Iberani 13 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paturoꞌ to kahópóꞌána

¹ Hangaa-ngaa mombepokaꞌahiꞌkou oaꞌ nodokou tohampohalaluá.

² Hangaa-ngaa bulá lalumi motarima torare to mehupeꞌ i támbimi, láwiꞌ taisá araheꞌ tauna to mampotorare malaꞌeka, agáiáná tiꞌara raisá kamalaꞌekaraꞌ.

³ Nibuhinao halalu hampepepoináláimi to ratarungku, láwiꞌ kómu woꞌo nodokou to ratarungku hingkakani hai hira. Hai nitulungiheꞌ tauna to rapopeahiahiꞌ ánti pepoináláiraꞌ, láwiꞌ kómu woꞌo nodokou to rapopeahiahiꞌ hingkakani hai hira.

⁴ Upu-upu tauna hangaa-ngaa mobiláꞌ dándi pohamboko to rapatongawaꞌ i lindoꞌna Pueꞌ Ala. Hangaa-ngaa tetidaꞌkou i hambokomi, láwiꞌ tauna to mebualosi hai to mobábehi bábehiá to metitidiꞌi, bateꞌraꞌ ina nahuku Pueꞌ Ala.

⁵ Ineeꞌ pekou mampoinao mampeliꞌ dóiꞌ, agáiáná nipokagóeꞌ apa peá to ara i kómu, láwiꞌ Pueꞌ Ala haduduáNa to ina mopagánái apa to niparaluu i lalu katueꞌmi. Hai ara laluitana Pueꞌ Ala to manguliꞌ: “Tiꞌarakoꞌ haweꞌ hangkani ina Kupálehi, hai tiꞌarakoꞌ haweꞌ hangkani ina Kukálámbáhi.” (Pohuleki 31:6)

⁶ Onoꞌ miꞌi haneꞌi maróhó laluntaꞌ, hai tauliꞌ: “Tiꞌaraꞌaꞌ malááꞌ, láwiꞌ Pueꞌ to motulungiaꞌ. Tiꞌara kupokalááꞌ apa to ina rabábehi tauna i kódóꞌ.” (Sura Petóiá 118:6)

⁷ Hangaa-ngaa nipekiriheꞌ oaꞌ tadulakomi hangkoia to mopahaweꞌákou ngkóráꞌna Pueꞌ Ala. Nibuhinao noumbá kahópóꞌána katueꞌraꞌ. Pepoináláiraꞌ peisá mewaliꞌ pándiriꞌ i kómu.

⁸ {Kehapiꞌ matemoheꞌ,} agáiáná Iesu Kerisitu tiꞌara mambáliꞌ; Ia hibali peá oaꞌ hangko i rungu-runguna, deꞌe-deꞌe, hai duuꞌna i rue-ruena.

⁹ Mewaliꞌ ineeꞌkou mampeuláꞌi paturoꞌ to tiꞌara toꞌu to mopakanawoꞌkou. Rángina miꞌi mopailalukou kamahilena ahiꞌna Pueꞌ Ala, láwiꞌ onoꞌ miꞌi to mopakaróhó pepoináláimi. Ane ádá hai páliá mokana i pandeꞌ, tiꞌara mobunduꞌ i lalu katueꞌtaꞌ.

¹⁰ Ara miꞌi i kitaꞌ to melumbuꞌ kamaroꞌana hangko i ádá agama toIahudiꞌ, ia miꞌi Iesu. Upu-upu tauna to mampeuláꞌi mani áturá popenómbá toIahudiꞌ, tiꞌaraheꞌ ina molámbiꞌ gáláꞌraꞌ hangko i popenómbána Iesu, ia miꞌi katueꞌ to maroꞌa to tiꞌara mokahópóꞌá.

¹¹ Mouláꞌ áturá ágámáraꞌ toIahudiꞌ, Tadulako Menómbá Mahile mosambale binataꞌ bona mopaháwángi dósá, hai waheꞌna naꞌánti i lalu Lintuꞌ to Melumbuꞌ Kamagasaꞌna, agáiáná wátána raꞌánti lao i rawa kótá haneꞌi raintu duuꞌna mewaliꞌ awu.

¹² Noꞌonoꞌ woꞌo Iesu Kerisitu raꞌánti lao i rawa kótá. Ionoꞌ Ia molámbiꞌ kapári hai rapapate bona waheꞌNa mopamagasaꞌkeꞌ to mepoinálái i Hia.

