Iberani 7 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pándiriꞌ hangko i Mekisedeꞌ

¹ Mekisedeꞌ iti, ia miꞌi hadua datu i kótá Salem hangkoia hai ia woꞌo hadua tadulako menómbá to mampopolumao bágóꞌ penómbá i Pueꞌ Ala to i Surugáꞌ. I pesuleꞌna Burahima hangko i pombealaꞌá monangi bahangapa datu, Mekisedeꞌ lao mampohidupaꞌá hai mowátiꞌ.

² Roo onoꞌ, Burahima mogáláꞌ-gáláꞌ párewá to nalámbiꞌ i pombeala iti, hai mampoweꞌi hanggáláꞌ hampuloꞌ hangko i polámbiꞌána i Mekisedeꞌ. Hangaꞌna Mekisedeꞌ, lempóna: “Datu to manótó,” hai ánti kaꞌiana datu i Salem, peisá woꞌo rauliꞌ, “Datu to moánti roꞌa ngkatueꞌ,” láwiꞌ lempóna laluita Salem ia miꞌi roꞌa ngkatueꞌ.

³ Kana i Mekisedeꞌ, tiꞌara ara to teukiꞌ mokana i umána ba inána ba pemuleꞌánaheꞌ. Tiꞌara woꞌo ara to teukiꞌ kana i pantepuꞌuána tueꞌna ba kahópóꞌána tueꞌna. Peisá tauliꞌ Mekisedeꞌ mewaliꞌ pándiriꞌ láwiꞌ ara kahibaliána hai Ánáꞌna Pueꞌ Ala: karapotadulako menómbána ina ara oaꞌ duuꞌna i rue-ruena.

Melumbuꞌ kamahilena tueꞌna Mekisedeꞌ hangko i Burahima hai tadulako-tadulako menómbá hangkoia

⁴ Mewaliꞌ, i daritakánána iti, taisá kamahilena tueꞌna Mekisedeꞌ. Ane Burahima, mahile woꞌo tueꞌna, láwiꞌ ia to rapouma upu-upu toIahudiꞌ. Agáiáná kehapiꞌ noꞌonoꞌ, Burahima mobiláꞌ Mekisedeꞌ hai mampeweꞌi i hia hanggáláꞌ hampuloꞌ hangko i párewána to nalámbiꞌ i pombeala.

⁵ Mouláꞌ áturá agama Iahudiꞌ, upu-upu toIahudiꞌ hangaa-ngaa mampeweꞌi hanggáláꞌ hampuloꞌ hangko i polámbiꞌáraꞌ i pemuleꞌána Lewi to mewaliꞌheꞌ tadulako menómbá. Tadulako menómbá iti, molámbiꞌheꞌ gáláꞌraꞌ hangko i hangka toIahudiꞌraꞌ, kehapiꞌraheꞌ upu-upu pemuleꞌána Burahima.

⁶ Mekisedeꞌ tiꞌara pemuleꞌána Lewi, agáiáná kehapiꞌ noꞌonoꞌ, molámbiꞌ hanggáláꞌ hampuloꞌ hangko i Burahima. Hai kehapiꞌ Burahima molámbiꞌ dándi hangko i Pueꞌ Ala, tiꞌara Burahima to mowátiꞌ Mekisedeꞌ, agáiáná bateꞌna riꞌi Mekisedeꞌ to mowátiꞌ Burahima.

⁷ Hai taisá ntepuꞌu: tauna to rawátiꞌ, tepaiwóiꞌá mani hangko i topewátiꞌ. Mewaliꞌ, melumbuꞌ kamahilena tueꞌna Mekisedeꞌ hangko i Burahima.

⁸ Noꞌonoꞌ woꞌo, melumbuꞌ kamahilena tueꞌna Mekisedeꞌ hangko i pemuleꞌána Lewi to mewaliꞌheꞌ tadulako menómbá. Tadulako-tadulako menómbá iti, molámbiꞌ mpuꞌuheꞌ hanggáláꞌ hampuloꞌ hangko i hangka toIahudiꞌraꞌ, agáiáná bateꞌna mateheꞌ woꞌo nodo tauna biásá. Mekisedeꞌ molámbiꞌ hanggáláꞌ hampuloꞌ hangko i Burahima, agáiáná tiꞌara ara teukiꞌ i lalu Sura Magasaꞌ kana i kamatena. Iti mewaliꞌ pándiriꞌ i kitaꞌ bona tongawaꞌ, Iesu to mewaliꞌ Tadulako Menómbá nodo Mekisedeꞌ, tueꞌ oaꞌ.

