2 Timotiu 1 - Sura Magasaꞌ: Bahangapa sura Pototowiá to Sae hai Pototowiá to Woꞌu

^1-2 Sura deꞌe hangko i kódóꞌ Paulu, kupakatu i hio Timotiu to kupoánáꞌ hai kupokaꞌahiꞌ. Pueꞌ Ala mopileꞌiaꞌ mewaliꞌ surona Kerisitu Iesu bona moántiaꞌ Ngkóráꞌ Marasa i handaꞌ tauna. I lalu Ngkóráꞌ Marasa iti, Pueꞌ Ala modándi, heáná to mepoinálái i Kerisitu Iesu, bateꞌna ina molámbiꞌ katueꞌ to maroꞌa to tiꞌara mokahópóꞌá. Mekakaeaꞌ i Pueꞌ Ala Umántaꞌ hai i Kerisitu Iesu Pueꞌtaꞌ. Kupembiáꞌ bona Nawátiꞌkoꞌ, Napatongawaꞌákoꞌ ahiꞌNa, hai Naweꞌikoꞌ roꞌa ngkatueꞌ.

Paulu manguliꞌ handaꞌ kamaroꞌana i Pueꞌ Ala ánti pepoináláina Timotiu

³ Rungu-runguna, kuꞌuliꞌ handaꞌ kamaroꞌana i Pueꞌ Ala. Hai kupopolumao bágóꞌNa hangko i lalungkuꞌ ntepuꞌu, nodoheꞌ woꞌo toiorungkuꞌ mampopolumao bágóꞌNa. Kuꞌuliꞌ oaꞌ handaꞌ kamaroꞌana i Pueꞌ Ala ánti kaꞌiona Timotiu.

⁴ Alo-alona, kukábeláikoꞌ i lalu pekakaengkuꞌ. Kubuhinao kateriaꞌmu i tempóntaꞌ mogááꞌ. Mabilaꞌaꞌ i hio, hai ina góeꞌ ntepuꞌuaꞌ ane kuita wopakoꞌ.

⁵ Kuꞌuliꞌ handaꞌ kamaroꞌana i Pueꞌ Ala, láwiꞌ kuisá mepoináláikoꞌ i Pueꞌ Iesu hangko i lalumu ntepuꞌu. Hai kuisá pepoináláimu bateꞌna nodo woꞌo pepoináláiraꞌ Lois pueꞌmu towawine hai Eunike inámu. Hira iti to ioru mepoináláiheꞌ i Iesu haneꞌi io.

Paulu mopaturoꞌ Timotiu hai mopakaróhó laluna (1:6–4:6)

⁶ Mewaliꞌ, Timotiu, kupopambuhinaoákoꞌ kana i bágóꞌ to naweꞌikoꞌ Pueꞌ Ala hangkoia, i tempóngkuꞌ moángkáꞌ taengkuꞌ i wuáꞌmu moángkáꞌkoꞌ mewaliꞌ tadulakoraꞌ toSarani. Onoꞌ miꞌi haneꞌi kupembiáꞌ nupakaróhó ntepuꞌu lalumu, bona nupopolumao oaꞌ bágóꞌmu iti.

⁷ Ineeꞌkoꞌ malááꞌ, láwiꞌ kamalááꞌ tiꞌara hangko i Pueꞌ Ala. Ngkáliꞌna riꞌi, Pueꞌ Ala mampoweꞌikeꞌ Inao to Magasaꞌ, onoꞌ miꞌi haneꞌi maróhó laluntaꞌ, taisá mampokaꞌahiꞌ hángká rángántaꞌ, hai tabuku momeeꞌ peundeꞌána laluntaꞌ.

⁸ Mewaliꞌ ineeꞌkoꞌ mahili mewaliꞌ sabiꞌna Pueꞌ Iesu, hai ineeꞌkoꞌ woꞌo mahili ánti kakódóꞌna toratarungku. Ratarungkuaꞌ láwiꞌ mopahaweꞌaꞌ ngkóráꞌna Pueꞌ Ala. Mewaliꞌ io woꞌo hangaa-ngaa timamakoꞌ mantódihá kapári ánti pobágóꞌmu mopahaweꞌ Ngkóráꞌ Marasa. Pueꞌ Ala ina mampoweꞌikoꞌ róhó bona nubuku mantódihá kapári iti.

