Iunu 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iunu mampeuláꞌi hawaꞌna Pueꞌ Ala

¹ Karongkánina PUEꞌ molaluita i Iunu,

² Nauliꞌ, “Laomokoꞌ i kótá Niniwe, kótá to mahile iti, hai nupahaweꞌámoheꞌ apa to Kuhángáꞌámokoꞌ.”

³ Hangkani deꞌe Iunu mampeuláꞌi miꞌi hawaꞌna PUEꞌ haneꞌi lao i Niniwe, kótá to mahile ntepuꞌu. Ane ratolelingiꞌi, tálu alona rapolumaoi.

⁴ Iunu mesuaꞌ i lalu kótá iti. Hangaloá nalumaohi hangko natepuꞌu riꞌi molaluita, nauliꞌ napasimbuku, “Iba rái puloꞌna alona, Niniwe deꞌe ina magero!”

⁵ ToNiniwe iti mampoináláiheꞌ laluitana Pueꞌ iti, onoꞌ miꞌi haneꞌi upu-upu tauna himpudu bona mopuasaꞌheꞌ, maroꞌa tosae, maroꞌa ánángkóiꞌ. Mopakeꞌheꞌ waruꞌ to rabábehi hangko i karuꞌ bona mopatongawaꞌheꞌ kamampenosoꞌiraꞌ dósáraꞌ.

⁶ Kanahádina datu Niniwe bámbári iti, ia mendáulu hangko i pehodaꞌá kadatuána hai ia woꞌo molosu waruꞌ kadatuána, mopakeꞌ waruꞌ karuꞌ haneꞌi mehoda i awu.

⁷ Ia woꞌo mopaꞌara hawaꞌ to rahawaka i humalele Niniwe, mampoliui pobutusiraꞌ datu hai upu-upu tauna to mapángkáꞌ lántiꞌraꞌ. Hawaꞌ iti node: “Upu-upu tauna tiꞌara peisá mandeꞌ hai mainu, noꞌonoꞌ woꞌo gapiꞌ, dimbá hai binataꞌ to ntániꞌna to rapiaraꞌ.

⁸ Upu-upu tauna hangaa-ngaa mewaruꞌheꞌ karuꞌ. Noꞌonoꞌ woꞌo upu-upu binataꞌ hangaa-ngaa rakómókiheꞌ hai karuꞌ, tandaꞌ penosoꞌraꞌ upu-upu tauna. Hai hangaa-ngaa mekakaeheꞌ i Pueꞌ Ala hangko i laluraꞌ ntepuꞌu. Hira woꞌo hangaa-ngaa mobálikiheꞌ bábehiáraꞌ to kadake hai bábehiá to bukeꞌ dósá.

⁹ Babilaꞌ PUEꞌ ina mobáliki tunggáiáNa hai tiꞌara piꞌi ina mabukoꞌ, haneꞌi tiꞌarakeꞌ ina marugiꞌ.”

¹⁰ Kanaitána Pueꞌ Ala toꞌu-toꞌu mokábáhá mpuꞌumoheꞌ bábehiáraꞌ to kadake, onoꞌ miꞌi haneꞌi tiꞌara piꞌi Napopewaliꞌ poliwoNa ina mohukuheꞌ.