Iberani 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Dándina Pueꞌ Ala i kitaꞌ ara mani bona peisákeꞌ molámbiꞌ pengkarooá hingkakani hai Ia. Onoꞌ miꞌi haneꞌi hangaa-ngaa maingáꞌ-ingáꞌ ntepuꞌukeꞌ, bona tiꞌara ara hadua hangko i oloꞌtaꞌ to tiꞌara molámbiꞌ apa to Nadándi miꞌi iti.

² Láwiꞌ kitaꞌ deꞌe, rapahaweꞌámokeꞌ woꞌo Ngkóráꞌ Marasa, nodo toSáráeliꞌ hangkoia. Agáiáná ngkóráꞌna Pueꞌ Ala to rahádi iti tiꞌara moánti pewátiꞌ i hira, mbero-mbero peá, láwiꞌ tiꞌaraheꞌ mepoinálái.

³ Bateꞌna peá kitaꞌ to mepoinálái to molámbiꞌ pengkarooá hingkakani hai Pueꞌ Ala. Ane tauna to tiꞌara mepoinálái, tiꞌaraheꞌ molámbiꞌ pengkarooá iti. Taisá iti hangko i Ngkóráꞌna Pueꞌ Ala to manguliꞌ node: “Ánti kamabukoꞌKuꞌ haneꞌi Kutotowi node: Tiꞌara mpuꞌuheꞌ ina mesuaꞌ i pengkarooá hingkakani hai Kódóꞌ.” (Sura Petóiá 95:11) Kehapiꞌ noꞌonoꞌ, bateꞌna ara pengkarooá to napatimama miꞌi Pueꞌ Ala hangko i pewaliꞌána duniáꞌ, láwiꞌ roo miꞌi bágóꞌNa iti.

⁴ Ara teukiꞌ i lalu Sura Magasaꞌ to mokábelái alo kapitu node: “I alo kapitu, Pueꞌ Ala mengkaroo hangko i upu-upu bágóꞌNa.” (Pewaliꞌána 2:2)

⁵ Hai hangkani mani teukiꞌ i Ngkóráꞌna Pueꞌ Ala to manguliꞌ node: “Tiꞌara mpuꞌuheꞌ ina mesuaꞌ i pengkarooáNgkuꞌ.” (Sura Petóiá 95:11)

⁶ Mewaliꞌ hira to rungu-runguna mohádi Ngkóráꞌ Marasa, tiꞌaraheꞌ molámbiꞌ pengkarooá hingkakani hai Pueꞌ Ala, láwiꞌ tiꞌaraheꞌ mampeuláꞌi hawaꞌNa. Agáiáná tunggáiána Pueꞌ Ala, hangaa-ngaa ara tauna ntániꞌna to molámbiꞌ pengkarooá iti.

⁷ Onoꞌ miꞌi haneꞌi Pueꞌ Ala mopakanótó alo ntaniꞌ, bona tauna peisá molámbiꞌ pengkarooá hingkakani hai Ia. Alo to Napakanótó ia miꞌi “Alo Deꞌe”, lempóna alo pampehádingiántaꞌ Ngkóráꞌ Marasa. Bahangapa átuna parena hangko i kaꞌaraꞌáraꞌ toSáráeliꞌ i pádá loriꞌ, Datu Daudiꞌ moukiꞌ Ngkóráꞌna Pueꞌ Ala to manguliꞌ node: “Alo deꞌe, ane nihádi apa to nauliꞌ Pueꞌ Ala, ineeꞌ nipamatuꞌa lalumi.” (Sura Petóiá 95:7-8)

⁸ Hangkoia, Iosuá moántiheꞌ toIahudiꞌ mesuaꞌ i tampoꞌ Kánáꞌá to nadándiáheꞌ Pueꞌ Ala, agáiáná tiꞌara iti peá to rauliꞌ pengkarooá, láwiꞌ ara mani alo pengkarooá to natunggái Pueꞌ Ala.

⁹ Mewaliꞌ, ara mani tempó i taunána Pueꞌ Ala bona molámbiꞌheꞌ pengkarooá hingkakani hai Ia. Pengkarooá iti, nodo pengkarooána Pueꞌ Ala i alo kapitu,

¹⁰ láwiꞌ ane mengkarookeꞌ hingkakani hai Pueꞌ Ala, lempóna, mengkarookeꞌ woꞌo hangko i bágóꞌtaꞌ, nodo Pueꞌ Ala mengkaroo hangko i bágóꞌNa i alo kapitu.

¹¹ Mewaliꞌ halalu-halalu, hangaa-ngaa tapári-pári bona molámbiꞌkeꞌ pengkarooá hingkakani hai Pueꞌ Ala, hai ineeꞌkeꞌ mosuliꞌ hangko i pepoináláintaꞌ, nodo toIahudiꞌ hangkoia to tiꞌara mampeuláꞌi hawaꞌNa.

¹² Láwiꞌ ngkóráꞌna Pueꞌ Ala ia miꞌi laluita to tueꞌ hai makuasaꞌ. Melumbuꞌ kamataruna hangko i pihoꞌ to momata ntimbali. Hamata pihoꞌ peisá metohuꞌ duuꞌna haweꞌ i lehoꞌ buꞌu hai átiꞌ buꞌu. Agáiáná ngkóráꞌna Pueꞌ Ala metohuꞌ duuꞌna haweꞌ i laluntaꞌ. Hai ngkóráꞌNa iti napakeꞌ Pueꞌ Ala mopáresáꞌ pekirintaꞌ hai tunggáiána laluntaꞌ.

¹³ Tiꞌara ara hampákáꞌ to tewuniángi i peitáNa. Upu-upuna to ara, makaaꞌ hai tongawaꞌ ntepuꞌu i Hia. Hai hangaa-ngaa tapangákuꞌ i lindoꞌNa upu-upu bábehiántaꞌ.

Iesu ia miꞌi Tadulako Menómbá Mahile to motulungikeꞌ

¹⁴ Ara miꞌi hadua Tadulakontaꞌ Menómbá Mahile to melumbuꞌ ntepuꞌu kamahilena tueꞌNa: Ia miꞌi Iesu Ánáꞌna Pueꞌ Ala. Ia mengkaoreꞌ miꞌi mesuaꞌ i lalu surugáꞌ hai lao i lindoꞌna Pueꞌ Ala. Onoꞌ miꞌi haneꞌi hangaa-ngaa tapakaróhó pepoináláintaꞌ hai tapangákuꞌ oaꞌ kaꞌIesuna Pueꞌtaꞌ.

¹⁵ Ia miꞌi Tadulakontaꞌ Menómbá Mahile to moisá kamaledeꞌtaꞌ. Naisá ntepuꞌu, láwiꞌ Ia rakeloꞌ miꞌi woꞌo i pákáꞌ-pákáꞌna hibali hai kitaꞌ, agáiáná Ia tiꞌara madósá.

¹⁶ Onoꞌ miꞌi haneꞌi, tiꞌarakeꞌ paraluu malááꞌ. Peisámokeꞌ pebáiꞌ mohungkuki Pueꞌ Ala i pehodaꞌáNa i surugáꞌ, bona tahádiá ntepuꞌu kamahilena ahiꞌNa i kitaꞌ, hai i tempó to taparaluu, ina Natulungikeꞌ hangko i kabulána laluNa.