Kolose 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Kómu to rapepueꞌi, hangaa-ngaa niweꞌi hawiꞌmi apa to maroꞌa hai to hintotoꞌ, láwiꞌ niꞌisá miꞌi ara woꞌo Pueꞌmi to i surugáꞌ.

Paturoꞌ kana i pekakae hai bábehiántaꞌ i tauna to tiꞌaraheꞌ toSarani

² Mekakaekou oaꞌ, hai ane mekakaekou, hangaa-ngaa hangko i lalumi ntepuꞌu, hai hangaa-ngaa niuliꞌ handaꞌ kamaroꞌana i Pueꞌ Ala.

³ Hai nipekakaeáꞌangkaiꞌ woꞌo, bona Pueꞌ Ala mampobungkáhiáꞌangkaiꞌ rárá mopahaweꞌ ngkóráꞌNa mokana i tunggáiáNa to tewuniángi hangkoia, to deꞌe-deꞌe nabukeki miꞌi Kerisitu. Hai kódóꞌ ratarungkuaꞌ ánti popahaweꞌkuꞌ bámbári iti.

⁴ Kupembiáꞌ bona nipekakaeáꞌaꞌ wongkódóꞌá, bona kubuku mopakanótó ntepuꞌu bámbári kana i Kerisitu iti, láwiꞌ iti miꞌi to hangaa-ngaa kupobágóꞌ.

⁵ Ane arakou hingkakani hai tauna to tiꞌara mepoinálái, hangaa-ngaa katueꞌmi nipakaroꞌa-roꞌa, hai tempómi nipopobunduꞌ ntepuꞌu mopahaweꞌáheꞌ rárá katehómpóꞌ.

⁶ Ane molalaluitakou hai tauna to tiꞌara mepoinálái, hangaa-ngaa nipamaꞌálusuꞌ laluitami hai nipolaluitaꞌáheꞌ maroꞌa bona tediiꞌ laluraꞌ. Nipekiri maroꞌa noumbá rárána mohániki pekuneꞌraꞌ.

Laluita to kahópóꞌána hai tabeá

⁷ Kuhuoꞌ miꞌi halaluntaꞌ Tikiku lao i kómu, bona napahaweꞌákou noumbá katueꞌkuꞌ ieneꞌ {i Roma}. Tikiku iti ia miꞌi halaluntaꞌ to tapokaꞌahiꞌ hai rángángkuꞌ mobágóꞌ to tetidaꞌ mampopolumao bágóꞌna Pueꞌ.

⁸ Tunggáiángkuꞌ mohuoꞌ Tikiku lao moweoꞌkou, bona niꞌisá noumbá katueꞌkiꞌ hai bona maróhó lalumi.

⁹ Kuhuoꞌ miꞌi woꞌo Onesimu lao hingkakani hai Tikiku. Onesimu iti woꞌo halaluntaꞌ, hai ia hangka toKolosemi. Onesimu iti to tapokaꞌahiꞌ, hai to peisá rapoinálái. Hira rodua to ina mopahaweꞌákou upu-upu to mewaliꞌ ieneꞌ.

¹⁰ Aritaku to hingkakani hai kódóꞌ i lalu tarungku, mopahaweꞌ tabeána i kómu. Marakusi to mohalalu hai Baranaba, ia woꞌo mopahaweꞌ tabeána. Nibuhinao apa to kupembiáꞌ hangkoia bona ane haweꞌi Marakusi i kómu, hangaa-ngaa nitarima maroꞌa!

¹¹ Tabeá hangko i Iesu, to rauliꞌ woꞌo Iustu. To táluheꞌ iti toIahudiꞌheꞌ, hai pakaheꞌ mopakaróhó lalungkuꞌ. I rawa hangko i hira, tiꞌara ara ntaniꞌ toIahudiꞌ to mobágóꞌ hingkakani hai kódóꞌ mopahaweꞌ bámbári kana i popárentána Pueꞌ Ala.

¹² Tabeá woꞌo hangko i Epara, huoꞌána Kerisitu Iesu, hadua to hangko i jemaꞌami. Napekakaeákou hangko i laluna ntepuꞌu, bona maróhó pepoináláimi hai bona niꞌisá ntepuꞌu apa peundeꞌána Pueꞌ Ala.

¹³ Kuisá Epara iti to mobágóꞌ ntepuꞌu motulungikou to i kótá Kolose, hai motulungiheꞌ woꞌo halaluntaꞌ to i kótá Laodikia hai i kótá Hierapoli.

¹⁴ Tabeá woꞌo hangko i sando Lukasi to tapokaꞌahiꞌ, hai hangko i Dema.

¹⁵ Kupembiáꞌ bona nipahaweꞌ woꞌo tabeángkiꞌ i halalu hampepepoináláintaꞌ to i kótá Laodikia. Tabeángkiꞌ woꞌo i Nimpa hai i toSarani to mamingguheꞌ i támbina.

¹⁶ Ane roo miꞌi nibásá sura deꞌe i lindoꞌna jemaꞌa, kupembiáꞌ bona nipakatuáheꞌ jemaꞌa-jemaꞌa to ara i Laodikia, bona rabásá woꞌo i lindoꞌraꞌ jemaꞌa iti. Hai surangkuꞌ to kupakatuáheꞌ toLaodikia, kupembiáꞌ bona ara to mobásá woꞌo i lindoꞌmi.

¹⁷ Nipahaweꞌ laluitangkuꞌ i Akipu bona ia mampopolumao maroꞌa bágóꞌna to napoináláiá miꞌi Pueꞌ i hia!

¹⁸ Tabeá to kahópóꞌána deꞌe, kuꞌukiꞌ hai taengkuꞌ haduduángkuꞌ. Kupembiáꞌ bona nibuhinaoaꞌ hai nipekakaeáꞌaꞌ wongkódóꞌá, láwiꞌ ratarungku maniaꞌ. Pueꞌ Ala mowátiꞌkou. Hangko i kódóꞌ, PAULU