Iberani 6 - Sura Magasaꞌ: Bahangapa sura Pototowiá to Sae hai Pototowiá to Woꞌu

^1-2 Mewaliꞌ halalu-halalu, ineeꞌ mesuleꞌ-suleꞌ pekeꞌ oaꞌ i paturoꞌ to rungu-runguna. Ane tauna to hangko mewaliꞌ toSarani, hangaa-ngaa rapaturoꞌheꞌ mokana i ntóáꞌna agama Sarani, bona menosoꞌheꞌ hangko i bábehiáraꞌ to moántiheꞌ i kapate, hai mepoináláiheꞌ i Pueꞌ Ala. Hangaa-ngaa rapaturoꞌheꞌ mokana i periu hai poángkáꞌ tae mowátiꞌ tauna. Hangaa-ngaa rapaturoꞌheꞌ mokana i apa to ina mewaliꞌ i alo to ina haweꞌ, ia miꞌi: pearóna huleꞌ tomate hai pehuku to tiꞌara mokahópóꞌá. Agáiáná hangaa-ngaa kupaturoꞌákou paturoꞌ kaliliuána, bona manótó lalumi hai pekirimi.

³ Paturoꞌ iti ina tapegurui ane napokana Pueꞌ Ala,

⁴ láwiꞌ tauna to motunggái mosuliꞌ hangko i pepoináláiraꞌ, tiꞌarapoheꞌ peisá rapoteteꞌá huleꞌ bona menosoꞌheꞌ hangko i dósáraꞌ. Hangkoia, manótó miꞌi laluraꞌ láwiꞌ moisáheꞌ Ngkóráꞌ Marasa, góeꞌheꞌ motarima pewátiꞌ hangko i Pueꞌ Ala, hai laluraꞌ nakuasaꞌi Inao to Magasaꞌ;

⁵ moisá ntepuꞌuheꞌ kamaroꞌana ngkóráꞌna Pueꞌ Ala hai kuasaꞌNa to ina tongawaꞌ i alo to ina haweꞌ.

⁶ Agáiáná ane roo onoꞌ, ratunggái mosuliꞌ hangko i pepoináláiraꞌ, tiꞌarapoheꞌ peisá rapoteteꞌá huleꞌ bona menosoꞌheꞌ hangko i dósáraꞌ, láwiꞌ ánti posápuákaraꞌ Pueꞌ Iesu, nodoheꞌ tauna to mopakuꞌ huleꞌ Ánáꞌna Pueꞌ Ala hai motitibei i lindoꞌraꞌ tauna to handaꞌ.

⁷ Tauna to noꞌonoꞌ peisá rapándiriꞌ nodo tampoꞌ to naudángi hai nakatueꞌi tudaꞌ-tudaꞌ to mobunduꞌ i topohinoe. Tampoꞌ iti nawátiꞌ Pueꞌ Ala.

⁸ Agáiáná ane roo onoꞌ, tampoꞌ iti nakatueꞌi danaꞌ hai dui, tiꞌara piꞌi mobunduꞌ, ina nakambo Pueꞌ Ala, hai kahópóꞌána to tueꞌ hangko i tampoꞌ iti upu rahunu. {Noꞌonoꞌ woꞌo tauna to mosuliꞌ hangko i pepoináláiraꞌ, ina nahuku Pueꞌ Ala i lalu api pehukuá}.

⁹ Agáiáná kómu halalu-halalu to kipokaꞌahiꞌ, kehapiꞌ noꞌonoꞌ laluitangkiꞌ, kiꞌisá tiꞌarakou nodo tampoꞌ to nakambo Pueꞌ Ala. Kiꞌisá kaꞌárána wuaꞌmi to melumbuꞌ kamaroꞌana, iti miꞌi pepoináláimi hai bábehiámi to hintotoꞌ i tauna to molámbiꞌ katehómpóꞌ hangko i Pueꞌ Ala.

