Iunu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iunu tiꞌara mampeuláꞌi hawaꞌna Pueꞌ Ala

¹ Hangkani tempó, PUEꞌ mongkóráꞌ i Iunu ánáꞌna Amitai,

² Nauliꞌ, “Laomokoꞌ i kótá Niniwe, kótá to mahile iti. Nupaingáꞌiáheꞌ láwiꞌ Kuisá miꞌi kakadakena bábehiáraꞌ.”

³ Agáiáná Iunu ina pohuꞌ riꞌi lao i Tarisi bona karaoꞌ hangko i PUEꞌ. Onoꞌ haneꞌi ia lao sieruꞌ i Iapo, láwiꞌ ionoꞌ ara pengkarooá duanga tahiꞌ. Kahaweꞌna ionoꞌ, nahumba hambuaꞌ duanga to mahile to ina lao i Tarisi. Liliu nabaiari pesarona hai mengkaheꞌ i duanga iti, bona pohuꞌ karaoꞌ hangko i lindoꞌna PUEꞌ.

^4-5 Iunu mendáulu lao i kaꞌaraꞌá to i wóiꞌ ntepuꞌu to i lalu duanga, haneꞌi maturu duuꞌna letaꞌ mposoꞌ. Tangaꞌna letaꞌ, PUEꞌ mopaꞌara wui baratiꞌ i tangaꞌ tahiꞌ, mewaliꞌ tahiꞌ iti mahile pobálumbána. Duanga iti hungkuꞌ ina magero narokaꞌ bálumbá. Topobágóꞌ i duanga to mahile iti malááꞌ ntepuꞌuheꞌ, hai monganga-ngangaheꞌ membiáꞌ tulungi i pueꞌraꞌ hadua-hadua, hai motibemoheꞌ inántiraꞌ i tahiꞌ bona monangkohi duangaraꞌ.

⁶ Topoánti duanga to mahile iti mendáulu lao i kaꞌaraꞌá to i wóiꞌ i lalu duanga. Nalámbiꞌ riꞌi Iunu tangaꞌna letaꞌ. Nauliꞌ, “Noumbá riꞌi haneꞌi peisá manikoꞌ letaꞌ mposoꞌ? Pearó! Mekakaekoꞌ i pueꞌmu membiáꞌ tulungi. Mole ba iai to maꞌahiꞌ i kitaꞌ bona tiꞌarakeꞌ hurewuꞌ.”

⁷ Pengkaheꞌraꞌ Iunu hai topoánti duanga iti lao i wongko, topobágóꞌ i duanga iti molaluitamoheꞌ hadua hai hadua, “Anaꞌ, tabolobiaꞌ bona taisá heáná to masalaꞌ i oloꞌtaꞌ haneꞌikeꞌ hurewuꞌ.” Mobolobiaꞌmoheꞌ, hai Iunu to kana.

⁸ Onoꞌ miꞌi haneꞌi mekuneꞌheꞌ i Iunu, “Toꞌu paꞌi ánti kaꞌiona haneꞌikeꞌ hurewuꞌ? Hangko iumbákoꞌ mai? Toapakoꞌ? Moapa riꞌi haneꞌi arakoꞌ ieneꞌ?”

⁹ Nahániki Iunu, “Kódóꞌ toIberaniaꞌ. Menómbáꞌaꞌ i PUEꞌ Ala to ara i surugáꞌ, to mopaꞌara tahiꞌ hai kámárá.”

¹⁰ Hangko ionoꞌ, napodarita miꞌi noumbá haneꞌi melangka mokaraohi PUEꞌ. Karahádina peá topobágóꞌ i duanga to mahile iti, malááꞌ ntepuꞌuheꞌ haneꞌi rahángáꞌá, “Moapa riꞌi haneꞌikoꞌ mobábehi to noꞌonoꞌ!”

¹¹ Tempó onoꞌ, wui napokarumihi riꞌi ntepuꞌu, haneꞌi topobágóꞌ i duanga iti mekuneꞌheꞌ i hia, “Ina kipanoumbámokoꞌ bona tahiꞌ mewaliꞌ tinda hai bálumbá to rumihi deꞌe tiꞌara piꞌi ina morampekeꞌ?”

¹² Mehániꞌ Iunu, “Nitibemoꞌ i lalu tahiꞌ, bona mewaliꞌ tinda, láwiꞌ kuisá ánti kakódóꞌna haneꞌikou narampe bálumbá.”

¹³ Agáiáná topobágóꞌheꞌ i duanga iti mopári-pári maniheꞌ mowose duangaraꞌ bona haweꞌheꞌ i kámárá. Agáiáná mbero-mbero peá láwiꞌ bálumbá mantámbái riꞌi karumihina.

¹⁴ Hangko ionoꞌ, mekakaeheꞌ i PUEꞌ, “Ó PUEꞌ. Kipembiáꞌ bona ineeꞌangkaiꞌ Nuhuku ánti kaꞌina mopapatengkiꞌ tauna deꞌe to tiꞌara ara salaꞌna i kaiꞌ. Láwiꞌ upu-upuna deꞌe mewaliꞌ hiolaꞌ hai peundeꞌáMu.”

¹⁵ Mewaliꞌ ratibe mpuꞌu miꞌi Iunu i lalu tahiꞌ, haneꞌi bálumbá to rumihi kásáliu mengkaroo, hai tahiꞌ iti menggoli tinda.

¹⁶ Topobágóꞌ i duanga to mahile iti malááꞌ ntepuꞌuheꞌ i PUEꞌ, haneꞌiheꞌ mopaꞌara popenómbáraꞌ hai modándi i lindoꞌna PUEꞌ.

¹⁷ Ánti popakanótóna PUEꞌ, haweꞌ hambaꞌa bauꞌ to mahile moameꞌ Iunu, hai ia ara i lalu taꞌi bauꞌ iti tálu alona tálu wengina kamaruena.