Iohane 21 - Sura Magasaꞌ: Bahangapa sura Pototowiá to Sae hai Pototowiá to Woꞌu

Iesu mopatongawaꞌ wátáNa i topeguruNa to pitu

¹ Roo onoꞌ, hangkani mani Iesu mopatongawaꞌ wátáNa i topegurunaheꞌ. Iti mewaliꞌ i wiwi rano Galilea. Node daritakáná:

² Bahangapaheꞌ topeguruNa hirámpu ionoꞌ, iamoheꞌ: Simoꞌ Peturuꞌ, Tómá to rauliꞌ woꞌo Didimu, lempóna Toporopaꞌ, Natanaeli hangko i wánuá Kana i tampoꞌ Galilea, ánáꞌna Sebedeu to rodua, hai rodua topeguruna Iesu to ntániꞌna.

³ Nauliꞌ Simoꞌ Peturuꞌ, “Ina laoaꞌ modálá.” Rauliꞌ, “Ina meuláꞌangkaiꞌ woꞌo.” Lao mpuꞌumoheꞌ mengkaheꞌ i duanga hai modálá i rano. Agáiáná i lalu hambengiá iti, tiꞌaraheꞌ morasiꞌ haweꞌ hambaꞌa to kana dáláraꞌ.

⁴ Hungkuꞌ miꞌi mabaa, Iesu meángkáꞌ i wiwi rano, agáiáná tiꞌara raisá kaꞌIesuna.

⁵ Nahángáꞌáheꞌ, “HalaluNgkuꞌ, tiꞌara paꞌi ara bouꞌmi?” Rahániki, “Tiꞌara ara haweꞌ hambaꞌa.”

⁶ Nahángáꞌáꞌáheꞌ Iesu, “Nitende dálámi tándáꞌ i kuánána duangami, bona morasiꞌkou.” Mewaliꞌ ratende mpuꞌu miꞌi dáláraꞌ, hai tiꞌara piꞌi rabuku moángkáꞌ i lalu duanga, láwiꞌ handaꞌ ntepuꞌu bouꞌ to ara i laluna.

⁷ Hangko ionoꞌ, topeguruna Iesu to Napokaꞌahiꞌ mohángáꞌá Peturuꞌ, “Doꞌo Pueꞌ!” Kanahádina Peturuꞌ laluitana iti, napusaꞌ miꞌi baduna láwiꞌ ia tiꞌara mebadu, haneꞌi mentimboꞌ i uwai lao mampohidupaꞌá Iesu.

⁸ Topeguruna Iesu to ntániꞌna to i duanga, modiiꞌheꞌ dálá to bukeꞌ bouꞌ lao i wiwi rano. Tiꞌaraheꞌ karaoꞌ hangko i lorena, rekeꞌ-rekeꞌna hangatu peá mete.

⁹ Kamendáuluraꞌ peá i lorena, moitaheꞌ api to tueꞌ ionoꞌ, hai i wongko api ara bouꞌ hai ara woꞌo rótiꞌ.

¹⁰ Nahángáꞌáheꞌ Iesu, “Ánti mai bahangapa báꞌána bouꞌ to hangko nidálá.”

¹¹ Simoꞌ Peturuꞌ mengkaheꞌ i duanga hai modiiꞌ dálána lao i lorena. Dálá iti bukeꞌ hai bouꞌ to mahile: hangatu lima puloꞌna hai tálu báꞌána kahandaꞌraꞌ. Agáiáná kehapiꞌ noꞌonoꞌ kahandaꞌraꞌ, tiꞌara woꞌo mohepaꞌ dálá iti.

¹² Nauliꞌ Iesu, “Maimokou molabiꞌ.” Tiꞌara ara haweꞌ hadua i oloꞌraꞌ topeguruNa to pebáiꞌ mekuneꞌ i Hia, “HeánáKoꞌ?” láwiꞌ manótó miꞌi i laluraꞌ kaꞌIana mpuꞌu Pueꞌ Iesu.

¹³ Iesu moala miꞌi rótiꞌ haneꞌi Naweꞌiheꞌ, noꞌonoꞌ woꞌo bouꞌ.

¹⁴ Iti miꞌi katáluna kánina Pueꞌ Iesu mopatongawaꞌ wátáNa i topeguruNaheꞌ mantepuꞌu hangko i katueꞌNa huleꞌ.