¹⁰ Pueꞌ Ala bateꞌna manótó. Tiꞌara ina Nakáláliꞌá bágóꞌmi to nipobágóꞌ hangko i lalumi to bukeꞌ ahiꞌ. Tongawaꞌ nipokaꞌahiꞌ Pueꞌ Ala, láwiꞌ handaꞌ kánimi motulungi halalu hampepepoináláimi, maroꞌa i tempó to liu miꞌi, maroꞌa deꞌe-deꞌe.

¹¹ Agáiáná kipembiáꞌ ntepuꞌu halalu-halalu, bona nipári-pári mopaliliu bábehiá to noꞌonoꞌ duuꞌna i kahópóꞌána, bona nilámbiꞌ mpuꞌu apa to nihárungá hangko i Pueꞌ Ala.

¹² Ineeꞌkou ara to lohe mampeuláꞌi peundeꞌána Pueꞌ Ala. Mampopándiriꞌmokou tauna to mepoinálái i Pueꞌ Ala. Sabaraꞌheꞌ mampegiá apa to Nadándiáheꞌ.

Dándina Pueꞌ Ala tiꞌara tebáliki

¹³ Tempóna Pueꞌ Ala mopahaweꞌ dándiNa i Burahima, tiꞌara ara to melumbuꞌ kamahilena tueꞌna hangko i Pueꞌ Ala. Onoꞌ miꞌi haneꞌi Ia mototowi moliu hangaꞌNa haduduáNa, Nauliꞌ:

¹⁴ “Ina Kupopewaliꞌ apa to Kudándiákoꞌ deꞌe: Ina Kuwátiꞌkoꞌ hai ina Kupahandaꞌ pemuleꞌámu duuꞌna handaꞌ ntepuꞌuheꞌ.”

¹⁵ Burahima sabaraꞌ mampegiá duuꞌna molámbiꞌ apa to nadándiá Pueꞌ Ala.

¹⁶ Ane rápáꞌna ara hadua tauna to mototowi, biásá ia mokábelái hangaꞌ apa to melumbuꞌ kamahilena tueꞌna hangko i hia. Totowina iti mopakaróhó laluitana bona tiꞌara ara to báiꞌ mesápuáka.

¹⁷ Noꞌonoꞌ woꞌo Pueꞌ Ala: i popahaweꞌNa dándiNa i Burahima hai i upu-upu tauna to ina molámbiꞌ dándi iti, Napoinao mopakaróhó laluraꞌ bona raisá katiꞌárána mabáliꞌ tunggáiáNa i hira. Onoꞌ miꞌi haneꞌi Napakaróhó ntepuꞌu dándiNa moliu totowi.

¹⁸ Pueꞌ Ala tiꞌara modongkoꞌ ane mopahaweꞌ dándiNa hai totowiNa, rompákáꞌ iti tiꞌara peisá tebáliki. Onoꞌ miꞌi haneꞌi kitaꞌ to mempaisare i Pueꞌ Ala, maróhó laluntaꞌ mampegiá apa to tahárungá hangko i Hia.

¹⁹ Pehárungántaꞌ iti nodo rante to motakaꞌkeꞌ i Pueꞌ Ala to mopatinda laluntaꞌ bona tiꞌara marugiꞌ pepoináláintaꞌ. {I lalu Támbina Pueꞌ Ala, ara rindi báná to motuko rárá mesuaꞌ i lalu Lintuꞌ to Melumbuꞌ Kamagasaꞌna.} Agáiáná i kitaꞌ to tetakaꞌ i Pueꞌ Ala, tiꞌara ara to motuko rárántaꞌ lao i lindoꞌNa,

²⁰ láwiꞌ Iesu miꞌi to moioru mesuaꞌ ionoꞌ mampobungkáhiákeꞌ rárá, bona kitaꞌ woꞌo peisá meuláꞌ lao ionoꞌ. Ia to mewaliꞌ Tadulako Menómbá Mahile duuꞌna i rue-ruena, mouláꞌ karapotadulako menómbána Mekisedeꞌ.