Iohane 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu molaluita hai hadua towawine toSamaria

¹ ToParisi mohádimoheꞌ bámbári to manguliꞌ kahandaꞌ-handaꞌá miꞌi tauna to lao mampoperiu i Iesu, álána melumbuꞌ kahandaꞌraꞌ tauna to meuláꞌ i Iesu haneꞌi tauna to meuláꞌ i Iohane.

² Katoꞌuána, tiꞌara Iesu to meriu, agáiáná topeguruNa riꞌi to meriu.

³ Kanaisána Iesu apa to rahádi toParisi iti, Ia pohuꞌ miꞌi hangko i tampoꞌ Iudá mesuleꞌ lao i tampoꞌ Galilea.

⁴ I polumaoNa iti, Ia hangaa-ngaa moliu i tampoꞌraꞌ toSamaria.

^5-6 Kalialo, haweꞌ miꞌi i wánuáraꞌ toSamaria to rahangaꞌ Sika, tiꞌara karaoꞌ hangko i tampoꞌ to napeweꞌi Iako hangkoia i Iusupu ánáꞌna. I rawa wánuá iti, ara hambuaꞌ tibubuꞌ to rahangaꞌ tibubuꞌna Iako. Mehoda miꞌi Iesu i wiwi tibubuꞌ iti, láwiꞌ mawonggoꞌ molumao.

^7-8 Topegurunaheꞌ liliu lao i wánuá mohóló pandeꞌraꞌ. Tiꞌara marue, haweꞌ miꞌi hadua towawine toSamaria mai mantámbuꞌ. Nauliꞌ Iesu, “Inaꞌ, nuweꞌiaꞌ wongkódóꞌá uwai Kuinu.”

⁹ Tingkáráꞌ laluna towawine iti, láwiꞌ biásána tiꞌara raundeꞌ toIahudiꞌ mopakeꞌ taboꞌ ba mangkuraꞌ toSamaria. Onoꞌ miꞌi haneꞌi nauliꞌ, “Io toIahudiꞌKoꞌ, kódóꞌ towawine toSamariaꞌaꞌ. Mewaliꞌ, moapa riꞌi haneꞌi membiáꞌKoꞌ uwai i kódóꞌ?”

¹⁰ Nauliꞌ Iesu, “Ane nuisá kamahilena pewátiꞌ to hangko i Pueꞌ Ala, hai ane nuisá woꞌo kaheánáNgkuꞌ to membiáꞌ uwai, hangaa-ngaa membiáꞌkoꞌ woꞌo uwai i Kódóꞌ, hai ina Kuweꞌikoꞌ uwai ngkatueꞌ.”

¹¹ Nauliꞌ towawine iti, “Tuá, hangko iumbá uwai ngkatueꞌ to Nuꞌuliꞌ iti? Tiꞌara ara popetámbuꞌMu, hai tibubuꞌ deꞌe kaladu.

¹² Tibubuꞌ deꞌe sosorangkiꞌ hangko i Iako, toiorungkiꞌ hangkoia. Ia mainu uwai hangko ieneꞌ, noꞌonoꞌheꞌ woꞌo ánáꞌna hai binataꞌna. Ba Nuꞌuliꞌ riꞌi melumbuꞌ tueꞌMu hangko i tueꞌna Iako haneꞌi peisáKoꞌ mampoweꞌi uwai to melumbuꞌ kamaroꞌana hangko i uwai tibubuꞌ deꞌe?”

¹³ Nauliꞌ Iesu, “Upu-upu tauna to mainu uwai hangko i tibubuꞌ deꞌe, ina mangkadoꞌuheꞌ huleꞌ.

¹⁴ Agáiáná heáná to mainu uwai to Kuweꞌi, tiꞌarapoheꞌ ina mangkadoꞌu duuꞌna i rue-ruena, láwiꞌ uwai to Kuweꞌiheꞌ iti ina mewaliꞌ uwai ngkatueꞌ to moili oaꞌ i laluraꞌ; lempóna, ina molámbiꞌheꞌ katueꞌ to maroꞌa to tiꞌara mokahópóꞌá.”