Iesu molaluita hai Peturuꞌ

¹⁵ Karooraꞌ molabiꞌ, Iesu mampolaluitaꞌá Simoꞌ Peturuꞌ, Nauliꞌ, “Simoꞌ ánáꞌna Iohane, ba nupokaꞌahiꞌAꞌ melumbuꞌ hangko i pepokaꞌahiꞌraꞌ rángámu deꞌe i Kódóꞌ?” Nauliꞌ Peturuꞌ, “Toꞌu, Pueꞌ. Nuisánto kakupokaꞌahiꞌMu.” Nauliꞌ Iesu, “Ane noꞌonoꞌi, nukádipuráheꞌ ánáꞌ dimbáNgkuꞌ.”

¹⁶ Roo onoꞌ, mekuneꞌ wopiꞌi Iesu i Peturuꞌ karongkánina, “Simoꞌ, ánáꞌna Iohane, ba nupokaꞌahiꞌAꞌ?” Nauliꞌ Peturuꞌ, “Toꞌu, Pueꞌ. Nuisánto kakupokaꞌahiꞌMu.” Nauliꞌ Iesu, “Ane noꞌonoꞌi, nukádipuráheꞌ dimbáNgkuꞌ.”

¹⁷ Hangko ionoꞌ, mekuneꞌ wopiꞌi Iesu i katáluna kánina, “Simoꞌ, ánáꞌna Iohane, ba nupokaꞌahiꞌAꞌ?” Masusa miꞌi laluna Peturuꞌ láwiꞌ Iesu mekuneꞌ i katáluna kánina ba napokaꞌahiꞌ mpuꞌu. Mewaliꞌ nauliꞌ Peturuꞌ, “Pueꞌ, Nuisá upu-upuna. Nuisá kakupokaꞌahiꞌMu.” Nauliꞌ Iesu, “Ane noꞌonoꞌi, nukádipuráheꞌ dimbáNgkuꞌ.

¹⁸ Toꞌu ntepuꞌu laluitaNgkuꞌ deꞌe: i tempómu mani maleheꞌ, nubuku mani mokádipurá wátámu haduduámu, hai molumaokoꞌ iumbá peá peundeꞌámu. Agáiáná ane matoamamokoꞌ, ina mampeweꞌikoꞌ taemu i tauna, ina ratimpukukoꞌ hai raꞌántikoꞌ lao i katoroꞌá to tiꞌara nuꞌundeꞌ.”

¹⁹ Moliu laluitaNa iti, Iesu mopakanótó noumbá Peturuꞌ ina rapapate bona hangaꞌna Pueꞌ Ala rapomahile. Roo onoꞌ, nauliꞌ wopiꞌi Iesu i Peturuꞌ, “Meuláꞌmokoꞌ i Kódóꞌ!”

Iesu mampolaluita i Peturuꞌ kana i topeguruNa to Napokaꞌahiꞌ

²⁰ Tempóna Peturuꞌ mehaileꞌ i taleuꞌna, ia moita hadua topeguru to napokaꞌahiꞌ Iesu meuláꞌ i hira. Ia miꞌi to mehoda i hintáiꞌna Iesu tempóraꞌ mandeꞌ pandeꞌ Paska hai mekuneꞌ i Hia, “Pueꞌ, heáná riꞌi to ina mampobaluꞌKoꞌ?”

²¹ Kanaitána Peturuꞌ, napekuneꞌ, “Pueꞌ, apa to ina mewaliꞌ i rángángkuꞌ deꞌe?”

²² Nauliꞌ Iesu, “Ane Kuꞌundeꞌ bona ia tueꞌ oaꞌ duuꞌKuꞌ haweꞌ i karongkánina, tiꞌara paraluu nuisá! Agáiáná io, meuláꞌ pekoꞌ i Kódóꞌ.”

²³ Hangko ionoꞌ, tebámbári miꞌi i topeuláꞌna Iesu to ntániꞌna, katiꞌárána ina mate topeguruNa iti. Mole tiꞌara iti to nauliꞌ Iesu, agáiáná node riꞌi, “Ane Kuꞌundeꞌ bona ia tueꞌ oaꞌ duuꞌKuꞌ haweꞌ i karongkánina, tiꞌara paraluu nuisá!”

²⁴ Topeguruna Iesu to moita mata upu-upu to mewaliꞌ hai to mopahaweꞌ posabikina, ia miꞌi to moukiꞌ sura deꞌe. Hai taisá katoꞌuna laluita deꞌe.

Kahópóꞌána laluita

²⁵ Handaꞌ mani to nabábehi Iesu, agáiáná ane upu-upuna to Nabábehi iti raukiꞌ i lalu sura, rekeꞌ-rekeꞌna humalele duniáꞌ deꞌe tiꞌara gáná rapamboliꞌi sura iti.