Lukasi 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu rapoánáka i Beteleme

¹ Tiꞌara marue hangko i karapoánákana Iohane, Datu Mahile Agustu mopaꞌara hambuaꞌ párentá, bona upu-upu tauna i humalele tampoꞌ to napárentái toRoma, raukiꞌ hangaꞌraꞌ bona raisá kahandaꞌraꞌ.

² Poimbaꞌ tauna to rungu-runguna deꞌe rapaꞌara i tempóna Kireniu mewaliꞌ mágáuꞌ i tampoꞌ Siria.

³ Onoꞌ miꞌi haneꞌi upu-upu tauna lao mampopeukiꞌ hangaꞌraꞌ i wánuána toioruraꞌ hadua-hadua.

^4-5 Noꞌonoꞌ woꞌo, Iusupu pohuꞌ miꞌi hangko i wánuá Nasare i Galilea hingkakani hai Maria to ina mewaliꞌ toinána. Maria iti tangaꞌna miꞌi morodua. Mempanaiꞌheꞌ lao i tampoꞌ Iudá hai liliuheꞌ i wánuá Beteleme, pesupaꞌána Datu Daudiꞌ hangkoia. Ionoꞌ, Iusupu mampopeukiꞌ hangaꞌraꞌ, láwiꞌ ia pemuleꞌánaheꞌ Daudiꞌ.

⁶ Tangaꞌraꞌ mani i Beteleme, haweꞌ miꞌi tempóna Maria ina moánáꞌ,

⁷ hai ia moánáka hadua Ánángkóiꞌ tobaleilo, ánáꞌna to towutuꞌ. Ánángkóiꞌ iti nalempiꞌi báná to maꞌálusuꞌ, haneꞌi naoliꞌ i lalu dulá dimbá, láwiꞌ ionoꞌ tiꞌara piꞌi ara támbi to peisá rakatoroꞌi.

Topoewu hai malaꞌeka

⁸ Hungkuꞌ i wánuá Beteleme, araheꞌ bahangapa topoewu to mokámpái dimbáraꞌ i pádá.

⁹ Wengi pesupaꞌána Iesu, hangkaꞌ-hangkaꞌ perái haweꞌ malaꞌekana Pueꞌ Ala, meángkáꞌ i hintáiꞌraꞌ topoewu hai peawaꞌna Pueꞌ Ala mowangkaꞌiheꞌ, mewaliꞌ malááꞌ ntepuꞌuheꞌ topoewu iti.

¹⁰ Nauliꞌ malaꞌeka iti, “Ineeꞌkou malááꞌ, láwiꞌ maiaꞌ moánti bámbári to maroꞌa i kómu. Bámbári iti ina mopagóeꞌ laluraꞌ upu-upu tauna.

¹¹ Wengi deꞌe i wánuána Datu Daudiꞌ, mesupaꞌ miꞌi Topohómpóꞌ Salaꞌ, Ia miꞌi Kerisitu, Pueꞌtaꞌ.

¹² Deꞌe miꞌi tandaꞌNa: ina nihumba hadua Ánáꞌlei to ralempiꞌi, hai raoliꞌ i lalu dulá dimbá.”

¹³ Hangkaꞌ-hangkaꞌ perái raita topoewu iti malaꞌeka to handaꞌ hingkakani hai malaꞌeka to rungu-runguna. Motóiáheꞌ Pueꞌ Ala, rauliꞌ:

¹⁴ “Tatóiá miꞌi Pueꞌ Ala to i surugáꞌ! Tauna i duniáꞌ to mampokagóeꞌ Pueꞌ Ala ina molámbiꞌheꞌ roꞌa ngkatueꞌ.”

¹⁵ I pesuleꞌraꞌ malaꞌeka iti lao i surugáꞌ, molaluitamoheꞌ topoewu iti hadua hai hadua, rauliꞌ, “Laomokeꞌ i Beteleme, mampeita apa to pewaliꞌ to napahaweꞌámokeꞌ Pueꞌ.”

¹⁶ Mewaliꞌ pohuꞌ mpuꞌumoheꞌ ragagu lao i Beteleme. Mampombelámbiꞌámoheꞌ Maria hai Iusupu, hai Ánáꞌlei to raoliꞌ i lalu dulá dimbá.

¹⁷ Karaitána Ánáꞌlei iti, rapahaweꞌ apa to nauliꞌ malaꞌeka mokana i Hia.

¹⁸ Tingkáráꞌheꞌ upu-upu tauna to mohádi laluitaraꞌ topoewu.

¹⁹ Agáiáná upu-upuna to mewaliꞌ iti napailalu Maria hai napekiri oaꞌ.

