti kaꞌIona Ánáꞌna Pueꞌ Ala, mengkanawoꞌmoKoꞌ hangko i hindeꞌe!

¹⁰ TiꞌaraKoꞌ ina moapa-apa, láwiꞌ ara teukiꞌ i lalu Sura Magasaꞌ to manguliꞌ node: ‘Pueꞌ Ala ina mohuoꞌheꞌ mai malaꞌekaNa mokámpáiKoꞌ mpakaroꞌa, bona tiꞌaraKoꞌ hurewuꞌ,’

¹¹ hai teukiꞌ woꞌo: ‘Ina rahángkóbáKoꞌ bona bitiMu tiꞌara ina tóá i watu.’ ”

¹² Nahániki wopiꞌi Iesu, “Teukiꞌ woꞌo i lalu Sura Magasaꞌ: ‘Ineeꞌkoꞌ mampehukáꞌ Pueꞌ Ala, Pueꞌmu.’ ”

¹³ Karoona Iesu nakeloꞌ noꞌonoꞌ, pohuꞌ miꞌi Datu Tokadake mampegiá tempó to maroꞌa ina mokeloꞌ wopiꞌi Iesu.

Pobágóꞌna Iesu hai pepaturoꞌNa i tampoꞌ Galilea (4:14–9:50) Iesu motepuꞌu pobágóꞌNa i Galilea

¹⁴ Roo onoꞌ, mesuleꞌ miꞌi Iesu lao i tampoꞌ Galilea, hai Ia nakuasaꞌi Inao to Magasaꞌ. Bámbári kana i Hia tehawuka miꞌi i humalele tampoꞌ Galilea.

¹⁵ Ia mepaturoꞌ i támbi-támbi penómbáꞌáraꞌ toIahudiꞌ, hai ratóiá upu-upu tauna.

Iesu tiꞌara rabiláꞌ toNasare

¹⁶ Iesu lao miꞌi i Nasare, wánuá karapakahileáNa. Nodo biásáNa, i alo penómbáꞌáraꞌ to Iahudiꞌ, Ia mesuaꞌ i lalu támbi penómbáꞌá, haneꞌi meángkáꞌ ina mobásá Sura Magasaꞌ.

¹⁷ Topobágóꞌ i támbi penómbáꞌá mampohuhuꞌá Iesu Sura Magasaꞌ to naukiꞌ nabiꞌ Iesaia hangkoia. Ia mobungkáhi sura iti duuꞌna molámbiꞌ Ngkóráꞌna Pueꞌ to manguliꞌ node:

¹⁸ “Inaona Pueꞌ Ala mokuasaꞌiAꞌ, láwiꞌ Kódóꞌ miꞌi to Napakanótó moánti bámbári to maroꞌa i tauna to meahiahiꞌ tueꞌraꞌ. Hai NahuoꞌAꞌ mopahaweꞌ bámbári i tauna to ratarungku, kaꞌina rakábáháraꞌ, hai noꞌonoꞌ woꞌo i tobilo, kaꞌina meitáraꞌ. NahuoꞌAꞌ mokábáháheꞌ tauna to rapohawiꞌ,

¹⁹ hai Kubámbáriáheꞌ kaꞌina haweꞌna tempóna Pueꞌ mopatongawaꞌ kamaꞌahiꞌNa i tauna.” (Iesaia 61:1-2)

²⁰ Karoona Iesu mobásá, Napilóló miꞌi huleꞌ sura iti, Napopesuleꞌ i topobágóꞌ i támbi penómbáꞌá, hai mehoda haneꞌi mantepuꞌu mepaturoꞌ. Upu-upu tauna to i lalu támbi penómbáꞌá iti motótóiheꞌ Iesu láwiꞌ mampoinaoheꞌ mohádi laluitaNa.

²¹ I kanatepuꞌuna Iesu mopaturoꞌheꞌ, Nauliꞌ, “I alo deꞌe, mantepuꞌuMoꞌ mobukeki Ngkóráꞌna Pueꞌ Ala to nihádi miꞌi Kubásá ininá!”