¹⁵ Nauliꞌ towawine iti, “Ane noꞌonoꞌi tuá, Nuweꞌimoꞌ uwai iti, bona tiꞌarapoꞌ mangkakadoꞌu, hai tiꞌarapoꞌ paraluu mai mantámbuꞌ alo-alona ieneꞌ.”

¹⁶ Nauliꞌ Iesu, “Laomokoꞌ sieruꞌ mokióꞌ toámámu, haneꞌi mesuleꞌkoꞌ mai.”

¹⁷ Nauliꞌ towawine iti, “Tiꞌara ara toámángkuꞌ.” Nauliꞌ Iesu, “Toꞌu laluitamu. Tiꞌara ara toámámu.

¹⁸ Lima miꞌi kánimu motoama, hai tobaleilo to nuporángá deꞌe-deꞌe, tiꞌaranto toámámu. Mewaliꞌ toꞌu mpuꞌu laluitamu ininá.”

¹⁹ Nauliꞌ towawine iti, “Kuisá miꞌi Io hadua nabiꞌ!

²⁰ Kaiꞌ toSamaria menómbá i buluꞌ Korasi deꞌe, i buluꞌ penómbáꞌáraꞌ toiorungkiꞌ. Agáiáná panguliꞌmi toIahudiꞌ, i Ierusale peá penómbáꞌá to toꞌu.”

²¹ Nauliꞌ Iesu, “Inaꞌ, mampoináláimokoꞌ laluitaNgkuꞌ deꞌe: ina haweꞌ tempóna, tauna ina menómbá i Pueꞌ Ala iumbá-umbá peá, tiꞌara peá i Ierusale, hai tiꞌara peá woꞌo i buluꞌ deꞌe.

²² Kómu toSamaria, tiꞌara niꞌisá kaheánáNa to nipenómbái. Kaiꞌ toIahudiꞌ, kiꞌisá kaheánáNa to kipenómbái, láwiꞌ ara dándina Pueꞌ Ala to manguliꞌ ina haweꞌ hadua hangko i oloꞌraꞌ toIahudiꞌ to ina moánti katueꞌ to maroꞌa i tauna.

²³ Agáiáná ina haweꞌ tempóna, hai katoꞌuána deꞌe-deꞌe haweꞌ miꞌi tempóna, tauna ina menómbá i Pueꞌ Ala Umántaꞌ, hangaa-ngaa menómbáheꞌ i Hia mouláꞌ paturoꞌ to toꞌu hai moliu peteteꞌna Inao to Magasaꞌ. Tauna to menómbá noꞌonoꞌ, itimoheꞌ to naundeꞌ Pueꞌ Ala Umántaꞌ.

²⁴ Pueꞌ Ala ia miꞌi Inao. Onoꞌ miꞌi haneꞌi tauna to menómbá i Hia, hangaa-ngaa menómbá hangko i laluraꞌ ntepuꞌu hai i katoꞌu-toꞌuána.”

²⁵ Nauliꞌ towawine iti, “To kuisá, ina haweꞌ Datu Topehómpóꞌ, to rauliꞌ woꞌo Kerisitu. Ane haweꞌi, Ia miꞌi to ina mopakanótó i kitaꞌ upu-upuna to ara.”

²⁶ Nauliꞌ Iesu, “Kódóꞌ miꞌi deꞌe Datu Topehómpóꞌ, to tangaꞌKuꞌ molaluita hai io.”

²⁷ Tangaꞌraꞌ mani molaluita, haweꞌmoheꞌ topeguruNa hangko i wánuá. Tingkáráꞌheꞌ moita Iesu molaluita hai hadua towawine, agáiáná tiꞌara haweꞌ hadua to pebáiꞌ mekuneꞌ i towawine iti ba apa paraluuna. Tiꞌaraheꞌ woꞌo pebáiꞌ mekuneꞌ i Iesu ba apa tunggáiáNa molaluita hai towawine iti.

