Lukasi 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iohane Toperiu mopaturoꞌ tauna to handaꞌ

¹ I pare kahampuloꞌ hai lima popárentána Datu Mahile Tiberiu hangko i kótá Roma, Pontiu Pilatu mewaliꞌ mágáuꞌ i tampoꞌ Iudá, hai Herode Antipa mepárentá i tampoꞌ Galilea. Pilipu halaluna Herode, ia miꞌi to mepárentá i tampoꞌ Iturea hai i tampoꞌ Tarakoniti, hai Lisania to mepárentá i tampoꞌ Abilene.

² Hanasa hai Kaiapa to mewaliꞌ Tadulako Menómbá Mahile i tempó iti. I pare iti woꞌo, Pueꞌ Ala mongkóráꞌ i Iohane ánáꞌna Sakaria i pádá loriꞌ.

³ Onoꞌ miꞌi haneꞌi Iohane molumaohi wánuá-wánuá to i wiwi uwai Iarade, mopahaweꞌ ngkóráꞌna Pueꞌ i tauna to handaꞌ. Nauliꞌ, “Menosoꞌmokou hangko i dósámi, hai maimokou kuriu bona dósámi ina naꞌámpungi Pueꞌ Ala.”

⁴ Pobágóꞌna Iohane iti mobukeki apa to teukiꞌ hangkoia i lalu surana nabiꞌ Iesaia to manguliꞌ node: Ara hadua tauna to molaluita napasimbuku i pádá loriꞌ, nauliꞌ: “Ina haweꞌ miꞌi Pueꞌ! Nipatimama lalumi nodo tauna to mopakanoroꞌ rárá to ina napoliui datu.

⁵ To molokeꞌ-lokeꞌ hangaa-ngaa ratámbungi, to mapángkáꞌ hai to mobuluꞌ-buluꞌ hangaa-ngaa rapahirante. To molengkoꞌ-lengkoꞌ hangaa-ngaa rapakanoroꞌ, hai to mowakuꞌ-wakuꞌ hangaa-ngaa rapahirante.

⁶ Roo onoꞌ, upu-upu tauna ina moita noumbá rárána Pueꞌ Ala mohómpóki tauna hangko i huku dósáraꞌ.” (Iesaia 40:3-5)

⁷ I tempó iti, handaꞌheꞌ tauna to lao mampoperiu i Iohane, agáiáná nahángáꞌáheꞌ, “Moapa riꞌi haneꞌi maikou i kódóꞌ membiáꞌkou rariu? Mampe to maroꞌa pekou! Bábehiámi kadake ntepuꞌu nodo lelótó to mobisa. Ba nipekiri peisákou tekábáhá hangko i pehukuna Pueꞌ Ala to ina morampekou i alo to ina haweꞌ?

⁸ Ane toꞌu-toꞌu mpuꞌu menosoꞌkou hangko i dósámi, hangaa-ngaa nibábehi bábehiá to maroꞌa. Hai ineeꞌ ripaꞌi nipekiri, ‘Kaiꞌ deꞌe, tauna to manótóangkaiꞌ láwiꞌ pemuleꞌánaꞌangkaiꞌ Burahima. {Tiꞌaraꞌangkaiꞌ ina nahuku Pueꞌ Ala.}’ Iti tiꞌara toꞌu! Nipehádingi: ane naundeꞌ Pueꞌ Ala, peisá Napopewaliꞌ watu deꞌe mewaliꞌ pemuleꞌána Burahima.

⁹ Pehukuna Pueꞌ Ala bateꞌna ina mewaliꞌ! Hai pehukuNa iti nodo uwahe to timama miꞌi i tóáꞌ kau. Upu-upu kau to tiꞌara maroꞌa wuaꞌna ina ratiwi, duuꞌna haweꞌ i kálándána rawehángi hai ratibe i lalu api.”

