Lukasi 22 - Sura Magasaꞌ: Bahangapa sura Pototowiá to Sae hai Pototowiá to Woꞌu

Poliwona Iudasiꞌ mampobaluꞌ Iesu

¹ Hungkuꞌ miꞌi alo mahileraꞌ toIahudiꞌ to rahangaꞌ Posusa Rótiꞌ to Tiꞌara Raragiꞌi hai to rauliꞌ woꞌo Alo Posusa Paska.

² Kapalaꞌ-kapalaꞌ tadulako menómbá hai guru-guru agama mampeliꞌheꞌ rárá ngkániiꞌ-niiꞌ bona Iesu rahuku mate, láwiꞌ mampokalááꞌheꞌ tauna to handaꞌ ina mabukoꞌ.

³ Roo onoꞌ, Datu Tokadake mampesuaꞌi Iudasiꞌ to rauliꞌ woꞌo Isikarioꞌ. Ia miꞌi hadua hangko i topeguruna Iesu to hampuloꞌ hai rodua.

⁴ Onoꞌ miꞌi haneꞌi lao miꞌi Iudasiꞌ i kapalaꞌ-kapalaꞌ tadulako menómbá hai kapalaꞌ-kapalaꞌ topokámpái Támbina Pueꞌ Ala. Napolaluitaꞌáheꞌ noumbá rárána mohuhuꞌ Iesu i hira.

⁵ Góeꞌheꞌ mohádi tunggáiána Iudasiꞌ iti, hai rapodándiá ina rapoweꞌi dóiꞌ.

⁶ Napokana miꞌi Iudasiꞌ laluitaraꞌ, haneꞌi napeliꞌ tempó to maroꞌa mohuhuꞌ Iesu i hira bona rahakaꞌ ngkániiꞌ-niiꞌ.

Iesu mandeꞌ pandeꞌ Posusa Paska hingkakani hai topeguruNaheꞌ

⁷ Haweꞌ miꞌi alo Popatimama Posusa Rótiꞌ to Tiꞌara Raragiꞌi, hai mouláꞌ ádá ágámáraꞌ toIahudiꞌ, hantámbi-hantámbi hangaa-ngaa moánti hambaꞌa dimbá bona rasambale {i Támbina Pueꞌ Ala} i alo iti bona raꞌandeꞌ i Posusa Paska.

⁸ Onoꞌ miꞌi haneꞌi Iesu mohuoꞌ Peturuꞌ hai Iohane, Nauliꞌ, “Laomokou mopatimama apa to ina taꞌandeꞌ deiná i Posusa Paska.”

⁹ Rapekuneꞌ, “Pueꞌ, iumbá peundeꞌáMu kipatimama pandeꞌ iti?”

¹⁰ Nahániki Iesu, “Ane mesuaꞌkou i lalu kótá Ierusale, ina nilámbiꞌ hadua tobaleilo to moánti gumbaꞌ to moꞌóntóꞌ uwai. Meuláꞌmokou i hia haweꞌ i támbina.

¹¹ Ane mesuaꞌkou i lalu támbina, nihángáꞌá pueꞌ támbi iti, ‘Napekuneꞌ Guru: Ba iumbá peisáꞌAꞌ mandeꞌ pandeꞌ Posusa Paska hingkakani hai topeguruNgkuꞌheꞌ?’

¹² Pueꞌ támbi iti ina motudeꞌáꞌákou hambuaꞌ lintuꞌ to mahile to i wongko. I lintuꞌ iti upu-upu to taparaluu timama miꞌi, mewaliꞌ ionoꞌ miꞌi nikádipuráꞌákeꞌ pandeꞌ Paska.”

¹³ Lao mpuꞌumoheꞌ Peturuꞌ hai Iohane i lalu kótá. Kahaweꞌraꞌ ionoꞌ, upu-upu mewaliꞌ hintotoꞌ hai apa to nahángáꞌáheꞌ Iesu, hai mopatimamaheꞌ pandeꞌ Posusa Paska.

¹⁴ Haweꞌ miꞌi tempóraꞌ mandeꞌ pandeꞌ Paska, mehodamoheꞌ Iesu hai suroNa.

