Lukasi 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tunggáiána sura deꞌe

^1-3 Molámbiꞌ Teopilu to kubiláꞌ. Handaꞌ tauna moita mata apa to nabábehi Pueꞌ Iesu tempóNa ara mani i duniáꞌ deꞌe, hai rapahaweꞌákeꞌ bámbári to maroꞌa mokana i Hia. Araheꞌ woꞌo to moukiꞌ tuntukáná Iesu hangko i tauna to moita mata pobágóꞌna Iesu. Noꞌonoꞌ woꞌo kódóꞌ lao mpiiꞌ kupekuneꞌ i tauna to moita mata apa to nabábehi Iesu, onoꞌ miꞌi haneꞌi kupakanótó moukiꞌ sura deꞌe, bona nuisá upu-upu to mewaliꞌ hangko i rungu-runguna Iesu mantepuꞌu mobágóꞌ i oloꞌkiꞌ, haweꞌ-haweꞌ i kahópóꞌána.

⁴ Tunggáiángkuꞌ, bona nuisá ntepuꞌu katoꞌuna apa to rapaturoꞌákoꞌ tauna ntániꞌna.

Kaꞌina rapoánákana Iohane Toperiu rapahaweꞌ i Sakaria

⁵ Tempóna Datu Herode Mahile mepárentá mani i tampoꞌ Iudá, ara hadua tadulako menómbá to rahangaꞌ Sakaria. Sakaria iti hangko i kolompoꞌna Abia. Toinána rahangaꞌ Elisabeꞌ. Ia woꞌo pemuleꞌána Haruni Tadulako Menómbá Mahile to rungu-runguna hangkoia.

⁶ Tohamboko iti manótó bábehiáraꞌ i peitána Pueꞌ Ala, láwiꞌ rapeuláꞌi ntepuꞌu upu-upu áturá hai párentána Pueꞌ Ala.

⁷ Agáiáná, tiꞌaraheꞌ moánáꞌ láwiꞌ Elisabeꞌ lalo hai matoina miꞌi, hai Sakaria woꞌo matoama miꞌi.

^8-9 Hangkani tempó, tadulako-tadulako menómbá to hangko i kolompoꞌ Abia, tepasuaꞌ Sakaria, mobágóꞌ i Támbina Pueꞌ Ala. Mouláꞌ ádáraꞌ, rabolobiaꞌ bona mopakanótó ba heáná to tepileꞌi mointu dupaꞌ i lalu Támbina Pueꞌ Ala. To kana bolobiaꞌ ia miꞌi Sakaria.

¹⁰ Mewaliꞌ, tangaꞌraꞌ tauna to handaꞌ mekakae i tangabaa, mesuaꞌ miꞌi Sakaria i lalu Támbina Pueꞌ Ala lao mointu dupaꞌ.

¹¹ I tempó iti, hadua malaꞌekana Pueꞌ Ala mopatongawaꞌ wátána i Sakaria. Malaꞌeka iti meángkáꞌ tándáꞌ i kuánána paintuá dupaꞌ.

¹² Kanaitána Sakaria malaꞌeka iti, napotingkáráꞌ hai malááꞌ.

¹³ Agáiáná nauliꞌ malaꞌeka iti, “Sakaria, ineeꞌkoꞌ malááꞌ, láwiꞌ pekakaemu nahádi miꞌi Pueꞌ Ala. Elisabeꞌ toinámu ina moánáka hadua ánángkóiꞌ tobaleilo to hangaa-ngaa nuhangaꞌ Iohane.

¹⁴ Ánángkóiꞌ iti ina nupokagóeꞌ ntepuꞌu, hai i karapoánákana, ina rapokagóeꞌ woꞌo handaꞌ tauna.

¹⁵ Ia ina mewaliꞌ tauna to mahile tueꞌna i peitána Pueꞌ Ala, hai ia tiꞌara ina mainu apa to melángui, {tandaꞌna ia miꞌi huoꞌána Pueꞌ Ala}. Hangko tiꞌara mani rapoánáka, ia ina nakuasaꞌi miꞌi Inao to Magasaꞌ.

