Iberani 11 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pepoinálái

¹ To rauliꞌ pepoinálái, lempóna: apa to tahárungá i Pueꞌ Ala, taisá bateꞌna ina mewaliꞌ. Kehapiꞌ tiꞌara mani taita apa to tapegiá, manótó i laluntaꞌ kaꞌina mewaliꞌna.

² Ánti pepoináláiraꞌ tauna hangkoia, napokagóeꞌheꞌ Pueꞌ Ala.

³ Ánti pepoináláintaꞌ, taisá kaPueꞌ Alana to mampopewaliꞌ duniáꞌ hai upu-upu óntóꞌna, hai Ia tiꞌara mopakeꞌ apa to peisá raita, agáiáná upu-upuna iti Nabábehi moliu peá ngkóráꞌNa.

Pándiriꞌ hangko i tauna to mepoinálái Pepoináláiraꞌ Abeli, Henoꞌ hai Noho

⁴ Ánti pepoináláina Abeli, ia mohuhuꞌ i Pueꞌ Ala popenómbána to melumbuꞌ kamaroꞌana hangko i popenómbána Kaiꞌ wutuꞌna. Taisá miꞌi kaꞌárána pepoináláina, láwiꞌ góeꞌ laluna Pueꞌ Ala motarima popenómbána. Hai ánti pepoináláina, Abeli narekeꞌ Pueꞌ Ala tauna to manótó i peitáNa. Kehapiꞌ mate miꞌi, agáiáná ia molaluita mani, láwiꞌ ánti pepoináláina, Abeli mewaliꞌ pándiriꞌ i kitaꞌ to tueꞌ deꞌe-deꞌe.

⁵ Ánti pepoináláina Henoꞌ, ia tiꞌara mate, agáiáná raoreꞌ hangko i duniáꞌ deꞌe i tempóna mani tueꞌ. Tiꞌara ara to molámbiꞌ wátána, láwiꞌ Pueꞌ Ala moala hangko i duniáꞌ deꞌe. I lalu Sura Magasaꞌ teukiꞌ napokagóeꞌ Pueꞌ Ala.

⁶ Mewaliꞌ taisá ntepuꞌu: tiꞌara ara tauna to mampokagóeꞌ Pueꞌ Ala ane tiꞌaraheꞌ mepoinálái i Hia. Láwiꞌ tauna to mohungkuki Pueꞌ Ala hangaa-ngaa raisá i laluraꞌ: Ia bateꞌna ara, hai bateꞌna ina mampoweꞌi háwángina to maroꞌa i heáná peá to toꞌu-toꞌu mampoinao ntepuꞌu moisá Pueꞌ Ala.

⁷ Ánti pepoináláina Noho, ia mampeuláꞌi apa to nahawaꞌá Pueꞌ Ala, láwiꞌ Pueꞌ Ala mohángáꞌá kaꞌina árána uwai to molábóꞌ duniáꞌ. Mewaliꞌ, kehapiꞌ tiꞌara mani naita pewaliꞌna, napeuláꞌi mpuꞌu miꞌi hawaꞌna Pueꞌ Ala haneꞌi mobábehi duanga to mahile bona ia hingkakani hai toinána hai ánáꞌna tiꞌaraheꞌ ina mate humpu. Upu-upu tauna ntániꞌna i duniáꞌ rahuku, agáiáná ánti pepoináláina, Noho narekeꞌ Pueꞌ Ala tauna to manótó i peitáNa.

Pepoináláina Burahima

⁸ Ánti pepoináláina Burahima, ia mampeuláꞌi hawaꞌna Pueꞌ Ala. Pueꞌ Ala mokióꞌ hai mohuoꞌ lao i tampoꞌ to karaoꞌ, bona tampoꞌ to Natudeꞌá iti ina mewaliꞌ gáláꞌna Burahima hai gáláꞌraꞌ pemuleꞌána. Mewaliꞌ kehapiꞌ tiꞌara naisá Burahima iumbá kalaoána, ia pohuꞌ mampeuláꞌi hawaꞌna Pueꞌ Ala.

