Epesu 5 - Sura Magasaꞌ: Bahangapa sura Pototowiá to Sae hai Pototowiá to Woꞌu

Bábehiá to hintotoꞌ i tauna to mepoinálái

¹ Mewaliꞌ, láwiꞌ napoánáꞌmokou Pueꞌ Ala hai Napokaꞌahiꞌkou, onoꞌ miꞌi haneꞌi hangaa-ngaa mampeuláꞌikou pambiárána Pueꞌ Ala.

² I bábehiámi alo-alona, hangaa-ngaa maꞌahiꞌkou i tauna ntániꞌna, nodo kanapokaꞌahiꞌmi Kerisitu. Ánti kamaꞌahiꞌNa i kitaꞌ, Nahuhuꞌ miꞌi wátáNa rapapate mosulewátáikeꞌ. BábehiáNa iti mopagóeꞌ Pueꞌ Ala, nodo popenómbá to mawongi to rahuhuꞌ i Hia.

³ Mewaliꞌ ineeꞌ mpuꞌukou motoina ba motoama deleꞌ. Ineeꞌkou mobábehi bábehiá to metitidiꞌi ba mampokaelu párewána tauna ntániꞌna, bona tiꞌara ara to peisá mosalaꞌikou. Bábehiá to noꞌonoꞌ tiꞌara hintotoꞌ i kómu, láwiꞌ kómu taunána Pueꞌ Ala to magasaꞌ.

⁴ Ineeꞌkou woꞌo metarahu ba mohuwárá laluita to tiꞌara mobunduꞌ ba mohudoꞌ-hudoꞌ to melumbuꞌ gaga. Rángina miꞌi tauliꞌ handaꞌ kamaroꞌana i Pueꞌ Ala.

⁵ Hangaa-ngaa niꞌisá: heáná peá to motoina ba motoama deleꞌ, ba mobábehi bábehiá ntániꞌna to metitidiꞌi, ba mampokaelu hángká rángámi, nodoheꞌ to menómbá i ánitu. Tiꞌaraheꞌ hintotoꞌ mesuaꞌ i lalu popárentána Kerisitu hai Pueꞌ Ala, hai molámbiꞌ háwángina to maroꞌa.

⁶ Mewaliꞌ, ineeꞌkou maꞌala rapakanawoꞌ hai laluita to tiꞌara toꞌu to modiiꞌ lalumi. Láwiꞌ ánti bábehiá to noꞌonoꞌ, Pueꞌ Ala bateꞌna ina mohuku tauna to tiꞌara mengkoruꞌ i Hia.

⁷ Mewaliꞌ ineeꞌheꞌ nipeuláꞌi tauna to noꞌonoꞌ bábehiáraꞌ.

⁸ Hangkoia, makáindi mani lalumi, agáiáná deꞌe-deꞌe mabaa miꞌi lalumi ánti pohintuwuꞌmi hai Pueꞌ Iesu. Mewaliꞌ, hangaa-ngaa tueꞌkou hintotoꞌ hai tauna to tueꞌ i lalu kamabaaꞌána.

⁹ Hangko i lalumi to mabaa, mesupaꞌ upu-upu bábehiá to maroꞌa, to toꞌu, hai to hintotoꞌ.

¹⁰ Hangaa-ngaa madotakou mampeliꞌ apa to napokagóeꞌ Pueꞌ.

¹¹ Mewaliꞌ, ineeꞌ nipeuláꞌi bábehiáraꞌ tauna to makáindi mani laluraꞌ, láwiꞌ tiꞌara ara bábehiá to maroꞌa to mesupaꞌ hangko i kamakáindiána. Rángina miꞌi nipakanótóáheꞌ kakadakena bábehiáraꞌ iti,

¹² láwiꞌ bábehiáraꞌ to rawuniángi iti, kehapiꞌ rapolaluita peá, mepakahiliá ntepuꞌu.

¹³ Agáiáná ane tauna to kadake moita bábehiámi to maroꞌa, ina tongawaꞌ kakadakena bábehiáraꞌ, álána araheꞌ to ina mokábáhá bábehiáraꞌ iti, hai ina tueꞌheꞌ woꞌo i lalu kamabaa.

¹⁴ Onoꞌ miꞌi haneꞌi ara laluita to manguliꞌ: “Hóe, to letaꞌ! Mearómokou! Mearómokou hangko i kapate, hai Kerisitu ina mowangkaꞌi lalumi.”

¹⁵ Onoꞌ miꞌi haneꞌi hangaa-ngaa nipakaroꞌa-roꞌa bábehiámi. Ineeꞌkou nodo tauna to tiꞌara moisá bábehiá to hintotoꞌ, agáiáná hangaa-ngaa manótó pekirimi.

¹⁶ Hangaa-ngaa nipopobunduꞌ maroꞌa tempó to ara i kómu, láwiꞌ tempó deꞌe, kadake ntepuꞌu bábehiá tauna.

