Kolose 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Kupoinao bona niꞌisá noumbá kamatimina pobágóꞌkuꞌ i upu-upu tauna to mepoinálái to tiꞌara maniaꞌ moisá, tepasuaꞌ kómu to i kótá Kolose hai to i kótá Laodikia.

² Tunggáiángkuꞌ deꞌe, bona maróhó lalumi upu-upu hai mombepokaꞌahiꞌkou, álána mohintuwuꞌkou hadua hai hadua. Peundeꞌángkuꞌ, bona nipoinálái hai niꞌisá ntepuꞌu tunggáiána Pueꞌ Ala to tewuniángi hangkoia, ia miꞌi bona moisákou Kerisitu.

³ Láwiꞌ Kerisitu miꞌi to mopatongawaꞌ kanótó lalu to tewuniángi hangkoia, bona peisákou moisá Pueꞌ Ala.

⁴ Upu-upu iti kuhángáꞌáꞌákou, bona tiꞌarakou rapakanawoꞌ tauna to moákálángikou moliu laluitaraꞌ to marasa, mole tiꞌara toꞌu.

⁵ Láwiꞌ kehapiꞌaꞌ karaoꞌ hangko i kómu, agáiáná lalungkuꞌ aranto oaꞌ hingkakani hai kómu. Góeꞌ ntepuꞌuaꞌ mohádi kamaróhóna pohintuwuꞌmi hai pepoináláimi i Kerisitu.

Bábehiántaꞌ hangaa-ngaa hiolaꞌ hai pepoináláintaꞌ

⁶ Halalu-halalu, ánti kanitarimana miꞌi Kerisitu Iesu mewaliꞌ Pueꞌmi, bábehiámi alo-alona hangaa-ngaa hiolaꞌ hai peundeꞌáNa, láwiꞌ mohintuwuꞌmokou hai Ia.

⁷ Mewaliꞌ hangaa-ngaa nipakaróhó hai nipatetidaꞌ lalumi i Hia. Nipakaróhó pepoináláimi, nodo to rapaturoꞌámokou. Hai niuliꞌ oaꞌ handaꞌ kamaroꞌana i Pueꞌ Ala.

Ineeꞌkeꞌ rapakanawoꞌ hai paturoꞌ to tiꞌara mentóáꞌ hangko i Kerisitu

⁸ Maingáꞌ-ingáꞌkou, bona tiꞌara ara tauna to mopakanawoꞌkou hai mopári-párikou mampeuláꞌi paturoꞌ to salaꞌ hai to tiꞌara mobunduꞌ. Paturoꞌraꞌ iti ia miꞌi paturoꞌ to mesupaꞌ peá hangko i pekiri tauna, hai rapaturoꞌkou mouláꞌ ádá hai áturá ngkáduniáꞌ mokana i pepoinálái. Paturoꞌraꞌ iti mosisalaꞌ hai paturoꞌ to toꞌu to mentóáꞌ hangko i Kerisitu.

⁹ Upu-upu kuasaꞌna Pueꞌ Ala hai upu-upu pambiáráNa ara miꞌi ami i Kerisitu to mewaliꞌ tauna.

¹⁰ Mewaliꞌ, ane mohintuwuꞌkou hai Kerisitu, tiꞌara piꞌi ara kamakuraꞌmi, láwiꞌ upu-upu to ara i Kerisitu ara woꞌo i kómu, hai Ia miꞌi to melumbuꞌ kuasaꞌNa hangko i upu-upu to makuasaꞌ hai to mepárentá.

¹¹ Ánti pohintuwuꞌmi hai Kerisitu, nodokou to ratileꞌ. Karatileꞌmi iti, tiꞌara riꞌi petileꞌ to nabábehi tauna i wátámi, agáiáná petileꞌ to nabábehi Kerisitu, lempóna, Ia mowehángi miꞌi kuasaꞌ dósá hangko i lalumi.

¹² I tempómi rariu, kómu nodo tauna to mate hai ratawu hingkakani hai Kerisitu, {láwiꞌ mokábáhámokou katueꞌmi hai bábehiámi hangkoia}. Hai i karariumi iti, kómu mewaliꞌkou nodo tauna to rapatueꞌ huleꞌ hingkakani hai Ia, {láwiꞌ molámbiꞌmokou katueꞌ to woꞌu} ánti pohintuwuꞌmi hai Iesu hai pepoináláimi i kuasaꞌna Pueꞌ Ala to mopatueꞌ huleꞌ Iesu hangko i kapate.

¹³ Hangkoia, hangko tiꞌara manikou mepoinálái i Kerisitu, nodokou tomate láwiꞌ madósákou hai tiꞌarakou woꞌo ratileꞌ {láwiꞌ tiꞌarakou taunána Pueꞌ Ala}. Agáiáná kehapiꞌ hangkoia nodokou tauna to mate, deꞌe-deꞌe ánti pohintuwuꞌmi hai Kerisitu, Pueꞌ Ala mopatueꞌmokou huleꞌ hingkakani hai Kerisitu, hai Naꞌámpungi miꞌi upu-upu dósámi.