¹⁶ Moliu pepaturoꞌna, ia ina moteteꞌ handaꞌ toSáráeliꞌ bona mepoináláiheꞌ huleꞌ i Pueꞌ Ala to rapenómbái toioruraꞌ.

¹⁷ Ánáꞌmu iti ina haweꞌ ioru hangko i Pueꞌ. Kamaróhóna hai kuasaꞌna ina nodo nabiꞌ Eliá hangkoia. Ánti kuasaꞌna hai pepaturoꞌna, ia ina mopahintuwuꞌ ánángkóiꞌ hai umáraꞌ, hai tauna to tiꞌaraheꞌ meuláꞌ i Pueꞌ, ina nateteꞌheꞌ huleꞌ i rárá to manótó. Upu-upu to nabábehi ina mopatimama laluraꞌ tauna bona natarimaheꞌ Pueꞌ.”

¹⁸ Mekuneꞌ Sakaria i malaꞌeka, “Noumbá miꞌi kakuisána katoꞌuna to nuꞌuliꞌ iti? Láwiꞌ matoamamoꞌ, hai toinángkuꞌ woꞌo matoina miꞌi.”

¹⁹ Nahániki malaꞌeka, “Kódóꞌ deꞌe Gábáráeliꞌ. Kódóꞌ miꞌi to meángkáꞌaꞌ i lindoꞌna Pueꞌ Ala mampegiá hawaꞌNa. Ia miꞌi to mohuoꞌaꞌ mai, mopahaweꞌákoꞌ bámbári to maroꞌa deꞌe.

²⁰ Apa to kuhángáꞌáꞌámokoꞌ ininá, bateꞌna ina mewaliꞌ ane haweꞌ miꞌi tempóna. Mewaliꞌ láwiꞌ tiꞌara nupoinálái laluitangkuꞌ, mantepuꞌu deꞌe-deꞌe, tiꞌarapokoꞌ peisá molaluita duuꞌna tebukeki apa to kuꞌuliꞌ ininá.”

²¹ Tangaꞌna Sakaria i lalu Támbina Pueꞌ Ala, tauna to handaꞌ makalelamoheꞌ mepegiá. Rapowuli, moapa riꞌi haneꞌi marue gaga?

²² I kapesuwuꞌna Sakaria, ia tiꞌara piꞌi peisá molaluita, morao-rao perái, onoꞌ miꞌi haneꞌi tongawaꞌ i tauna to handaꞌ kamoitána hampákáꞌ pampetudeꞌá i lalu Támbina Pueꞌ Ala.

²³ Hópóꞌ miꞌi tempóna mobágóꞌ i Támbina Pueꞌ Ala, pohuꞌ miꞌi Sakaria hangko i Ierusale, mesuleꞌ lao i wánuána.

²⁴ Tiꞌara marue hangko ionoꞌ, morodua mpuꞌu miꞌi Elisabeꞌ toinána. Lima wulána kamaruena, Elisabeꞌ mengkatuhu peá i lalu támbina. Nauliꞌ,

²⁵ “To mewaliꞌ deꞌe, ánti kuasaꞌna Pueꞌ i kódóꞌ! Deꞌe-deꞌe Nawátiꞌaꞌ woꞌo bona moánáꞌaꞌ, mewaliꞌ tiꞌara piꞌi kóiꞌ inaongkuꞌ ánti kalalongkuꞌ.”

Kaꞌina rapoánákana Iesu rapahaweꞌ i Maria

²⁶ Molumao miꞌi ini wulána Elisabeꞌ morodua, Pueꞌ Ala mohuoꞌ malaꞌeka Gábáráeliꞌ lao i wánuá Nasare i tampoꞌ Galilea,

²⁷ bona mampohidupaꞌá hadua ánáꞌntawine to rahangaꞌ Maria. Ánáꞌntawine iti nakaróhói miꞌi ngkóráꞌ hai hadua ánáꞌntomoane to rahangaꞌ Iusupu, pemuleꞌána Datu Daudiꞌ.

²⁸ Kahaweꞌna malaꞌeka iti i Maria, nahángáꞌá, “Tabeá. Pueꞌ Ala to mamporángákoꞌ! Io miꞌi to nawátiꞌ Pueꞌ Ala!”

