Lukasi 24 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu tueꞌ huleꞌ

¹ Mepulo-pulo i alo Minggu, laomoheꞌ towawine iti i popatawuá moánti lana to mawongi hai rampaꞌ-rampaꞌ to roo miꞌi rapatimama.

² Kahaweꞌraꞌ ionoꞌ, raita tegoli miꞌi watu petuko babaꞌ popatawuá,

³ mewaliꞌ mesuaꞌheꞌ i lalu popatawuá, agáiáná wátámandoꞌna Iesu tiꞌara piꞌi ara ionoꞌ.

⁴ Wuli ntepuꞌuheꞌ hai apa to raita iti. Hangkaꞌ-hangkaꞌ perái, haweꞌ rodua tobaleilo meángkáꞌ i hintáiꞌraꞌ, mopakeꞌheꞌ waruꞌ to mengkilaꞌ.

⁵ Malááꞌ ntepuꞌumoheꞌ towawine iti, haneꞌi molingkuduheꞌ motóngkóꞌ haweꞌ i tampoꞌ. Agáiáná tobaleilo to rodua iti mohángáꞌáheꞌ, “Moapa riꞌi haneꞌi nipeliꞌ tauna to tueꞌ i oloꞌraꞌ tomate?

⁶ Ia tiꞌara piꞌi ara ieneꞌ láwiꞌ tueꞌ miꞌi huleꞌ! Nibuhinao apa to Nahángáꞌákou hangkoia, tempómi mani i tampoꞌ Galilea.

⁷ Nauliꞌ: Ánáꞌ Mánusiá hangaa-ngaa rahuhuꞌ i taeraꞌ tauna to kadake bona rapakuꞌ i kau mombehape, agáiáná i katáluna alona, ina tueꞌ huleꞌ.”

⁸ Karahádina laluitaraꞌ tobaleilo iti, hangko rabuhinao riꞌi laluitana Iesu.

⁹ Mesuleꞌmoheꞌ towawine iti hangko i popatawuá, laoheꞌ mopahaweꞌ upu-upu to mewaliꞌ i topeguruna Iesu to hampuloꞌ hai hadua, hai i upu-upu tauna to ara ionoꞌ.

¹⁰ Towawine iti, ia miꞌi Maria toMadalena, Iohana, Maria inána Iakobu, hai towawine to ntániꞌna.

¹¹ Karahádina peá suroNa laluitaraꞌ iti, tiꞌara rapoinálái; rarekeꞌ peá laluita iti tiꞌara toꞌu.

¹² Agáiáná Peturuꞌ meángkáꞌ hai melangka lao i popatawuá. Kahaweꞌna ionoꞌ, motóngkóꞌ haneꞌi meloga i lalu. Naita báná popebungkuna peá to ara ionoꞌ. Roo onoꞌ, ia mesuleꞌ lao i támbi penóntóáraꞌ, hai mampepekiri oaꞌ apa to mewaliꞌ iti.

I tangaꞌ rárá lao i wánuá Emau

¹³ I alo iti woꞌo, ara rodua topeuláꞌna Iesu to lao i wánuá Emau. Wánuá Emau iti, rekeꞌ-rekeꞌna hampuloꞌ hai hakiló kakaraoꞌna hangko i kótá Ierusale.

¹⁴ Tangaꞌraꞌ molumao, rapolaluita oaꞌ upu-upu to hangko mewaliꞌ.

¹⁵ Tangaꞌraꞌ molaluita, Iesu mohungkukiheꞌ hai molumaoheꞌ hingkakani.

¹⁶ I karaitána Iesu, ara to mopawuli pekiriraꞌ álána tiꞌara raisá kaꞌIana miꞌi Iesu,

¹⁷ onoꞌ miꞌi haneꞌi, tangaꞌraꞌ molumao, nakuneꞌheꞌ Iesu, “Apa riꞌi to nipolaluita oaꞌ i polumaoámi?” Mengkarooheꞌ molumao hai tongawaꞌ kamasusana laluraꞌ.

¹⁸ Hadua to rahangaꞌ Kleopa mekuneꞌ i Iesu, nauliꞌ, “Hangko iumbáraKoꞌ mai haneꞌi tiꞌara Nuisá apa to mewaliꞌ ieneꞌ i Ierusale bahangapa alona to liu?”

¹⁹ Mekuneꞌ wopiꞌi Iesu, “Apa riꞌi to mewaliꞌ?” Mehániꞌheꞌ, rauliꞌ, “To mewaliꞌ iti kana i Iesu toNasare! Ia hadua nabiꞌ. BábehiáNa hai polaluitaNa mopatongawaꞌ kuasaꞌna Pueꞌ Ala ara i Hia, hai Ia woꞌo rabiláꞌ handaꞌ tauna.

