Lukasi 18 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌ pándiriꞌ kana i hadua topobutusi hai hadua tobembaꞌ

¹ Roo onoꞌ, Iesu mopahaweꞌ hampákáꞌ ngkóráꞌ pándiriꞌ i topeguruNa bona mekakaeheꞌ oaꞌ hai ineeꞌ luleꞌ.

² Nauliꞌ, “I hambuaꞌ wánuá, ara hadua topobutusi to tiꞌara mengkoruꞌ i Pueꞌ Ala, hai tiꞌara woꞌo mobiláꞌ ba heáná peá.

³ I wánuá iti, ara woꞌo hadua towawine to bembaꞌ. Handaꞌ miꞌi kánina paka lao i topobutusi mopahaweꞌ kárá-kárána, nauliꞌ, ‘Nutulungiaꞌ wongkódóꞌá hangko i ewálingkuꞌ.’

⁴ Marue miꞌi topobutusi iti tiꞌara mau motulungi tobembaꞌ iti, agáiáná kahópóꞌána nauliꞌ i laluna, ‘Kehapiꞌaꞌ tiꞌara mengkoruꞌ i Pueꞌ Ala hai tiꞌaraꞌaꞌ mobiláꞌ ba heáná peá,

⁵ agáiáná ánti kahaweꞌna oaꞌ tobembaꞌ iti mai metunggái, rángina miꞌi kubutusi kárá-kárána, láwiꞌ ane tiꞌara kutulungi, ina mosalempori peaꞌ oaꞌ láwiꞌ ia ina mai oaꞌ i kódóꞌ.’ ”

⁶ Roo onoꞌ, nauliꞌ Pueꞌ Iesu, “Nipailalu apa to nauliꞌ topobutusi iti. Kehapiꞌ tiꞌara manótó laluna, agáiáná kahópóꞌána naundeꞌ motulungi tobembaꞌ iti.

⁷ Noꞌonoꞌ woꞌo, Pueꞌ Ala ina motulungikou to Napileꞌi mewaliꞌ taunáNa, ane meraruaꞌkou oaꞌ i Hia membiáꞌ tulungi, maroꞌa káindi ba mabaa. Timama miꞌi oaꞌ Pueꞌ Ala motulungikou.

⁸ Bateꞌna ina hawiáꞌ kaNatulungimi. Agáiáná ane haweꞌ huleꞌ Ánáꞌ Mánusiá i duniáꞌ deꞌe, ba ina Nalámbiꞌ tauna to mepoinálái mani i Hia?”

Ngkóráꞌ pándiriꞌ kana i toParisi hai toperóróꞌ ásele

⁹ Roo onoꞌ, Iesu mopahaweꞌ wopiꞌi ngkóráꞌ pándiriꞌ deꞌe i tauna to maꞌángkáꞌ láwiꞌ rapekiri hira peá to manótó i peitána Pueꞌ Ala. Mewaliꞌ raundeꞌ peá mopakóiꞌ tauna ntániꞌna.

¹⁰ Nauliꞌ Iesu, “Ara rodua tauna to lao i Támbina Pueꞌ Ala bona mekakaeheꞌ. Hadua toParisi, hai hadua toperóróꞌ ásele.

¹¹ ToParisi iti meángkáꞌ hai mekakae, nauliꞌ, ‘Kuꞌuliꞌ handaꞌ kamaroꞌana i Hio Pueꞌ, láwiꞌ tiꞌaraꞌaꞌ nodo tauna ntániꞌna to manako, to motengkoꞌ laluraꞌ, ba to mebualosi. Kuꞌuliꞌ handaꞌ kamaroꞌana i Hio, láwiꞌ tiꞌaraꞌaꞌ tauna to madósá nodo toperóróꞌ ásele doꞌo.

¹² Mopuasaꞌaꞌ rongkani i laluna haminggu, hai hanggáláꞌ hampuloꞌ kuweꞌiKoꞌ hangko i upu-upu polámbiꞌángkuꞌ.’

¹³ Agáiáná toperóróꞌ ásele iti, meángkáꞌ peá ngkaraoꞌ, hai tiꞌara pebáiꞌ mengoaꞌ i langiꞌ. Ánti kanaisána dósána, ia motápáꞌ-tápáꞌ pondána tandaꞌ penosoꞌna, nauliꞌ, ‘Ó Pueꞌ Ala! Nupokaꞌahiꞌaꞌ wongkódóꞌá, láwiꞌ kódóꞌ deꞌe tauna to madósáꞌaꞌ!’ ”

¹⁴ Hangko ionoꞌ, napahópóꞌ Iesu laluitaNa, Nauliꞌ, “Toꞌu ntepuꞌu to Kuhángáꞌákou: i pesuleꞌraꞌ i támbiraꞌ, toperóróꞌ ásele iti to natarima Pueꞌ Ala hai Narekeꞌ tauna to manótó i peitáNa, agáiáná toParisi iti, tiꞌara natarima Pueꞌ Ala. Láwiꞌ heáná to mampepemahile, ina napaiwóiꞌ Pueꞌ Ala. Hai heáná to mengkaiwóiꞌ, ina napomahile Pueꞌ Ala.”

