2 Peturuꞌ 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pepaingáꞌi kaꞌina haweꞌna huleꞌ Iesu Kerisitu

¹ Halalungkuꞌ to kupokaꞌahiꞌ! Deꞌe miꞌi surangkuꞌ to karongkánina i kómu. I lalu surangkuꞌ to rungu-runguna hai to karongkánina deꞌe, kuruaꞌ lalumi hai kupopaingáꞌákou bona nibuhinao huleꞌ paturoꞌ to toꞌu, bona manótó pekirimi.

² Tunggáiángkuꞌ bona nibuhinao apa to rapahaweꞌ miꞌi nabiꞌ-nabiꞌ hangkoia to magasaꞌ tueꞌraꞌ, hai bona nibuhinao woꞌo hawaꞌna Pueꞌtaꞌ Pueꞌ Iesu Topohómpóꞌ Salaꞌ. HawaꞌNa iti nihádi miꞌi hangko i kaiꞌ suroNa.

³ Ara to hangaa-ngaa nibuhinao ntepuꞌu: i alo-alo to kahópóꞌána deꞌe, ina araheꞌ tauna to nakuasaꞌi peundeꞌána laluraꞌ to kadake. Taunaheꞌ iti ina mosasalaꞌikou,

⁴ ina rauliꞌ, “Iesu modándi kaꞌina haweꞌNa huleꞌ, agáiáná iumbá miꞌi deꞌe-deꞌe? Tiꞌara kipoinálái, láwiꞌ toioruntaꞌ hangkoia matemoheꞌ, hai mantepuꞌu hangko i pewaliꞌána duniáꞌ duuꞌna haweꞌ deꞌe-deꞌe, tiꞌara ara katebálikiána.”

⁵ Tauna to molaluita noꞌonoꞌ, salaꞌ ntepuꞌuheꞌ láwiꞌ ratunggái motuko pekiriraꞌ. Tiꞌara raundeꞌ mampekiri, hangkoia Pueꞌ Ala mampopewaliꞌ langiꞌ hai duniáꞌ hai upu-upu óntóꞌna moliu ngkóráꞌNa. Duniáꞌ deꞌe Napopewaliꞌ hangko i uwai, hai lorena mesupaꞌ hangko i uwai,

⁶ hai hangkoia Pueꞌ Ala mopakeꞌ woꞌo uwai mogero duniáꞌ deꞌe.

⁷ Langiꞌ hai tampoꞌ ara haweꞌ deꞌe-deꞌe láwiꞌ moliu ngkóráꞌNa, Pueꞌ Ala mokámpái oaꞌ duuꞌna haweꞌ alo pobutusi. I tempó iti, langiꞌ hai tampoꞌ deꞌe bateꞌna ina nagero Pueꞌ Ala hai api, hai upu-upu tauna to tiꞌara mengkoruꞌ i Hia ina Nahuku.

^8-9 Araheꞌ tauna to manguliꞌ, “Marue gaga kahaweꞌna huleꞌ Pueꞌ Iesu.” Agáiáná kómu halalungkuꞌ to kupokaꞌahiꞌ, hampákáꞌ peá ineeꞌ mpuꞌu nikáláliꞌá, ia miꞌi, i lalu peitána Pueꞌ, hasábu parena hibali peá hai hangalo, hai hangalo hibali peá hai hasábu parena. Katoꞌuána, Pueꞌ tiꞌara mawewe mobukeki dándiNa, agáiáná ánti kasabaraꞌNa i kómu, onoꞌ miꞌi haneꞌi Ia tiꞌara mani haweꞌ i duniáꞌ duuꞌna deꞌe-deꞌe. Tiꞌara naundeꞌ Pueꞌ ane ara haweꞌ hadua tauna to molámbiꞌ pehuku ánti dósána. PeundeꞌáNa bona upu-upu tauna menosoꞌ hangko i dósáraꞌ.

¹⁰ Agáiáná bateꞌna ina haweꞌ mpuꞌu Pueꞌ, hai kahaweꞌNa iti ina nodo kahaweꞌna topanako. I alo iti ina rahádi pewoo to meriringkuꞌi, langiꞌ ina matántá, hai upu-upu to ara i langiꞌ ina naꞌandeꞌ api. Duniáꞌ deꞌe hai upu-upu óntóꞌna ina tuna.