⁹ I kahaweꞌna i tampoꞌ iti, napoinálái oaꞌ dándina Pueꞌ Ala iti. Isakiꞌ ánáꞌna, hai Iako ueꞌna, motarimaheꞌ woꞌo dándina Pueꞌ Ala iti. Kehapiꞌ tampoꞌ iti ina mewaliꞌ gáláꞌraꞌ, agáiáná toroꞌheꞌ ionoꞌ nodo peheꞌ tohaweꞌ, tiꞌara ara támbiraꞌ haduduáraꞌ, toroꞌ peheꞌ i lalu bambaruꞌ.

¹⁰ Burahima mampegiá hambuaꞌ kótá to napopewaliꞌ hai naꞌaró Pueꞌ Ala. Kótá iti ina ara oaꞌ duuꞌna i rue-ruena.

¹¹ Ánti pepoináláiraꞌ Burahima hai Sáráꞌ, haneꞌi peisáheꞌ moánáꞌ, kehapiꞌ matoama miꞌi Burahima hai toinána iti lalo. Iti mewaliꞌ láwiꞌ manótó i laluna Burahima kaꞌina nabukekina Pueꞌ Ala dándiNa.

¹² I tempó iti, wátána Burahima matoama miꞌi láwiꞌ liu miꞌi tempóna memuleꞌ. Agáiáná kehapiꞌ noꞌonoꞌ, ánti pepoináláina, Burahima momuleáka handaꞌ tauna to tiꞌara peisá teimbaꞌ. Kahandaꞌraꞌ nodo kahandaꞌna betue i langiꞌ hai nodo wungi i wiwi tahiꞌ.

¹³ Upu-upu tauna iti mepoináláiheꞌ i dándina Pueꞌ Ala duuꞌraꞌ mate, agáiáná tiꞌara maniheꞌ molámbiꞌ apa to nadándiáheꞌ Pueꞌ Ala. Peisá tauliꞌ: moita ngkaraoꞌ peheꞌ pewaliꞌna. Raisá, marue mani hangko mewaliꞌ riꞌi, agáiáná kehapiꞌ noꞌonoꞌ, tiꞌara bata-bata laluraꞌ i dándina Pueꞌ Ala. Góeꞌ ntepuꞌuheꞌ mampegiá, onoꞌ miꞌi haneꞌi rauliꞌ: tueꞌheꞌ i duniáꞌ deꞌe nodo peheꞌ tohaweꞌ ba topolilo.

¹⁴ Tauna to manguliꞌ noꞌonoꞌ, tongawaꞌ hangko i laluitaraꞌ apa to rahárungá. To rahárungá iti, ia miꞌi tampoꞌ to peisá mewaliꞌ tampoꞌraꞌ haduduáraꞌ.

¹⁵ Tiꞌara tampoꞌ to rapálehi hangkoia to rapeliꞌ, láwiꞌ ane ketampoꞌ iti to rahárungá, kenampakaꞌ maniheꞌ mesuleꞌ ionoꞌ.

¹⁶ Agáiáná katoroꞌá to rahárungá, ia miꞌi katoroꞌá to melumbuꞌ kamaroꞌana, to napatimamaꞌámoheꞌ Pueꞌ Ala, ia miꞌi hambuaꞌ kótá to ara i surugáꞌ. Onoꞌ miꞌi haneꞌi Ia tiꞌara mahili ane rauliꞌ Ia Pueꞌraꞌ.

^17-18 Ánti pepoináláina Burahima, i tempóna napampeitai Pueꞌ Ala, ia lao mohuhuꞌ Isakiꞌ ánáꞌna to haduduána ina mewaliꞌ popenómbána. Hangko i rungu-runguna, napehángáꞌá miꞌi Pueꞌ Ala i hia, “Moliu ánáꞌmu Isakiꞌ iti, ina molámbiꞌkoꞌ handaꞌ pemuleꞌámu mouláꞌ apa to Kudándiákoꞌ.” Agáiáná kehapiꞌ miꞌi ara dándi iti, Burahima bateꞌna peá mopatimama ánáꞌna to haduduána ina nasambale,

¹⁹ láwiꞌ i tempó iti nauliꞌ Burahima i laluna, “Kehapiꞌ ánáꞌkuꞌ mate, makuasaꞌ ntepuꞌu Pueꞌ Ala mopatueꞌ huleꞌ.” Hai peisá tauliꞌ: ia molámbiꞌ huleꞌ ánáꞌna hangko i kapate.