²⁹ Wuli ntepuꞌu Maria mohádi laluitana malaꞌeka iti, hai napekiri apa tunggáiána.

³⁰ Nauliꞌ wopiꞌi malaꞌeka i hia, “Ineeꞌkoꞌ malááꞌ Maria, láwiꞌ kamaꞌahiꞌna Pueꞌ Ala tongawaꞌ i hio.

³¹ Ina moroduakoꞌ, hai ina moánákakoꞌ hadua ánángkóiꞌ tobaleilo to hangaa-ngaa nuhangaꞌ Iesu.

³² Ina mahile tueꞌNa, hai Ia ina rauliꞌ Ánáꞌna Pueꞌ Ala to i Surugáꞌ. Hai Pueꞌ Ala ina moángkáꞌ Ánángkóiꞌ iti mewaliꞌ datu nodo Datu Daudiꞌ toioruNa.

³³ Ánáꞌmu iti ina mopárentá toSáráeliꞌ duuꞌna i rue-ruena, hai popárentáNa iti tiꞌara ina mokahópóꞌá.”

³⁴ Nauliꞌ Maria i malaꞌeka iti, “Noumbá miꞌi kaꞌina mewaliꞌna apa to nuꞌuliꞌ, láwiꞌ tiꞌara maniaꞌ motoama?”

³⁵ Nahániki malaꞌeka, “Inao to Magasaꞌ ina mendáulu i hio, hai kuasaꞌna Pueꞌ Ala to i Surugáꞌ ina mobóungángikoꞌ. Onoꞌ miꞌi haneꞌi Ánángkóiꞌ to ina nuánáka iti ina magasaꞌ hai ina rauliꞌ woꞌo Ánáꞌna Pueꞌ Ala.

³⁶ Bona nuisá katoꞌuna laluitangkuꞌ i hio: halalumu Elisabeꞌ to matoina miꞌi hai rauliꞌ lalo, deꞌe-deꞌe morodua miꞌi molumao ini wulána!

³⁷ {Ineeꞌ nupotingkáráꞌ,} láwiꞌ ane i Pueꞌ Ala, tiꞌara ara to tiꞌara Nabuku Nabábehi.”

³⁸ Nauliꞌ Maria, “Kódóꞌ deꞌe huoꞌánaꞌaꞌ Pueꞌ Ala. Mewaliꞌ apa to nuhángáꞌáꞌáꞌaꞌ, bateꞌna ina mewaliꞌ i wátángkuꞌ.” Roo onoꞌ, pohuꞌ miꞌi malaꞌeka iti mopálehi Maria.

Maria hai Elisabeꞌ

³⁹ Hangko ionoꞌ, pohuꞌ miꞌi Maria hangko i tampoꞌ Galilea, nagagu lao i tampoꞌ Iudá i hambuaꞌ wánuá to i buluꞌna.

⁴⁰ Kahaweꞌna i támbina Sakaria, Maria liliu mesuaꞌ i lalu támbi haneꞌi motabe Elisabeꞌ.

⁴¹ Kanahádina Elisabeꞌ petábena Maria, kásáliu rumihi pokalena ánángkóiꞌ to i lalu taꞌina Elisabeꞌ. Tempó onoꞌ, ia nakuasaꞌi Inao to Magasaꞌ,

⁴² haneꞌi molaluita napasimbuku, nauliꞌ, “Io miꞌi to nawátiꞌ Pueꞌ Ala melumbuꞌ hangko i upu-upu towawine, hai nawátiꞌ woꞌo Pueꞌ Ala Ánángkóiꞌ to i lalu taꞌimu iti.

⁴³ Heánáꞌaꞌ paꞌi kódóꞌ deꞌe haneꞌi io, inána Pueꞌ to kupenómbái, maiaꞌ nupombelámbiꞌá?

⁴⁴ I kakuhádina petábemu, kásáliu mokale ánángkóiꞌ to i lalu taꞌingkuꞌ láwiꞌ góeꞌ.

⁴⁵ Ánti pepoináláimu i laluitaNa Pueꞌ, morasiꞌ ntepuꞌukoꞌ, láwiꞌ apa to Nahángáꞌákoꞌ, bateꞌna ina mewaliꞌ!”

