Lukasi 13 - Sura Magasaꞌ: Bahangapa sura Pototowiá to Sae hai Pototowiá to Woꞌu

Menosoꞌ hangko i dósá

¹ I tempó iti, araheꞌ tauna to mopahaweꞌ i Iesu kana i bahangapa toGalilea to napapate Pilatu tangaꞌraꞌ mohuhuꞌ popenómbáraꞌ i Pueꞌ Ala.

² Kanahádina Iesu laluitaraꞌ, Nauliꞌ, “Ba nipekiri rárá kamateraꞌ toGalilea iti ánti kamelumbuꞌna dósáraꞌ hangko i dósáraꞌ upu-upu tauna ntániꞌna i Galilea?

³ Tiꞌara! Agáiáná, ane tiꞌarakou menosoꞌ hangko i dósámi, bateꞌna woꞌo ina molámbiꞌkou pehuku haweꞌ i rue-ruena.

⁴ Ara woꞌo hampuloꞌ hai uwalu tauna to mate láwiꞌ nadungkángi támbi peántóꞌá i Siloa to ara i kótá Ierusale. Ba nipekiri rárá kamateraꞌ iti ánti kamelumbuꞌna dósáraꞌ hangko i dósáraꞌ upu-upu tauna ntániꞌna i Ierusale?

⁵ Tiꞌara! Agáiáná, ane tiꞌarakou menosoꞌ hangko i dósámi, bateꞌna woꞌo ina molámbiꞌkou pehuku haweꞌ i rue-ruena.”

Ngkóráꞌ pándiriꞌ kana i kau ara to tiꞌara mowuaꞌ

⁶ Roo onoꞌ, napaliliu miꞌi Iesu laluitaNa hai ngkóráꞌ pándiriꞌ deꞌe, Nauliꞌ, “Ara hadua tauna to motudaꞌ kau ara i hinoena. Hangkani tempó, lao miꞌi pueꞌ hinoe iti bona mampeita ba ara wuaꞌna. Agáiáná tiꞌara haweꞌ hambuaꞌ wuaꞌna to nalámbiꞌ.

⁷ Onoꞌ miꞌi haneꞌi nauliꞌ pueꞌ hinoe iti i topokádipurá hinoena, ‘Peita, i lalu tálu parena, pakaꞌaꞌ mai mopáresáꞌ kau deꞌe, agáiáná tiꞌara haweꞌ hambuaꞌ wuaꞌna to kulámbiꞌ. Mewaliꞌ, nutiwi pemiꞌi! Apa bunduꞌna tueꞌ ieneꞌ, mopaupu peá kamaruduꞌna tampoꞌ?’

⁸ Agáiáná nahániki topokádipurá hinoena, ‘Pueꞌ, nupatodáhi mani tueꞌ hampare. Ina kukalemohi tóáꞌna, hai ina kuawui tóáꞌna bona maruduꞌ.

⁹ Babilaꞌ pare mai ina mowuaꞌ, agáiáná ane tiꞌara, hangko kutiwi riꞌi.’ ”

Iesu mopakauriꞌ hadua towawine to bungkuꞌ i alo penómbáꞌá

¹⁰ Hangkani tempó i alo Satu, alo penómbáꞌáraꞌ toIahudiꞌ, Iesu mepaturoꞌ i támbi penómbáꞌá.

¹¹ Ionoꞌ, ara hadua towawine to hampuloꞌ miꞌi hai uwalu parena maduꞌa, láwiꞌ napesuaꞌi setáꞌ. Towawine iti bungkuꞌ, tiꞌara nabuku meángkáꞌ tindáꞌ.

¹² Kanaitána Iesu towawine iti, Nakióꞌ mai haneꞌi Nahángáꞌá, “Inaꞌ, tekábáhámokoꞌ hangko i hakiꞌmu.”

¹³ Roo onoꞌ, Napekamaꞌ miꞌi towawine iti, kásáliu manoroꞌ miꞌi peángkáꞌna, haneꞌi motóiá Pueꞌ Ala.