²⁸ Hangko ionoꞌ, towawine iti mopálehi gumbaꞌna, lao miꞌi i wánuá mopahaweꞌ i tauna to ionoꞌ,

²⁹ “Maikou! Laokeꞌ mampohidupaꞌá hadua tauna to mopatongawaꞌáꞌaꞌ upu-upu bábehiángkuꞌ. Ba Ia mpuꞌu miꞌi Datu Topehómpóꞌ?”

³⁰ Onoꞌ haneꞌi laomoheꞌ i rawa wánuá bona mampohidupaꞌáheꞌ Iesu.

³¹ Tangaꞌna towawine iti lao i wánuá, topeguruna Iesu manguliꞌ, “Guru, mandeꞌmokeꞌ.”

³² Agáiáná nauliꞌ Iesu, “Ara pandeꞌKuꞌ to tiꞌara niꞌisá.”

³³ Mombekuneꞌ-kuneꞌheꞌ topeguruNa, rauliꞌ, “Heáná riꞌi to mampoántiá pandeꞌNa?”

³⁴ Onoꞌ miꞌi haneꞌi nahángáꞌáheꞌ Iesu, “PandeꞌKuꞌ, ia miꞌi mampeuláꞌi peundeꞌána Pueꞌ Ala to mohuoꞌAꞌ mai, hai moparoo bágóꞌ to NaweꞌiAꞌ.

³⁵ Paka niuliꞌ node: iba mani wulána, hangko meparerakeꞌ. Agáiáná Kuhángáꞌáꞌákou: nipeita reiꞌ mantoleli. Handaꞌ tauna to timamamoheꞌ mampoinálái laluitaNgkuꞌ. Hira nodo pare to mabádáꞌ, to timama miꞌi ina rapepare.

³⁶ Kódóꞌ to mopahaweꞌ ngkóráꞌna Pueꞌ, peisáꞌAꞌ rapándiriꞌ nodo to mantudaꞌ. Kómu to modureiheꞌ tauna bona mampoináláiheꞌ ngkóráꞌna Pueꞌ, peisákou rapándiriꞌ nodo tauna to mepare. Ánti pobágóꞌmi, ina molámbiꞌkou háwángina, hai handaꞌ tauna ina molámbiꞌ katueꞌ to maroꞌa to tiꞌara mokahópóꞌá. Ane mewaliꞌ iti, ina góeꞌkeꞌ hingkakani.

³⁷ Mewaliꞌ toꞌu ntepuꞌu laluita to manguliꞌ: ‘Hadua to mantudaꞌ, to haduána to mampepare.’

³⁸ Kuhuoꞌkou lao mepare i hinoe to tiꞌara nitudaꞌi. Tauna ntániꞌna riꞌi to motudaꞌi, agáiáná kómu miꞌi to mampepare wuaꞌna pobágóꞌraꞌ.”

³⁹ I wánuáraꞌ toSamaria, handaꞌ tauna to mepoinálái i Iesu, láwiꞌ mohádiheꞌ laluitana towawine iti ininá to manguliꞌ, “Nahángáꞌámoꞌ hinángkáꞌna bábehiángkuꞌ.”

⁴⁰ Mewaliꞌ, laomoheꞌ mampohidupaꞌá Iesu, hai rapembiáꞌ bona mehupeꞌ i wánuáraꞌ. Onoꞌ miꞌi haneꞌi Iesu hai topeguruNa rombengiheꞌ ionoꞌ.

⁴¹ Hangko ionoꞌ, kahandaꞌ-handaꞌáheꞌ pueꞌ wánuá to mepoinálái i Iesu, láwiꞌ mampehádingi mpuꞌumoheꞌ laluitaNa.

