Kolose 3 - Sura Magasaꞌ: Bahangapa sura Pototowiá to Sae hai Pototowiá to WoꞌuBábehiá to hintotoꞌ i tauna to mepoinálái 1 Mewaliꞌ ane motarimamokou katueꞌ to woꞌu, kómu nodokou to rapatueꞌ huleꞌ hingkakani hai Kerisitu, onoꞌ miꞌi haneꞌi katueꞌmi hangaa-ngaa hintotoꞌ i tauna to ina lao i surugáꞌ, kaꞌaraꞌána Kerisitu to mehoda tándáꞌ i kuánána Pueꞌ Ala. 2 Hai surugáꞌ iti to hangaa-ngaa mobukeki to i pekirimi. Ineeꞌ pekou mampekiri katueꞌmi to i duniáꞌ deꞌe, 3 láwiꞌ kómu nodokou tauna to mate hingkakani hai Kerisitu, hai nilámbiꞌ miꞌi katueꞌ to woꞌu hangko i Hia to ara hingkakani hai Pueꞌ Ala i surugáꞌ. Kehapiꞌ pepoináláimi tiꞌara peisá raita tauna, 4 Kerisitu iti to mampoweꞌikeꞌ katueꞌ to woꞌu. Ane haweꞌ huleꞌ, ina Napatongawaꞌákeꞌ peawaꞌNa. Hai kómu woꞌo ina rapopeawaꞌkou hingkakani hai Ia. 5 Mewaliꞌ, {ánti kamatemi miꞌi hingkakani hai Kerisitu,} onoꞌ miꞌi haneꞌi hangaa-ngaa nikábáhá bábehiámi hai rárá katueꞌmi to hangkoia. Ineeꞌkou mobábehi bábehiá to metitidiꞌi. Ineeꞌkou motoina ba motoama deleꞌ. Ineeꞌkou mobábehi to tiꞌara hintotoꞌ. Ineeꞌkou mouláꞌ peundeꞌána lalumi to kadake. Ineeꞌkou mampokaelu hángká rángámi. Láwiꞌ heáná to mampekiri oaꞌ ngkáduniáꞌ, ia hibali peá hai to menómbá i ánitu. 6 Hai upu-upuna iti ina mopaꞌara kamabukoꞌna Pueꞌ Ala i tauna to tiꞌara mengkoruꞌ i Hia. 7 Hai kómu woꞌo hangkoia, i katiꞌárámi mani mengkoruꞌ i Pueꞌ Ala, bateꞌna noꞌonoꞌ rárá katueꞌmi. 8 Agáiáná deꞌe-deꞌe, hangaa-ngaa nikábáhá upu-upu bábehiá to kadake, to nodo: Ineeꞌkou mabukoꞌ. Ineeꞌkou mepailalu. Ineeꞌkou mekáhihiꞌ. Ineeꞌkou moánti-ánti laluita to tiꞌara toꞌu mokana i tauna ntániꞌna. Ineeꞌkou mohuwárá laluita to kadake. 9 Ineeꞌkou modongkoꞌ i hángká rángámi, láwiꞌ nikábáhá miꞌi upu-upu bábehiámi hangkoia to noꞌonoꞌ. 10 Hai deꞌe-deꞌe molámbiꞌmokou katueꞌ to woꞌu, láwiꞌ Pueꞌ Ala mampopewaliꞌmokou tauna to woꞌu. Napawoꞌu oaꞌ lalumi bona mampeuláꞌikou pambiáráNa, hai bona moisákou apa to toꞌu mokana i Hia. 11 Mewaliꞌ, ánti kaNapopewaliꞌmi tauna to woꞌu, Pueꞌ Ala tiꞌara piꞌi mampopontaniꞌ toIahudiꞌ hai tauna to tiꞌara toIahudiꞌ, láwiꞌ i peitáNa, hibali peá tauna to ratileꞌ hai tauna to tiꞌara ratileꞌ. Ia tiꞌara mampopontaniꞌ tauna to mosikolaꞌ hai to tiꞌara mosikolaꞌ, to hawiꞌ ba to tiꞌara hawiꞌ. Kerisitu ia miꞌi to tepaioruá. Ia to ara i laluraꞌ upu-upu tauna to mepoinálái. 