Pepoináláiraꞌ Isakiꞌ, Iako hai Iusupu

²⁰ Ánti pepoináláina Isakiꞌ, ia mowátiꞌ Iako hai Esau ánáꞌnaheꞌ, hai mopahaweꞌáheꞌ apa to ina mewaliꞌ i alo to ina haweꞌ.

²¹ Ánti pepoináláina Iako, hangko tiꞌara mani mate, ia mowátiꞌ ueꞌna, ánáꞌnaheꞌ Iusupu to rodua. I tempó iti ia mepalintukuꞌ i wuntu laiꞌna, menómbá i Pueꞌ Ala.

²² Ánti pepoináláina Iusupu, i tempóna ina mate, ia mampolaluita kaꞌina pohuꞌraꞌ pemuleꞌána toSáráeliꞌ hangko i tampoꞌ Másiriꞌ. Hai ia meawili bona ane mesuwuꞌheꞌ hangko i tampoꞌ Másiriꞌ, buꞌuna hangaa-ngaa raꞌánti mesuleꞌ lao i tampoꞌ Kánáꞌá.

Pepoináláina Musa

²³ Ánti pepoináláiraꞌ tosaena, onoꞌ miꞌi haneꞌi i kamesupaꞌna Musa, ia rawuni tálu wulána kamaruena, láwiꞌ moitaheꞌ ánángkóiꞌ iti malápáká ntepuꞌu, hai tiꞌaraheꞌ malááꞌ moliungi hawaꞌna daturaꞌ toMásiriꞌ bona mopapate upu-upu ánángkóiꞌ tobaleilo.

²⁴ Ánti pepoináláina Musa, i tempóna miꞌi mahile, tiꞌara naundeꞌ rauliꞌ ueꞌna datu toMásiriꞌ.

²⁵ Tiꞌara naundeꞌ tueꞌ i kagóeꞌ-góeꞌ to hampaiꞌ peá to ina moánti i lalu dósá, agáiáná naundeꞌ mani tueꞌ i lalu kapári hingkakani hai taunána Pueꞌ Ala.

²⁶ Naundeꞌ mani Musa rasasalaꞌi ánti pepoináláina i Datu Topehómpóꞌ to ina haweꞌ haneꞌi ina molámbiꞌ peawaꞌna datu i tampoꞌ Másiriꞌ, láwiꞌ ia mehárungá ntepuꞌu ina molámbiꞌ háwángina to mahile hangko i Pueꞌ Ala.

²⁷ Ánti pepoináláina Musa, haneꞌi mopálehi tampoꞌ Másiriꞌ, tiꞌara ánti kamalááꞌna i kamabukoꞌna daturaꞌ toMásiriꞌ. Ia tetidaꞌ oaꞌ i tunggáiána, nodo miꞌi to moita Pueꞌ Ala to tiꞌara peisá raita tauna.

²⁸ Ánti pepoináláina, ia mampeuláꞌi hawaꞌna Pueꞌ Ala, bona mobábehi ádá Alo Posusa Paska to rungu-runguna, hai nahuoꞌheꞌ toSáráeliꞌ mopariroha waheꞌ ánáꞌ dimbá i babaꞌ támbiraꞌ, bona ane moliui malaꞌeka to mepapate, ánáꞌraꞌ to wutuꞌ tiꞌara ina rapahipapate nodo ánáꞌraꞌ toMásiriꞌ to wutuꞌ.

Pepoináláiraꞌ tauna ntániꞌna

²⁹ Ánti pepoináláiraꞌ, toSáráeliꞌ mengkalimbaheꞌ i tahiꞌ Malei nodo peheꞌ molumao i kámárá. Agáiáná toMásiriꞌ to medápáꞌ mateheꞌ humpu tangaꞌraꞌ mengkalimba i tahiꞌ iti.

