2 Korintu 6 - Sura Magasaꞌ: Bahangapa sura Pototowiá to Sae hai Pototowiá to Woꞌu

¹ Mewaliꞌ kaiꞌ deꞌe, mobágóꞌangkaiꞌ hingkakani hai Pueꞌ Ala mopahaweꞌ ngkóráꞌNa i tauna. Onoꞌ miꞌi haneꞌi kipembiáꞌ ntepuꞌu halalu-halalu, bona ineeꞌ nikáhákei mbero kamaꞌahiꞌna Pueꞌ Ala i kómu.

² I lalu Sura Magasaꞌ hangkoia, nauliꞌ Pueꞌ Ala node: “I tempó to Kupakanótó, Kupehádingi pekakaemi, hai i tempóNgkuꞌ mohómpóki tauna, Kutulungikou.” (Iesaia 49:8) Halalu-halalu, kuhángáꞌáꞌákou: deꞌe-deꞌe miꞌi tempó to napakanótó Pueꞌ Ala iti ina mohómpókikou hangko i huku dósámi.

Paulu molámbiꞌ handaꞌ kapári

³ Kódóꞌ hai rángángkuꞌ mobágóꞌ, hangaa-ngaa maroꞌa-roꞌaꞌangkaiꞌ bona tiꞌara ara kamasalaꞌna bábehiángkiꞌ haneꞌi tiꞌara ara to rapakanawoꞌ, hai bona tiꞌara ara tauna to peisá mosalaꞌi bágóꞌkiꞌ mopahaweꞌ ngkóráꞌna Pueꞌ Ala.

⁴ Ngkáliꞌna riꞌi, i pákáꞌ-pákáꞌna kibábehi oaꞌ apa to maroꞌa, bona tongawaꞌ kakaiꞌna topobágóꞌna Pueꞌ Ala to manótó. Mantahaꞌangkaiꞌ i lalu mampopengaa kapári.

⁵ Rapapaháiangkaiꞌ, ratarungkuangkaiꞌ, hai raduluangkaiꞌ. Mobágóꞌangkaiꞌ matimi. Handaꞌ kánina tiꞌaraꞌangkaiꞌ peisá letaꞌ. Handaꞌ kánina tiꞌara ara pandeꞌkiꞌ.

⁶ I pákáꞌ-pákáꞌna, tongawaꞌ kakaiꞌna topobágóꞌna Pueꞌ Ala, láwiꞌ: magasaꞌ bábehiángkiꞌ, kiꞌisá Ngkóráꞌna Pueꞌ Ala, sabaraꞌangkaiꞌ, maroꞌa lalungkiꞌ i upu-upu tauna, nateteꞌangkaiꞌ Inao to Magasaꞌ, hai mampokaꞌahiꞌangkaiꞌ hángká rángángkiꞌ hangko i kabulána lalungkiꞌ,

⁷ kipahaweꞌ apa to toꞌu, hai kipopolumao bágóꞌkiꞌ hangko i kuasaꞌ to kilámbiꞌ hangko i Pueꞌ Ala. Nodoangkaiꞌ tauna to timama lao mombeala moánti pihoꞌ hai lábá, {láwiꞌ timamaꞌangkaiꞌ mopahaweꞌ ngkóráꞌna Pueꞌ i katoꞌu-toꞌuána, hai mohániki tauna to mosalaꞌiangkaiꞌ}.

⁸ Kipopolumao oaꞌ bágóꞌna Pueꞌ Ala, maroꞌa rabiláꞌangkaiꞌ ba rapakóiꞌangkaiꞌ; ratóiáꞌangkaiꞌ ba rasalaꞌiangkaiꞌ. Kehapiꞌ kiuliꞌ apa to toꞌu, agáiáná ara to manguliꞌ topodongkoꞌangkaiꞌ.