²⁰ Agáiáná kehapiꞌ noꞌonoꞌ, kapalaꞌ-kapalaꞌ tadulako menómbá hai tadulakontaꞌ to ntániꞌna mohuhuꞌ Iesu i topopárentá toRoma bona rahuku mate. Onoꞌ miꞌi haneꞌi Iesu rapakuꞌ i kau mombehape.

²¹ Katoꞌuána, Ia miꞌi to kihárungá ina mokábáhákeꞌ toSáráeliꞌ hangko i ewálintaꞌ. Hai alo deꞌe, katáluna miꞌi alona hangko i karapapateNa.

^22-23 Iamepulo, bahangapa towawine to hamporángáꞌangkaiꞌ, laoheꞌ i popatawuá, agáiáná wátámandoꞌna Iesu tiꞌara piꞌi rahumba. Tingkáráꞌ ntepuꞌuangkaiꞌ, láwiꞌ i pesuleꞌraꞌ rapahaweꞌáꞌangkaiꞌ kamoitáraꞌ malaꞌeka i popatawuá to manguliꞌ katueꞌna miꞌi huleꞌ Iesu.

²⁴ Hangko ionoꞌ, bahangapa rángángkiꞌ laoheꞌ woꞌo i popatawuá. Kahaweꞌraꞌ ionoꞌ, raita hintotoꞌ hai to rauliꞌ towawine to laoheꞌ ioru. Agáiáná Iesu tiꞌara raita.”

²⁵ Roo onoꞌ, Iesu mohángáꞌáheꞌ, “Moapa riꞌi haneꞌi noꞌonoꞌ gaga pekirimi, haneꞌi tiꞌara niꞌisá lempóna apa to mewaliꞌ? Tiꞌara paꞌi nipoinálái upu-upu to rauliꞌ nabiꞌ-nabiꞌ hangkoia?

²⁶ Deꞌe miꞌi to rapahaweꞌákou: Datu Topehómpóꞌ hangaa-ngaa molámbiꞌ sieruꞌ kapári hangko molámbiꞌ peawaꞌ hangko i Pueꞌ Ala i surugáꞌ.”

²⁷ Hangko ionoꞌ, Iesu mopakanótóáheꞌ upu-upu to teukiꞌ i lalu Sura Magasaꞌ kana i wátáNa haduduáNa, mantepuꞌu hangko i surana nabiꞌ Musa duuꞌna haweꞌ i upu-upu suraraꞌ nabiꞌ to ntániꞌna.

²⁸ Hungkuꞌmoheꞌ haweꞌ i wánuá to ratunggái, Iesu ina liliu peá,

²⁹ agáiáná tauna to rodua iti mokóntó bona hambengi sieruꞌ i támbiraꞌ, láwiꞌ ina káindi miꞌi. Mewaliꞌ mehupeꞌ mpuꞌu miꞌi Iesu.

³⁰ Mehodaheꞌ hingkakani ina mandeꞌ, Iesu moala miꞌi rótiꞌ, Napekakaeá, Nabiseꞌ-biseꞌ haneꞌi Nagáláꞌ-gáláꞌáheꞌ.

³¹ I tempó iti, hangko manótó riꞌi i laluraꞌ kaꞌIesuna miꞌi to rapohingkakaniá mandeꞌ. Roo onoꞌ, iaperái hangkaꞌ Iesu matántá; tiꞌara piꞌi raita.

³² Molaluitamoheꞌ, rauliꞌ, “I tangaꞌ rárá ininá, teruaꞌ ntepuꞌu laluntaꞌ i kaNapakanótóántaꞌ upu-upu to teukiꞌ i lalu Sura Magasaꞌ kana i wátáNa haduduáNa!”

³³ Kásáliu mesuleꞌheꞌ lao i Ierusale. Kahaweꞌraꞌ ionoꞌ, topeguruna Iesu to hampuloꞌ hai hadua hai rángáraꞌ ntániꞌna to hirámpu ionoꞌ

³⁴ manguliꞌ, “Pueꞌ Iesu tueꞌ miꞌi huleꞌ! Ia mopatongawaꞌ miꞌi wátáNa i Simoꞌ Peturuꞌ!”

³⁵ Mewaliꞌ, tauna to rodua iti motuntuáheꞌ woꞌo upu-upu to mewaliꞌ i tangaꞌ rárá ininá, hai mopahaweꞌámoheꞌ apa to mewaliꞌ i tempóna Iesu mobiseꞌ-biseꞌ rótiꞌ, láwiꞌ i tempó iti hangko manótó riꞌi i laluraꞌ kaꞌIesuna miꞌi to ara hingkakani hai hira.

