Epesu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pohintuwuꞌtaꞌ hai halalu hampepepoináláintaꞌ

¹ Kódóꞌ deꞌe to ratarungkuaꞌ ánti pobágóꞌkuꞌ i Pueꞌ, kupembiáꞌ bona katueꞌmi hintotoꞌ hai tauna to nakióꞌ mewaliꞌ ánáꞌna Pueꞌ Ala.

² Hangaa-ngaa mengkaiwóiꞌkou hai hangaa-ngaa maꞌálusuꞌ pambiárámi i pákáꞌ-pákáꞌna. Kehapiꞌ niꞌisá salaꞌna halalumi, hangaa-ngaa mombetarimakou hai sabaraꞌkou ánti kamaꞌahiꞌmi hadua hai hadua.

³ Maroꞌa-roꞌakou bona tiꞌara ara posisalaꞌ, láwiꞌ Inao to Magasaꞌ to mopahintuwuꞌkou upu-upu. Pohintuwuꞌmi iti hangaa-ngaa nikámpái maroꞌa.

⁴ Kitaꞌ upu-upu to mepoinálái i Iesu Kerisitu, mewaliꞌkeꞌ nodo hawátá-wátá, hadua peá Inao to Magasaꞌ to ara i laluntaꞌ. Noꞌonoꞌ woꞌo upu-upukeꞌ to Nakióꞌ; hibali pehárungántaꞌ,

⁵ hadua peá Pueꞌtaꞌ, hambuaꞌ pepoináláintaꞌ, hai kitaꞌ upu-upu rariu i lalu hangaꞌna Pueꞌ.

⁶ Hadua peá Umántaꞌ, Ia miꞌi Pueꞌ Ala. Ia to mopárentákeꞌ upu-upu, to mobágóꞌ moliu i kitaꞌ upu-upu, hai to mokatoroꞌikeꞌ upu-upu.

⁷ Onoꞌ miꞌi haneꞌi kitaꞌ hadua-hadua raweꞌikeꞌ pewátiꞌ to montaniꞌ-ntaniꞌ, bona peisákeꞌ mampopolumao bágóꞌna Pueꞌ, hai tapopolumao bágóꞌ iti hintotoꞌ hai pewátiꞌ to nagáláꞌ-gáláꞌámokeꞌ Kerisitu.

⁸ Iti hibali hai apa to teukiꞌ i lalu Sura Magasaꞌ kana i Kerisitu to manguliꞌ node: “Karoona monangi ewáliNa, Ia mengkaoreꞌ lao i kapángkáꞌáNa. Handaꞌ tawani to Naꞌánti, haneꞌi pewátiꞌ Nagáláꞌ-gáláꞌ i taunáNa.” (Sura Petóiá 68:19)

⁹ Apa lempóna laluita iti? Ane Ia mengkaoreꞌ lao i kaꞌaraꞌá to i reá ntepuꞌu, manótó Ia mendáulu miꞌi lao i kaꞌaraꞌá to i wóiꞌ ntepuꞌu.

¹⁰ To natunggái laluita iti, ia miꞌi Kerisitu. Ia to mendáulu, Ia woꞌo to mengkaoreꞌ álána molámbiꞌ pehodaꞌá to melumbuꞌ kapángkáꞌna hangko i upu-upu to i reá ntepuꞌu, bona Ia mopárentái upu-upuna.

¹¹ Ia miꞌi to mogáláꞌ-gáláꞌ pewátiꞌ i upu-upu tauna to mepoinálái: araheꞌ to Napopewaliꞌ suroNa, araheꞌ to Napopewaliꞌ nabiꞌ to mopahaweꞌ laluitaNa, hai araheꞌ woꞌo to Napopewaliꞌ topoánti Ngkóráꞌ Marasa, araheꞌ woꞌo to Napopewaliꞌ pandita, hai araheꞌ woꞌo to Napopewaliꞌ guru.

¹² Nagáláꞌ-gáláꞌ mampopengaa kapánde iti bona kitaꞌ to mepoinálái peisá mampopolumao bágóꞌ to naweꞌikeꞌ Pueꞌ. Láwiꞌ ane iti to tabábehi, kitaꞌ to rauliꞌ Wátána Kerisitu ina tetámbái kamaróhóna pepoináláintaꞌ,

¹³ duuꞌna hangkani tempó ina mohintuwuꞌkeꞌ upu-upu i lalu pepoináláintaꞌ, hai ina taisá ntepuꞌu Ánáꞌna Pueꞌ Ala. Ina maróhó pepoináláintaꞌ, hai ina mewaliꞌkeꞌ nodo Kerisitu to tiꞌara ara kamakuraꞌNa.

¹⁴ Mewaliꞌ, ane noꞌonoꞌi kamaróhóna pepoináláintaꞌ, tiꞌarapokeꞌ ina madoli rapakanawoꞌ nodo ánángkóiꞌ. Pekiriraꞌ ánángkóiꞌ nodo rumpuꞌ to nawui modumbá-dumbá, agáiáná kitaꞌ, tiꞌarapokeꞌ noꞌonoꞌ. Tiꞌarapokeꞌ ina mampeuláꞌi hinángkáꞌ paturoꞌ hangko i tauna to mepawuli hai mepakanawoꞌ,

¹⁵ agáiáná ina taisá mopahaweꞌ paturoꞌ to toꞌu hangko i laluntaꞌ to bukeꞌ ahiꞌ, álána mewaliꞌkeꞌ maróhó i upu-upuna, hai ina mewaliꞌkeꞌ nodo Kerisitu. Ia miꞌi Wuáꞌtaꞌ to motadulakoi upu-upu taunáNa.