¹⁵ Tangaꞌraꞌ mandeꞌ, nahángáꞌáheꞌ Iesu, “Kuꞌundeꞌ ntepuꞌu mandeꞌ hingkakani hai kómu i Posusa Paska deꞌe hangko tiꞌara maniAꞌ molámbiꞌ kapári,

¹⁶ láwiꞌ toꞌu ntepuꞌu to Kuhángáꞌákou deꞌe: tiꞌara piꞌi ina Kuandeꞌ pandeꞌ Paska, hangko tiꞌara mani tebukeki lempóna Posusa Paska deꞌe i kahaweꞌna popárentána Pueꞌ Ala i duniáꞌ.”

¹⁷ Roo onoꞌ, Iesu moala miꞌi hambuaꞌ painuá to bukeꞌ anggoroꞌ, haneꞌi mekakae i Pueꞌ Ala. Nahángáꞌáheꞌ topeguruNa, “Niala miꞌi haneꞌi niꞌinu hadua-hadua.

¹⁸ Bona niꞌisá: mantepuꞌu deꞌe-deꞌe, tiꞌara piꞌi ina Kuinu anggoroꞌ, duuꞌna haweꞌ popárentána Pueꞌ Ala i duniáꞌ.”

¹⁹ Roo onoꞌ, Naꞌala wopiꞌi Iesu rótiꞌ hai mekakae i Pueꞌ Ala haneꞌi Nabiseꞌ-biseꞌ rótiꞌ iti hai Nagáláꞌ-gáláꞌáheꞌ, Nauliꞌ, “Deꞌe miꞌi wátáNgkuꞌ to Kuhuhuꞌ mosulewátáikou. Nibábehi miꞌi ádá deꞌe bona nibuhinao oaꞌ apa to Kubábehi.”

²⁰ Noꞌonoꞌ woꞌo, karooraꞌ mandeꞌ pandeꞌ Paska iti, Naꞌala wopiꞌi painuá anggoroꞌ, Nahángáꞌáheꞌ, “Óntóꞌna painuá anggoroꞌ deꞌe, lempóna podándina Pueꞌ Ala to woꞌu, to mopahintuwuꞌ Pueꞌ Ala hai tauna. Dándi iti ina Napakaróhó hai waheꞌKuꞌ to ina mabubu i kamateNgkuꞌ.

²¹ Agáiáná nipehádingi sieruꞌ! Hadua hangko i oloꞌmi to tapohingkakaniá mandeꞌ, deꞌe-deꞌe ina mohuhuꞌAꞌ i ewálingkuꞌ!

²² Kódóꞌ Ánáꞌ Mánusiá bateꞌna ina mate nodo to napakanótó miꞌi ami Pueꞌ Ala. Agáiáná ina rumihi karahukuna tauna to mohuhuꞌAꞌ i ewálingkuꞌ!”

²³ Karahádina topeguruNa laluitaNa, mombekuneꞌmoheꞌ hadua hai hadua, ba heáná to ina mobábehi bábehiá to kadake iti.

Heáná to mahile tueꞌraꞌ

²⁴ Hangko ionoꞌ, mombeheheꞌmoheꞌ topeguruna Iesu, ba heáná hangko i oloꞌraꞌ to melumbuꞌ kamahilena tueꞌna.

²⁵ Onoꞌ miꞌi haneꞌi nahángáꞌáheꞌ Iesu, “Datu-datu i duniáꞌ paka mopasimbuku tauna bona mampeuláꞌi hawaꞌraꞌ, hai rauliꞌ woꞌo kahirana miꞌi to mampeámpárái tauna to handaꞌ.

²⁶ Agáiáná kómu, ineeꞌkou noꞌonoꞌ! Rángina miꞌi tauna to i reá tueꞌna hangaa-ngaa mengkaiwóiꞌ, noꞌonoꞌ woꞌo tauna to mohawaꞌ hangaa-ngaa mewaliꞌ sieruꞌ nodo topekádipurá.

²⁷ Mewaliꞌ Kupekuneꞌ: heáná to tepaireá tueꞌna: tauna to mehoda-hoda mandeꞌ, ba tauna to merórá? Taisá miꞌi: i duniáꞌ deꞌe, to mahile tueꞌna ia miꞌi to mehoda-hoda. Agáiáná Kódóꞌ to mewaliꞌ pándiriꞌ i kómu láwiꞌ Kódóꞌ to mokádipurákou.