¹¹ Mewaliꞌ halalu-halalu, ane noꞌonoꞌ kaꞌina maropuꞌna upu-upuna to ara, noumbá miꞌi rárá katueꞌmi deꞌe-deꞌe? Hangaa-ngaa nipamagasaꞌ bábehiámi hai mengkoruꞌkou i Pueꞌ Ala,

¹² láwiꞌ kómu deꞌe mampegiákou alo kahaweꞌána huleꞌ Pueꞌ. Rángina miꞌi nipakaróhó peuláꞌmi i Pueꞌ Ala bona rapakawiáꞌ alo kahaweꞌáNa iti. I alo iti, langiꞌ ina naꞌandeꞌ api, hai upu-upu to ara ina magonuꞌ.

¹³ Agáiáná kitaꞌ mampegiá pekeꞌ apa to nadándiákeꞌ Pueꞌ Ala, ia miꞌi langiꞌ hai duniáꞌ to woꞌu to ina rakatoroꞌi tauna to manótó i peitáNa.

Laluita to kahópóꞌána

¹⁴ Mewaliꞌ halalu-halalu to kupokaꞌahiꞌ, tangaꞌmi mampegiá alo iti, nipakaróhó peuláꞌmi i Pueꞌ, bona maroꞌa pohintuwuꞌmi hai Ia, hai tiꞌara ara kamasalaꞌmi ba kamakuraꞌmi ane meángkáꞌkou i lindoꞌNa.

¹⁵ Hangaa-ngaa tabuhinao apa tunggáiána kasabaraꞌna Pueꞌtaꞌ. Upu-upu tauna naweꞌiheꞌ Pueꞌ Ala tempó mampenosoꞌi bábehiáraꞌ, bona peisáheꞌ rahómpóki hangko i huku dósáraꞌ. Paturoꞌ deꞌe naukiꞌákou woꞌo Paulu, hadua halaluntaꞌ to tapokaꞌahiꞌ. Hai apa to naukiꞌ Paulu i lalu surana, naukiꞌ mouláꞌ kapánde to hangko i Pueꞌ.

¹⁶ I lalu upu-upu surana, naukiꞌ woꞌo mokana i kahaweꞌna huleꞌ Pueꞌ Iesu, hibali hai apa to kupahaweꞌámokou, agáiáná ara woꞌo paturoꞌna Paulu to maꞌángkárá ralempónga. Hai paturoꞌna iti rabáliki tauna to tiꞌara manótó pekiriraꞌ hai tiꞌara maróhó pepoináláiraꞌ. Noꞌonoꞌ woꞌo, paturoꞌ ntániꞌna hangko i Sura Magasaꞌ rabáliki woꞌo. Mewaliꞌ ánti bábehiáraꞌ iti, ina nahukuheꞌ Pueꞌ Ala.

¹⁷ Agáiáná kómu halalungkuꞌ to kupokaꞌahiꞌ, niꞌisá miꞌi upu-upu iti. Onoꞌ miꞌi haneꞌi hangaa-ngaa maingáꞌ-ingáꞌkou i tauna to tiꞌara mengkoruꞌ i áturá, bona tiꞌarakou maꞌala mouláꞌ paturoꞌraꞌ hai bábehiáraꞌ to salaꞌ, duuꞌna bata-bata lalumi mokana i apa to toꞌu to nipoinálái miꞌi.

¹⁸ Kupembiáꞌ bona nitámbái kamaróhóna peuláꞌmi i Pueꞌtaꞌ Iesu Kerisitu, bona nihádiá ntepuꞌu kamahilena ahiꞌNa i kómu, hai nitámbái woꞌo apa to niꞌisá mokana i Topohómpóꞌ Salaꞌtaꞌ iti. Tapomahile hangaꞌNa mantepuꞌu deꞌe-deꞌe duuꞌna i rue-ruena. Ami. Hangko i kódóꞌ, PETURUꞌ