Iberani 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ngkóráꞌna Pueꞌ Ala napahaweꞌámokeꞌ moliu ÁnáꞌNa

¹ Hangkoia, handaꞌ kánina Pueꞌ Ala mongkóráꞌ i toioruntaꞌ. LaluitaNa rapahaweꞌ nabiꞌ-nabiꞌ, hai handaꞌ pákáꞌna rárá Napakeꞌ mopaturoꞌ toioruntaꞌ.

² Agáiáná deꞌe-deꞌe i tempó to kahópóꞌána, Pueꞌ Ala mopahaweꞌ laluitaNa i kitaꞌ moliu ÁnáꞌNa haduduáNa. Hai ÁnáꞌNa iti to Napontóáꞌ mampopewaliꞌ duniáꞌ hai upu-upu óntóꞌna. Ia miꞌi to napakanótó Pueꞌ Ala molámbiꞌ upu-upuna to ara.

³ Ia to mampetudeꞌá peawaꞌna Pueꞌ Ala i kitaꞌ. PambiáráNa hai kuasaꞌNa hibali hai pambiárána hai kuasaꞌna Pueꞌ Ala. Ia to mokádipurá upu-upuna to ara moliu ngkóráꞌNa to makuasaꞌ. Ia to mampehuhuꞌá wátáNa rapapate bona mopamagasaꞌ tauna hangko i dósá, hai roo onoꞌ, Ia mengkaoreꞌ miꞌi lao i surugáꞌ mehoda tándáꞌ i kuánána Pueꞌ Ala to Makuasaꞌ i lalu popárentáNa.

Iesu melumbuꞌ kamahilena tueꞌNa hangko i malaꞌeka

⁴ Ia molámbiꞌ kuasaꞌ to melumbuꞌ hangko i upu-upu malaꞌeka, láwiꞌ melumbuꞌ kamahilena hangaꞌNa to naweꞌi Pueꞌ Ala i Hia hangko i hangaꞌ to raweꞌiheꞌ malaꞌeka.

⁵ Taisá kamahilena tueꞌna Pueꞌ Iesu, láwiꞌ laluita deꞌe tiꞌara haweꞌ hangkani napahaweꞌ Pueꞌ Ala i malaꞌeka: “Io miꞌi ÁnáꞌKuꞌ. Mantepuꞌu alo deꞌe, KupopewaliꞌKoꞌ ÁnáꞌKuꞌ.” (Sura Petóiá 2:7) Hai Pueꞌ Ala tiꞌara woꞌo molaluita mokana i hadua malaꞌeka node: “Kódóꞌ NapoumaꞌAꞌ, hai Ia Kupoánáꞌ.” (2 Semueli 7:14)

⁶ Hai i kanahuoꞌna Pueꞌ Ala ÁnáꞌNa to towutuꞌ mai i duniáꞌ, node laluitaNa: “Upu-upu malaꞌekaNgkuꞌ hangaa-ngaa menómbá i Hia.” (Sura Petóiá 97:7)

⁷ Mokana i malaꞌeka, teukiꞌ peá node: “Pueꞌ Ala mampopewaliꞌ malaꞌekaNa nodo wui hai huoꞌána nodo api.” (Sura Petóiá 104:4)

⁸ Agáiáná kana i ÁnáꞌNa nauliꞌ Pueꞌ Ala: “Ó Pueꞌ Ala! Io miꞌi datu duuꞌna i rue-ruena. Io to mepárentá i kanótó-nótóána.

⁹ Nuꞌundeꞌ bábehiá to manótó, hai Nukáhihiꞌ bábehiá to kadake. Onoꞌ miꞌi haneꞌi KububuhiKoꞌ hai lana to mawongi láwiꞌ KupileꞌiKoꞌ. Kódóꞌ miꞌi Pueꞌ Ala, PueꞌMu. KubiláꞌKoꞌ melumbuꞌ hangko i rángáMu, bona góeꞌ laluMu.” (Sura Petóiá 45:7-8)

¹⁰ Nauliꞌ woꞌo Pueꞌ Ala i ÁnáꞌNa: “Ó Pueꞌ, hangko i rungu-runguna, Io miꞌi to mampopewaliꞌ duniáꞌ deꞌe, hai Io to mampopewaliꞌ langiꞌ.

¹¹ Upu-upuna iti bateꞌna ina magero. Agáiáná Io, tiꞌaraKoꞌ mambáliꞌ. Langiꞌ hai tampoꞌ deꞌe ina magero nodo waruꞌ to sae.

¹² Hangkani tempó ina Nuwógó hai Nutibe. Ina Nupaháwángi hai duniáꞌ to woꞌu. Agáiáná Io, tiꞌara ara kamambáliꞌáMu, hai katueꞌMu tiꞌara mokahópóꞌá.” (Sura Petóiá 102:26-28)

¹³ Hai ara woꞌo hampákáꞌ laluita to tiꞌara haweꞌ hangkani napahaweꞌ Pueꞌ Ala i malaꞌeka, láwiꞌ laluitaNa deꞌe Napahaweꞌ peá i ÁnáꞌNa, Nauliꞌ: “MehodamoKoꞌ tándáꞌ i kuánáNgkuꞌ, duuꞌna Kupopengkoruꞌheꞌ upu-upu ewáliMu i Hio.” (Sura Petóiá 110:1)

¹⁴ Mewaliꞌ apa to taisá mokana i upu-upu malaꞌeka? Hira iti huoꞌána Pueꞌ Ala to mobágóꞌ nodo topekádipurá. Nahuoꞌheꞌ motulungi tauna to ina molámbiꞌ katueꞌ to maroꞌa to tiꞌara mokahópóꞌá.