Nani petóiána Maria i Pueꞌ Ala

⁴⁶ Nauliꞌ Maria: “Hangko i lalungkuꞌ ntepuꞌu, motóiáꞌaꞌ Pueꞌ.

⁴⁷ Góeꞌ ntepuꞌu lalungkuꞌ láwiꞌ Pueꞌ Ala mampelaeaꞌ.

⁴⁸ Nabuhinaoaꞌ, wongkódóꞌá, huoꞌáNa to mengkaiwóiꞌ. Mantepuꞌu deꞌe-deꞌe, upu-upu tauna ina manguliꞌ kakódóꞌna miꞌi to nawátiꞌ Pueꞌ Ala,

⁴⁹ láwiꞌ Pueꞌ Ala to Makuasaꞌ mopatongawaꞌ i kódóꞌ kamaróhóna kuasaꞌNa. Magasaꞌ ntepuꞌu hangaꞌNa!

⁵⁰ Napatongawaꞌ ahiꞌNa i upu-upu tauna to mengkoruꞌ i Hia, duuꞌna haweꞌ i pemuleꞌáraꞌ.

⁵¹ Ánti kamaróhóna kuasaꞌNa, tauna to mampepemahile, Nagááꞌ-gááꞌheꞌ bona tunggáiáraꞌ tiꞌara mewaliꞌ.

⁵² Tauna to makuasaꞌ, Napopendáuluheꞌ hangko i lántiꞌraꞌ, agáiáná tauna to mengkaiwóiꞌ, Napaiwongkoheꞌ.

⁵³ Tauna to marimi, Napamabuhuheꞌ hai pandeꞌ to maroꞌa. Agáiáná topebuku, Nawuraheꞌ hai tiꞌara ara to raꞌánti.

^54-55 Pueꞌ Ala mobukeki miꞌi dándi to Nadándi hangkoia i toioruntaꞌ Burahima hai i pemuleꞌána. Onoꞌ miꞌi haneꞌi kitaꞌ toSáráeliꞌ Natulungikeꞌ, hai Napopaitaꞌákeꞌ ahiꞌNa duuꞌna i rue-ruena.”

⁵⁶ Maria toroꞌ hingkakani hai Elisabeꞌ rekeꞌ-rekeꞌna tálu wulána kamaruena, hangko mesuleꞌ riꞌi lao i wánuána.

Karapoánákana Iohane Toperiu

⁵⁷ Haweꞌ miꞌi tempóna Elisabeꞌ moánáꞌ, ia moánáka hadua ánángkóiꞌ tobaleilo.

⁵⁸ I karahádina rángána hai halalunaheꞌ, Pueꞌ mopatongawaꞌ kamaꞌahiꞌNa i Elisabeꞌ, góeꞌheꞌ woꞌo.

⁵⁹ Gáná miꞌi haminggu tinuwuꞌna ánángkóiꞌ iti, haweꞌmoheꞌ upu-upu rángáraꞌ hai halaluraꞌ ina mobábehiheꞌ ádá petileꞌ mouláꞌ ádáraꞌ toIahudiꞌ, hai ina mohangaꞌheꞌ ánángkóiꞌ iti Sakaria, mouláꞌ hangaꞌna umána,

⁶⁰ agáiáná nauliꞌ inána, “Ineeꞌ! Hangaa-ngaa rahangaꞌ riꞌi Iohane.”

⁶¹ Mehániꞌheꞌ, rauliꞌ, “Agáiáná tiꞌara mani ara halalumi to rahangaꞌ onoꞌ!”

⁶² Onoꞌ miꞌi haneꞌi Sakaria raporao-raoá bona rapekuneꞌ i hia ba heáná to naundeꞌ rapopohangaꞌ ánáꞌna.

⁶³ Sakaria membiáꞌ hambuaꞌ watu poukiꞌá haneꞌi naukiꞌ, “Hangaꞌna Iohane.” Tingkáráꞌheꞌ upu-upu.

⁶⁴ Hai i tempó iti woꞌo, Sakaria kásáliu peisá molaluita, haneꞌi ia motóiá Pueꞌ Ala.

