2 Timotiu 2 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Mewaliꞌ, Timotiu to kupoánáꞌ! Hangaa-ngaa nupakaróhó ntepuꞌu lalumu ánti kamaꞌahiꞌna Kerisitu Iesu i hio.

² Hangkoia nuhádi miꞌi upu-upu paturoꞌkuꞌ, hai handaꞌ woꞌo tauna to mampehádingi hai mosabiki katoꞌuna paturoꞌkuꞌ iti. Mewaliꞌ, paturoꞌ iti hangaa-ngaa nupahaweꞌ woꞌo i tauna to peisá rapoinálái, bona hira woꞌo ina mopaturoꞌ tauna ntániꞌna.

Hangaa-ngaa timamakoꞌ mantódihá kapári hai mobágóꞌ matimi

^3-4 Hangaa-ngaa timamakoꞌ woꞌo mantódihá kapári nodo woꞌo kódóꞌ ánti pobágóꞌmu i Kerisitu Iesu. Tauna to mampopolumao bágóꞌna Pueꞌ peisá rapándiriꞌ nodo hadua surudadoꞌ to maroꞌa, to tiꞌara mopaioru peá urusiána haduduána, láwiꞌ naundeꞌ mopagóeꞌ tadulakona.

⁵ Noꞌonoꞌ woꞌo tauna to mampopolumao bágóꞌna Pueꞌ peisá rapándiriꞌ nodo hadua toposilumba. Ia hangaa-ngaa mampeuláꞌi áturá-áturá posilumba, láwiꞌ ane tiꞌara napeuláꞌi, tiꞌara ina molámbiꞌ parasee.

⁶ Hai tauna to mampopolumao bágóꞌna Pueꞌ peisá woꞌo rapándiriꞌ nodo hadua topohinoe. Ane madotai mobágóꞌ, bateꞌna ia to rungu-runguna motarima wuaꞌna powiáꞌna.

⁷ Hangaa-ngaa nupailalu paturoꞌkuꞌ iti, hai Pueꞌ ina mopakanótó lalumu bona nuisá upu-upuna iti.

⁸ Hangaa-ngaa nubuhinao: Iesu Kerisitu Ia miꞌi Datu Topehómpóꞌ, pemuleꞌána Datu Daudiꞌ, hai Ia tueꞌ huleꞌ hangko i kapate. Iti miꞌi ntóáꞌna Ngkóráꞌ Marasa to kupahaweꞌ.

⁹ Ánti kamopahaweꞌkuꞌ Ngkóráꞌ Marasa, onoꞌ miꞌi haneꞌi kulámbiꞌ kapári, duuꞌna ratimpukuaꞌ ieneꞌ i lalu tarungku, nodoaꞌ hadua tauna to kadake. Agáiáná ngkóráꞌna Pueꞌ Ala tiꞌara peisá ratimpuku,

¹⁰ onoꞌ miꞌi haneꞌi kubuku mantódihá upu-upu kapári deꞌe, bona tauna to Napileꞌi ina molámbiꞌ katehómpóꞌ ánti pohintuwuꞌraꞌ hai Kerisitu Iesu, hai ina molámbiꞌheꞌ woꞌo katueꞌ to meawaꞌ i surugáꞌ.

¹¹ Toꞌu ntepuꞌu laluita deꞌe mokana i Iesu to manguliꞌ node: Ane matekeꞌ hingkakani hai Ia, ina tueꞌkeꞌ woꞌo hingkakani hai Ia.

¹² Ane sabaraꞌkeꞌ mantódihá kapári ánti peuláꞌtaꞌ i Hia, ina mepárentákeꞌ woꞌo hingkakani hai Ia. Agáiáná ane tasápuáka peuláꞌtaꞌ i Hia, kitaꞌ woꞌo ina Nasápuáka kakitaꞌna taunáNa.

¹³ Kehapiꞌkeꞌ tiꞌara tetidaꞌ i pepoináláintaꞌ i Hia, Ia ina mobukeki oaꞌ upu-upu dándiNa i kitaꞌ, láwiꞌ Ia tiꞌara peisá mosápuáka kaheánáNa.

Hangaa-ngaa maroꞌa pambiárámu ane mewaliꞌkoꞌ topobágóꞌna Pueꞌ Ala

¹⁴ Timotiu! Upu-upu to kuꞌuliꞌ deꞌe, hangaa-ngaa nupahaweꞌáheꞌ oaꞌ tauna to mepoinálái i Kerisitu. I lalu hangaꞌna Pueꞌ Ala, nupolaluitaꞌáheꞌ bona ineeꞌheꞌ mampombeheheꞌi mokana i laluita, láwiꞌ tiꞌara ara bunduꞌna i lalu katueꞌtaꞌ, ngkáliꞌna riꞌi mopakarugiꞌ peá pepoináláiraꞌ tauna to mampehádingi.

