Iakobu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

Ineeꞌkou mampopontaniꞌ tauna

¹ Halalu-halalu! Pueꞌtaꞌ, Pueꞌ Iesu Kerisitu, mahile tueꞌNa. Mewaliꞌ, ane mepoinálái ntepuꞌukou i Pueꞌ Iesu, ineeꞌkou mampopontaniꞌ tauna.

² Rápáꞌna, ara rodua tauna to haweꞌ i poromu-romuántaꞌ, hadua to mehingkoliꞌ buláwá, mewaruꞌ to mababe, haneꞌi to haduána to meahiahiꞌ tueꞌna, mewaruꞌ to magentá-gentá.

³ Ane tauna to mababe pewaruꞌna nibiláꞌ ntepuꞌu haneꞌi nihángáꞌá, “Tuá, maikeꞌ mehoda i pehodaꞌá to maroꞌa deꞌe,” agáiáná nihángáꞌá tauna to meahiahiꞌ tueꞌna, “Meángkáꞌmokoꞌ i hinti,” ba nihángáꞌá, “Mehoda pekoꞌ i daula,”

⁴ lempóna, mampopontaniꞌkou hángká rángámi, hai mouláꞌ pekou pekirimi to salaꞌ.

⁵ Halalungkuꞌ to kupokaꞌahiꞌ! Nipehádingi maroꞌa: tauna to meahiahiꞌ tueꞌraꞌ i duniáꞌ deꞌe, napileꞌiheꞌ Pueꞌ Ala bona mewaliꞌheꞌ pebuku i pepoináláiraꞌ. Hira ina molámbiꞌheꞌ woꞌo sosoraraꞌ i lalu popárentána Pueꞌ Ala, hintotoꞌ hai dándiNa i tauna to mepokaꞌahiꞌ i Hia.

⁶ Agáiáná ane noꞌonoꞌ bábehiámi i tauna to meahiahiꞌ tueꞌraꞌ, lempóna nipakóiꞌheꞌ! Tiꞌara paꞌi topebukuheꞌ iti to moewaꞌkou hai moántikou i lindoꞌna topobutusi?

⁷ Hai hira miꞌi woꞌo to motitibei hangaꞌ to tebiláꞌ, ia miꞌi Iesu Kerisitu, mole riꞌi, ánti kaꞌIesuna iti, kitaꞌ mewaliꞌmokeꞌ taunána Pueꞌ Ala.

⁸ Ara hawaꞌna Datuntaꞌ to teukiꞌ i lalu Sura Magasaꞌ to manguliꞌ, “Nipokaꞌahiꞌ rángámi nodokou mampokaꞌahiꞌ wátámi haduduámi.” Mewaliꞌ ane nipopolumao hawaꞌ iti, manótó bábehiámi.

⁹ Agáiáná ane mampopontaniꞌkou tauna, madósákou hai tongawaꞌ kamasalaꞌmi, láwiꞌ moliungikou hawaꞌna Pueꞌ Ala iti.

¹⁰ Heáná peá to mampeuláꞌi upu-upu párentá to teukiꞌ i lalu Áturána Pueꞌ Ala, kehapiꞌ hampákáꞌ peá to naliungi, hibali peá hai moliungi upu-upu párentá.

¹¹ Láwiꞌ Pueꞌ Ala to manguliꞌ, “Ineeꞌ mebualosi,” hai Ia woꞌo to manguliꞌ, “Ineeꞌ mepapate.” Mewaliꞌ kehapiꞌkou tiꞌara mebualosi, agáiáná mepapatekou, bateꞌmi moliungi Áturána Pueꞌ Ala.

¹² Polaluitami hai bábehiámi hangaa-ngaa hintotoꞌ i tauna to ina rahoda-hoda mouláꞌ Áturána Pueꞌ Ala, hai ÁturáNa iti to peisá mokábáhákeꞌ hangko i dósántaꞌ.

¹³ Láwiꞌ Pueꞌ Ala tiꞌara ina mopatongawaꞌ kamaꞌahiꞌNa i tauna to tiꞌara moisá maꞌahiꞌ, agáiáná i tauna to moisá mampokaꞌahiꞌ hángká rángáraꞌ. Mewaliꞌ tiꞌaraheꞌ paraluu malááꞌ ina rahoda-hoda, láwiꞌ maróhó mani kamaꞌahiꞌna Pueꞌ Ala haneꞌi pehukuNa.

Pepoinálái i rawa bábehiá mbero-mbero peá

¹⁴ Halalu-halalu! Apa miꞌi bunduꞌna ane tauliꞌ mepoináláikeꞌ i Pueꞌ, agáiáná tiꞌara tongawaꞌ hangko i bábehiántaꞌ? Ane noꞌonoꞌ peá pepoináláintaꞌ, ba peisákeꞌ tekábáhá hangko i huku dósántaꞌ? Bateꞌna tiꞌara.