Iesu mopatongawaꞌ wátáNa i topeguruNaheꞌ

³⁶ Tangaꞌraꞌ mani topeuláꞌna Iesu molaluita, iaperái hangkaꞌ Iesu haduduáNa meángkáꞌ i oloꞌraꞌ haneꞌi manguliꞌ, “Tabeá. Roꞌa ngkatueꞌ haweꞌ i kómu.”

³⁷ Tingkáráꞌmoheꞌ hai malááꞌheꞌ, láwiꞌ rapekiri tánuánáꞌ.

³⁸ Onoꞌ miꞌi haneꞌi nahángáꞌáheꞌ Iesu, “Moapa riꞌi haneꞌikou malááꞌ hai bata-bata mani lalumi?

³⁹ Nipeita to bálá i taeNgkuꞌ deꞌe hai i bitiNgkuꞌ. Kódóꞌ miꞌi noeneꞌ! NipekamaꞌAꞌ bona niꞌisá katiꞌáráNgkuꞌnto tánuánáꞌ, láwiꞌ aranto óntóꞌKuꞌ hai buꞌuNgkuꞌ.”

⁴⁰ Roo onoꞌ, Natudeꞌá wopaheꞌ taeNa hai bitiNa.

⁴¹ Góeꞌheꞌ topeguruNa iti, agáiáná makuraꞌ mani pepoináláiraꞌ, onoꞌ miꞌi haneꞌi napekuneꞌ Iesu, “Ara pandeꞌmi?”

⁴² Raweꞌi hambóhóꞌ bouꞌ to ratunu.

⁴³ Narangaꞌ miꞌi Iesu, haneꞌi Naꞌandeꞌ, bona raisá ntepuꞌu katiꞌáráNamonto tánuánáꞌ.

⁴⁴ Roo onoꞌ, Nahángáꞌáheꞌ, “To mewaliꞌ deꞌe-deꞌe, iti miꞌi to Kuhángáꞌáꞌámokou i tempóNgkuꞌ mani hingkakani hai kómu. Upu-upuna to teukiꞌ i lalu surana Musa, suraraꞌ nabiꞌ-nabiꞌ hai Sura Petóiá kana i wátáNgkuꞌ, upu-upu hangaa-ngaa mewaliꞌ.”

⁴⁵ Roo onoꞌ, Napakanótóámoheꞌ apa to teukiꞌ i lalu Sura Magasaꞌ,

⁴⁶ Nauliꞌ, “I lalu Sura Magasaꞌ teukiꞌ node: Datu Topehómpóꞌ hangaa-ngaa molámbiꞌ kapári hai kapate, hai i katáluna alona ina tueꞌ huleꞌ.

⁴⁷ Deꞌe miꞌi bámbári to hangaa-ngaa nipahaweꞌ: ane tauna menosoꞌheꞌ hangko i dósáraꞌ, Pueꞌ Ala ina moámpungiheꞌ ánti kanahómpókiraꞌ Datu Topehómpóꞌ. Hai bámbári iti hangaa-ngaa nipahaweꞌ i humalele duniáꞌ, mantepuꞌu ieneꞌ i Ierusale.

⁴⁸ Kómu miꞌi to ina mewaliꞌ sabiꞌ mokana i Kódóꞌ, láwiꞌ niꞌita mata upu-upu to pewaliꞌ deꞌe.

⁴⁹ Nipehádingi laluitaNgkuꞌ! Ina Kuhuoꞌ Inao to Magasaꞌ mai i kómu, agáiáná hangaa-ngaa nipegiá sieruꞌ ieneꞌ i kótá Ierusale, duuꞌna Inao to Magasaꞌ mokuasaꞌikou mouláꞌ dándiNa UmáNgkuꞌ.”

Iesu mengkaoreꞌ lao i surugáꞌ

⁵⁰ Roo onoꞌ, Iesu moántiheꞌ lao i rawa kótá Ierusale, hungkuꞌ i wánuá Betania, hai moángkáꞌ miꞌi taeNa haneꞌiheꞌ Nawátiꞌ.

⁵¹ TangaꞌNa mewátiꞌ, Napálehimoheꞌ, mengkaoreꞌ lao i surugáꞌ.

⁵² Molingkudumoheꞌ menómbá i Hia, haneꞌiheꞌ mesuleꞌ lao i Ierusale hai góeꞌ ntepuꞌu laluraꞌ.

⁵³ I Ierusale, alo-alona laoheꞌ i Támbina Pueꞌ Ala hai motóiáheꞌ Pueꞌ Ala.