Biblia Todo Logo
Bìoball air-loidhne

- Sanasan -

Iakobu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu


Ineeꞌkou mouláꞌ peundeꞌána lalumi haduduámi

1 Apa to mopaꞌara posisalaꞌ hai pombeheheꞌ i oloꞌmi? Tiꞌara paꞌi hangko i peundeꞌámi haduduámi to mombeala oaꞌ i lalumi?

2 Apa to niundeꞌ, tiꞌara nilámbiꞌ, onoꞌ miꞌi haneꞌi nipoinao mepapate. Mahiniꞌkou, agáiáná apa to nipokaelu iti, tiꞌara nilámbiꞌ, mewaliꞌ mombeheheꞌ hai mosisalaꞌ pekou. Tiꞌara ara to nilámbiꞌ, láwiꞌ tiꞌara nipembiáꞌ i Pueꞌ Ala apa to niparaluu.

3 Kehapiꞌ ara to nipembiáꞌ, tiꞌara nilámbiꞌ, láwiꞌ tiꞌara maroꞌa tunggáiámi, hai nipoinao peá mampoporasiꞌ wátámi haduduámi.

4 Kómu to tiꞌara tetidaꞌ i Pueꞌ Ala! Tiꞌara paꞌi niꞌisá, ane mouláꞌkou peundeꞌána duniáꞌ, lempóna moewaꞌkou Pueꞌ Ala. Heáná to mampileꞌi mampeuláꞌi bábehiá to i duniáꞌ, ia mopileꞌi miꞌi mewaliꞌ ewálina Pueꞌ Ala!

5 Ineeꞌ nipekiri tiꞌara mobunduꞌ to teukiꞌ i lalu Sura Magasaꞌ to manguliꞌ node: I wátántaꞌ deꞌe, Pueꞌ Ala mampoweꞌikeꞌ inaontaꞌ, hai mohiriꞌ ane tiꞌarakeꞌ tetidaꞌ i Hia.

6 Kehapiꞌ noꞌonoꞌ, Pueꞌ Ala mampokaꞌahiꞌ ntepuꞌukeꞌ, nodo to teukiꞌ i lalu Sura Magasaꞌ: “Pueꞌ Ala moewaꞌ tauna to mampepemahile, agáiáná tauna to mengkaiwóiꞌ, Natulungiheꞌ ánti kamaꞌahiꞌNa.” (Sura Paturoꞌ 3:34)

7 Onoꞌ miꞌi haneꞌi hangaa-ngaa mengkoruꞌkou i Pueꞌ Ala hai moewaꞌkou oaꞌ Datu Tokadake, hai bateꞌna ia ina mokaraohikou.

8 Ane nihungkuki miꞌi Pueꞌ Ala, Ia woꞌo ina mohungkukikou. Kómu to madósá, hangaa-ngaa mokábáhákou dósámi. Kómu to morompenga lalumi, hangaa-ngaa mopamagasaꞌkou lalumi.

9 Hangaa-ngaa niꞌisá ntepuꞌu kamadósámi. Hangaa-ngaa wiorakou ánti kamasalaꞌmi. Ineeꞌkou góeꞌ, ngkáliꞌna riꞌi hangaa-ngaa mampenosoꞌikou dósámi.

10 Mengkaiwóiꞌkou i lindoꞌna Pueꞌ hai bateꞌna ina Ia ina mampomahilekou.


Ineeꞌkou mopakadake hángká rángámi

11 Halalu-halalu! Ineeꞌkou mopakadake hangka halalu hampepepoináláimi. Ane ara tauna to mopakadake ba mosasalaꞌi halaluna, lempóna mopakadake hai mosasalaꞌi woꞌo Áturána Pueꞌ Ala. Tauna to mobábehi noꞌonoꞌ, tiꞌara mampeuláꞌi Áturána Pueꞌ, agáiáná mewaliꞌ riꞌi topobutusi to motimbá áturána iti.

12 Katoꞌuána Hadua peá to hintotoꞌ mampoweꞌi áturá i tauna hai mewaliꞌ Topobutusi, Ia miꞌi Pueꞌ Ala. Ara kuasaꞌNa mohukukeꞌ ba mokábáhákeꞌ hangko i huku dósántaꞌ. Agáiáná kómu, heánákou to báiꞌ mobutusi salaꞌna hángká rángámi?


Ineeꞌkou mokáláliꞌá Pueꞌ i pangkaliwomi

13 Deꞌe miꞌi paturoꞌkuꞌ i kómu to mampepemahile hai to manguliꞌ node: “Alo deꞌe ba kahalo, ina pohuꞌangkaiꞌ lao i hambuaꞌ kótá. Ina toroꞌangkaiꞌ ionoꞌ hampare kamaruena mobaluꞌ-baluꞌ álána handaꞌ porasiꞌángkiꞌ.”

14 Katoꞌuána, tiꞌara niꞌisá apa to ina mewaliꞌ kahalo! Noumbá katueꞌmi? Katueꞌmi nodo peá gawu mepulo; hampaiꞌ peá raita, haneꞌi matántá!

15 Ngkáliꞌna hangaa-ngaa niuliꞌ riꞌi node: “Ane napokana Pueꞌ, ina tueꞌangkaiꞌ hai ina kibábehi hintotoꞌ hai to kiliwo.”

16 Agáiáná tiꞌara noꞌonoꞌ polaluitami. Maꞌángkáꞌkou hai mampepemahilekou. Upu-upu pampepemahilemi iti salaꞌ ntepuꞌu {láwiꞌ mokáláliꞌákou Pueꞌ}.

17 Mewaliꞌ, heáná to moisá apa to maroꞌa to hangaa-ngaa nabábehi, agáiáná tiꞌara onoꞌ to nabábehi, tauna iti bateꞌna madósá.

Bahasa Behoa Shorter Bible © Indonesian Bible Society, 2015.

Indonesian Bible Society
Lean sinn:



Sanasan