2 Korintu 7 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Mewaliꞌ, halalungkuꞌ to kupokaꞌahiꞌ, ánti kanaweꞌintaꞌ Pueꞌ Ala dándiNa iti, onoꞌ miꞌi haneꞌi hangaa-ngaa takábáhá hinángkáꞌna to mopakadakekeꞌ, maroꞌa i wátántaꞌ, maroꞌa i laluntaꞌ. Hangaa-ngaa tapeuláꞌi peundeꞌána Pueꞌ Ala hangko i laluntaꞌ ntepuꞌu, hai hangaa-ngaa malááꞌkeꞌ mobábehi apa peá to tiꞌara hintotoꞌ hai peundeꞌáNa.

² Halalu-halalu! Kupembiáꞌ bona nitarimaꞌangkaiꞌ hangko i lalumi ntepuꞌu! Tiꞌara ara salaꞌkiꞌ i heáná peá. Tiꞌaraꞌangkaiꞌ mopakanawoꞌ tauna, tiꞌaraꞌangkaiꞌ moákálángi tauna bona kipolámbiꞌi rasiꞌ.

³ Tunggáiángkuꞌ, tiꞌarakou kusalaꞌi, láwiꞌ nodo miꞌi to kuꞌuliꞌ, rumihi kamaꞌahiꞌkiꞌ i kómu. Tueꞌangkaiꞌ ba mateangkaiꞌ, bateꞌna kipokaꞌahiꞌkou.

⁴ Halalu-halalu, mahile pehárungángkuꞌ i kómu, hai kupomahilekou. Kehapiꞌ handaꞌ kapári to morampeangkaiꞌ, lindóaꞌ hai góeꞌ ntepuꞌu lalungkuꞌ ánti kakómuna.

Góeꞌ Paulu láwiꞌ Titu moánti bámbári kana i toKorintu

⁵ {Lindó lalungkuꞌ, láwiꞌ kuhádi bámbári to naꞌánti Titu hangko i kómu. Nodo to kutuntuámokou,} hangkoia pohuꞌmongkaiꞌ hangko i kótá Teroasi mai i tampoꞌ Makedonia. Agáiáná i kahaweꞌkiꞌ ieneꞌ, tiꞌara ara tempóngkiꞌ mengkaroo. Iumbá peá kalaoángkiꞌ, narampeangkaiꞌ handaꞌ kapári. Rapombeheheꞌangkaiꞌ handaꞌ tauna. Malááꞌangkaiꞌ hai masusa lalungkiꞌ tempó onoꞌ.

⁶ Agáiáná kuꞌuliꞌ handaꞌ kamaroꞌana i Pueꞌ Ala to mopalindó tauna to mapári laluraꞌ, láwiꞌ Ia mopalindóangkaiꞌ woꞌo. I tempó iti, haweꞌ miꞌi Titu moánti bámbári hangko i kómu. Mewaliꞌ, lalungkiꞌ to masusa napalindó Pueꞌ Ala.

⁷ Hai melumbuꞌ hangko i hinti, góeꞌangkaiꞌ mohádi laluitana Titu kana i kómu. Napahaweꞌ i kaiꞌ noumbá kanipalindóna laluna tangaꞌna toroꞌ i oloꞌmi. Nauliꞌ rumihi kamabilami i kódóꞌ, hai nipoinao bona haweꞌaꞌ i kómu. Napolaluita woꞌo, katebálikina miꞌi lalumi hai membiáꞌkou ámpu i kódóꞌ, hai nipoinao modame huleꞌ hai kódóꞌ hangko i lalumi ntepuꞌu. Halalu-halalu, kakuhádina bámbári iti, tetámbái miꞌi kagóeꞌkuꞌ.

⁸ Kehapiꞌ óntóꞌ surangkuꞌ hangkoia mobelái lalumi, agáiáná tiꞌara piꞌi masusa lalungkuꞌ i kakupakatuámi sura iti. Rungu-runguna mapári ntepuꞌu kuhádi, láwiꞌ kuisá hangaa-ngaa masusa lalumi ane mobásákou sura iti. Agáiáná kamasusana lalumi iti hampaiꞌ peá.