²⁰ Roo onoꞌ, topoewu iti mesuleꞌmoheꞌ lao i pádá poewuáraꞌ. I tangaꞌ rárá, motóiá hai mampomahileheꞌ Pueꞌ Ala, láwiꞌ upu-upu to rahádi hai to raita, toꞌu-toꞌu mewaliꞌ hintotoꞌ hai apa to napahaweꞌáheꞌ malaꞌeka.

Iesu rahangaꞌ hai rapeweꞌi i Pueꞌ Ala

²¹ Gáná miꞌi haminggu tinuwuꞌNa, Ánángkóiꞌ iti ratileꞌ mouláꞌ ádáraꞌ toIahudiꞌ, hai rahangaꞌ Iesu mouláꞌ popahaweꞌna malaꞌeka hangko tiꞌara mani nakákáleáꞌánga ináNa.

²² I tempó popamagasaꞌna Maria hangko i poánáꞌna, hintotoꞌ hai áturá to teukiꞌ i Paturoꞌna Musa, tosaena Iesu moánti Ánáꞌraꞌ iti lao i Támbina Pueꞌ Ala i Ierusale bona rapeweꞌi i Pueꞌ Ala,

²³ láwiꞌ teukiꞌ miꞌi i lalu Sura Áturána Pueꞌ node: “Upu-upu ánángkóiꞌ tobaleilo towutuꞌ hangaa-ngaa rapeweꞌi i Pueꞌ Ala bona mewaliꞌ taunáNa.”

²⁴ Hai moántiheꞌ woꞌo popenómbáraꞌ nodo to tepakanótó i lalu Sura Áturána Pueꞌ, ia miꞌi: hamboko tádáhi manggebodoꞌ ba rombaꞌa ánáꞌ tádáhi kokou.

Simeoꞌ hai Hana

^25-26 I Ierusale, ara hadua tauna to rahangaꞌ Simeoꞌ. Ia hadua to manótó hai mengkoruꞌ i Pueꞌ Ala, hai napoinálái kaꞌina haweꞌna tempóna Pueꞌ Ala {ina mohuoꞌ Datu Topehómpóꞌ bona} mampelae toSáráeliꞌ. Hai ia naporángá Inao to Magasaꞌ to mampopaisáꞌá katiꞌárána ina mate ane tiꞌara maniꞌi moita Datu Topehómpóꞌ to nadándi Pueꞌ Ala.

²⁷ Inao to Magasaꞌ mokale i laluna Simeoꞌ, haneꞌi ia lao i Támbina Pueꞌ Ala. I tempóraꞌ Iusupu hai Maria moánti Iesu bona rapeweꞌi i Pueꞌ Ala mouláꞌ Paturoꞌna Musa,

²⁸ Simeoꞌ moala Ánángkóiꞌ iti, naꞌawi haneꞌi motóiá Pueꞌ Ala, nauliꞌ:

²⁹ “Ó Pueꞌ, deꞌe-deꞌe peisámoꞌ mate i katinda lalu, láwiꞌ Nubukeki miꞌi dándiMu.

³⁰ Kuita mpuꞌu miꞌi Ánángkóiꞌ deꞌe, Datu Topehómpóꞌ to Nuhuoꞌ mai,

³¹ to Nupatimama bona mohómpóki upu-upu tauna hangko i huku dósá.

³² Datu Topehómpóꞌ deꞌe nodo pewangkaꞌ láwiꞌ Ia ina mopakanótó apa to toꞌu mokana i Hio i tauna to tiꞌara toSáráeliꞌ bona raisáKoꞌ, Pueꞌ. Hai ánti kaꞌIana, taunáMu toSáráeliꞌ ina rapomahile.”

³³ Tingkáráꞌheꞌ Maria hai Iusupu mohádi laluitana Simeoꞌ kana i Ánáꞌraꞌ.

³⁴ Roo onoꞌ, Simeoꞌ mowátiꞌheꞌ hai mampolaluitaꞌá Maria, “Ánti kahaweꞌna miꞌi Ánáꞌmu deꞌe, handaꞌ toSáráeliꞌ ina molámbiꞌ pehuku, agáiáná handaꞌ woꞌo tauna ina molámbiꞌ katehómpóꞌ. Ia miꞌi to napileꞌi hai nahuoꞌ mai Pueꞌ Ala {bona motudeꞌá i tauna apa to toꞌu}, agáiáná Ia ina raewaꞌ handaꞌ tauna,

³⁵ bona ina tongawaꞌ apa to ara i lalu pekiriraꞌ. Hai io Maria, kawiorana lalumu ina nodo to natohuꞌ pihoꞌ to mataru.”

