Iunu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pueꞌ mopatongawaꞌ ahiꞌNa i Iunu

¹ Iunu mabukoꞌ ntepuꞌu láwiꞌ to naliwo PUEꞌ ina mogero Niniwe tiꞌara mewaliꞌ.

² Tangaꞌna mabukoꞌ, Iunu mekakae i PUEꞌ, nauliꞌ, “Ó PUEꞌ. Tiꞌara paꞌi noꞌonoꞌ to kuꞌuliꞌ hangkoia, tempóngkuꞌ mani i tampoꞌkuꞌ? Onoꞌ miꞌi haneꞌi melangka peaꞌ ina lao i Tarisi, láwiꞌ kuisá Io Pueꞌ to bukeꞌ ahiꞌ hai maroꞌa laluMu. TiꞌaraKoꞌ hawiáꞌ mabukoꞌ. Onoꞌ miꞌi haneꞌi pehuku to Nuliwo miꞌi peisá Nubáliki.

³ Mewaliꞌ deꞌe-deꞌe PUEꞌ, Nuala miꞌi peinaongkuꞌ, láwiꞌ rángingkuꞌ miꞌi mate haneꞌiaꞌ tueꞌ.”

⁴ Nauliꞌ PUEꞌ, “Apa riꞌi bunduꞌna haneꞌi nupobukoꞌ apa to Kubábehi?”

⁵ Hangko ionoꞌ, Iunu pohuꞌ miꞌi mokaraohi kótá lao tándáꞌ i mata alo. Ionoꞌ ia mobábehi bambaruꞌ napebóungái mampegiá apa to ina mewaliꞌ i kótá Niniwe.

⁶ Ánti popakanótóna PUEꞌ Ala, tueꞌ miꞌi hampóꞌá kau to marumbu taweꞌna, mobóungángi Iunu bona mopalindó laluna. Góeꞌ ntepuꞌu Iunu ánti katueꞌna kau iti.

⁷ Agáiáná kahalona hungkuꞌ mabaa, ánti popakanótóna Pueꞌ Ala, haweꞌ hambaꞌa koeꞌ motataꞌ kálándá kau iti duuꞌna malau.

⁸ I kapembetona alo, Pueꞌ Ala mopaꞌara wui to maꞌámuꞌ hangko tándáꞌ i mata alo. Ánti kamaꞌámuꞌna, wuáꞌna Iunu nodo miꞌi to mararuꞌ, onoꞌ haneꞌi hungkuꞌ miꞌi ina malimpu. Ánti kamaꞌángkáráꞌna pehádina, nauliꞌ Iunu, “Rángingkuꞌ miꞌi mate haneꞌiaꞌ tueꞌ.”

⁹ Agáiáná Pueꞌ Ala molaluita i Iunu, “Tiꞌara mobunduꞌ nuposusa lalu kana i kau to tueꞌ iti.” Nahániki Iunu, “Moapa riꞌi haneꞌi tiꞌara? Mobunduꞌ ntepuꞌu kupobukoꞌ duuꞌkuꞌ mate.”

¹⁰ Haneꞌi nauliꞌ PUEꞌ i Iunu, “Io mokahiá kau iti, mole riꞌi tiꞌara io to mopatueꞌ hai mopiaraꞌ. Kau iti tueꞌ hambengiá peá hai kahalona káindi mate miꞌi.

¹¹ Mewaliꞌ noumbá hai Niniwe, kótá to mahile ntepuꞌu iti? Láwiꞌ handaꞌ binataꞌna, hai taunána hangatu rompuloꞌ sábuna lábi to tiꞌara mani moisá apa to maroꞌa hai apa to kadake. Hangaa-ngaa Kupokaꞌahiꞌ ntepuꞌuheꞌ woꞌo.”