⁹ Ara tauna to mopangákuꞌ kaiꞌ huoꞌánaꞌangkaiꞌ Pueꞌ Ala, ara woꞌo to mesápuáka. Handaꞌ kapári to morampeangkaiꞌ. Kaiꞌ nodoangkaiꞌ tauna to ina mate, agáiáná tueꞌ maniangkaiꞌ! Rapapaháiangkaiꞌ, agáiáná tiꞌara maniangkaiꞌ rapapate.

¹⁰ Narampeangkaiꞌ handaꞌ kapári, agáiáná góeꞌ lalungkiꞌ. Meahiahiꞌ tueꞌkiꞌ, agáiáná kaiꞌ to moántiangkaiꞌ pewátiꞌ hangko i Pueꞌ Ala i tauna to handaꞌ. I peitána tauna, handaꞌ kamakuraꞌkiꞌ, agáiáná katoꞌuána upu-upuna ara i kaiꞌ.

¹¹ Halalungkuꞌ toKorintu! Óntóꞌna lalungkiꞌ kipahaweꞌákou, hai kipokaꞌahiꞌkou.

¹² Tiꞌara kaiꞌ to tiꞌara maꞌahiꞌ i kómu, agáiáná kómu riꞌi to tiꞌara piꞌi maꞌahiꞌ i kaiꞌ.

¹³ Laluitangkuꞌ deꞌe, nodoaꞌ molaluita i ánáꞌkuꞌ haduduángkuꞌ, onoꞌ haneꞌi kupembiáꞌ bona nipokaꞌahiꞌ ntepuꞌuangkaiꞌ, nodo kaiꞌ woꞌo maꞌahiꞌ i kómu!

Paulu mopaingáꞌiheꞌ bona ineeꞌheꞌ mohintuwuꞌ hai tauna to tiꞌara mepoinálái i Pueꞌ

¹⁴ Ineeꞌkou mohintuwuꞌ hai tauna to tiꞌaraheꞌ mepoinálái i Pueꞌ Iesu. Peisá paꞌi tauna to mampeuláꞌi peundeꞌána Pueꞌ Ala mohintuwuꞌ hai tauna to mosápuáka Pueꞌ Ala? Peisá paꞌi to mabaa mohintuwuꞌ hai to makáindi?

¹⁵ Peisá paꞌi Kerisitu mohintuwuꞌ hai Datu Tokadake? Peisá paꞌi tauna to mepoinálái mohintuwuꞌ hai tauna to tiꞌara mepoinálái?

¹⁶ Apa kahibaliána Támbina Pueꞌ Ala hai támbi penómbáꞌá i ánitu? Tiꞌara ara! Kitaꞌ deꞌe peisákeꞌ rapándiriꞌ nodo támbina Pueꞌ Ala, láwiꞌ Pueꞌ Ala to tueꞌ ara i laluntaꞌ, nodo to teukiꞌ i Ngkóráꞌna Pueꞌ: “Ina toroꞌAꞌ i oloꞌraꞌ hai ina Kuporángáheꞌ. Kódóꞌ ina mewaliꞌ Pueꞌraꞌ, hai hira ina mewaliꞌheꞌ taunáNgkuꞌ.” (Áturá Menómbá 26:12; Ieheskie 37:27)

¹⁷ “Mewaliꞌ, hangaa-ngaa nikábáhá pampeuláꞌimi bábehiáraꞌ tauna to tiꞌaraꞌAꞌ moisá. Ineeꞌheꞌ nipohintuwuꞌá! Nipakaraoꞌ wátámi hangko i upu-upu bábehiáraꞌ to kadake. Ane nibábehi noꞌonoꞌ, ina Kutarimakou.” (Iesaia 52:11)

¹⁸ “Kódóꞌ ina nipouma, hai kómu woꞌo ina Kupoánáꞌkou.” Noꞌonoꞌ miꞌi panguliꞌna Pueꞌ Ala to melumbuꞌ kuasaꞌNa hangko i hinángkáꞌna to ara. (2 Semueli 7:14)