Galatia 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Kitaꞌ molámbiꞌkeꞌ Inao to Magasaꞌ hangko i pepoináláintaꞌ i Pueꞌ Iesu, tiꞌara hangko i pampeuláꞌintaꞌ áturáraꞌ toIahudiꞌ

¹ Halalungkuꞌ toGalatia. Bebe ntepuꞌukou! Moapa riꞌi haneꞌi nipatodáhiheꞌ tauna mopakanawoꞌkou, álána tiꞌara piꞌi nipeuláꞌi paturoꞌ to toꞌu? Kupakanótóámokou tunggáiána kamatena Iesu Kerisitu i kau mombehape.

² Deꞌe peá pekuneꞌkuꞌ halalu-halalu: ba nibuhinao apa to mewaliꞌ i kómu hangkoia tempómi mepoinálái? Tiꞌarakou motarima Inao to Magasaꞌ ánti pampeuláꞌimi áturá-áturá to napahaweꞌ Musa. Ngkáliꞌna riꞌi, motarimamokou Inao to Magasaꞌ láwiꞌ nihádi miꞌi Ngkóráꞌ Marasa hai mepoináláimokou i Pueꞌ Iesu.

³ Mewaliꞌ moapa riꞌi haneꞌi mosuliꞌkou hangko i pepoináláimi? Rungu-runguna i kanipoináláina miꞌi Iesu, molámbiꞌmokou katueꞌ to woꞌu hangko i kuasaꞌna Inao to Magasaꞌ. Ba niuliꞌ riꞌi deꞌe-deꞌe peisákou mewaliꞌ magasaꞌ ánti kamaróhómi haduduámi? Tiꞌara peisá! Bebe ntepuꞌukou!

⁴ Hangaa-ngaa mantahakou oaꞌ i pepoináláimi, láwiꞌ ane tiꞌara noꞌonoꞌ, ina mbero-mbero peá, hai tiꞌara piꞌi mobunduꞌ upu-upu pewátiꞌna Pueꞌ Ala to nitarima miꞌi.

⁵ Pueꞌ Ala mampoweꞌimokou Inao to Magasaꞌ hai mopatongawaꞌákou tandaꞌ kuasaꞌ. Ba Nabábehi noꞌonoꞌ láwiꞌ mampeuláꞌikou Paturoꞌna Musa? Tiꞌara. Ngkáliꞌna riꞌi Nabábehi noꞌonoꞌ láwiꞌ mohádimokou Ngkóráꞌ Marasa hai nipoinálái miꞌi Pueꞌ Iesu.

Kitaꞌ mewaliꞌkeꞌ pemuleꞌána Burahima ánti pepoináláintaꞌ i Pueꞌ Iesu

⁶ Noꞌonoꞌ woꞌo ara teukiꞌ i lalu Sura Magasaꞌ mokana i Burahima to manguliꞌ node: “Burahima mepoinálái i Pueꞌ Ala, onoꞌ miꞌi haneꞌi narekeꞌ Pueꞌ Ala manótó i peitáNa.” (Pewaliꞌána 15:6)

⁷ Mewaliꞌ, taisá miꞌi halalu-halalu: heáná peá to mepoinálái i Pueꞌ Ala, hira miꞌi to terekeꞌ pemuleꞌána Burahima.

⁸ Mantepuꞌu hangkoia, ara miꞌi tunggáiána Pueꞌ Ala i tauna to tiꞌaraheꞌ toIahudiꞌ, bona peisáheꞌ mewaliꞌ manótó i peitáNa ánti pepoináláiraꞌ. Onoꞌ miꞌi haneꞌi i lalu Sura Magasaꞌ, Pueꞌ Ala mopahaweꞌ bámbári to maroꞌa deꞌe i Burahima, Nauliꞌ, “Ánti kaꞌiona, ina Kuwátiꞌ upu-upu tauna i humalele duniáꞌ.”

⁹ Mewaliꞌ Burahima nawátiꞌ Pueꞌ Ala ánti pepoináláina, noꞌonoꞌ woꞌo upu-upu tauna to mepoinálái i Iesu bateꞌna ina nawátiꞌ Pueꞌ Ala hingkakani hai Burahima.