¹⁷ Mewaliꞌ, ineeꞌkou bebe, ngkáliꞌna riꞌi hangaa-ngaa nipekiri oaꞌ apa to naundeꞌ Pueꞌ.

¹⁸ Ineeꞌkou malangu, láwiꞌ iti to ina moántikou mobábehi handaꞌ pákáꞌna bábehiá to kadake, agáiáná hangaa-ngaa nipatodáhi oaꞌ lalumi nakuasaꞌi Inao to Magasaꞌ. Ane nakuasaꞌikou Inao to Magasaꞌ,

¹⁹ ina momberóhóngikou mpolalu: ina mamponanikou nani penómbá, nani petóiá hai nani ntániꞌna to naweꞌikou Inao to Magasaꞌ. Ina monanikou i kagóeꞌ-góeꞌ motóiá Pueꞌ hangko i lalumi ntepuꞌu,

²⁰ hai ina niuliꞌ oaꞌ handaꞌ kamaroꞌana i Pueꞌ Ala Umántaꞌ i lalu hangaꞌna Iesu Kerisitu Pueꞌtaꞌ, láwiꞌ Naweꞌikeꞌ hinángkáꞌna.

Paturoꞌ i tohamboko

²¹ Hangaa-ngaa mombepengkoruꞌikou hadua hai hadua ánti pebiláꞌmi i Kerisitu.

²² Kómu towawine, hangaa-ngaa mengkoruꞌkou i toámámi, nodo pengkoruꞌmi i Pueꞌ.

²³ Tobaleilo peisá rapándiriꞌ nodo kapalaꞌ i toinána, noꞌonoꞌ woꞌo Kerisitu mewaliꞌ Kapalaꞌ i taunáNa. Kitaꞌ taunáNa to mepoinálái, peisákeꞌ rapándiriꞌ nodo wátána Kerisitu to mohómpóki taunáNa.

²⁴ Mewaliꞌ, nodo kitaꞌ to mepoinálái mengkoruꞌkeꞌ i Kerisitu, noꞌonoꞌ woꞌo towawine hangaa-ngaa mengkoruꞌ i toámána i pákáꞌ-pákáꞌna.

²⁵ Hai kómu tobaleilo, hangaa-ngaa nipokaꞌahiꞌ toinámi hibali hai Kerisitu mampokaꞌahiꞌ upu-upu to mepoinálái, duuꞌNa mampehuhuꞌá wátáNa rapapate mohómpóki dósántaꞌ.

²⁶ Nabábehi noꞌonoꞌ bona Napataniꞌkeꞌ mewaliꞌ taunáNa, hai Napamagasaꞌkeꞌ hangko i dósántaꞌ moliu uwai periu hai ngkóráꞌNa.

²⁷ Nabábehi woꞌo noꞌonoꞌ bona kitaꞌ upu-upu to mepoinálái, mewaliꞌkeꞌ taunáNa to magasaꞌ hai meawaꞌ, duuꞌna tiꞌara piꞌi ara kamasalaꞌtaꞌ ba kamakuraꞌtaꞌ, bona hintotoꞌkeꞌ ina Nakahaweꞌi.

²⁸ Nodo Kerisitu mampokaꞌahiꞌ upu-upu to mepoinálái, noꞌonoꞌ woꞌo tobaleilo hangaa-ngaa mampokaꞌahiꞌ toinána nodo mampokaꞌahiꞌ wátána haduduána. Heáná to mampokaꞌahiꞌ toinána, lempóna, mampokaꞌahiꞌ woꞌo wátána haduduána.

²⁹ Tiꞌara ara tauna to mokáhihiꞌ wátána haduduána, bateꞌna nakámpái hai nakádipurá. Noꞌonoꞌ woꞌo Kerisitu mokádipurá tauna to mepoinálái i Hia.

³⁰ Ia mokádipurákeꞌ láwiꞌ kitaꞌ to mepoinálái i Hia nodokeꞌ hanggáláꞌ hangko i WátáNa.

³¹ I lalu Sura Magasaꞌ, teukiꞌ node: “Onoꞌ miꞌi haneꞌi hadua tobaleilo hangaa-ngaa mopálehi umána hai inána, hai tueꞌ hingkakani hai toinána, bona to rodua iti mewaliꞌheꞌ hawátá-wátá.” (Pewaliꞌána 2:24)

³² Laluita iti, ara to tewuniángi hai kaladu lempóna. To kutunggái ia miꞌi pohintuwuꞌna Kerisitu hai taunáNa.

³³ Agáiáná kehapiꞌ noꞌonoꞌ, bateꞌna ara woꞌo lempóna i kómu to node: tobaleilo hangaa-ngaa mampokaꞌahiꞌ toinána nodo pampokaꞌahiꞌna wátána haduduána, noꞌonoꞌ woꞌo towawine hangaa-ngaa mobiláꞌ toámána.