¹⁶ Hai kitaꞌ to mepoinálái peisá rapándiriꞌ nodo hanggáláꞌ hangko i Wátána Kerisitu. Ane i wátá tauna, mampopengaa gáláꞌna, agáiáná ara pombekáiꞌána bona mewaliꞌ hambuaꞌ wátá. Noꞌonoꞌ woꞌo kitaꞌ to mepoinálái: ánti pohintuwuꞌtaꞌ hai Kerisitu, mohintuwuꞌkeꞌ hadua hai hadua. Hai ane kitaꞌ hadua-hadua mampopolumao bágóꞌtaꞌ hintotoꞌ hai apa to napoináláiákeꞌ Pueꞌ, ina kamaróhó-róhóá peuláꞌtaꞌ i Hia, hai ina maróhó woꞌo pohintuwuꞌtaꞌ ánti pombepokaꞌahiꞌtaꞌ hadua hai hadua.

Katueꞌ to woꞌu i lalu Kerisitu

¹⁷ Mewaliꞌ, ánti kuasaꞌ to naweꞌiaꞌ Pueꞌ, kuweꞌikou laluita i katoꞌu-toꞌuána. Ineeꞌ wopakou mampeuláꞌi bábehiáraꞌ tauna to tiꞌara moisá Pueꞌ Ala, láwiꞌ pekiriraꞌ tiꞌara mobunduꞌ

¹⁸ hai tetuko. Tiꞌaraheꞌ molámbiꞌ katueꞌ to woꞌu to hangko i Pueꞌ Ala, láwiꞌ tiꞌaraheꞌ moisá Pueꞌ Ala. Mentibongoꞌheꞌ láwiꞌ matuꞌa laluraꞌ.

¹⁹ Tiꞌara piꞌi raisá mahili, álána mouláꞌ peheꞌ peundeꞌána laluraꞌ haduduáraꞌ to tiꞌara hintotoꞌ, hai raundeꞌ ntepuꞌu mobábehi hinángkáꞌna bábehiá to metitidiꞌi.

²⁰ Agáiáná kómu, tiꞌara bábehiá iti to rapaturoꞌákou i tempómi mohádi Ngkóráꞌ Marasa mokana i Kerisitu.

²¹ Nihádi mpuꞌu miꞌi kana i Hia, hai mohintuwuꞌkou, lempóna motarimamokou woꞌo paturoꞌ to toꞌu mokana i Hia.

²² Rapaturoꞌámokou node: hangaa-ngaa nikábáhá bábehiámi to nipeuláꞌi hangko tiꞌara manikou mepoinálái i Pueꞌ. Upu-upu peundeꞌána lalumi to nipeuláꞌi tempó iti mopakanawoꞌkou hai mopakarugiꞌ katueꞌmi.

²³ Mewaliꞌ hangaa-ngaa nipembiáꞌ i Pueꞌ Ala bona lalumi hai pekirimi Napawoꞌu.

²⁴ Bábehiámi hangaa-ngaa hintotoꞌ i tauna to napawoꞌu miꞌi Pueꞌ Ala, láwiꞌ Ia mampopewaliꞌmokou tauna to magasaꞌ ntepuꞌu, manótó i peitáNa, hai to mampeuláꞌi pambiáráNa haduduáNa.

²⁵ Mewaliꞌ halalu-halalu, hangaa-ngaa nikábáhá bábehiámi to hangkoia. Ineeꞌkou modongkoꞌ. Hangaa-ngaa niuliꞌ apa to toꞌu, láwiꞌ kitaꞌ upu-upu hawátá-wátákeꞌ i lalu Kerisitu.

²⁶ Ane mabukoꞌkou, ineeꞌ nipatodáhi bukoꞌmi iti moántikou i lalu dósá. Ineeꞌkou mabukoꞌ duuꞌna támpu alo,

²⁷ bona tiꞌara niweꞌi tempó i Datu Tokadake mokeloꞌkou.

²⁸ Tauna to manako, ineeꞌ wopaheꞌ manako. Rángiraꞌ mobágóꞌ matimi, bona molámbiꞌheꞌ apa to raparaluu hai peisáheꞌ woꞌo motulungi tauna ntániꞌna to tiꞌara nakaꞌarai.

²⁹ Nikámpái bona tiꞌara ara laluita to kadake to mesuwuꞌ i humemi. Rángina miꞌi mohuwárákou laluita to hintotoꞌ bona peisákou motulungi hai mopakaróhó laluraꞌ tauna ntániꞌna. Laluita to noꞌonoꞌ ina moánti pewátiꞌ i tauna to mohádi.

³⁰ Nikámpái bábehiámi hai laluitami bona tiꞌarakou mopamasusa Inao to Magasaꞌ to hangko i Pueꞌ Ala. Hangaa-ngaa nibuhinao: Inao to Magasaꞌ Ia miꞌi petándáina Pueꞌ Ala i lalumi to mopakanótó kakómuna taunáNa. Ánti kaꞌárána Inao to Magasaꞌ i lalumi, niꞌisá miꞌi kaꞌina haweꞌna tempóna Pueꞌ Ala mohómpókikou bukeꞌ-bukeꞌ.

³¹ Mewaliꞌ, hangaa-ngaa nikábáhá upu-upu bábehiá to node: kakóiꞌ inao, pepailalu, kamabukoꞌ, pombeheheꞌ, hai petitibei. Hangaa-ngaa nikábáhá bábehiá iti hai upu-upu bábehiá to kadake.

³² Rángina miꞌi: maꞌálusuꞌ lalumi, mombepokaꞌahiꞌkou hadua hai hadua, hai niámpungi salaꞌna hángká rángámi, nodo woꞌo Pueꞌ Ala moámpungi salaꞌmi ánti peuláꞌmi i Kerisitu.