⁴² Rauliꞌ pueꞌ wánuá i towawine iti, “Deꞌe-deꞌe kipoinálái ntepuꞌu kaꞌIana miꞌi Datu Topehómpóꞌ, tiꞌara ánti kaꞌiona to mohángáꞌáꞌangkaiꞌ, agáiáná láwiꞌ kakihádina miꞌi haduduángkiꞌ laluitaNa, hai kiꞌisá kaꞌIana mpuꞌu miꞌi Topohómpóꞌ Salaꞌna upu-upu tauna i duniáꞌ.”

Iesu mesuleꞌ lao i tampoꞌ Galilea

^43-44 Bahangapa alona to liu, Iesu manguliꞌ, “Hadua nabiꞌ tiꞌara rabiláꞌ i tampoꞌ karapamahileána.” Mewaliꞌ liu miꞌi rongalo i tampoꞌ Samaria, Napaliliu wopiꞌi polumaoNa lao i tampoꞌ Galilea.

⁴⁵ KahaweꞌNa i Galilea, pueꞌ wánuá motarima Iesu hangko i laluraꞌ ntepuꞌu, láwiꞌ araheꞌ iaꞌo i Ierusale i tempóna Iesu mouláꞌ Alo Posusa Paska, hai moita mataheꞌ upu-upu tandaꞌ kuasaꞌ to Nabábehi i tempó iti.

Iesu mopakauriꞌ ánáꞌna hadua to mobágóꞌ i támbina datu

⁴⁶ I tampoꞌ Galilea, haweꞌ wopiꞌi Iesu i wánuá Kana, i wánuá pampopewaliꞌáNa uwai mewaliꞌ anggoroꞌ. Ionoꞌ ara hadua tauna to mobágóꞌ i támbina datu i wánuá Kapenau. Ánáꞌna tobaleilo rumihi kamaduꞌana.

⁴⁷ Kamohádina peá Iesu haweꞌ i tampoꞌ Galilea hangko i tampoꞌ Iudá, ia lao mampohidupaꞌá Iesu, hai nauliꞌ, “Tuá, laokeꞌ i Kapenau, Nupakauriꞌ wongkódóꞌá ánáꞌkuꞌ, láwiꞌ ina mate miꞌi.”

⁴⁸ Nauliꞌ Iesu, “Kómu to tueꞌ tempó deꞌe, tiꞌarakou ina mampoinálái kahangko i Pueꞌ AlaNgkuꞌ, ane tiꞌarakou moita tandaꞌ kuasaꞌ!”

⁴⁹ Nauliꞌ tauna iti, “Tuá, laokeꞌ, láwiꞌ ánáꞌkuꞌ hungkuꞌ miꞌi mate!”

⁵⁰ Nauliꞌ Iesu, “Mesuleꞌmokoꞌ. Ánáꞌmu ina nalalunto.” Tauna iti mampoinálái ntepuꞌu laluitana Iesu, haneꞌi mesuleꞌ miꞌi.

⁵¹ Tangaꞌna mani i rárá, bahangapaheꞌ hawiꞌna lao mampohidupaꞌá, rahángáꞌá, “Maroꞌa-roꞌa miꞌi ánáꞌmu!”

⁵² Nakuneꞌheꞌ, “Tintiꞌ hangapa mantepuꞌu nalalu?” Rauliꞌ, “Iamáindi, tintiꞌ isáꞌ kalialo, mengkaroo miꞌi kamalengiꞌna.”

⁵³ Mewaliꞌ naisá miꞌi tauna iti, i tempóna Iesu manguliꞌ, “Ánáꞌmu ina nalalunto,” tempó iti woꞌo nalalu miꞌi. Hangko ionoꞌ, tauna iti mepoinálái miꞌi i Iesu hingkakani hai upu-upu hantámbiána.

⁵⁴ Iti miꞌi tandaꞌ kuasaꞌ to karongkánina to nabábehi Iesu i tampoꞌ Galilea i kahaweꞌNa hangko i tampoꞌ Iudá.