¹⁴ Agáiáná tadulako támbi penómbáꞌá to ionoꞌ mabukoꞌ láwiꞌ Iesu mopakauriꞌ tauna i alo penómbáꞌá. Onoꞌ miꞌi haneꞌi nauliꞌ i tauna to ara ionoꞌ, “Peisákeꞌ mobágóꞌ ini alona, hai i alo iti, peisákou mai membiáꞌ rapakauriꞌ, ineeꞌ i alo penómbáꞌá!”

¹⁵ Nahániki Pueꞌ Iesu, “Kómu, mampe to maroꞌa pekou! Tiꞌara paꞌi toꞌu, kehapiꞌ alo penómbáꞌá, kómu upu-upu mokábáhákou gapiꞌmi hai dárámi hangko i gimpu bona niánti lao nipopainu?

¹⁶ Ane noꞌonoꞌi, hibali hai apa to pewaliꞌ ininá. Towawine deꞌe pemuleꞌána Burahima to hampuloꞌ miꞌi hai uwalu parena natakaꞌ Datu Tokadake. Tiꞌara paꞌi hintotoꞌ ane towawine deꞌe rakábáhá woꞌo i alo penómbáꞌá hangko i karatakaꞌna?”

¹⁷ I tempóna Iesu manguliꞌ noꞌonoꞌ, upu-upu ewáliNa mahiliheꞌ, agáiáná tauna to handaꞌ mampokagóeꞌ upu-upu tandaꞌ kuasaꞌ to nabábehi Iesu iti.

Ngkóráꞌ pándiriꞌ kana i lihu to marámbóꞌ ntepuꞌu hai ragiꞌ

^18-19 Iesu mopaliliu wopiꞌi laluitaNa, Nauliꞌ, “Ane Pueꞌ Ala mantepuꞌu mepárentá i duniáꞌ, noumbá pewaliꞌna? Popárentána Pueꞌ Ala peisá rapándiriꞌ nodo lihu to marámbóꞌ ntepuꞌu, rápáꞌna nodo lihu duiꞌá to naꞌala hadua tauna, haneꞌi natudaꞌ. Agáiáná kehapiꞌ marámbóꞌ ntepuꞌu, ane tueꞌi, mewaliꞌ hampóꞌá kau to mahile, duuꞌna dáꞌána peisá rapohárái tádáhi.”

²⁰ Napahaweꞌ wopiꞌi Iesu hampákáꞌ ngkóráꞌ pándiriꞌ i tauna to handaꞌ, Nauliꞌ, “Popárentána Pueꞌ Ala nodo woꞌo ragiꞌ i lalu ngkóráꞌ pándiriꞌ deꞌe:

²¹ Ragiꞌ biásá napakeꞌ towawine, nagalo hai tinámpu to handaꞌ ntepuꞌu. Kehapiꞌ hantódiꞌ peá, peisá mampopembongke tinámpu to handaꞌ.”

Babaꞌ to mahingkiꞌ

²² I tempóna Iesu mopaliliu polumaoNa lao i Ierusale, Ia moliu i handaꞌ kótá hai wánuá, hai mopaturoꞌ tauna to ara ionoꞌ.

²³ Hangkani tempó, ara hadua tauna to mekuneꞌ i Iesu, “Pueꞌ, ba hantóiꞌ peá tauna to ina molámbiꞌ katueꞌ to maroꞌa to tiꞌara mokahópóꞌá?” Nahániki Iesu:

^24-25 “To molámbiꞌ katehómpóꞌ, peisá rapándiriꞌ nodo tauna to mesuaꞌ i babaꞌ to mahingkiꞌ. Hangaa-ngaa nipári-pári mesuaꞌ i babaꞌ to mahingkiꞌ iti i tempóna mani tebungkáhi, láwiꞌ ane haweꞌ miꞌi tempóna, babaꞌ iti ina natuko pueꞌ támbi, hai handaꞌ tauna to mampoinaoheꞌ ina mesuaꞌ agáiáná tiꞌarapoheꞌ peisá. Mewaliꞌ kómu to tiꞌara mesuaꞌ ina meángkáꞌkou i rawa, hai ina mekióꞌkou membiáꞌ bona babaꞌ iti rabungkáhiákou. Ina niuliꞌ node: ‘Tuá, nubungkáhiáꞌangkaiꞌ babaꞌ!’ Ina Nahániki, ‘Tiꞌarakou kuisá, hai tiꞌara kuisá kahangko iumbámi mai.’