12 Pueꞌ Ala mampokaꞌahiꞌkou hai mopileꞌimokou mewaliꞌ taunáNa to magasaꞌ. Onoꞌ miꞌi haneꞌi: hangaa-ngaa niꞌisá mombetulungi, hangaa-ngaa maroꞌa lalumi hadua hai hadua, mengkaiwóiꞌkou, nipamaꞌálusuꞌ pambiárámi, hai sabaraꞌkou. 13 Ineeꞌ nipailalu salaꞌna hángká rángámi. Hangaa-ngaa niámpungi tauna to masalaꞌ i kómu, hibali hai Pueꞌ moámpungi salaꞌmi. 14 To paraluu ntepuꞌu, hangaa-ngaa mombepokaꞌahiꞌkou, láwiꞌ ane mombepokaꞌahiꞌkou, ina maroꞌa ntepuꞌu pohintuwuꞌmi hai halalu hampepepoináláimi. 15 Nakióꞌmokou Pueꞌ Ala, hai Napopewaliꞌkou nodo hambuaꞌ peá wátá ánti pohintuwuꞌmi hai Kerisitu. Mewaliꞌ, hangaa-ngaa nipakaróhó pohintuwuꞌmi iti hai katinda lalu to hangko i Kerisitu, hai hangaa-ngaa niuliꞌ handaꞌ kamaroꞌana i Pueꞌ Ala. 16 Hangaa-ngaa nipailalu ntepuꞌu ngkóráꞌna Kerisitu. Mombepakaróhó mpolalumokou hai mombepaturoꞌkou hiolaꞌ hai nótó lalu hangko i Pueꞌ Ala. Mamponanikou nani penómbá, nani petóiá hai nani ntániꞌna to naweꞌikou Inao to Magasaꞌ. Monanikou hangko i lalumi ntepuꞌu, hai manguliꞌ handaꞌ kamaroꞌana i Pueꞌ Ala. 17 Apa peá to nibábehi ba to nipolaluita, hangaa-ngaa nibábehi hiolaꞌ hai pepoináláimi i Pueꞌ Iesu. Láwiꞌ ánti kaꞌIesuna haneꞌikeꞌ peisá manguliꞌ handaꞌ kamaroꞌana i Pueꞌ Ala Umántaꞌ. Paturoꞌ i tohamboko, i ánángkóiꞌ hai i umaꞌ 18 Kómu towawine to motoamamokou, hangaa-ngaa mengkoruꞌkou i toámámi. Iti miꞌi to hintotoꞌ i tauna to meuláꞌ i Pueꞌ. 19 Hai kómu woꞌo tobaleilo to motoinamokou, hangaa-ngaa nipokaꞌahiꞌheꞌ toinámi. Ineeꞌkou makasaraꞌ i hira. 20 Kómu to ánángkóiꞌ mani, hangaa-ngaa nipehádingi tosaemi, láwiꞌ iti to naundeꞌ Pueꞌ Ala. 21 Hai kómu to rapouma, ineeꞌ nibelái laluna ánáꞌmi bona tiꞌara masusa laluraꞌ. Paturoꞌ i hawiꞌ hai i pueꞌraꞌ 22 Halalu-halalu to mewaliꞌ hawiꞌ, hangaa-ngaa nipeuláꞌi upu-upu hawaꞌna pueꞌmi to i duniáꞌ deꞌe. Ineeꞌ nipeuláꞌi hawaꞌraꞌ iti ánti kamampoinaomi peá raita ba ratóiá pueꞌmi. Ngkáliꞌna riꞌi, nipeuláꞌi hawaꞌraꞌ hangko i kabulána lalumi, ánti pengkoruꞌmi i Pueꞌ Iesu. 23 Bágóꞌ apa peá to rahuoꞌákou, hangaa-ngaa nibágóꞌ hangko i lalumi ntepuꞌu. Nipobágóꞌ bágóꞌ iti nodokou mobágóꞌ i Pueꞌ Iesu, tiꞌara nodo peá pobágóꞌmi i tauna. 24 Hai nipailalu laluita deꞌe: Pueꞌ ina mampoweꞌikou háwángina hintotoꞌ hai apa to Nadándi i upu-upu tauna to Napoánáꞌ. Láwiꞌ Kerisitu Ia miꞌi Pueꞌmi, hai kómu miꞌi hawiꞌNa. 25 Agáiáná heáná peá to mobábehi salaꞌ ina molámbiꞌ woꞌo pehuku, láwiꞌ Pueꞌ tiꞌara mampopontaniꞌ tauna. |
Bahasa Behoa Shorter Bible © Indonesian Bible Society, 2015.
Indonesian Bible Society