¹³ Mewaliꞌ halalu-halalu, hangaa-ngaa takábáhá kamampeuláꞌintaꞌ áturá-áturá agama toIahudiꞌ. Rángina miꞌi mepoináláikeꞌ i Iesu, kehapiꞌkeꞌ ratitibei tauna nodo woꞌo Iesu ratitibei.

¹⁴ Katueꞌtaꞌ i duniáꞌ deꞌe bukeꞌ hai kapári, agáiáná tiꞌara duniáꞌ deꞌe to ina mewaliꞌ katoroꞌántaꞌ duuꞌna i rue-ruena. Deꞌe-deꞌe mehárungákeꞌ i katoroꞌántaꞌ i surugáꞌ to ina ara oaꞌ duuꞌna i rue-ruena.

¹⁵ Mewaliꞌ halalu-halalu, ánti kanatangaꞌ-tangaꞌintaꞌ Iesu, peisákeꞌ mohuhuꞌ oaꞌ popenómbántaꞌ i Pueꞌ Ala. Popenómbántaꞌ iti tiꞌara piꞌi binataꞌ, agáiáná petóiá to tahuwárá mampomahile hangaꞌNa.

¹⁶ Ineeꞌkou luleꞌ mobábehi apa to maroꞌa. Hangaa-ngaa motulungikou halalumi, láwiꞌ iti miꞌi woꞌo popenómbá to mopagóeꞌ Pueꞌ Ala.

¹⁷ Nipeuláꞌi miꞌi paturoꞌraꞌ tadulakomi hai nipengkoruꞌiheꞌ, láwiꞌ hira to moteteꞌkou i lalu pepoináláimi, hai hira to hangaa-ngaa mehániꞌheꞌ i Pueꞌ Ala kana i pobágóꞌraꞌ. Nipeuláꞌi paturoꞌraꞌ bona góeꞌheꞌ mampopolumao bágóꞌraꞌ. Ane tiꞌara nipeuláꞌi hawaꞌraꞌ, ina mopamasusakou laluraꞌ hai tiꞌarakou ina morasiꞌ.

¹⁸ Kupembiáꞌ bona nipekakaeáꞌangkaiꞌ oaꞌ. Kiꞌisá kabulána lalungkiꞌ, láwiꞌ i pákáꞌ-pákáꞌna kipoinao mobábehi oaꞌ to maroꞌa.

¹⁹ Hai kupembiáꞌ ntepuꞌu bona nipekakaeáꞌaꞌ, bona hawiáꞌaꞌ mesuleꞌ lao i kómu.

Pekakae hai kahópóꞌána sura

²⁰ Moliu waheꞌna Iesu Pueꞌtaꞌ to rapapate, Pueꞌ Ala mopakanótó dándiNa to mopahintuwuꞌkeꞌ hai Ia duuꞌna i rue-ruena. Hai Pueꞌ Ala mopatueꞌ huleꞌ Iesu hangko i kapate, haneꞌi Naꞌángkáꞌ mewaliꞌ Topoewu to melumbuꞌ kamaroꞌana, hai kitaꞌ deꞌe dimbáNa. Onoꞌ miꞌi haneꞌi mekakaeaꞌ i Pueꞌ Ala, láwiꞌ Ia pentóáꞌána roꞌa ngkatueꞌ.

²¹ Kupembiáꞌ bona Naweꞌikou upu-upu to maroꞌa, bona peisákou mampeuláꞌi peundeꞌáNa. Kupembiáꞌ bona moliu kuasaꞌna Iesu Kerisitu, Pueꞌ Ala mokale i lalumi duuꞌna apa to nibábehi ina mopagóeꞌ ntepuꞌu Pueꞌ Ala. Tatóiá miꞌi Pueꞌ Iesu duuꞌna i rue-ruena. Ami.

²² Halalu-halalu, kupembiáꞌ bona nipailalu paturoꞌ to teukiꞌ i lalu sura deꞌe, kehapiꞌ surangkuꞌ deꞌe hampaieneꞌ peá.

²³ Bona niꞌisá woꞌo: halaluntaꞌ Timotiu rakábáhá miꞌi hangko i tarungku. Ane poloꞌ haweꞌ ieneꞌ, ina kuporángá lao moweoꞌkou.

²⁴ Nipahaweꞌ tabeángkiꞌ i upu-upu tadulakomi hai upu-upu halalu hampepepoináláimi. Tabeá hangko i halalumi to hangko i Italia.

²⁵ Pueꞌ mowátiꞌkou upu-upu. Hangko i kódóꞌ.