Iesu mowátiꞌ ánángkóiꞌ

¹⁵ Araheꞌ woꞌo tauna to moánti ánáꞌraꞌ i Iesu bona Napekamaꞌheꞌ hai Nawátiꞌheꞌ. Karaitána topeguruNa apa to rabábehi tauna iti, rakámbáróáheꞌ.

¹⁶ Agáiáná Iesu mokióꞌheꞌ ánángkóiꞌ iti, hai Nahángáꞌáheꞌ topeguruNa, “Nipatodáhiheꞌ ánángkóiꞌ iti mai i Kódóꞌ. Ineeꞌheꞌ nikóntó, láwiꞌ tauna to nodo ánángkóiꞌ deꞌe, ina mewaliꞌheꞌ taunána Pueꞌ Ala i lalu popárentáNa.

¹⁷ Toꞌu ntepuꞌu laluitaNgkuꞌ deꞌe: Pueꞌ Ala ina mepárentá i laluraꞌ tauna to mopaisarenga katueꞌraꞌ i Hia, nodo ánángkóiꞌ to mopaisarenga katueꞌna i tosaena.”

Maꞌángkárá ntepuꞌu i topebuku mewaliꞌ taunána Pueꞌ

¹⁸ Ara hadua tadulakoraꞌ toIahudiꞌ to mekuneꞌ i Iesu, nauliꞌ, “Guru to maroꞌa! Apa to hangaa-ngaa kubábehi bona molámbiꞌaꞌ katueꞌ to maroꞌa to tiꞌara mokahópóꞌá?”

¹⁹ Nauliꞌ Iesu i tauna iti, “Moapa riꞌi haneꞌi nuꞌuliꞌ Kódóꞌ deꞌe to maroꞌaꞌAꞌ? Tiꞌara ara hadua to maroꞌa, bateꞌna peá Pueꞌ Ala.

²⁰ {Agáiáná ina Kuhániki pekuneꞌmu.} Nuisá miꞌi hawaꞌ to teukiꞌ i lalu Hawaꞌna Musa: Ineeꞌ mebualosi, ineeꞌ mepapate, ineeꞌ manako, ineeꞌ mosabiki dongkoꞌ, nubiláꞌ inámu hai umámu.”

²¹ Nauliꞌ tauna iti, “Upu-upu hawaꞌ iti, kupeuláꞌi miꞌi hangko i kamaleheꞌkuꞌ mani.”

²² Kanahádina Iesu laluitana, Nauliꞌ, “Ara mani hampákáꞌ to hangaa-ngaa nubábehi. Laomokoꞌ sieruꞌ mampobaluꞌ upu-upu párewámu, hai dóiꞌ hólóna nugáláꞌ-gáláꞌáheꞌ tauna to meahiahiꞌ tueꞌraꞌ. Ane nubábehiꞌi noꞌonoꞌ, ina mahile háwángina to nulámbiꞌ i lalu surugáꞌ. Roo onoꞌ, maimokoꞌ meuláꞌ i Kódóꞌ.”

²³ Kanahádina tauna topebuku iti polaluitana Iesu, masusa miꞌi laluna láwiꞌ handaꞌ ntepuꞌu tampoꞌna hai párewána.

²⁴ Kamasusana laluna tauna iti naisá miꞌi Iesu, haneꞌi Natótói, Nauliꞌ, “Maꞌángkárá ntepuꞌu tauna to pebuku mewaliꞌ taunána Pueꞌ Ala i lalu popárentáNa.

²⁵ Madoli mani hambaꞌa untá mesuaꞌ i lalu kalolu daru haneꞌi topebuku mewaliꞌ taunána Pueꞌ Ala i lalu popárentáNa.”

²⁶ Upu-upu tauna to mohádi laluitana Iesu tingkáráꞌheꞌ {láwiꞌ rapekiri tauna topebuku nawátiꞌ Pueꞌ Ala}, onoꞌ miꞌi haneꞌi mekuneꞌheꞌ i Iesu, rauliꞌ, “Ane tauna topebuku tiꞌara peisá mewaliꞌ taunána Pueꞌ Ala, apa mani tauna ntániꞌna! Heáná paꞌi to nabuku molámbiꞌ katueꞌ to maroꞌa to tiꞌara mokahópóꞌá?”