²⁸ NiporángáMoꞌ oaꞌ i upu-upu kamapáriNgkuꞌ,

²⁹ onoꞌ miꞌi haneꞌi Kuhángáꞌákou: nodo UmáNgkuꞌ mampoweꞌiAꞌ kuasaꞌ mepárentá, Kódóꞌ woꞌo mampoweꞌikou kuasaꞌ mepárentá,

³⁰ bona ina mandeꞌ hai mainukeꞌ hingkakani i mejáNgkuꞌ i lalu popárentáNgkuꞌ. Hai ina mehodakou woꞌo i pehodaꞌá kadatuá to hampuloꞌ hai rombuaꞌ mopárentá toSáráeliꞌ to hampuloꞌ hai rontina.”

Iesu mampolaluita kaꞌina mesápuákana Peturuꞌ

³¹ Roo onoꞌ, Iesu mampolaluitaꞌá Simoꞌ Peturuꞌ, Nauliꞌ, “Simoꞌ! Nupehádingi: Pueꞌ Ala mopatodáhi Datu Tokadake mokeloꞌkou upu-upu. Nodo pare to ratápiꞌi, ina napehukáꞌkou Datu Tokadake.

³² Agáiáná Kupekakaeámokoꞌ Simoꞌ, bona tiꞌara maledeꞌ pepoináláimu. Mewaliꞌ, ane menosoꞌmokoꞌ deiná hai mesuleꞌmokoꞌ i Kódóꞌ, hangaa-ngaa nupakaróhó laluraꞌ halalumu.”

³³ Nahániki Peturuꞌ, “Pueꞌ, kehapiꞌaꞌ ratarungku ba mate hingkakani hai Io, tiꞌaraKoꞌ ina kupálehi!”

³⁴ Nauliꞌ Iesu, “Peturuꞌ, toꞌu ntepuꞌu to Kuhángáꞌáꞌákoꞌ: alo deꞌe, hangko tiꞌara mani motuturuꞌuá manuꞌ, tálu miꞌi kánina nusápuákaꞌAꞌ.”

Dompeꞌ hai pihoꞌ

³⁵ Roo onoꞌ, Iesu mohángáꞌáheꞌ topeguruNa, “Iaꞌo, i kaKuhuoꞌmi lao moánti Ngkóráꞌ Marasa, tiꞌarakou Kupaliu moánti dóiꞌ ba tasi ba ropári sandale. I tempó iti, ba arai kamakuraꞌmi?”

³⁶ Rahániki, “Tiꞌara ara.” Nauliꞌ Iesu, “Agáiáná mantepuꞌu deꞌe-deꞌe, ane arai dóiꞌ ba tasi, hangaa-ngaa niánti. Hai ane tiꞌara ara pihoꞌmi, nipobaluꞌ kumbámi nipopehóló pihoꞌ,

³⁷ láwiꞌ teukiꞌ miꞌi i lalu Sura Magasaꞌ node: ‘Ia ina rarekeꞌ tauna to kadake.’ Hai apa to teukiꞌ deꞌe hangaa-ngaa mewaliꞌ i Kódóꞌ, láwiꞌ upu-upu to teukiꞌ i lalu Sura Magasaꞌ kana i Kódóꞌ, bateꞌna ina tebukeki.”

³⁸ Rauliꞌ topeguruNa, “Pueꞌ, demiꞌe pihoꞌ romata.” Nahániki Iesu, “Gáná miꞌi.”

Iesu mekakae i Buluꞌ Saitu

³⁹ Nodo biásáNa, Iesu pohuꞌ miꞌi hangko i kótá lao i Buluꞌ Saitu hingkakani hai topeguruNa.

⁴⁰ Kahaweꞌraꞌ ionoꞌ, Nahángáꞌáheꞌ, “Mekakaemokou bona tiꞌarakou molámbiꞌ pekeloꞌ.”

⁴¹ Roo onoꞌ, Nakaraohimoheꞌ topeguruNa rekeꞌ-rekeꞌna tálu puloꞌna mete, haneꞌi molingkudu mekakae.