¹⁰ Tauna to handaꞌ mekuneꞌ i Iohane, rauliꞌ, “Ane noꞌonoꞌi, apa to hangaa-ngaa kibábehi bona tongawaꞌ kamenosoꞌkiꞌ miꞌi.”

¹¹ Nahániki Iohane, “Heáná to morontau baduna, hangaa-ngaa hantau naweꞌi tauna to tiꞌara ara baduna. Noꞌonoꞌ woꞌo, heáná to ara pandeꞌna, hangaa-ngaa nagáláꞌ-gáláꞌáheꞌ tauna to marimi.”

¹² Araheꞌ woꞌo toperóróꞌ ásele to lao mampoperiu i Iohane. Mekuneꞌheꞌ, rauliꞌ, “Guru, apa to hintotoꞌ kibábehi bona tongawaꞌ kamenosoꞌkiꞌ miꞌi.”

¹³ Nahánikiheꞌ, “Ineeꞌkou mesingaraꞌ ásele melumbuꞌ hangko i to rapakanótó miꞌi mouláꞌ popárentá Roma.”

¹⁴ Araheꞌ woꞌo surudadoꞌ to lao mekuneꞌ i Iohane, rauliꞌ, “Noumbá miꞌi hai kaiꞌ? Apa to hintotoꞌ kibábehi bona tongawaꞌ kamenosoꞌkiꞌ miꞌi.” Nahángáꞌáheꞌ, “Ineeꞌkou mampopalááꞌ tauna bona niperampaꞌi apa to ara i hira. Saromi hangaa-ngaa nipogáná.”

¹⁵ I tempó iti, tauna to handaꞌ mampegiáheꞌ kahaweꞌna Datu Topehómpóꞌ to nadándi Pueꞌ Ala. Onoꞌ miꞌi haneꞌi mekuneꞌ-kuneꞌheꞌ i laluraꞌ, “Ba ia miꞌi Datu Topehómpóꞌ?”

¹⁶ Nahánikiheꞌ Iohane, “Tiꞌara. Kódóꞌ, kuriu pekou hai uwai, agáiáná ara hadua to ina haweꞌ to melumbuꞌ kuasaꞌNa hangko i kódóꞌ. Mogalo riꞌi mokekehi petakaꞌ sandaleNa, tiꞌaraꞌaꞌ hintotoꞌ. Ia to ina moriukou hai Inao to Magasaꞌ hai api.

¹⁷ Ia peisá rapándiriꞌ nodo tauna to mantápiꞌi bailoꞌ bona tepataniꞌ bailoꞌ to moꞌóntóꞌ hai bailoꞌ to langkoꞌ. Bailoꞌ to moꞌóntóꞌ ina Napusaꞌ i lalu buhoꞌ, hai to langkoꞌ ina Natibe i lalu api to tiꞌara ina mate. {Noꞌonoꞌ woꞌo Ia ina mopataniꞌ tauna to manótó hai tauna to kadake.}”

¹⁸ I tempóna Iohane mopahaweꞌ bámbári to maroꞌa i tauna to handaꞌ, handaꞌ pákáꞌna paturoꞌ to napahaweꞌáheꞌ.

¹⁹ Ia mokámbáróá Datu Herode Antipa, mágáuꞌ i tampoꞌ Galilea, láwiꞌ Herode moala Herodia toinána wutuꞌna, napohambokoá. Tiꞌara iti peá to nakámbáróáꞌá Iohane, agáiáná handaꞌ mani pákáꞌna bábehiána to kadake.

²⁰ Kanahádina Herode pekámbáróána Iohane iti, ia tiꞌara mokábáhá bábehiána to kadake, ngkáliꞌna mantámbái riꞌi. Ia mohuoꞌ surudadoꞌna bona Iohane rahakaꞌ hai ratarungku.