Tiꞌarakeꞌ molámbiꞌ apa to nadándi Pueꞌ Ala i Burahima ánti pampeuláꞌintaꞌ Paturoꞌna Musa

¹⁰ Mewaliꞌ halalu-halalu, taisá miꞌi upu-upu tauna to mehárungá i kamampeuláꞌiraꞌ Paturoꞌna Musa, ina rasalaꞌiheꞌ i lindoꞌna Pueꞌ Ala hai ina háráráheꞌ, láwiꞌ teukiꞌ miꞌi i lalu Sura Magasaꞌ: “Hárárámoheꞌ i lindoꞌna Pueꞌ Ala, tauna to tiꞌara mampeuláꞌi oaꞌ upu-upu párentá to teukiꞌ i lalu Paturoꞌna Musa.”

¹¹ Tongawaꞌ ntepuꞌu katiꞌárána ara haweꞌ hadua to manótó i peitána Pueꞌ Ala ánti pampeuláꞌina Paturoꞌna Musa. Láwiꞌ ara woꞌo laluita i lalu Sura Magasaꞌ to teukiꞌ node: “Tauna to manótó i peitána Pueꞌ Ala ina molámbiꞌheꞌ katehómpóꞌ ánti pepoináláiraꞌ.”

¹² Agáiáná áturá-áturá to naukiꞌ Musa tiꞌara hiolaꞌ hai pepoinálái, láwiꞌ ara teukiꞌ i lalu Sura Magasaꞌ to manguliꞌ, “Heáná to mehárungá i bábehiána haduduána, katueꞌna ina mentóáꞌ i bábehiána.”

¹³ Kitaꞌ upu-upu hintotoꞌkeꞌ napahárárá Pueꞌ Ala, láwiꞌ moliungikeꞌ PárentáNa. Agáiáná kehapiꞌ noꞌonoꞌ, Kerisitu mokábáhámokeꞌ hangko i pekambo iti. Teukiꞌ hangkoia i lalu Sura Magasaꞌ node: “Ane ara tauna to ratóe i kau bona rapapate, manótó tauna iti nakambo Pueꞌ Ala.” Mewaliꞌ, i kamatena Kerisitu i kau mombehape, Ia to molámbiꞌ pekambo hangko i Pueꞌ Ala. Katoꞌuána, hangaa-ngaa kitaꞌ riꞌi to molámbiꞌ pekambo iti.

¹⁴ Tunggáiána Iesu mate rapakuꞌ i kau mombehape, bona tauna to tiꞌaraheꞌ toIahudiꞌ peisáheꞌ woꞌo molámbiꞌ pewátiꞌ to nadándi Pueꞌ Ala i Burahima. Mewaliꞌ, ane mepoináláikeꞌ i Iesu Kerisitu, molámbiꞌkeꞌ woꞌo Inao to Magasaꞌ to nadándi miꞌi Pueꞌ Ala hangkoia.

Dándina Pueꞌ Ala i Burahima hai pemuleꞌána tiꞌara tebáliki

¹⁵ Halalu-halalu, kuala pándiriꞌ hangko i katueꞌtaꞌ alo-alona. Ane hadua tauna mopaꞌara podándi, podándi iti rapokana miꞌi, lempóna tiꞌara piꞌi peisá ratámbái ba rawehángi.

¹⁶ Noꞌonoꞌ woꞌo podándina Pueꞌ Ala. Pueꞌ Ala mopaꞌara dándiNa i Burahima hai i pemuleꞌána. Nipailalu maroꞌa laluita iti. Tiꞌara teukiꞌ “i pemuleꞌánaheꞌ” Burahima, lempóna to handaꞌ. To teukiꞌ: “i pemuleꞌána”, láwiꞌ to natunggái hai laluita iti ia miꞌi pemuleꞌána Burahima to hadua peá, Ia miꞌi Kerisitu.

¹⁷ Mewaliꞌ halalu-halalu, deꞌe miꞌi lempóna pándiriꞌ iti: rungu-runguna Pueꞌ Ala mopaꞌara dándiNa i Burahima. Iba átuna hai tálu puloꞌna parena hangko ionoꞌ, Ia mopaꞌara PaturoꞌNa moliu Musa. Agáiáná Paturoꞌna Musa iti tiꞌara mowehángi dándiNa to Napaꞌara miꞌi i Burahima hangkoia. DándiNa iti bateꞌna ina mewaliꞌ.

¹⁸ Ane rápáꞌna dándi to ratarima pemuleꞌána Burahima mentóáꞌ i pampeuláꞌiraꞌ áturá-áturá to naukiꞌ Musa, lempóna iti tiꞌara dándina Pueꞌ Ala. Agáiáná Burahima molámbiꞌ pewátiꞌ iti láwiꞌ ánti kabulána laluNa, Pueꞌ Ala modándi miꞌi i Burahima.

