3 Iohane 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Molámbiꞌ Gaiu i kaꞌaraꞌámu Halalungkuꞌ Gaiu to kupokaꞌahiꞌ ntepuꞌu. Sura deꞌe hangko i kódóꞌ, Tosaeraꞌ toSarani.

² Halalungkuꞌ! Mekakaeaꞌ bona maroꞌa-roꞌakoꞌ, hai upu-upu to nubábehi mewaliꞌ maroꞌa. Kuisá miꞌi kamaróhóna pepoináláimu.

Iohane motóiá katetidaꞌna Gaiu i paturoꞌ to toꞌu

³ Góeꞌ ntepuꞌuaꞌ, láwiꞌ ara bahangapa halalu hampepepoináláintaꞌ to haweꞌ ieneꞌ, hai mopahaweꞌheꞌ bámbári kana i hio. Rauliꞌ mepoináláikoꞌ oaꞌ i paturoꞌ to toꞌu, hai bábehiámu hiolaꞌ woꞌo hai paturoꞌ iti.

⁴ Rumihi ntepuꞌu kagóeꞌkuꞌ ane kuhádi ánáꞌkuꞌheꞌ mampeuláꞌi oaꞌ paturoꞌ to toꞌu.

⁵ Halalungkuꞌ Gaiu! Góeꞌaꞌ láwiꞌ motulungikoꞌ oaꞌ halalu hampepepoináláintaꞌ to moánti Ngkóráꞌ Marasa, mogaloraheꞌ to tiꞌara mani nuisá, nutulungiheꞌ woꞌo. Onoꞌ haneꞌi tongawaꞌ katetidaꞌmu i Pueꞌ.

⁶ Araheꞌ to mai ieneꞌ mopahaweꞌ i lindoꞌna jemaꞌa mokana i kamaꞌahiꞌmu i halalu hampepepoináláintaꞌ. Mewaliꞌ kuhárungá ina nutulungiheꞌ oaꞌ hai nupopeángkáꞌheꞌ maroꞌa bona rabuku mopaliliu bágóꞌraꞌ. Iti miꞌi to mopagóeꞌ Pueꞌ Ala,

⁷ láwiꞌ halaluntaꞌ iti mampopolumaoheꞌ bágóꞌna Pueꞌ. Tiꞌaraheꞌ motarima apa-apa hangko i tauna to tiꞌara mepoinálái.

⁸ Mewaliꞌ, hintotoꞌ ntepuꞌu ane tatulungiheꞌ, láwiꞌ ane tabábehi noꞌonoꞌ, lempóna mobágóꞌkeꞌ hingkakani i lalu pobágóꞌraꞌ moánti bámbári to toꞌu.

Iohane mosalaꞌi Dioterepe hai motóiá Demeteriu

⁹ Ara hambuaꞌ sura to kupakatu miꞌi i jemaꞌa to ihinti. Agáiáná Dioterepe mosápuákaꞌangkaiꞌ, láwiꞌ napoinao bona ia peá to mokuasaꞌi tauna.

¹⁰ Mewaliꞌ, ane haweꞌaꞌ, ina kupakanótóákou bábehiána to kadake bona niꞌisá. Ia mopakadake hangaꞌkuꞌ, hai tiꞌara iti peá to nabábehi. Ane halaluntaꞌ to moánti Ngkóráꞌ Marasa haweꞌ i wánuámi, tiꞌaraheꞌ natarima, hai nakóntóheꞌ woꞌo tauna ntániꞌna to moundeꞌ motarimaheꞌ. Hai heáná peá to moundeꞌ motarima topoánti Ngkóráꞌ, napopesuwuꞌheꞌ hangko i jemaꞌa.

¹¹ Halalungkuꞌ! Ineeꞌkoꞌ mampeuláꞌi bábehiá tauna to kadake, ngkáliꞌna riꞌi hangaa-ngaa nupeuláꞌi bábehiá tauna to maroꞌa. Tauna to mobábehi apa to maroꞌa, tongawaꞌ kanapoánáꞌnamoheꞌ Pueꞌ Ala. Tauna to mobábehi apa to kadake, tongawaꞌ katiꞌáráraꞌ moisá Pueꞌ Ala.

¹² Ane Demeteriu, ia ratóiá upu-upu tauna, hai hintotoꞌ ntepuꞌu ratóiá, láwiꞌ bábehiána hiolaꞌ hai paturoꞌ to toꞌu. Hai kaiꞌ woꞌo motóiá ntepuꞌuangkaiꞌ Demeteriu. Hai nuisá apa to kipolaluita kana i hia iti, toꞌu ntepuꞌu.

Laluita to kahópóꞌána

¹³ Handaꞌ mani to kupoinao kupahaweꞌákoꞌ, agáiáná tiꞌara kuꞌundeꞌ moukiꞌ upu-upuna i sura,

¹⁴ láwiꞌ kuhárungá tiꞌara piꞌi marue ina mohidupaꞌ wopakeꞌ, bona ara tempóntaꞌ molalaluita hingkakani.

¹⁵ Mekakaeaꞌ bona Pueꞌ Ala mampoweꞌikoꞌ roꞌa ngkatueꞌ. Tabeá hangko i upu-upu rángámu ieneꞌ. Kupembiáꞌ bona nupahaweꞌ tabeángkuꞌ i upu-upuheꞌ rángángkuꞌ hadua-hadua. Hangko i kódóꞌ, IOHANE