⁹ Ia mokióꞌkeꞌ mewaliꞌ taunáNa to magasaꞌ hai mohómpókikeꞌ hangko i huku dósántaꞌ. Tiꞌarakeꞌ Nakióꞌ hai Nahómpóki Pueꞌ Ala ánti bábehiántaꞌ to maroꞌa. Iti Nabábehi ánti kabulána laluNa hiolaꞌ hai tunggáiáNa. Láwiꞌ hangko tiꞌara mani duniáꞌ deꞌe rapopewaliꞌ, ara miꞌi tunggáiána Pueꞌ Ala mohintuwuꞌkeꞌ moliu Kerisitu Iesu.

¹⁰ Hai deꞌe-deꞌe, Napatongawaꞌámokeꞌ kabulána laluNa, láwiꞌ haweꞌ miꞌi Kerisitu Iesu Topohómpóꞌ Salaꞌtaꞌ. Iesu monangi kapate. Lempóna: kehapiꞌkeꞌ mate, ane mepoináláikeꞌ i Ngkóráꞌ Marasa, Iesu ina mopatueꞌkeꞌ huleꞌ hai ina Naweꞌikeꞌ katueꞌ to tiꞌara mokahópóꞌá.

¹¹ Pueꞌ Ala mopileꞌiaꞌ mewaliꞌ surona Pueꞌ Iesu, bona kupahaweꞌ Ngkóráꞌ Marasa i tauna hai kupaturoꞌáheꞌ bona mepoináláiheꞌ i Iesu.

¹² Mewaliꞌ, ánti pobágóꞌkuꞌ mopahaweꞌ Ngkóráꞌ Marasa iti, onoꞌ miꞌi haneꞌi molámbiꞌaꞌ kapári duuꞌkuꞌ ratarungku. Agáiáná kehapiꞌ noꞌonoꞌ, tiꞌaraꞌaꞌ mahili, láwiꞌ kuisá kaheánáNa to kupoinálái, hai kupoinálái kaꞌIana to ina mokámpáiaꞌ. Kuisá ntepuꞌu kamakuasaꞌNa mokámpái upu-upu to Napoináláiáꞌaꞌ duuꞌna haweꞌ i alo pobutusi i kahópóꞌána duniáꞌ.

Hangaa-ngaa nupeuláꞌi oaꞌ paturoꞌ to toꞌu

¹³ Timotiu! Kupopambuhinaoákoꞌ paturoꞌ to nuhádi miꞌi hangko i kódóꞌ. Paturoꞌ to toꞌu iti hangaa-ngaa nutibaaꞌ maroꞌa. Ineeꞌ nukábáhá pepoináláimu i Kerisitu Iesu. Hangaa-ngaa nupokaꞌahiꞌ hángká rángámu ánti pohintuwuꞌmu hai Iesu.

¹⁴ Hai ánti kuasaꞌna Inao to Magasaꞌ to ara i laluntaꞌ, kupembiáꞌ bona nukámpái maroꞌa paturoꞌ iti; ineeꞌ nupatodáhi tauna ntániꞌna mobáliki.

¹⁵ Nuisá miꞌi, hangko i oloꞌraꞌ upu-upu toSarani to ara i poropensi Asia, tiꞌarapoheꞌ ara to hingkakani hai kódóꞌ. Rapálehimoꞌ rángángkuꞌheꞌ, tepasuaꞌ Pigelu hai Hemogene.

^16-18 Agáiáná Onesiporu, handaꞌ kánina mai meweoꞌ hai mopalindóaꞌ, láwiꞌ kehapiꞌaꞌ ratarungku, ia tiꞌara mahili. I kahaweꞌna ieneꞌ i Roma, nagaguaꞌ napeliꞌ, duuꞌna napohidupaꞌáꞌaꞌ. Hai nuisá noumbá petulungina i kódóꞌ hangkoia tempóngkuꞌ mani i kótá Epesu. Onoꞌ miꞌi haneꞌi mekakaeaꞌ i Pueꞌ, kupembiáꞌ bona Nawátiꞌ upu-upu halaluna Onesiporu, hai Napatongawaꞌ ahiꞌNa i Onesiporu i alo pobutusi i kahópóꞌána duniáꞌ.