¹⁴ Ánti kamatena Iesu i kau mombehape, Pueꞌ Ala mowoe miꞌi upu-upu dósántaꞌ to teukiꞌ miꞌi, hai Nakábáhámokeꞌ hangko i áturá-áturá to ina moántikeꞌ i pehuku.

¹⁵ Moliu kamatena Kerisitu i kau mombehape, Pueꞌ Ala monangi miꞌi upu-upu tokadake hai upu-upu to makuasaꞌ, hai kamenangiNa iti tongawaꞌ ntepuꞌu i upu-upu to ara.

Áturá-áturá to tiꞌara mobunduꞌ

¹⁶ Halalu-halalu, ánti karakábáhámi miꞌi hangko i áturá-áturá, ane araheꞌ toIahudiꞌ to mampoinao mopári-párikou bona mampeuláꞌikou ádá ágámáraꞌ, ineeꞌheꞌ nipeuláꞌi. Rasalaꞌikou láwiꞌ tiꞌarakou mampeuláꞌi páliáraꞌ i pandeꞌ hai i painu. Rasalaꞌikou láwiꞌ tiꞌarakou mampeuláꞌi ádá alo mahile ágámáraꞌ, rápáꞌna alo mahile maleheꞌ wulá ba alo penómbáꞌá.

¹⁷ Pueꞌ Ala mampoweꞌikeꞌ áturá-áturá iti mewaliꞌ peá nodo pándiriꞌ mokana i pewátiꞌ to ina talámbiꞌ hangko i Kerisitu.

¹⁸ Mewaliꞌ, ineeꞌkou rapakanawoꞌ tauna iti. Mampe to mengkaiwóiꞌheꞌ hai menómbáheꞌ i malaꞌeka. Rauliꞌ kapánderaꞌ mentóáꞌ hangko i pampetudeꞌá. Paturoꞌraꞌ iti mesupaꞌ peá hangko i laluraꞌ haduduáraꞌ to mouláꞌ rárá ngkáduniáꞌ. Tauna iti, ineeꞌheꞌ nipatodáhi mosalaꞌikou.

¹⁹ Hira iti tiꞌarapoheꞌ mohintuwuꞌ hai Kerisitu. Kerisitu iti nodo Wuáꞌtaꞌ, hai kitaꞌ upu-upu to mepoinálái peisá rapándiriꞌ nodo wátáNa. Wuáꞌ mokuasaꞌi upu-upu wátá. Noꞌonoꞌ woꞌo, Kerisitu to moteteꞌkeꞌ hai mopahintuwuꞌmokeꞌ bona kamaróhó-róhóá peuláꞌtaꞌ i Hia hintotoꞌ hai peundeꞌána Pueꞌ Ala.

²⁰ {Kitaꞌ to mepoinálái i Kerisitu, peisákeꞌ rapándiriꞌ nodo tauna to mate hingkakani hai Kerisitu, láwiꞌ ánti pohintuwuꞌtaꞌ hai Ia, tekábáhámokeꞌ hangko i áturá to i duniáꞌ deꞌe. Tiꞌarapokeꞌ paraluu mampeuláꞌi áturá iti bona mewaliꞌkeꞌ manótó i peitána Pueꞌ Ala.} Mewaliꞌ, ane matekou hingkakani hai Kerisitu, moapa riꞌi haneꞌi nipengkoruꞌi mani áturá-áturá mokana i pepoinálái iti, nodokou tauna to tiꞌara moisá Kerisitu?

²¹ Moapa riꞌi haneꞌi nipeuláꞌi áturáraꞌ to manguliꞌ, “Ineeꞌ nitibaaꞌ deꞌe!” “Ineeꞌ niandeꞌ iti!” “Ineeꞌ nipetóbóꞌ deꞌe ba iti!”

²² Áturá to noꞌonoꞌ tiꞌara moánti katehómpóꞌ i kitaꞌ, láwiꞌ áturá iti mokana peá pandeꞌ hai párewá to peisá upu; hampaiꞌ peá rapakeꞌ haneꞌi kahópóꞌána ratibe. Áturá iti mentóáꞌ peá hangko i párentá hai paturoꞌna tauna.

²³ I peitána tauna, áturá-áturá iti rarekeꞌ maroꞌa, láwiꞌ tauna to mampeuláꞌi áturá iti, moagamaheꞌ, mengkaiwóiꞌheꞌ, hai mampopeahiahiꞌheꞌ wátáraꞌ, mole riꞌi áturá-áturá iti tiꞌara mobunduꞌ, láwiꞌ i rawa peá, hai tiꞌara motulungikeꞌ momeeꞌ peundeꞌána laluntaꞌ haduduántaꞌ.