²² Tingkáráꞌmoheꞌ upu-upu tauna to mampehádingi laluitaNa, rauliꞌ, “Maroꞌa ntepuꞌu polaluitaNa! Manótó ntepuꞌu apa to Nahuwárá.” Agáiáná ara woꞌo to manguliꞌ, “Tiꞌara paꞌi Ia iti ánáꞌna peá Iusupu?”

²³ Onoꞌ miꞌi haneꞌi nahángáꞌáheꞌ Iesu, “Manótó arakou to ina mohuwárá i Kódóꞌ laluita to biásá rauliꞌ tauna node: ‘Ee sando, nupakauriꞌ sieruꞌ wátámu haduduámu!’ To nitunggái, tandaꞌ kuasaꞌ to nihádi Kubábehi i wánuá Kapenau, niundeꞌ woꞌo Kubábehi ieneꞌ i wánuáNgkuꞌ haduduáNgkuꞌ.”

²⁴ Napaliliu Iesu laluitaNa, Nauliꞌ, “Toꞌu ntepuꞌu to Kuhángáꞌákou: tiꞌara ara hadua nabiꞌ to rabiláꞌ i wánuána haduduána.

²⁵ Kuhángáꞌákou apa to teukiꞌ miꞌi mokana i nabiꞌ Eliá hangkoia. I lalu tálu parena hai ini wulána tiꞌara oaꞌ keudá, duuꞌna mewaliꞌ rimi rumihi to morampe humalele tampoꞌ. I tempó iti, handaꞌheꞌ towawine to bembaꞌ i tampoꞌ Sáráeliꞌ.

²⁶ Agáiáná kehapiꞌ noꞌonoꞌ, Pueꞌ Ala tiꞌara mohuoꞌ Eliá lao motulungi tobembaꞌ toSáráeliꞌ iti, agáiáná Eliá rahuoꞌ riꞌi lao i wánuá Sarapaꞌ i tampoꞌ Sido bona motulungi hadua towawine to bembaꞌ to tiꞌara toSáráeliꞌ.

²⁷ Noꞌonoꞌ woꞌo i tempóna nabiꞌ Elisa. Handaꞌ ntepuꞌu tauna to ketánggáꞌ toroꞌ i tampoꞌ Sáráeliꞌ, agáiáná tiꞌara ara haweꞌ hadua to napakauriꞌ Elisa, bateꞌna peá Naꞌama to napakauriꞌ, hai ia toSiria, tiꞌara toSáráeliꞌ!”

²⁸ Karahádina peá laluitana Iesu, tauna i lalu támbi penómbáꞌá mabukoꞌ ntepuꞌuheꞌ.

²⁹ Meángkáꞌmoheꞌ mowura Iesu lao i rawa wánuá, duuꞌNa haweꞌ i wiwi pingke. Tunggáiáraꞌ ina mohumbángá bona manawoꞌ i pingke iti, láwiꞌ wánuá Nasare iti ara i wongko buluꞌ.

³⁰ Agáiáná Iesu mengkalahiꞌ hangko i hiliꞌraꞌ tauna to handaꞌ iti, haneꞌiheꞌ Napálehi.

Iesu mopakauriꞌ hadua tauna to napesuaꞌi setáꞌ

³¹ Roo onoꞌ, Iesu lao wopiꞌi i wánuá Kapenau i tampoꞌ Galilea. I alo penómbáꞌáraꞌ toIahudiꞌ, Ia mepaturoꞌ i támbi penómbáꞌá.

³² Tingkáráꞌheꞌ tauna mohádi paturoꞌNa, láwiꞌ Ia mepaturoꞌ nodo to makuasaꞌ ntepuꞌu.