¹⁵ Rápáꞌna, ara hadua halaluntaꞌ to moparaluu pewaruꞌ, hai tiꞌara woꞌo gáná pandeꞌna alo-alona.

¹⁶ Noumbá ane nihángáꞌá peá node: “Maroꞌa-roꞌakoꞌ i rárá! Kuhárungá ina molámbiꞌkoꞌ badu to makápá, hai mandeꞌkoꞌ haweꞌ mabuhu!” Agáiáná ane tiꞌara niweꞌi apa to naparaluu, apa miꞌi bunduꞌna?

¹⁷ Noꞌonoꞌ woꞌo hai pepoináláintaꞌ. Ane tauliꞌ mepoináláikeꞌ i Pueꞌ, agáiáná tiꞌara tongawaꞌ hangko i bábehiántaꞌ, lempóna mbero-mbero peá pepoináláintaꞌ. Peisá woꞌo rauliꞌ mate pepoináláintaꞌ.

¹⁸ Manótó ara to ina manguliꞌ node: “Ara tauna to mehárungá i pepoináláiraꞌ, hai ara woꞌo to mehárungá i bábehiáraꞌ.” Mewaliꞌ ina kuhániki, “Nupatongawaꞌáꞌaꞌ noumbá pepoináláimu i rawa bábehiámu, hai ina kupatongawaꞌákoꞌ woꞌo pepoináláingkuꞌ moliu bábehiángkuꞌ.”

¹⁹ Ba nipoinálái kahaduána peá Pueꞌ Ala? Maroꞌa ane noꞌonoꞌi. Mogaloraheꞌ setáꞌ mampoináláiheꞌ woꞌo kahaduána peá Pueꞌ Ala, onoꞌ miꞌi haneꞌi moridiꞌheꞌ ánti kamalááꞌraꞌ.

²⁰ Bebe ntepuꞌukou! Ba niuliꞌ ripaꞌi gáná miꞌi pepoináláimi i Pueꞌ Ala, kehapiꞌ tiꞌara teuláꞌ hai bábehiámi to maroꞌa? Ane noꞌonoꞌi, pepoináláimi mbero-mbero peá!

²¹ Tiꞌara paꞌi Burahima toioruntaꞌ narekeꞌ Pueꞌ Ala tauna to manótó ánti kamaroꞌana bábehiána, láwiꞌ ia mampopenómbá Isakiꞌ ánáꞌna i Pueꞌ Ala i wongko paintuá popenómbá.

²² Niꞌisá ntepuꞌu pepoináláina Burahima tongawaꞌ hangko i bábehiána. Mewaliꞌ ánti bábehiána to maroꞌa iti, pepoináláina tiꞌara ara kamakuraꞌna.

²³ Onoꞌ miꞌi haneꞌi tebukeki apa to teukiꞌ i lalu Sura Magasaꞌ to manguliꞌ node: “Burahima mepoinálái i Pueꞌ Ala, onoꞌ miꞌi haneꞌi narekeꞌ Pueꞌ Ala manótó i peitáNa.” (Pewaliꞌána 15:6) Mewaliꞌ, Burahima rauliꞌ “rángána Pueꞌ Ala”.

²⁴ Taisá miꞌi tauna to maroꞌa bábehiáraꞌ, narekeꞌ Pueꞌ Ala manótó i peitáNa, agáiáná tauna to mepoinálái peá, hai pepoináláiraꞌ iti tiꞌara tongawaꞌ hangko i bábehiáraꞌ, tiꞌaraheꞌ Narekeꞌ Pueꞌ Ala tauna to manótó i peitáNa.

²⁵ Noꞌonoꞌ woꞌo Raha hangkoia, hadua towawine to mampobaluꞌ wátána. I tempóna roduaheꞌ toSáráeliꞌ rahuoꞌ lao momata-matai kótá Ieriko katoroꞌáraꞌ ewáliraꞌ, Raha iti to motarimaheꞌ i támbina hai motulungiheꞌ bona peisáheꞌ mesuleꞌ mouláꞌ rárá to ntániꞌna. Ánti bábehiána to maroꞌa iti, onoꞌ miꞌi haneꞌi Raha narekeꞌ Pueꞌ Ala tauna to manótó.

²⁶ Mewaliꞌ, ane tauna tiꞌara piꞌi meinao, tauliꞌ miꞌi mate. Noꞌonoꞌ woꞌo ane pepoináláintaꞌ i Pueꞌ tiꞌara tongawaꞌ hangko i bábehiántaꞌ, lempóna pepoináláintaꞌ mate.