2 Korintu 8 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pembiáꞌna Paulu bona morámpuheꞌ dóiꞌ petulungi nodo to rabábehi toMakedonia

¹ Kaliliuána halalu-halalu, kipoinao kihángáꞌákou apa to pewaliꞌ ieneꞌ i tampoꞌ Makedonia. Mahile ahiꞌna Pueꞌ i jemaꞌa-jemaꞌa i Makedonia.

² Kehapiꞌheꞌ molámbiꞌ kapári to matimi ntepuꞌu, agáiáná i lalu kamapári iti, rapogóeꞌ. Hai kehapiꞌ meahiahiꞌ ntepuꞌu tueꞌraꞌ, agáiáná handaꞌ pampeweꞌiraꞌ dóiꞌ bona motulungiheꞌ halalu hampepepoináláiraꞌ.

³ Kuita noumbá kamaroꞌana laluraꞌ mampeweꞌi dóiꞌ. Mampeweꞌiheꞌ i sukáꞌna pebukuáraꞌ, hai melumbuꞌ mpuꞌu miꞌi hangko i onoꞌ. Tiꞌara ara to mopári-páriheꞌ, rapeweꞌi ánti kabulána laluraꞌ.

⁴ Rapembiáꞌ ntepuꞌu i kaiꞌ bona peisáheꞌ mampeweꞌi dóiꞌ i toSarani i kótá Ierusale.

⁵ Kabulána laluraꞌ iti melumbuꞌ hangko i apa to kihárungá. Tiꞌara peá dóiꞌ to rapeweꞌi, agáiáná mopaisarengaheꞌ sieruꞌ katueꞌraꞌ i Pueꞌ Ala. Mengkoruꞌheꞌ i Pueꞌ, hai ánti peundeꞌána Pueꞌ Ala, mengkoruꞌheꞌ woꞌo i kaiꞌ.

⁶ Ánti kamaroꞌana laluraꞌ toMakedonia iti, onoꞌ miꞌi haneꞌi mohuoꞌangkaiꞌ Titu lao i kómu. Ia miꞌi to rungu-runguna motulungikou morámpu dóiꞌ to ina nipakatu i jemaꞌa-jemaꞌa to meahiahiꞌ tueꞌraꞌ. Mewaliꞌ, onoꞌ miꞌi haneꞌi kihuoꞌ wopiꞌi lao i kómu mopaliliu bágóꞌ to maroꞌa iti i oloꞌmi.

⁷ Halalu-halalu, upu-upu to niparaluu ara miꞌi i kómu: maróhó pepoináláimi, niꞌisá paturoꞌ to toꞌu, mapándekou mepaturoꞌ, handaꞌ kánimi motulungi halalumi, hai mahile kamaꞌahiꞌmi i kaiꞌ. Onoꞌ miꞌi haneꞌi kupembiáꞌ bona ineeꞌ ara kamakuraꞌmi i lalu pobágóꞌmi motulungi halalumi to meahiahiꞌ tueꞌraꞌ.

⁸ To kuhángáꞌákou iti tiꞌara párentá. Kupopaisáꞌákou mokana i toMakedonia, bona mewaliꞌheꞌ pándiriꞌ i kómu. Tunggáiángkuꞌ kupampeitaikou, bona kuisá noumbá kamaꞌahiꞌmi i hángká rángámi.

⁹ Tiꞌarakou kupárentá morámpu dóiꞌ petulungi, láwiꞌ niꞌisá woꞌo pándiriꞌ hangko i kamahilena ahiꞌna Pueꞌtaꞌ Iesu Kerisitu i kitaꞌ. Upu-upu to ara i surugáꞌ, Ia pueꞌna, agáiáná ánti kamahilena ahiꞌNa i kitaꞌ, Ia mewaliꞌ nodo hadua tauna to meahiahiꞌ tueꞌna, bona kitaꞌ peisá molámbiꞌ katueꞌ to maroꞌa to tiꞌara mokahópóꞌá.

^10-11 Mewaliꞌ, deꞌe miꞌi laluitangkuꞌ i kómu halalungkuꞌ toKorintu: rángina miꞌi nipaliliu bágóꞌmi to nitepuꞌu pare to liu, láwiꞌ kómu miꞌi to rungu-runguna mampekiri kana i porámpu dóiꞌ to peisá rapopetulungiꞌi halalumi to araheꞌ i kamakuraꞌ. Mewaliꞌ apa tunggáiámi hangkoia, hangaa-ngaa nipobágóꞌ oaꞌ duuꞌna hópóꞌ. Rángina miꞌi mampeweꞌikou hangko i kabulána lalumi mouláꞌ pebukuámi hadua-hadua.