⁹ Pemuleꞌána Lewi to mewaliꞌheꞌ tadulako menómbá molámbiꞌ mpuꞌuheꞌ hanggáláꞌ hampuloꞌ hangko i halaluraꞌ. Agáiáná peisá tauliꞌ: pemuleꞌána Lewi mampeweꞌi hanggáláꞌ hampuloꞌ i Mekisedeꞌ moliu Burahima,

¹⁰ láwiꞌ Lewi iti, ueꞌ kuntuꞌna Burahima. I kamaina Mekisedeꞌ mampohidupaꞌá Burahima, Lewi tiꞌara mani ara; ara mani i lalu wátána Burahima. Mewaliꞌ, melumbuꞌ kamahilena tueꞌna Mekisedeꞌ hangko i Burahima hai pemuleꞌánaheꞌ Lewi.

Iesu mewaliꞌ Tadulako Menómbá Mahile mouláꞌ karapotadulako menómbána Mekisedeꞌ

¹¹ Kanapeweꞌina Pueꞌ Ala ÁturáNa i toIahudiꞌ, Ia moángkáꞌ pemuleꞌána Lewi Napopewaliꞌheꞌ tadulako menómbá to mampohawaꞌá tauna to handaꞌ bona mampeuláꞌiheꞌ ÁturáNa iti. Agáiáná tauna tiꞌara mewaliꞌ manótó i peitána Pueꞌ Ala ánti pobágóꞌraꞌ tadulako menómbá iti. Onoꞌ miꞌi haneꞌi hangaa-ngaa haweꞌ hadua tadulako menómbá to ntániꞌna to mouláꞌ karapotadulako menómbána Mekisedeꞌ, tiꞌara piꞌi hangko i pemuleꞌána Haruni toLewi.

¹² ToLewi to peisá mewaliꞌ tadulako menómbá. Mewaliꞌ, ane rapaháwángi hai hadua tadulako menómbá to to tiꞌara toLewi, lempóna, Paturoꞌna Musa woꞌo hangaa-ngaa rapaháwángi.

^13-14 Tadulako Menómbá Mahile to ratunggái ieneꞌ, Ia miꞌi Pueꞌtaꞌ Pueꞌ Iesu, to tiꞌara hangko i pemuleꞌána Lewi, agáiáná hangko i pemuleꞌána to ntániꞌna to tiꞌara haweꞌ hangkani mampopolumao bágóꞌna tadulako menómbá. Iesu hangko i pemuleꞌána Iudá, hai Musa tiꞌara haweꞌ hangkani mokábelái kana i pemuleꞌána Iudá tempóna mampolaluita kana i tadulako menómbá.

¹⁵ Tongawaꞌ pemuleꞌána Lewi hangaa-ngaa rapaháwángi i lalu pobágóꞌraꞌ mewaliꞌ tadulako menómbá, láwiꞌ haweꞌ miꞌi Tadulako Menómbá Mahile to hibali hai Mekisedeꞌ: Ia tiꞌara hangko i pemuleꞌána Lewi.

¹⁶ Hai Ia tiꞌara woꞌo mewaliꞌ tadulako menómbá mouláꞌ áturá mokana i tinána toioruNa. Ngkáliꞌna riꞌi Ia mewaliꞌ tadulako menómbá láwiꞌ katueꞌNa to tiꞌara mokahópóꞌá mopatongawaꞌ kamakuasaꞌNa.

¹⁷ Nodo to teukiꞌ i lalu Sura Magasaꞌ: “Io miꞌi tadulako menómbá duuꞌna i rue-ruena, mouláꞌ karapotadulako menómbána Mekisedeꞌ.” (Sura Petóiá 110:4)

¹⁸ Paturoꞌna Musa mokana i áturá pohuhuꞌ popenómbá moliu Tadulako Menómbá Mahile rakábáhá miꞌi, láwiꞌ rárá iti handaꞌ kamakuraꞌna hai tiꞌara piꞌi mobunduꞌ.

¹⁹ Áturá iti tiꞌara moánti tauna i Pueꞌ Ala; lempóna, tiꞌarakeꞌ mewaliꞌ manótó i peitána Pueꞌ Ala ánti pampeuláꞌintaꞌ Paturoꞌna Musa. Onoꞌ miꞌi haneꞌi áturá iti rapaháwángi hai rárá to melumbuꞌ mani kamaroꞌana. Ane tapeuláꞌi rárá to woꞌu iti, ara pehárungántaꞌ to maróhó peisákeꞌ mohungkuki Pueꞌ Ala.