¹⁵ Agáiáná io Timotiu, hangaa-ngaa nupahaweꞌ i katoꞌu-toꞌuána paturoꞌ to toꞌu. Nupakaróhó pampopolumaomu bágóꞌ iti, bona tiꞌarakoꞌ mahili i lindoꞌna Pueꞌ Ala. Ane nubábehi noꞌonoꞌ, io ina narekeꞌkoꞌ Pueꞌ Ala nodo topobágóꞌNa to maroꞌa.

¹⁶ Ineeꞌheꞌ nupohintuwuꞌá tauna to moánti-ánti laluita to tiꞌara mobunduꞌ, láwiꞌ laluitaraꞌ iti tiꞌara moánti tauna i katueꞌ to magasaꞌ, agáiáná moántiraheꞌ karaoꞌ hangko i Pueꞌ Ala.

¹⁷ Laluitaraꞌ iti nodo hakiꞌ to mendele. Himeneu hai Piletu mouláꞌheꞌ woꞌo tauna to moánti paturoꞌ to kadake.

¹⁸ Mehupeꞌheꞌ hangko i paturoꞌ to toꞌu. Rauliꞌ pearóraꞌ upu-upu tauna to mate mewaliꞌ miꞌi. Paturoꞌraꞌ iti salaꞌ, hai mopawuli peheꞌ tauna.

¹⁹ Agáiáná ntóáꞌ pepoináláintaꞌ to napakanótó Pueꞌ Ala maróhó ntepuꞌu, ia miꞌi: “Naisá miꞌi Pueꞌ Ala heáná to Napileꞌi mewaliꞌ ánáꞌNa,” hai, “Heáná peá to mopangákuꞌ kaꞌIesuna Pueꞌraꞌ, hangaa-ngaa mokábáháheꞌ bábehiáraꞌ to kadake.”

²⁰ I lalu támbi to mahile, ara handaꞌ pákáꞌna párewá. Ara párewá to maroꞌa to rabábehi hangko i buláwá hai peráꞌ. Ara woꞌo to rabábehi hangko i kau ba tampoꞌ pólóꞌ. To maroꞌa rapakeꞌ i kahaweꞌna torare to rabiláꞌ. To tiꞌara maroꞌa rapakeꞌ alo-alona.

²¹ Mewaliꞌ, heáná tauna to mokábáhá bábehiána to kadake, ia to mewaliꞌ nodo párewá to maroꞌa. Lempóna, mewaliꞌ topobágóꞌ to magasaꞌ hai to mobunduꞌ i Pueꞌ, láwiꞌ timama mampopolumao upu-upu bágóꞌ to maroꞌa.

²² Mewaliꞌ kuhángáꞌákoꞌ Timotiu: Ineeꞌ nupeuláꞌi peundeꞌána lalumu nodo tauna to maleheꞌ mani. Hangaa-ngaa nupári-pári mobábehi bábehiá to hintotoꞌ hai peundeꞌána Pueꞌ Ala. Nupakaróhó pepoináláimu i Pueꞌ hai kamaꞌahiꞌmu i tauna ntániꞌna. Hangaa-ngaa mohintuwuꞌkoꞌ hai upu-upu tauna to mekakae i Pueꞌ hangko i kabulána laluraꞌ.

²³ Araheꞌ tauna to mampombeheheꞌi paturoꞌ to tiꞌara mobunduꞌ, láwiꞌ paturoꞌ to toꞌu tiꞌara mani manótó i laluraꞌ. Ineeꞌ nupesuaꞌi pombeheheꞌraꞌ iti, láwiꞌ nuisá paturoꞌ iti mopaꞌara peá posisalaꞌ,

²⁴ hai tiꞌara hintotoꞌ ane kitaꞌ to mewaliꞌ huoꞌána Pueꞌ pakakeꞌ mombeheheꞌ. Hangaa-ngaa maꞌálusuꞌkeꞌ i upu-upu tauna. Hangaa-ngaa mapándekeꞌ mepaturoꞌ, hai sabaraꞌkeꞌ.

²⁵ Ane araheꞌ tauna to moewaꞌ paturoꞌ to toꞌu, hangaa-ngaa tapamaꞌálusuꞌ polaluitantaꞌ mopaturoꞌheꞌ. Babilaꞌ naweꞌiheꞌ Pueꞌ tempó menosoꞌ hangko i peꞌewaꞌraꞌ, hai ina moisáheꞌ woꞌo paturoꞌ to toꞌu,

²⁶ duuꞌna manótó laluraꞌ hai tekábáháheꞌ hangko i kuasaꞌna Datu Tokadake, láwiꞌ Datu Tokadake moákálángimoheꞌ bona mampeuláꞌiheꞌ peundeꞌána.