⁴² Nauliꞌ, “UmáNgkuꞌ, ane peisái, Nupakaraoꞌ hangko i Kódóꞌ kapári to ina morampeAꞌ. Agáiáná tiꞌara peundeꞌáNgkuꞌ to ina mewaliꞌ, ngkáliꞌna riꞌi peundeꞌáMu Umaꞌ.” [

⁴³ Roo onoꞌ, haweꞌ miꞌi hadua malaꞌeka hangko i surugáꞌ to mopakaróhó laluNa.

⁴⁴ Mapári ntepuꞌu Nahádi, onoꞌ miꞌi haneꞌi Ia mekakae hangko i laluNa ntepuꞌu, hai lolaNa mogalo waheꞌ, tudoꞌ i tampoꞌ.]

⁴⁵ Roo mekakae, meángkáꞌ miꞌi Iesu haneꞌi mesuleꞌ lao i topeguruNa. Nahumbaheꞌ tangaꞌraꞌ letaꞌ láwiꞌ masusa ntepuꞌu laluraꞌ.

⁴⁶ Nahángáꞌáheꞌ, “Moapa riꞌi haneꞌi letaꞌ pekou? Pearó hai mekakaekou bona tiꞌarakou molámbiꞌ pekeloꞌ.”

Iesu rahakaꞌ

⁴⁷ Tangaꞌna mani Iesu molaluita, hangkaꞌ-hangkaꞌ perái haweꞌmoheꞌ tauna to handaꞌ. Tauna iti naꞌántiheꞌ Iudasiꞌ, hadua hangko i topeguruna Iesu. Kahaweꞌraꞌ ionoꞌ, lao miꞌi Iudasiꞌ i Iesu, natabe hai naꞌángki.

⁴⁸ Agáiáná nauliꞌ Iesu, “Iudasiꞌ, moapa riꞌi haneꞌiAꞌ nuángki? Ba ina nuhuhuꞌ Ánáꞌ Mánusiá i ewáliNa?”

⁴⁹ Karaitána topeguruNa apa to ina mewaliꞌ, rauliꞌ, “Noumbá miꞌi Pueꞌ? Ba kiewaꞌheꞌ hai pihoꞌ?”

⁵⁰ Hadua hangko i oloꞌraꞌ topeguruna Iesu kásáliu mobutuꞌ pihoꞌna, motárási hadua hawiꞌna Tadulako Menómbá Mahile, agáiáná kana peá talinga kuánána hai mawehángi.

⁵¹ Nauliꞌ Iesu, “Gáná miꞌi! Ineeꞌ!” hai Natibaaꞌ talingana tauna iti haneꞌi Napatakaꞌ huleꞌ.

⁵² Roo onoꞌ, Iesu mohángáꞌáheꞌ kapalaꞌ-kapalaꞌ tadulako menómbá, topokámpái Támbina Pueꞌ Ala hai totosaeraꞌ toIahudiꞌ to ntániꞌna to lao mohakaꞌ, Nauliꞌ, “Moapa riꞌi haneꞌi maiAꞌ nihakaꞌ moántikou pihoꞌ hai pebóbáꞌ? Ba niuliꞌ ripaꞌi tauna to kadakeAꞌ noeneꞌ?

⁵³ Alo-alona araꞌAꞌ hingkakani hai kómu mepaturoꞌ i Támbina Pueꞌ Ala. Moapa riꞌi haneꞌi tiꞌaraꞌAꞌ nihakaꞌ i tempó iti? Agáiáná deꞌe miꞌi tempó to napakanótó ami Pueꞌ Ala, bona kómu hai Datu Tokadake mobábehi upu-upuna deꞌe i Kódóꞌ!”

Peturuꞌ mosápuáka peuláꞌna i Iesu

⁵⁴ Hangko ionoꞌ, Iesu rahakaꞌ mpuꞌu miꞌi haneꞌi raꞌánti lao i támbina Tadulako Menómbá Mahile. Peturuꞌ meuláꞌ ngkaraoꞌ peá.

⁵⁵ I tangabaa támbi iti, araheꞌ bahangapa tauna to mopatueꞌ api rapenenei. Peturuꞌ lao miꞌi woꞌo mehoda hingkakani hai hira.