²⁰ Pelumbuꞌna miꞌi, Iesu mewaliꞌ tadulako menómbá mouláꞌ totowina Pueꞌ Ala. Ane tadulako menómbá to ntániꞌna, tiꞌaraheꞌ raꞌángkáꞌ mewaliꞌ tadulako menómbá mouláꞌ totowi, mouláꞌ peheꞌ áturá.

²¹ I karaꞌángkáꞌna Iesu mewaliꞌ tadulako menómbá, Pueꞌ Ala to modándi, Nauliꞌ: “Kódóꞌ miꞌi deꞌe Pueꞌ Ala to mototowi, hai tiꞌara ina Kubáliki laluitaNgkuꞌ: Io miꞌi tadulako menómbá duuꞌna i rue-ruena.” (Sura Petóiá 110:4)

²² Mewaliꞌ, ánti totowi iti, Iesu mewaliꞌ popopakaróhó podándi to mopahintuwuꞌkeꞌ hai Pueꞌ Ala, hai melumbuꞌ mani kamaróhóna podándi iti hangko i podándi to napaꞌara Pueꞌ Ala i toSáráeliꞌ hangkoia.

²³ Ara wopiꞌi hampákáꞌ: ane pemuleꞌána Lewi, handaꞌmoheꞌ to mewaliꞌ tadulako menómbá, láwiꞌ tauna biásá peheꞌ to hangaa-ngaa mate, onoꞌ miꞌi haneꞌi tiꞌara rabuku mopaliliu bágóꞌraꞌ duuꞌna i rue-ruena. Mewaliꞌ ane mate hadua, napaháwángi to haduána.

²⁴ Agáiáná Iesu, karapotadulako menómbáNa tiꞌara ina mokahópóꞌá, láwiꞌ Ia tueꞌ oaꞌ duuꞌna i rue-ruena.

²⁵ Onoꞌ miꞌi haneꞌi Nabuku mokábáhákeꞌ hangko i huku dósántaꞌ hai mampoweꞌikeꞌ katehómpóꞌ to tiꞌara ara kamakuraꞌna, asalaꞌ mohungkukikeꞌ Pueꞌ Ala ánti pepoináláintaꞌ i Iesu. Láwiꞌ Ia to tueꞌ oaꞌ hai motangaꞌ-tangaꞌikeꞌ oaꞌ i lindoꞌna Pueꞌ Ala.

²⁶ Mewaliꞌ, hintotoꞌ ntepuꞌu Iesu to mewaliꞌ Tadulako Menómbá Mahile, láwiꞌ Ia peá to peisá motulungikeꞌ. Magasaꞌ tueꞌNa, tiꞌara ara salaꞌNa ba kamakuraꞌNa. Kehapiꞌ mewaliꞌ tauna, Ia tiꞌara madósá nodo tauna, haneꞌi deꞌe-deꞌe Ia rapopehoda i pehodaꞌá to tepaireáꞌá hangko i upu-upu to ara i surugáꞌ.

²⁷ Iesu iti tiꞌara nodo tadulako menómbá mahile to ntániꞌna, to alo-alona hangaa-ngaa mohuhuꞌheꞌ popenómbá. Rungu-runguna moántiheꞌ popenómbá to mopaháwángi dósáraꞌ haduduáraꞌ, hai roo onoꞌ mohuhuꞌheꞌ popenómbá to mopaháwángi dósáraꞌ tauna to handaꞌ. Agáiáná Iesu, hangkani peá mohuhuꞌ popenómbáNa i Pueꞌ Ala. Iti Nabábehi i tempóNa mohuhuꞌ wátáNa haduduáNa bona rapapate. PopenómbáNa iti Nahuhuꞌ hangkani peá; tiꞌara piꞌi paraluu rahuleki duuꞌna i rue-ruena.

²⁸ Tauna to mewaliꞌ Tadulako Menómbá Mahile mouláꞌ Paturoꞌna Musa, hira iti tauna biásá peheꞌ to bukeꞌ kamaledeꞌ. Agáiáná bahangapai parena hangko i Paturoꞌna Musa iti, Pueꞌ Ala mototowi ina moángkáꞌ ÁnáꞌNa to haduduáNa mewaliꞌ Tadulako Menómbá Mahile. Hai ÁnáꞌNa iti mewaliꞌ Topehómpóꞌ to tiꞌara ara kamakuraꞌNa hai to tueꞌ oaꞌ duuꞌna i rue-ruena.