Iunu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pekakaena Iunu

¹ Hangko i lalu taꞌi bauꞌ Iunu mekakae i PUEꞌ Alana, nauliꞌ:

² “Ó PUEꞌ, i lalu kamapáringkuꞌ mekakaeaꞌ i Hio, hai Nuhánikiaꞌ. Hangko i duniáꞌ tomate, membiáꞌaꞌ tulungi. Pembiáꞌkuꞌ Nupehádingi hai Nupailalu.

³ Nutibemoꞌ i tahiꞌ to kaladu, haweꞌ i pohiꞌna tahiꞌ. Ionoꞌ uwai motolelingiaꞌ, hai bálumbá to mahile to Nuhuoꞌ, mowasóengaꞌaꞌ.

⁴ Kuꞌuliꞌ i lalungkuꞌ: ‘Nawuramoꞌ PUEꞌ hangko i lindoꞌNa. Tiꞌara piꞌi ina kuita támbiNa to magasaꞌ.’

⁵ Uwai tahiꞌ mempusaꞌ i ngángángkuꞌ. Uwai tahiꞌ motolelingi wátángkuꞌ. Lómóꞌ tahiꞌ mowewehi wuáꞌkuꞌ.

^6-7 Tiriaꞌ haweꞌ i lokeꞌna buluꞌ to i lalu tahiꞌ, i kaꞌaraꞌá to teparauꞌ babaꞌna haweꞌ i kahópóꞌána duniáꞌ. Hungkuaꞌ ina mate. KubuhinaoKoꞌ hai mekakaeaꞌ i Hio. Haweꞌ mpuꞌu miꞌi pekakaengkuꞌ i Hio. Hangko i támbiMu to magasaꞌ, Nupehádingiaꞌ, haneꞌi Nuángkáꞌaꞌ hangko i lalu tahiꞌ, Ó PUEꞌ Alangkuꞌ.

⁸ Tauna to menómbáheꞌ i ánitu to mbero-mbero, mopálehimoKoꞌ hai tiꞌarapoheꞌ tetidaꞌ.

⁹ Agáiáná kódóꞌ ina monanikaꞌaꞌ nani petóiá i lindoꞌMu, hai ina mampopenómbáꞌaꞌ popenómbá i Hio. Upu-upu dándingkuꞌ ina kubukeki, láwiꞌ Io miꞌi PUEꞌkuꞌ to mampelaeaꞌ.”

¹⁰ Hangko ionoꞌ, ánti popakanótóna PUEꞌ, bauꞌ mobólá Iunu i kámárá.