^36-37 I Támbina Pueꞌ Ala, ara woꞌo hadua nabiꞌ towawine to rahangaꞌ Hana. Ia miꞌi ánáꞌna Panueli, pemuleꞌána Asere. Hana iti, uwalu miꞌi puloꞌna hai iba parena tinuwuꞌna. Hangkoia ara toámána, agáiáná pitu peá parena hambokoheꞌ, mate miꞌi toámána. Mantepuꞌu i tempó iti, ia bembaꞌ hai alo-alona lao menómbá i Támbina Pueꞌ Ala. Alo-alona hai wengi-wengina Hana mekakae hai mopuasaꞌ.

³⁸ I kamoitána Iesu i Támbina Pueꞌ Ala, ia motóiá Pueꞌ Ala, hai napolaluita woꞌo kana i Ánángkóiꞌ iti i upu-upu tauna to mampegiá karakábáhána toIerusale hangko i ewáliraꞌ, {iamoheꞌ toRoma}.

Iusupu hai Maria mesuleꞌ lao i Nasare

³⁹ Karooraꞌ Iusupu hai Maria mampeuláꞌi upu-upu áturá to teukiꞌ i lalu Áturána Pueꞌ, mesuleꞌmoheꞌ lao i wánuá Nasare i tampoꞌ Galilea.

⁴⁰ Ánáꞌraꞌ iti kamahile-hileá hai kamaróhó-róhóá. Manótó ntepuꞌu laluNa, hai nawátiꞌ Pueꞌ Ala.

Iesu i Támbina Pueꞌ Ala

⁴¹ Pare-parena, inána hai umána Iesu laoheꞌ i Ierusale bona mouláꞌheꞌ Alo Posusa Paska, alo mahileraꞌ toIahudiꞌ.

⁴² Gáná miꞌi hampuloꞌ hai rompare tinuwuꞌna Iesu, laomoheꞌ tosaeNa i posusa iti nodo kabiásáꞌáraꞌ, hai Iesu woꞌo raꞌánti.

⁴³ Kaupuraꞌ mouláꞌ alo mahile iti, pohuꞌmoheꞌ ina mesuleꞌ lao i Nasare wánuáraꞌ, agáiáná Iesu tiꞌara meuláꞌ i hira. Ia ara mani i Ierusale, agáiáná tiꞌara raisá tosaeNa.

⁴⁴ Rapekiri peá aranto hingkakani hai rángáraꞌ hampopolumaoá. Hangaloámoheꞌ molumao hangko lao riꞌi rapeliꞌ i rángáraꞌ hai halaluraꞌheꞌ.

⁴⁵ Ánti katiꞌárána ralámbiꞌ, mesuleꞌ wopaheꞌ lao i Ierusale mampeliꞌ oaꞌ Iesu.

⁴⁶ I katáluna alona karapeliꞌNa hangko ralámbiꞌ riꞌi i tangabaa Támbina Pueꞌ Ala. Iesu tangaꞌNa mehoda i oloꞌraꞌ guru-guru agama, mampehádingi polaluitaraꞌ, hai mekuneꞌ woꞌo i hira.

⁴⁷ Tingkáráꞌheꞌ upu-upu tauna to mohádi polaluitaNa hai rauliꞌ, “Mapánde ntepuꞌu Ánángkóiꞌ iti. Handaꞌ to Naisá!”

⁴⁸ Karaitána peá iti Iesu, tingkáráꞌmoheꞌ ináNa hai umáNa. Nauliꞌ ináNa, “Ánáꞌkuꞌ, moapa riꞌi haneꞌi noꞌonoꞌ bábehiáMu? Kódóꞌ hai umáMu, mapári kihádi mampeliꞌKoꞌ!”

⁴⁹ Agáiáná nahániki Iesu, Nauliꞌ, “Moapa riꞌi haneꞌiAꞌ nipeliꞌ? Tiꞌara paꞌi niꞌisá, Kódóꞌ hangaa-ngaa araꞌAꞌ i lalu támbina UmáNgkuꞌ?”

⁵⁰ Agáiáná tiꞌara raisá tunggáiána laluitana Iesu iti.

⁵¹ Roo onoꞌ, mesuleꞌmoheꞌ hingkakani lao i Nasare, hai Iesu mengkoruꞌ i hira. Upu-upu to mewaliꞌ iti, napailalu peá ináNa.

⁵² Iesu kamahile-hileá, hai kamanótó-nótóá laluNa. Ia napokagóeꞌ Pueꞌ Ala, hai rapokagóeꞌ woꞌo tauna.