Tunggáiána Áturána Musa bona taisá kamadósántaꞌ

¹⁹ Mewaliꞌ, bateꞌna ina ara tauna to manguliꞌ node: “Ane noꞌonoꞌi, apa tunggáiána áturá-áturá to naukiꞌ Musa?” Áturána Musa iti naweꞌi Pueꞌ Ala bona mopakanótó ane tauna madósá, lempóna ane moliungiheꞌ peundeꞌáNa. Tunggáiána Pueꞌ Ala, bona tauna mampeuláꞌi áturá-áturá to teukiꞌ iti duuꞌna haweꞌ miꞌi pemuleꞌána Burahima to natunggái Pueꞌ Ala i dándiNa hangkoia, ia miꞌi Kerisitu. Pueꞌ Ala mampohawaꞌá malaꞌekaNa mopahaweꞌ ÁturáNa i Musa, hai Musa iti mewaliꞌ topetangaꞌ-tangaꞌi to mopahaweꞌ Párentána Pueꞌ i tauna.

²⁰ Mewaliꞌ, Párentána Pueꞌ rapahaweꞌ i tauna moliu Musa. Agáiáná i kanapahaweꞌna Pueꞌ Ala dándiNa i Burahima, tiꞌara ara to motangaꞌ-tangaꞌi, bateꞌna peá Pueꞌ Ala haduduáNa to mopahaweꞌ dándiNa iti.

²¹ Kaliliuána halalu-halalu, áturá-áturá to naukiꞌ Musa tiꞌara moewaꞌ tunggáiána dándina Pueꞌ Ala. Ane rápáꞌna, peisá tapeuláꞌi áturá-áturá bona molámbiꞌkeꞌ katueꞌ to maroꞌa, lempóna áturá iti miꞌi to mewaliꞌ rárá to mopakanótókeꞌ i peitána Pueꞌ Ala.

²² Agáiáná i lalu Sura Magasaꞌ, Pueꞌ Ala mopakanótó miꞌi kamasalaꞌna upu-upu tauna i peitáNa ánti kamadósáraꞌ. Mewaliꞌ, tiꞌara ara rárá ntaniꞌ to mampopewaliꞌkeꞌ manótó i peitáNa, bateꞌna peá pepoináláintaꞌ i Iesu Kerisitu. Katueꞌ to tiꞌara mokahópóꞌá to nadándi Pueꞌ Ala, bateꞌna Naweꞌi i heáná peá to mepoinálái i Iesu Kerisitu.

Paturoꞌna Musa moteteꞌkeꞌ duuꞌna mampoináláikeꞌ Kerisitu

²³ Hangko tiꞌara manikeꞌ mepoinálái i Iesu, mengkoruꞌkeꞌ i áturá-áturá. I tempó iti, kitaꞌ nodokeꞌ tauna to ratarungku hai rakámpái, láwiꞌ nakóntókeꞌ oaꞌ áturá-áturá iti.

²⁴ Paturoꞌna Musa peisá rapándiriꞌ nodo guru to moteteꞌkeꞌ duuꞌna haweꞌ Kerisitu, bona kitaꞌ mewaliꞌ manótó i peitána Pueꞌ Ala ánti pepoináláintaꞌ i Kerisitu.

²⁵ Mewaliꞌ deꞌe-deꞌe, tiꞌarapokeꞌ nateteꞌ Paturoꞌna Musa, láwiꞌ manótómokeꞌ i peitána Pueꞌ Ala ánti pepoináláintaꞌ i Kerisitu.

²⁶ Mewaliꞌ kómu upu-upu, napoánáꞌmokou Pueꞌ Ala ánti pepoináláimi i Iesu Kerisitu.

²⁷ Rariumokou mewaliꞌ tauna to mohintuwuꞌ hai Kerisitu, hai pambiárámi hibali hai Kerisitu.

²⁸ Pueꞌ Ala tiꞌara mampopontaniꞌ tauna: toIahudiꞌ ba to tiꞌara toIahudiꞌ, to hawiꞌ ba to tiꞌara hawiꞌ, tobaleilo ba towawine. I peitána Pueꞌ Ala hibali pekou upu-upu ánti pohintuwuꞌmi hai Iesu Kerisitu.

²⁹ Ánti peuláꞌmi i Kerisitu, Narekeꞌmokou pemuleꞌána Burahima, hai bateꞌna molámbiꞌkou apa to nadándi Pueꞌ Ala i Burahima.