²⁷ Nahániki Iesu, “Tiꞌara ara to peisá nabábehi tauna bona mewaliꞌheꞌ taunána Pueꞌ Ala. Agáiáná Pueꞌ Ala peá to peisá mohómpóki dósá tauna.”

²⁸ Hangko ionoꞌ, nauliꞌ Peturuꞌ, “Noumbámongkaiꞌ? Kipálehi miꞌi hinángkáꞌna bona meuláꞌangkaiꞌ i Hio.”

²⁹ Nauliꞌ Iesu i topeguruNa, “Bona niꞌisá: heáná to mopálehi támbina, ba toinána ba halaluna ba tosaena ba ánáꞌna, ánti pampopolumaona bágóꞌna Pueꞌ Ala,

³⁰ bateꞌna ina molámbiꞌ i duniáꞌ deꞌe handaꞌ kánina háwángina hangko i upu-upu to napálehi, hai i alo to ina haweꞌ ina molámbiꞌ woꞌo katueꞌ to maroꞌa to tiꞌara mokahópóꞌá.”

Katáluna kánina Iesu mampolaluita kana i kaꞌina mateNa

³¹ Hangkani tempó, Iesu mokióꞌmoheꞌ topeguruNa to hampuloꞌ hai rodua hai Narámpu i kaꞌaraꞌá to tepataniꞌ, haneꞌi Nahángáꞌáheꞌ, “Nipehádingi maroꞌa! Deꞌe-deꞌe tangaꞌtaꞌ lao i Ierusale. I kótá iti, upu-upu to raukiꞌ nabiꞌ-nabiꞌ kana i Ánáꞌ Mánusiá ina tebukeki.

³² Ánáꞌ Mánusiá ina rahuhuꞌ i tauna to tiꞌaraheꞌ toIahudiꞌ. Ina rasasalaꞌi, rapakóiꞌ, hai ratitinuduhi.

³³ Ina rahepe hai gulaꞌ, hai kahópóꞌána ina rapapate. Agáiáná i katáluna alona, Ia ina tueꞌ huleꞌ.”

³⁴ Agáiáná tiꞌara raisá topeguruNa tunggáiána Iesu, láwiꞌ lempóna laluitaNa tewuniángi mani i hira.

Iesu mopakauriꞌ hadua tobilo i kótá Ieriko

³⁵ Iesu hai tauna to meuláꞌ i Hia, hungkuꞌmoheꞌ i kótá Ieriko. Ionoꞌ, ara hadua tobilo to mehoda i wiwi rárá membiáꞌ-mbiáꞌ.

³⁶ I kanahádina tauna to handaꞌ moliu, ia mekuneꞌ, nauliꞌ, “Apa riꞌi to pewaliꞌ?”

³⁷ Rahániki tauna to handaꞌ, “Iesu toNasare moliu!”

³⁸ Kanahádina tobilo iti laluitaraꞌ, meraruaꞌ, nauliꞌ, “Iesu! Pemuleꞌána Datu Daudiꞌ! Nupokaꞌahiꞌaꞌ!”

³⁹ Agáiáná ia rakabukoꞌi tauna to molumao ioru, rauliꞌ “Maniiꞌkoꞌ!” Tobilo iti mekióꞌ-kióꞌ peá napasimbuku, nauliꞌ, “Pemuleꞌána Datu Daudiꞌ! Nupokaꞌahiꞌaꞌ wongkódóꞌá!”

⁴⁰ Mengkaroo miꞌi Iesu haneꞌi mohuoꞌ tauna, Nauliꞌ, “Niánti mai tauna to bilo iti!” Raꞌánti mpuꞌu miꞌi lao i Iesu, hai Iesu mekuneꞌ i hia, Nauliꞌ,

⁴¹ “Apa to nuꞌundeꞌ Kubábehi i hio?” Nahániki tobilo iti, “Pueꞌ, kuꞌundeꞌ, wongkódóꞌá, bona meitaꞌaꞌ!”

⁴² Nauliꞌ Iesu, “Meitamokoꞌ! Ánti pepoináláimu i Kódóꞌ, haneꞌikoꞌ mauriꞌ.”

⁴³ Kásáliu meita. Hangko ionoꞌ, ia meuláꞌ i Iesu hai motóiá Pueꞌ Ala. Hai upu-upu tauna to moita apa to pewaliꞌ iti, motóiáheꞌ woꞌo Pueꞌ Ala.