³³ Ara woꞌo ionoꞌ hadua tauna to napesuaꞌi setáꞌ. Ia monganga-nganga napasimbuku, nauliꞌ,

³⁴ “Ee, Iesu toNasare! Ineeꞌangkaiꞌ Nupopoapa! Ba ina Nupahurewuꞌangkaiꞌ deꞌe-deꞌe? Kuisá kaꞌIona to Magasaꞌ to hangko i Pueꞌ Ala!”

³⁵ Agáiáná Iesu mokámbáróá, Nauliꞌ, “Maniiꞌkoꞌ! Mesuwuꞌmokoꞌ hangko i tauna deꞌe!” I lindoꞌraꞌ tauna to handaꞌ, setáꞌ iti modungká tauna to napesuaꞌi haneꞌi mesuwuꞌ, agáiáná tauna iti tiꞌaranto mahái i kamadungkána.

³⁶ Upu-upu tauna mampotingkáráꞌ moita apa to pewaliꞌ iti, haneꞌiheꞌ mombekuneꞌ hadua hai hadua, rauliꞌ, “Laluita apa paꞌi to noeneꞌ? Makuasaꞌ ntepuꞌu laluitaNa! Mogalo riꞌi tokadake, mampeuláꞌiheꞌ hawaꞌNa.”

³⁷ Hangko ionoꞌ, tebámbári miꞌi i wánuá-wánuá hungkuꞌ i wánuá Kapenau mokana i Iesu.

Iesu mopakauriꞌ handaꞌ tauna

³⁸ Roo onoꞌ, pohuꞌ miꞌi Iesu hangko i támbi penómbáꞌá, lao i támbina Simoꞌ Peturuꞌ. Pengántiꞌina Simoꞌ towawine, rumihi kamalengiꞌna, mewaliꞌ tauna to ionoꞌ membiáꞌheꞌ tulungi i Iesu.

³⁹ Lao miꞌi Iesu meángkáꞌ i hintáiꞌna towawine iti, haneꞌi mokámbáróá hakiꞌna. Mewaliꞌ mauriꞌ mpuꞌu miꞌi towawine iti, liliu mearó haneꞌi mokádipuráheꞌ Iesu hai tauna ntániꞌna.

⁴⁰ Támpu miꞌi alo, handaꞌheꞌ tauna lao i Iesu moánti halaluraꞌ to mantódihá handaꞌ pákáꞌna hakiꞌ. Iesu mokamaꞌheꞌ upu-upu hai mopakauriꞌheꞌ.

⁴¹ Handaꞌ woꞌo setáꞌ to napopesuwuꞌ Iesu hangko i tauna to napesuaꞌi. Setáꞌ to Napopelóhóꞌ iti, monganga-ngangaheꞌ, rauliꞌ, “Kiꞌisánto, kaꞌIona Ánáꞌna Pueꞌ Ala!” Agáiáná setáꞌ iti nakóntóheꞌ Iesu, tiꞌaraheꞌ Napaliu molaluita láwiꞌ raisá ntepuꞌu kaꞌIana Datu Topehómpóꞌ.

Iesu mepaturoꞌ i wánuá ntániꞌna

⁴² Kahalona mepulo-pulo, pohuꞌ miꞌi Iesu hangko i wánuá Kapenau lao i hambuaꞌ katoroꞌá to tepataniꞌ. Agáiáná kehapiꞌ noꞌonoꞌ, handaꞌheꞌ tauna lao mampeliꞌ duuꞌNa ralámbiꞌ, haneꞌi membiáꞌheꞌ bona ineeꞌheꞌ Napálehi.

⁴³ Agáiáná nahániki Iesu, “Bámbári to maroꞌa kana i popárentána Pueꞌ Ala hangaa-ngaa Kupahaweꞌ woꞌo i wánuá-wánuá ntániꞌna, láwiꞌ iti miꞌi tunggáiána Pueꞌ Ala mohuoꞌAꞌ mai i duniáꞌ.”

⁴⁴ Hangko ionoꞌ, Iesu mopahaweꞌ bámbári to maroꞌa i támbi-támbi penómbáꞌá i humalele tampoꞌ Iudá.