Lukasi 17 - Sura Magasaꞌ: Bahangapa sura Pototowiá to Sae hai Pototowiá to Woꞌu

Bahangapa pákáꞌna paturoꞌna Iesu

¹ Roo onoꞌ, nauliꞌ Iesu i topeguruNa, “Tauna bateꞌna ina rakeloꞌ bona madósá, agáiáná hurewuꞌ ntepuꞌuheꞌ tauna to mopaꞌara pekeloꞌ iti!

² Ina rumihi pehuku to nalámbiꞌ hangko i Pueꞌ Ala. Rángina miꞌi hambuaꞌ watu pogiliá to mahile ratóe i tambólóna hai ia ratibe i lalu tahiꞌ, haneꞌi mopakanawoꞌ hadua tauna to tiꞌara maróhó pepoináláina, álána tiꞌara piꞌi mepoinálái i Kódóꞌ.

³ Onoꞌ miꞌi haneꞌi hangaa-ngaa maroꞌa-roꞌakou mokámpái bábehiámi haduduámi! Ane halalumi mobábehi salaꞌ, hangaa-ngaa nikámbáróá. Hai ane tebáliki miꞌi laluna, hangaa-ngaa niámpungi.

⁴ Ane halalumi mobábehi salaꞌ i kómu, kehapiꞌ miꞌi pitu kánina i lalu hangaloá, hai pitu woꞌo kánina lao membiáꞌ ámpu i kómu, hangaa-ngaa niámpungi.”

⁵ Rauliꞌ suroNa, “Pueꞌ, Nupakaróhó pepoináláingkiꞌ!”

⁶ Nahániki Iesu, “Ane rápáꞌna ara miꞌi pepoináláimi, kehapiꞌ nodo peá kamahilena lihu duiꞌá, peisá nihángáꞌá kau to mahile deꞌe, ‘Ee, kau! Marebuꞌmokoꞌ hangko i katueꞌámu, hai melimbákoꞌ i tahiꞌ!’ hai bateꞌna ina mewaliꞌ hintotoꞌ hai hawaꞌmi.”

Pambiárána hawiꞌ

⁷ Iesu mopaliliu wopiꞌi laluitaNa hai ngkóráꞌ pándiriꞌ deꞌe, Nauliꞌ, “Rápáꞌna, ane ara hadua hangko i oloꞌmi to ara hawiꞌna, hai hawiꞌ iti lao mobágóꞌ i hinoe ba moewu binataꞌmi, apa to ina nihángáꞌá i pesuleꞌna hangko i pobágóꞌána? Ba ina niuliꞌ, ‘Maimokoꞌ mandeꞌ’?

⁸ Manótó tiꞌara! Ngkáliꞌna riꞌi, ina niuliꞌ node: ‘Mempaháwákoꞌ sieruꞌ, haneꞌi nupatimama pandeꞌkuꞌ, hai nupegiá miꞌi sieruꞌ kaupungkuꞌ mandeꞌ hai mainu hangko peisárakoꞌ mandeꞌ.’

⁹ Tiꞌara paraluu niuliꞌ handaꞌ kamaroꞌana i hawiꞌ iti ánti pampeuláꞌina peá hawaꞌmi.

¹⁰ Noꞌonoꞌ woꞌo kómu. Ane nipeuláꞌi miꞌi upu-upu párentána Pueꞌ Ala, hangaa-ngaa niuliꞌ, ‘Kaiꞌ deꞌe, huoꞌá biásá peangkaiꞌ. Kipeuláꞌi peá apa to nahawaꞌáꞌangkaiꞌ Pueꞌkiꞌ.’ ”

Iesu mopakauriꞌ hampuloꞌ tauna to ketánggáꞌ

¹¹ I polumaoraꞌ lao i Ierusale, Iesu hai topeguruNa mouláꞌ parailiꞌraꞌ tampoꞌ Samaria hai Galilea.