³⁰ Ánti pepoináláiraꞌ, toSáráeliꞌ motolelingiheꞌ bente kótá Ieriko pitu alona kamaruena. Kahópóꞌána bente iti magero i alo kapitu.

³¹ Ánti pepoináláina Raha, ia tiꞌara rapapate hingkakani hai tauna to hambámbánuána i Ieriko to tiꞌaraheꞌ mengkoruꞌ i Pueꞌ Ala. Kehapiꞌ Raha iti hadua towawine to mampobaluꞌ wátána, i tempóraꞌ bahangapa surudadoꞌ toSáráeliꞌ lao momata-matai kótá Ieriko, napotorareheꞌ i támbina, hai natulungiheꞌ.

³² Handaꞌ mani to peisá kuhángáꞌáꞌákou mokana i pepoináláiraꞌ tauna, agáiáná tiꞌara piꞌi gáná tempóngkuꞌ motuntu kana i hira upu-upu. Tiꞌara manikou kutuntuá mokana i Gideo, Bara, Simesoꞌ, Ieta, Daudiꞌ, Semueli hai nabiꞌ-nabiꞌ ntániꞌna.

³³ Ánti pepoináláiraꞌ: araheꞌ to mampombealaꞌá hai monangiheꞌ kadatuá, araheꞌ to mepárentá i kanótó-nótóána, araheꞌ to molámbiꞌ to nadándiáheꞌ Pueꞌ Ala, araheꞌ to tiꞌara naꞌandeꞌ singá,

³⁴ araheꞌ to tiꞌara mate tempóraꞌ ratibe i lalu api to lolaaꞌ, araheꞌ to tekábáhá hangko i tauna to mampoinao mepapate, araheꞌ to maledeꞌ wátáraꞌ, agáiáná mewaliꞌheꞌ maróhó ntepuꞌu, araheꞌ to pebáiꞌ mombeala, hai araheꞌ to monangi surudadoꞌ ewáliraꞌ hangko i tampoꞌ ntániꞌna.

³⁵ Ánti pepoináláiraꞌ, araheꞌ towawine to molámbiꞌ huleꞌ ánáꞌraꞌ láwiꞌ rapatueꞌheꞌ huleꞌ. Agáiáná araheꞌ woꞌo tauna ntániꞌna to rapopeahiahiꞌ ánti pepoináláiraꞌ duuꞌraꞌ mate. Raundeꞌ mani rapapate haneꞌiheꞌ mosápuáka Pueꞌ Ala, láwiꞌ mampoinaoheꞌ rapatueꞌ huleꞌ bona molámbiꞌheꞌ katueꞌ to melumbuꞌ kamaroꞌana.

³⁶ Araheꞌ to rasasalaꞌi hai rahepe-hepe, araheꞌ woꞌo to ratimpuku hai ratarungku.

³⁷ Araheꞌ to rawatui duuꞌraꞌ mate, to rabóhóki hai garagaji, hai to rapapate hai pihoꞌ. Araheꞌ to meahiahiꞌ ntepuꞌu tueꞌraꞌ. Molilo peheꞌ. Waruꞌraꞌ bateꞌna perái koliꞌ dimbá hai bekeꞌ. Rapopeahiahiꞌheꞌ hai rapapaháiheꞌ.

³⁸ Melangkaheꞌ lao i pádá loriꞌ hai i buluꞌ-buluꞌ, toroꞌheꞌ i balamba watu. Katoꞌuána, tiꞌaraheꞌ hintotoꞌ toroꞌ i duniáꞌ to kadake deꞌe.

³⁹ Ánti pepoináláiraꞌ, upu-upu tauna iti napokagóeꞌheꞌ Pueꞌ Ala. Agáiáná kehapiꞌ noꞌonoꞌ, tiꞌara maniheꞌ molámbiꞌ apa to Nadándi.

⁴⁰ To napatimama Pueꞌ Ala melumbuꞌ kamaroꞌana, bona i tempóraꞌ hingkakani hai kitaꞌ, ina Naweꞌiheꞌ woꞌo katehómpóꞌ to tiꞌara ara kamakuraꞌna.