²⁶ Ina nihángáꞌá, ‘Ó Tuá! Mandeꞌ hai mainumongkaiꞌ hingkakani hai io, hai mepaturoꞌmokoꞌ woꞌo i lalu wánuángkiꞌ!’

²⁷ Agáiáná ina nahániki pueꞌ támbi, ‘Tiꞌarakou kuisá, hai tiꞌara kuisá kahangko iumbámi mai. Pohuꞌmokou hangko ieneꞌ, kómu upu-upu to kadake bábehiámi.’

²⁸ Mewaliꞌ, kómu to tiꞌara mesuaꞌ, ina teriaꞌkou hai mapári ntepuꞌu nihádi, láwiꞌ ina niꞌita toiorumi Burahima, Isakiꞌ hai Iako, hai upu-upu nabiꞌ ntániꞌna, mehodaheꞌ i lalu popárentána Pueꞌ Ala.

²⁹ Handaꞌ tauna to tiꞌara toIahudiꞌ hangko i humalele duniáꞌ ina mewaliꞌheꞌ taunána Pueꞌ Ala i lalu popárentáNa, hai ina mehodaheꞌ mandeꞌ hingkakani.

³⁰ Hai i tempó iti ina tongawaꞌ ntepuꞌu, handaꞌ tauna to tepaiwóiꞌá tueꞌraꞌ ina mewaliꞌheꞌ to tepaireáꞌá. Hai tauna to tepaireáꞌá ina mewaliꞌheꞌ tepaiwóiꞌá.”

Masusa laluna Iesu mampekiri toIerusale

³¹ I tempó iti, araheꞌ bahangapa toParisi to lao i Iesu, rahángáꞌá, “PohuꞌmoKoꞌ hangko ieneꞌ, hai laoKoꞌ i wánuá ntániꞌna, láwiꞌ Datu Herode Antipa ina mopapateKoꞌ.”

³² Agáiáná nahángáꞌáheꞌ Iesu, “Nipahaweꞌ i tauna to tiꞌara mobunduꞌ iti node: Bahangapa mani alona ina Kupopolumao bágóꞌKuꞌ mampopesuwuꞌ setáꞌ hai mopakauriꞌ tauna to tangaꞌraꞌ maduꞌa. Agáiáná i alo to tepakanótó, ina hópóꞌ miꞌi bágóꞌKuꞌ.

³³ Agáiáná kehapiꞌ apa miꞌi to ina mewaliꞌ, hangaa-ngaa bateꞌKuꞌ lao i Ierusale, láwiꞌ tiꞌara hintotoꞌ ane hadua nabiꞌ rapapate i rawa hangko i kótá Ierusale.

³⁴ Óó toIerusale, toIerusale! Kómu miꞌi to mopapate nabiꞌ-nabiꞌ, hai mowatuikou huoꞌána Pueꞌ Ala to haweꞌ i kómu. Handaꞌ kánina Kupoinao mokámpáikou nodo manuꞌ moꞌóbóki ánáꞌna, agáiáná tiꞌaraꞌAꞌ nitarima.

³⁵ Bona niꞌisá: tiꞌarapokou ina nakámpái Pueꞌ Ala! Toꞌu ntepuꞌu to Kuhángáꞌákou deꞌe: tiꞌaraPoꞌ ina niꞌita, duuꞌna haweꞌ tempóna ina niuliꞌ, ‘Pueꞌ Ala mowátiꞌ tauna to haweꞌ, to mewaliꞌ huoꞌáNa!’ ”