¹² Kahaweꞌraꞌ i hambuaꞌ wánuá, araheꞌ hampuloꞌ tauna to ketánggáꞌ to lao mampohidupaꞌá Iesu, agáiáná meángkáꞌheꞌ i kakaraoꞌána, hai mekióꞌ-kióꞌheꞌ,

¹³ rauliꞌ, “Iesu! Tuá! Nupokaꞌahiꞌ wongkaiꞌkaa!”

¹⁴ KaNahádina pekióꞌraꞌ iti, Iesu motótóiheꞌ haneꞌiheꞌ Nahángáꞌá, “Laomokou nipetudeꞌá wátámi i tadulako menómbá, bona ia mopáresáꞌ hai mopakanótó kamauriꞌna miꞌi hakiꞌmi.” Lao mpuꞌumoheꞌ. Tangaꞌraꞌ molumao, mauriꞌ miꞌi hakiꞌraꞌ.

¹⁵ Hadua hangko i oloꞌraꞌ tauna to hampuloꞌ iti, i kanaisána kamauriꞌna miꞌi, ia mesuleꞌ lao i Iesu, haneꞌi nauliꞌ napasimbuku, “Kutóiá miꞌi Pueꞌ Ala, láwiꞌ mauriꞌmoꞌ!”

¹⁶ Ia molingkudu motóngkóꞌ i bitina Iesu, hai manguliꞌ handaꞌ kamaroꞌana i Hia. Tauna iti ia miꞌi hadua toSamaria.

¹⁷ Roo onoꞌ, nauliꞌ Iesu i upu-upu tauna to meuláꞌ i Hia, “Tiꞌaraheꞌ paꞌi hampuloꞌ to Kupakauriꞌ? Iumbámoheꞌ rángána to hahioꞌ?

¹⁸ Moapa riꞌi haneꞌi hadua peá to mesuleꞌ mai i Kódóꞌ manguliꞌ handaꞌ kamaroꞌana i Pueꞌ Ala, mole riꞌi ia tiꞌara toIahudiꞌ?”

¹⁹ Hangko ionoꞌ, nauliꞌ wopiꞌi Iesu i tauna iti, “Ánti pepoináláimu i Kódóꞌ, haneꞌikoꞌ mauriꞌ, mewaliꞌ meángkáꞌmokoꞌ, hai mesuleꞌmokoꞌ.”

Popárentána Pueꞌ Ala

²⁰ Bahangapa toParisi mekuneꞌheꞌ i Iesu, ba impirái kaꞌina haweꞌna popárentána Pueꞌ Ala i duniáꞌ. Nahániki Iesu, “Tiꞌara ara tandaꞌ-tandaꞌ to peisá raita tauna i kahaweꞌna popárentána Pueꞌ Ala i duniáꞌ.

²¹ Noꞌonoꞌ woꞌo, tiꞌara ara tauna to ina manguliꞌ, ‘Peita, ara ieneꞌ!’ ba, ‘Peita, ara indoraoꞌ!’ láwiꞌ popárentána Pueꞌ Ala ara miꞌi i oloꞌmi.”

²² Roo onoꞌ, nauliꞌ Iesu i topeguruNa, “Ina haweꞌ tempóna nipoinao ntepuꞌu moita Ánáꞌ Mánusiá, kehapiꞌ hangalo peá, agáiáná tiꞌara ina niꞌita.

²³ I tempó iti, ara woꞌo tauna to ina mohángáꞌákou, ‘Peita, Ánáꞌ Mánusiá!’ Ara woꞌo to ina manguliꞌ, ‘Ia ara ieneꞌ!’ Agáiáná ineeꞌkou lao ionoꞌ, hai ineeꞌkou woꞌo meuláꞌ i hira!

²⁴ Láwiꞌ ane haweꞌ huleꞌ Ánáꞌ Mánusiá, ina tongawaꞌ ntepuꞌu. KahaweꞌNa ina raita nodo pewangkaꞌ kiláꞌ to mowangkaꞌi humalele langiꞌ.