¹² Láwiꞌ ane mampoinaokeꞌ motulungi halaluntaꞌ, hai mampeweꞌikeꞌ petulungintaꞌ mouláꞌ apa to ara i kitaꞌ, Pueꞌ Ala ina mampokana apa to tapeweꞌi iti. Tiꞌara Napembiáꞌ i kitaꞌ bona mampeweꞌikeꞌ melumbuꞌ hangko i pebukuántaꞌ.

¹³ Tiꞌara ara tunggáiángkuꞌ bona mopamapári katueꞌmi hai mampoporasiꞌ tauna ntániꞌna. Ngkáliꞌna riꞌi bona hibali katueꞌtaꞌ.

¹⁴ Deꞌe-deꞌe, ánti kahandaꞌna miꞌi rasiꞌ to nilámbiꞌ, kómu to hangaa-ngaa mopamagánái kamakuraꞌraꞌ jemaꞌa-jemaꞌa to ara i Ierusale. Hai ane rápáꞌna ara woꞌo kamakuraꞌmi i alo to ina haweꞌ, hira woꞌo hangaa-ngaa mopamagánái apa to makuraꞌ i kómu. Ane mombetulungikou noꞌonoꞌ, tiꞌara ina ara kamakuraꞌmi.

¹⁵ Nodo to teukiꞌ i lalu Sura Magasaꞌ: “Tauna to morámpu handaꞌ, tiꞌara ina melábi, hai tauna to morámpu hantóiꞌ peá, tiꞌara woꞌo ara kamakuraꞌna.” (Pesuwuꞌá 16:18)

Titu hai rodua rángána nahuoꞌ Paulu

¹⁶ Kuꞌuliꞌ handaꞌ kamaroꞌana i Pueꞌ Ala to mampopokale laluna Titu haneꞌi naundeꞌ motulungikou. Peundeꞌána Titu iti, hibali woꞌo hai peundeꞌángkiꞌ,

¹⁷ onoꞌ miꞌi haneꞌi kipekuneꞌ ba naꞌundeꞌ lao i Korintu motulungikou mokádipurá porámpu dóiꞌ. Nauliꞌ naundeꞌnto, láwiꞌ ara woꞌo tunggáiána haduduána lao moweoꞌkou.

¹⁸ Hai kihuoꞌ woꞌo hadua halaluntaꞌ lao i kómu hingkakani hai Titu. Ia rabiláꞌ upu-upu jemaꞌa ánti pobágóꞌna mopahaweꞌ Ngkóráꞌ Marasa.

¹⁹ Ia rapileꞌi upu-upu jemaꞌa ieneꞌ bona mamporángáꞌangkaiꞌ i polumaongkiꞌ lao moánti dóiꞌ petulungimi i halalu hampepepoináláintaꞌ to ara i lalu kamakuraꞌraꞌ. Tunggáiána polumaongkiꞌ deꞌe, bona hangaꞌna Pueꞌ rapomahile, hai bona tongawaꞌ kamahilena ahiꞌtaꞌ i halalu hampepepoináláintaꞌ.

²⁰ Tunggáiángkiꞌ mohuoꞌ halaluntaꞌ iti lao hingkakani hai Titu, bona tiꞌara ara to moraiꞌangkaiꞌ i poántingkiꞌ dóiꞌ to handaꞌ.

²¹ Onoꞌ haneꞌi kipileꞌi miꞌi ami heáná to ina meuláꞌ i polumaongkiꞌ deꞌe, bona tongawaꞌ kamanótóna bábehiángkiꞌ, tiꞌara peá i peitána Pueꞌ, agáiáná i peitána woꞌo tauna.

²² Ara mani hadua tauna to kihuoꞌ lao i kómu hingkakani hai hira. Kiꞌisá kamadotana medurei i lalu bágóꞌna Pueꞌ, láwiꞌ kiꞌita mata miꞌi bábehiána i lalu pákáꞌ-pákáꞌna to napobágóꞌ. Hai deꞌe-deꞌe, napoinao ntepuꞌu motulungikou, láwiꞌ nahárungá ntepuꞌu kómu toKorintu ina morámpu handaꞌ dóiꞌ petulungimi.

²³ {Ane araheꞌ tauna to mekuneꞌ} kana i Titu, ia rángángkuꞌ mobágóꞌ to kuhuoꞌ lao motulungikou. Ane rángána to rodua, hira miꞌi tauna to rahuoꞌ jemaꞌa-jemaꞌa ieneꞌ bona laokou motulungi mourusi dóiꞌ petulungimi to ina raꞌánti. Tauna iti mampomahileheꞌ hangaꞌna Kerisitu.

²⁴ Mewaliꞌ, kupembiáꞌ bona nitarimaheꞌ maroꞌa, bona tongawaꞌ kamaꞌahiꞌmi i hira, hai upu-upu jemaꞌa ina moisá katoꞌuna laluitangkiꞌ motóiákou.