Epesu 6 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paturoꞌ i ánángkóiꞌ hai tosae

¹ Ánángkóiꞌ, ánti pohintuwuꞌmi hai Pueꞌ, hangaa-ngaa nipeuláꞌi hawaꞌna tosaemi, láwiꞌ iti to hintotoꞌ nibábehi.

² Párentá i lalu Sura Magasaꞌ to rungu-runguna to ara dándina, ia miꞌi: “Hangaa-ngaa nubiláꞌ inámu hai umámu,

³ bona matinuwuꞌkoꞌ hai maroꞌa tueꞌmu i duniáꞌ deꞌe.”

⁴ Hai kómu to rapouma, ineeꞌ nibelái laluna ánáꞌmi. Hangaa-ngaa nikádipuráheꞌ, nipaturoꞌ, hai niweꞌiheꞌ laluita to hiolaꞌ hai peundeꞌána Pueꞌ.

Paturoꞌ i tauna to rapohawiꞌ hai paturoꞌ i pueꞌraꞌ

⁵ Halalungkuꞌ to rapohawiꞌ, nipeuláꞌi hawaꞌna pueꞌmi i wongko duniáꞌ deꞌe. Nibiláꞌ hai nipengkoruꞌiheꞌ hangko i lalumi ntepuꞌu, nodo pengkoruꞌmi i Kerisitu.

⁶ Ineeꞌkou mampopaita peá i pueꞌmi bona ratóiákou. Hangaa-ngaa mobágóꞌkou hangko i lalumi ntepuꞌu, láwiꞌ kómu huoꞌánakou Kerisitu to mampeuláꞌi peundeꞌána Pueꞌ Ala.

⁷ Hangaa-ngaa mobágóꞌkou i lalu kagóeꞌna lalumi, nodokou to mobágóꞌ i Pueꞌ, tiꞌara peá i tauna.

⁸ Nipailalu laluita deꞌe: upu-upu tauna to mobágóꞌ mpakaroꞌa, bateꞌraꞌ ina molámbiꞌheꞌ háwángina hangko i Pueꞌ, maroꞌa hawiꞌ, maroꞌa to tiꞌara.

⁹ Hai kómu to rapopueꞌ hawiꞌ, hangaa-ngaa maroꞌa woꞌo bábehiámi i hawiꞌmi. Ineeꞌheꞌ nipopalááꞌ. Hangaa-ngaa nibuhinao: kómu hai hawiꞌmi, hadua peá Pueꞌmi, ia miꞌi Pueꞌ to i surugáꞌ to tiꞌara mampopontaniꞌ tauna.

ToSarani rapándiriꞌ nodo surudadoꞌ to rapopatimamaꞌá párewá pombeala

¹⁰ Kahópóꞌána halalu-halalu, hangaa-ngaa mamporóhókou róhó to hangko i kuasaꞌna Pueꞌ, láwiꞌ mohintuwuꞌmokou hai Ia.

¹¹ Hangaa-ngaa nipakeꞌ upu-upu párewá pombeala to napatimamaꞌámokou Pueꞌ Ala, bona maróhókou moewaꞌ ákálána Datu Tokadake.

¹² Láwiꞌ i pombeala deꞌe, tiꞌarakeꞌ moewaꞌ tauna, agáiáná moewaꞌkeꞌ to makuasaꞌ to tiꞌara taita. Moewaꞌkeꞌ tadulako-tadulako kakáindiána to makuasaꞌ i duniáꞌ. Moewaꞌkeꞌ hinángkáꞌna setáꞌ ba tokadake to makuasaꞌ i laerawa.

¹³ Onoꞌ miꞌi haneꞌi, hangaa-ngaa nipakeꞌ upu-upu párewá pombeala to hangko i Pueꞌ Ala, bona ane haweꞌ miꞌi tempó kapári to rumihi ntepuꞌu, ina maróhókou oaꞌ i pepoináláimi duuꞌna hópóꞌ kapári iti, hai tiꞌarakou ina mosuliꞌ hangko i pepoináláimi.