²⁵ Agáiáná hangko tiꞌara mani haweꞌ huleꞌ, Ia hangaa-ngaa mantódihá handaꞌ kapári hai tiꞌara ina ratarima tauna to tueꞌ deꞌe-deꞌe.

²⁶ Apa to mewaliꞌ hangkoia i tempóna nabiꞌ Noho tueꞌ mani, ina mewaliꞌ woꞌo i alo kahaweꞌána huleꞌ Ánáꞌ Mánusiá.

²⁷ I tempóna nabiꞌ Noho, tauna mampomaleꞌaheꞌ, tiꞌara raisá apa to ina merampe. Mandeꞌ hai mainuheꞌ oaꞌ, mosambokoheꞌ hai mosusaheꞌ. Noꞌonoꞌ katueꞌraꞌ duuꞌna haweꞌ tempóna nabiꞌ Noho mesuaꞌ i lalu duanga to mahile. Hangkaꞌ-hangkaꞌ perái, upu-upuheꞌ nalábóꞌ uwai hai mate humpu.

²⁸ Noꞌonoꞌ woꞌo kamampomaleꞌaraꞌ tauna i kótá Sodomo i tempóna Loꞌoti toroꞌ ionoꞌ. Mandeꞌheꞌ oaꞌ hai mainu-inuheꞌ, mobaluꞌ-baluꞌheꞌ, mowiáꞌheꞌ hai moaróheꞌ támbi.

²⁹ Agáiáná i kapohuꞌna Loꞌoti hangko i kótá Sodomo, hangkaꞌ-hangkaꞌ perái udá api hai watu belerang to moawaa mendáulu hangko i langiꞌ, onoꞌ miꞌi haneꞌi maropuꞌheꞌ upu-upu.

³⁰ Noꞌonoꞌ woꞌo kamampomaleꞌaraꞌ tauna i tempóna Ánáꞌ Mánusiá ina haweꞌ huleꞌ i duniáꞌ.

³¹ I alo iti, heáná peá tauna to mehoda i atuꞌ to hirante, ineeꞌheꞌ lebaꞌ mesuaꞌ i lalu támbi moala párewáraꞌ. Noꞌonoꞌ woꞌo tauna to i hinoe, ineeꞌheꞌ lebaꞌ mesuleꞌ lao i wánuá moala ba apa-apa. Hangaa-ngaa liliuheꞌ melangka!

³² Nibuhinao apa to mewaliꞌ i toinána Loꞌoti!

³³ Heáná peá to moundeꞌ mopári-pári mampelae katueꞌna, ia tiꞌara ina molámbiꞌ katueꞌ to maroꞌa to tiꞌara mokahópóꞌá, hai heáná peá to mate ánti pepoináláina, ia ina molámbiꞌ katueꞌ to maroꞌa to tiꞌara mokahópóꞌá.

³⁴ Toꞌu ntepuꞌu to Kuhángáꞌákou: i alo kahaweꞌáNgkuꞌ, rodua to maturu i hambuaꞌ lintuꞌ, hadua ina raꞌala hai to haduána rapálehi.

³⁵ Noꞌonoꞌ woꞌo, rodua towawine tangaꞌraꞌ mombau, hadua ina raꞌala hai to haduána rapálehi. [

³⁶ Noꞌonoꞌ woꞌo ane rodua tauna ina mobágóꞌ hingkakani i hinoe, hadua ina raꞌala hai to haduána rapálehi.]”

³⁷ Karoona Iesu molaluita, mekuneꞌheꞌ topeguruNa i Hia, rauliꞌ, “Pueꞌ, ane haweꞌKoꞌ huleꞌ, iumbá pewaliꞌána?” Nahánikiheꞌ Iesu, Nauliꞌ, “Ane moitakou tádáhi kaaꞌ hirámpu, niꞌisá kaꞌárána to mate ionoꞌ. Noꞌonoꞌ woꞌo, ina tongawaꞌ ntepuꞌu kahaweꞌKuꞌ huleꞌ i duniáꞌ.”