⁶⁵ Upu-upu to pewaliꞌ iti rapotingkáráꞌ tauna to ara i támbina Sakaria, hai tebámbári i upu-upu wánuá to ara i buluꞌna tampoꞌ Iudá.

⁶⁶ Bámbári to humalele iti, rapailalu upu-upu tauna to mohádi. Onoꞌ miꞌi haneꞌi rauliꞌ, “Apa to ina mewaliꞌ i lalu katueꞌna ánángkóiꞌ iti?” Tongawaꞌ kaꞌárána miꞌi kuasaꞌna Pueꞌ Ala i hia.

Sakaria mopahaweꞌ laluitana Pueꞌ

⁶⁷ Sakaria umána ánángkóiꞌ iti, nakuasaꞌi miꞌi Inao to Magasaꞌ, haneꞌi mopahaweꞌ laluita deꞌe to hangko i Pueꞌ Ala, nauliꞌ:

⁶⁸ “Maikeꞌ motóiá Pueꞌ Ala to tapenómbái, kitaꞌ toSáráeliꞌ, láwiꞌ Ia to maikeꞌ mampelae hai maikeꞌ mokábáhá hangko i ewálintaꞌ!

^69-70 Nahuoꞌ mai hadua Datu to makuasaꞌ to peisá mohómpókikeꞌ hangko i dósántaꞌ, nodo to napahaweꞌ miꞌi Pueꞌ Ala moliu nábiꞌ-nábiꞌNa to magasaꞌ. Datu iti pemuleꞌána Datu Daudiꞌ, huoꞌáNa hangkoia. Pueꞌ Ala modándi

⁷¹ kaꞌina Nakábáhántaꞌ hangko i ewálintaꞌ hai hangko i kuasaꞌraꞌ tauna to mokáhihiꞌkeꞌ.

⁷² Pueꞌ Ala mopatongawaꞌ miꞌi ahiꞌNa i toioruntaꞌ, hai mobukeki miꞌi dándiNa to magasaꞌ.

^73-75 Maróhó ntepuꞌu podándiNa i Burahima toioruntaꞌ, bona kitaꞌ to mewaliꞌ pemuleꞌána ina nakábáhákeꞌ Pueꞌ Ala hangko i ewálintaꞌ, bona mengkoruꞌkeꞌ i Hia hai tiꞌarakeꞌ paraluu malááꞌ. Ina mewaliꞌkeꞌ taunáNa to magasaꞌ hai manótó i peitáNa haweꞌ i kahópóꞌána katueꞌtaꞌ.

⁷⁶ Hai io, ánáꞌkuꞌ, ina rauliꞌkoꞌ nábiꞌna Pueꞌ Ala to i Surugáꞌ, láwiꞌ io to rapaioru hangko i Pueꞌ bona mopatimama laluraꞌ tauna kaꞌina haweꞌNa.

⁷⁷ Ina nupahaweꞌáheꞌ woꞌo noumbá rárána bona dósáraꞌ peisá teámpungi bona peisáheꞌ molámbiꞌ katehómpóꞌ to hangko i Pueꞌ Ala.

⁷⁸ Ánti kamaꞌahiꞌna Pueꞌ Ala, Ia mai hangko i surugáꞌ maimokeꞌ Napelae. Nodo pembetona alo,

⁷⁹ to mohimbaꞌi duniáꞌ to makáindi deꞌe, noꞌonoꞌ woꞌo Pueꞌ ina mowangkaꞌi tauna to tueꞌ i lalu kamakáindi hai mampoáweá kapate. Ina Nateteꞌkeꞌ bona molámbiꞌkeꞌ roꞌa ngkatueꞌ.” {Eneꞌ miꞌi laluita to nauliꞌ Sakaria.}

⁸⁰ Ánáꞌna Sakaria iti, tetámbái kamahilena hai tetámbái woꞌo kamaróhóna pepoináláina. Ia lao toroꞌ i pádá loriꞌ duuꞌna haweꞌ tempóna mantepuꞌu mopahaweꞌ ngkóráꞌna Pueꞌ i toSáráeliꞌ.