¹⁴ Mewaliꞌ, hangaa-ngaa nipatimama párewá pombeala to hangko i Pueꞌ Ala. Hangaa-ngaa nipakaróhó peuláꞌmi i paturoꞌ to toꞌu mokana i Pueꞌ, nodo pampou i hopeꞌmi. Hangaa-ngaa manótókou i lalumi hai bábehiámi, nodo badu besiꞌ mokámpái wátámi hangko i ewálimi.

¹⁵ Hangaa-ngaa timamakou oaꞌ mopahaweꞌ Ngkóráꞌ Marasa, láwiꞌ iti to mampopodame tauna hai Pueꞌ Ala, nodo sapatuꞌ to nipakeꞌ molumao.

¹⁶ Hai hangaa-ngaa mepoináláikou oaꞌ i Pueꞌ Ala. Pepoináláimi iti, nipolábá oaꞌ. Ánti pepoináláimi, peisákou molábángi hinángkáꞌ mata panaꞌ api to hangko i Datu Tokadake.

¹⁷ Hangaa-ngaa nihárungá i katehómpóꞌmi to hangko i Pueꞌ Ala. Katehómpóꞌ iti nodo sóngkó besiꞌ. Hangaa-ngaa nipakeꞌ Ngkóráꞌna Pueꞌ Ala láwiꞌ iti nodo pihoꞌ to naweꞌikou Inao to Magasaꞌ.

¹⁸ Hangaa-ngaa mekakaekou oaꞌ membiáꞌ róhó hangko i Pueꞌ Ala. I pákáꞌ-pákáꞌna, mekakaekou mouláꞌ peteteꞌna Inao to Magasaꞌ. Ineeꞌkou luleꞌ mekakae. Hangaa-ngaa nipekakaeá oaꞌ upu-upu tauna to mepoinálái i Pueꞌ Iesu.

¹⁹ Kupembiáꞌ bona nipekakaeáꞌaꞌ woꞌo, bona i tempóngkuꞌ molaluita, Pueꞌ Ala ina mampoweꞌiaꞌ laluita to maroꞌa, bona tiꞌaraꞌaꞌ malááꞌ mopahaweꞌ Ngkóráꞌ Marasa to tewuniángi hangkoia, agáiáná to napakanótóákeꞌ Pueꞌ Ala deꞌe-deꞌe.

²⁰ Pueꞌ Iesu mopileꞌiaꞌ mewaliꞌ suroNa moánti Ngkóráꞌ Marasa, álána deꞌe-deꞌe ratarungkuaꞌ. Mewaliꞌ, kupembiáꞌ bona nipekakaeáꞌaꞌ bona pebáiꞌaꞌ mopahaweꞌ Ngkóráꞌ Marasa, láwiꞌ iti to hangaa-ngaa kubábehi.

Laluita to kahópóꞌána

²¹ Mewaliꞌ, bona niꞌisá noumbá katueꞌkuꞌ deꞌe-deꞌe, kuhuoꞌ miꞌi halaluntaꞌ Tikiku lao moweoꞌkou hai mampopaisáꞌákou upu-upu to mewaliꞌ i kódóꞌ. Tikiku iti, ia miꞌi halaluntaꞌ to tapokaꞌahiꞌ, to mampopolumao oaꞌ bágóꞌna Pueꞌ Ala.

²² Onoꞌ miꞌi haneꞌi kuhuoꞌ lao i kómu mampopaisáꞌákou noumbá kaꞌárángkiꞌ ieneꞌ, bona mopalindó lalumi.

²³ Kupembiáꞌ i Pueꞌ Ala Umántaꞌ hai Pueꞌ Iesu Kerisitu bona mampoweꞌi roꞌa ngkatueꞌ i upu-upumi halalu hampepepoináláingkuꞌ. Kupembiáꞌ woꞌo bona Pueꞌ Ala motámbái pombepokaꞌahiꞌmi hai pepoináláimi.

²⁴ Kupembiáꞌ bona Pueꞌ mowátiꞌ upu-upu tauna to mampokaꞌahiꞌ Pueꞌtaꞌ Iesu Kerisitu hai ahiꞌ to tiꞌara mokahópóꞌá. Hangko i kódóꞌ, PAULU