Iohane moriu Iesu

²¹ Hangko tiꞌara mani Iohane ratarungku, handaꞌheꞌ tauna to lao mampoperiu i hia. Iesu lao woꞌo mampoperiu i Iohane. Karoona Iesu rariu, Ia mekakae. TangaꞌNa mekakae, tebungkáhi miꞌi langiꞌ,

²² hai Inao to Magasaꞌ mendáulu i Hia nodo tádáhi manggebodoꞌ. Hai rahádi wambaꞌ to hangko i surugáꞌ manguliꞌ, “Io miꞌi ÁnáꞌKuꞌ to Kupokaꞌahiꞌ hai Kupokagóeꞌ.”

Toioruna Iesu

^23-38 Tempóna Iesu mantepuꞌu mampopolumao bágóꞌNa to naweꞌi Pueꞌ Ala, gáná miꞌi tinuwuꞌNa tálu puloꞌna pareNa. Mouláꞌ polámbiꞌraꞌ tauna, Iesu ia miꞌi ánáꞌna Iusupu, Iusupu ánáꞌna Eli, Eli ánáꞌna Mata, Mata ánáꞌna Lewi, Lewi ánáꞌna Maki, Maki ánáꞌna Ianai, Ianai ánáꞌna Iusupu, Iusupu ánáꞌna Matika, Matika ánáꞌna Amosi, Amosi ánáꞌna Nahu, Nahu ánáꞌna Heli, Heli ánáꞌna Nagai, Nagai ánáꞌna Maa, Maa ánáꞌna Matika, Matika ánáꞌna Simei, Simei ánáꞌna Ioseꞌ, Ioseꞌ ánáꞌna Ioda, Ioda ánáꞌna Iohana, Iohana ánáꞌna Resa, Resa ánáꞌna Serubabe, Serubabe ánáꞌna Salatie, Salatie ánáꞌna Neri, Neri ánáꞌna Maki, Maki ánáꞌna Adi, Adi ánáꞌna Kosam, Kosam ánáꞌna Emada, Emada ánáꞌna Ereꞌ, Ereꞌ ánáꞌna Iesua, Iesua ánáꞌna Eliese, Eliese ánáꞌna Iori, Iori ánáꞌna Mata, Mata ánáꞌna Lewi, Lewi ánáꞌna Simeoꞌ, Simeoꞌ ánáꞌna Iudá, Iudá ánáꞌna Iusupu, Iusupu ánáꞌna Iona, Iona ánáꞌna Eliaki, Eliaki ánáꞌna Melea, Melea ánáꞌna Mina, Mina ánáꞌna Matata, Matata ánáꞌna Nata, Nata ánáꞌna Daudiꞌ, Daudiꞌ ánáꞌna Isai, Isai ánáꞌna Obeꞌ, Obeꞌ ánáꞌna Boasi, Boasi ánáꞌna Salomo, Salomo ánáꞌna Nahaso, Nahaso ánáꞌna Aminadaꞌ, Aminadaꞌ ánáꞌna Ami, Ami ánáꞌna Ani, Ani ánáꞌna Hesero, Hesero ánáꞌna Peresi, Peresi ánáꞌna Iudá, Iudá ánáꞌna Iako, Iako ánáꞌna Isakiꞌ, Isakiꞌ ánáꞌna Burahima, Burahima ánáꞌna Tera, Tera ánáꞌna Nahori, Nahori ánáꞌna Seru, Seru ánáꞌna Rehu, Rehu ánáꞌna Peleꞌ, Peleꞌ ánáꞌna Eberi, Eberi ánáꞌna Salomo, Salomo ánáꞌna Kena, Kena ánáꞌna Aripasa, Aripasa ánáꞌna Semuꞌ, Semuꞌ ánáꞌna Noho, Noho ánáꞌna Lame, Lame ánáꞌna Metusala, Metusala ánáꞌna Henoꞌ, Henoꞌ ánáꞌna Iare, Iare ánáꞌna Mahalaleꞌ, Mahalaleꞌ ánáꞌna Kena, Kena ánáꞌna Enoꞌ, Enoꞌ ánáꞌna Setiꞌ, Setiꞌ ánáꞌna Adama, hai Adama ánáꞌna Pueꞌ Ala.