⁵⁶ Hadua towawine to mobágóꞌ i támbina Tadulako Menómbá Mahile mampelenggeꞌ Peturuꞌ tangaꞌna menene, haneꞌi nauliꞌ, “Tauna deꞌe ara hingkakani hai Iesu!”

⁵⁷ Nasápuáka Peturuꞌ, nauliꞌ, “Tiꞌara kuisá tauna iti!”

⁵⁸ Tiꞌara marue hangko ionoꞌ, hadua wopiꞌi moita Peturuꞌ, haneꞌi nakuneꞌ, “Io woꞌo hadua topeguruNa.” Nasápuáka wopiꞌi Peturuꞌ, nauliꞌ, “Tiꞌara! Tiꞌara kódóꞌ!”

⁵⁹ Rekeꞌ-rekeꞌna hajaa hangko ionoꞌ, ara wopiꞌi hadua to manguliꞌ, “Kuisá ia woꞌo meuláꞌ i Iesu, láwiꞌ ia woꞌo toGalilea!”

⁶⁰ Nahániki Peturuꞌ, “Tiꞌara! Tiꞌara mpuꞌu kuisá apa to nuꞌuliꞌ iti!” Tangaꞌna mani molaluita, motuturuꞌuá miꞌi manuꞌ,

⁶¹ hai mehaileꞌ miꞌi Pueꞌ Iesu motótói Peturuꞌ. I tempó iti, nabuhinao miꞌi Peturuꞌ laluitana Pueꞌ Iesu to manguliꞌ, “Hangko tiꞌara mani motuturuꞌuá manuꞌ, tálu miꞌi kánimu ina mosápuákaꞌAꞌ.”

⁶² I kanaisána Peturuꞌ apa to nabábehi, pohuꞌ miꞌi lao i rawa hai teriaꞌ láwiꞌ nahohoꞌ inaona.

Iesu rapakóiꞌ hai rapapahái

⁶³ Roo onoꞌ, tauna to mokámpái Iesu mopakóiꞌ hai mopapaháiheꞌ oaꞌ wátáNa.

⁶⁴ Rapiriꞌ mátáNa haneꞌi rahángáꞌá, “Ane toꞌu-toꞌu Io toMásehi, Nuꞌuliꞌ ba heánái to motampedaꞌKoꞌ!”

⁶⁵ Haneꞌi ratitibei woꞌo hai mampopengaa laluita to kadake.

Iesu i lindoꞌna tadulako agama

⁶⁶ Kahalona mepulo-pulo, upu-upu kapalaꞌ tadulako menómbá, guru-guru agama, hai totosaeraꞌ toIahudiꞌ to ntániꞌna, hirámpuheꞌ i Támbi Pogómbóá Topepáresáꞌ Mahile Agama Iahudiꞌ, hai Iesu raꞌánti i lindoꞌraꞌ.

⁶⁷ Mekuneꞌheꞌ tadulako iti i Iesu, “Nuhángáꞌáꞌangkaiꞌ deꞌe-deꞌe, ba Io mpuꞌui Datu Topehómpóꞌ?” Nahániki Iesu, “Kehapiꞌkou Kuhániki, bateꞌna tiꞌaraꞌAꞌ ina nipoinálái.

⁶⁸ Hai ane mekuneꞌAꞌ i kómu, bateꞌna tiꞌaraꞌAꞌ ina nihániki.

⁶⁹ Mewaliꞌ, deꞌe miꞌi pehániꞌKuꞌ: mantepuꞌu deꞌe-deꞌe, Ánáꞌ Mánusiá ina mehoda tándáꞌ i kuánána Pueꞌ Ala to Makuasaꞌ.”

⁷⁰ Rauliꞌ wopiꞌi upu-upu tadulako iti i Iesu, “Ba Ánáꞌna mpuꞌuKoꞌ Pueꞌ Ala?” Nahániki Iesu, “Kómu haduduámi to manguliꞌ noꞌonoꞌ.”

⁷¹ Hangko ionoꞌ, rauliꞌ miꞌi, “Tiꞌara piꞌi mobunduꞌ ara sabiꞌ! Tahádi miꞌi polaluitaNa haduduáNa to mopahibali wátáNa hai Pueꞌ Ala!”