⁹ Deꞌe-deꞌe góeꞌaꞌ láwiꞌ kuꞌukiꞌákou sura iti. Tiꞌaraꞌaꞌ góeꞌ ánti kamasusami, agáiáná góeꞌaꞌ láwiꞌ kamasusami iti moántikou bona menosoꞌkou hangko i bábehiámi to tiꞌara maroꞌa. Láwiꞌ kehapiꞌ masusa lalumi mobásá surangkuꞌ iti, kamasusana lalumi naporárá Pueꞌ Ala moánti pewátiꞌ i kómu. Mewaliꞌ, laluitangkuꞌ i lalu sura iti katoꞌuána tiꞌarakou mopakasusa.

¹⁰ Láwiꞌ kasusa lalu to hintotoꞌ hai peundeꞌána Pueꞌ Ala, moántikeꞌ i penosoꞌ, álána Pueꞌ Ala mohómpókikeꞌ hangko i huku dósántaꞌ. Hai tiꞌara ara tauna to nahohoꞌ inaona ánti kamenosoꞌna! Agáiáná ara kasusa lalu láwiꞌ tauna mampekiri peheꞌ ngkáduniáꞌ. Iti tiꞌara moántiheꞌ i penosoꞌ, ngkáliꞌna riꞌi molámbiꞌheꞌ kapate to mogáákiheꞌ hangko i Pueꞌ Ala.

¹¹ Nibuhinao kamasusana lalumi tempómi mobásá surangkuꞌ hangkoia, ia miꞌi kasusa to mouláꞌ peundeꞌána Pueꞌ Ala. Nipekiri maroꞌa, ba apa wuaꞌna kamasusami iti. Ánti kamasusami iti, mampoinaokou mobábehi apa to manótó. Nipatongawaꞌ katiꞌárámi moundeꞌ mohintuwuꞌ hai tauna to mosápuákaꞌangkaiꞌ. Nikáhihiꞌ dósáraꞌ tauna to masalaꞌ, hai malááꞌkou mampeuláꞌi bábehiáraꞌ. Mabilakou i kódóꞌ, nipeuláꞌi ntepuꞌu hawaꞌkuꞌ, hai timamakou mohuku tauna to masalaꞌ. Ánti kanibábehina miꞌi upu-upuna iti, tongawaꞌ miꞌi tiꞌara piꞌi ara katesalaꞌiámi.

¹² Halalu-halalu, i lalu surangkuꞌ hangkoia to kuꞌukiꞌákou, tiꞌara ara tunggáiángkuꞌ bona mosalaꞌi peá hadua tauna to masalaꞌ iti. Tiꞌara woꞌo ara tunggáiángkuꞌ motulungi tauna to molámbiꞌ rugiꞌ hangko i tauna to masalaꞌ iti. Tunggáiángkuꞌ moukiꞌ sura iti, bona nipatongawaꞌ i peitána Pueꞌ Ala noumbá kamahilena ahiꞌmi i kaiꞌ.

¹³ Mewaliꞌ, maróhó ntepuꞌu lalungkiꞌ! Melumbuꞌ hangko i hinti, góeꞌangkaiꞌ woꞌo moita kagóeꞌna Titu. Magenggáhi laluna moita bábehiámi to maroꞌa tangaꞌna toroꞌ i oloꞌmi.

¹⁴ Hangko tiꞌara mani kuhuoꞌ lao i kómu, kutóiákou, kupahaweꞌ miꞌi ami noumbá kamaroꞌana lalumi. Morasiꞌaꞌ halalu-halalu, tiꞌaraꞌaꞌ nipakahiliá. Upu-upu to kuhángáꞌáꞌákou, toꞌu ntepuꞌu. Noꞌonoꞌ woꞌo upu-upu to kupahaweꞌá Titu kana i kómu, tiꞌara ara to salaꞌ, upu-upuna iti toꞌu.

¹⁵ Hai ia woꞌo, tetámbái ahiꞌna i kómu, láwiꞌ nabuhinao noumbá pampeuláꞌimi hawaꞌna. Nitarima maroꞌa hai nipengkoruꞌi ntepuꞌu. Tiꞌara niundeꞌ mobábehi to salaꞌ.

¹⁶ Mewaliꞌ halalu-halalu, hangkani mani kuꞌuliꞌ: góeꞌ ntepuꞌuaꞌ deꞌe-deꞌe, láwiꞌ peisámokou kuhárungá i upu-upuna.