2 Korintu 5 - Sura Magasaꞌ: Bahangapa sura Pototowiá to Sae hai Pototowiá to Woꞌu

Pueꞌ Ala ina mampoweꞌikeꞌ wátá to woꞌu

¹ Wátántaꞌ i duniáꞌ deꞌe peisá rapándiriꞌ nodo bambaruꞌ. Hai taisá, ane bambaruꞌtaꞌ deꞌe ragero, lempóna: ane matekeꞌ, Pueꞌ Ala ina mopatimamaꞌákeꞌ hambuaꞌ támbi i surugáꞌ to tiꞌara rabábehi tauna hai to tiꞌara ina mokahópóꞌá, lempóna: wátántaꞌ to woꞌu.

^2-3 Lántuꞌántaꞌ mani tueꞌ i duniáꞌ deꞌe, meraruaꞌkeꞌ oaꞌ láwiꞌ mampoinaokeꞌ molámbiꞌ wátántaꞌ to woꞌu i surugáꞌ, bona tiꞌarakeꞌ mewaliꞌ tánuánáꞌ peá to tiꞌara ara wátána.

⁴ Láwiꞌ lántuꞌántaꞌ mani tueꞌ i duniáꞌ deꞌe, mantódihákeꞌ kapári ánti kamatimina kilingantaꞌ. Tiꞌarakeꞌ meraruaꞌ láwiꞌ taundeꞌ mopálehi wátántaꞌ deꞌe, agáiáná meraruaꞌkeꞌ láwiꞌ taundeꞌ bona wátántaꞌ deꞌe rapaháwángi hai wátá to woꞌu, nodo tauna mopakeꞌ waruꞌ to woꞌu. Taundeꞌ bona wátántaꞌ to ina mate deꞌe, ina rapaháwángi hai to tiꞌara mokahópóꞌá.

⁵ Pueꞌ Ala haduduáNa to mopatimamakeꞌ bona talámbiꞌ wátá to woꞌu, hai deꞌe-deꞌe Ia mampoweꞌimokeꞌ Inao to Magasaꞌ, tandaꞌna upu-upuna iti ina mewaliꞌ.

⁶ Onoꞌ miꞌi haneꞌi maróhó oaꞌ laluntaꞌ hai taisá ntepuꞌu, tangaꞌtaꞌ mani tueꞌ i lalu wátántaꞌ i duniáꞌ deꞌe, karaoꞌ manikeꞌ hangko i katoroꞌántaꞌ hingkakani hai Pueꞌ Iesu.

⁷ Meuláꞌkeꞌ i Pueꞌ ánti pepoináláintaꞌ, kehapiꞌ tiꞌara mani taita.

⁸ Mewaliꞌ, maróhó oaꞌ laluntaꞌ. Kehapiꞌkeꞌ mate, morasiꞌkeꞌ, láwiꞌ ane tegááꞌkeꞌ hangko i wátántaꞌ deꞌe, ina hingkakanikeꞌ hai Pueꞌ.

⁹ Hai tapoinao mobábehi oaꞌ apa to mopagóeꞌ laluNa, maroꞌa tueꞌ manikeꞌ i duniáꞌ deꞌe, maroꞌa ane matemokeꞌ {hai tueꞌkeꞌ i lalu surugáꞌ}.

¹⁰ Láwiꞌ hangkani tempó, kitaꞌ upu-upu hangaa-ngaa meángkáꞌkeꞌ i lindoꞌna Kerisitu bona Napáresáꞌ bábehiántaꞌ, maroꞌa ba tiꞌara, hai kitaꞌ upu-upu ina molámbiꞌ háwángina to hintotoꞌ hai bábehiántaꞌ tangaꞌtaꞌ mani tueꞌ i duniáꞌ deꞌe.

Tauna peisá mohintuwuꞌ hai Pueꞌ Ala moliu Kerisitu

¹¹ Mewaliꞌ malááꞌangkaiꞌ mobábehi apa peá to tiꞌara hintotoꞌ hai peundeꞌána Pueꞌ, láwiꞌ kiꞌisá Ia ina mopáresáꞌ bábehiáraꞌ upu-upu tauna. Onoꞌ miꞌi haneꞌi kipári-pári mopahaweꞌ Ngkóráꞌ Marasa, bona tauna ina mepoinálái i Pueꞌ Iesu. Pueꞌ Ala moisá lalungkiꞌ. Peundeꞌángkiꞌ bona kómu upu-upu, ina niꞌisá woꞌo kabulána lalungkiꞌ.

¹² Ineeꞌ nipekiri kipoinao peá motóiá wátángkiꞌ haduduángkiꞌ. Kipopaisáꞌákou bábehiángkiꞌ to maroꞌa to peisá nitóiá, bona ara rárámi mohánikiheꞌ tauna to moewaꞌangkaiꞌ, láwiꞌ tauna iti mampepemahileheꞌ ánti kamapánderaꞌ hai kamapángkáꞌna lántiꞌraꞌ i duniáꞌ deꞌe, agáiáná laluraꞌ tiꞌara maroꞌa.

¹³ Araheꞌ tauna to manguliꞌ magilaꞌangkaiꞌ, agáiáná tiꞌaraꞌangkaiꞌ magila. Ane kaiꞌ nodo to magila, iti mewaliꞌ láwiꞌ kiundeꞌ mampeuláꞌi peundeꞌána Pueꞌ Ala hangko i lalungkiꞌ ntepuꞌu. Agáiáná, ane manótó pekiringkiꞌ, iti mewaliꞌ láwiꞌ kiundeꞌ motulungikou.

¹⁴ Upu-upu to kibábehi mentóáꞌ hangko i kamaꞌahiꞌna Kerisitu, láwiꞌ kiꞌisá Ia mate mosulewátái upu-upu tauna. Mewaliꞌ kitaꞌ upu-upu {to mehárungá i Hia}, tiꞌara piꞌi ara peundeꞌántaꞌ mobábehi dósá.

¹⁵ Láwiꞌ tunggáiána Kerisitu mate mosulewátái upu-upu tauna, bona kitaꞌ to tueꞌ mani i duniáꞌ deꞌe tiꞌarapokeꞌ mampeuláꞌi peundeꞌántaꞌ haduduántaꞌ, agáiáná mampeuláꞌirakeꞌ peundeꞌána Kerisitu. Ia miꞌi to mate mosulewátáikeꞌ hai to rapatueꞌ huleꞌ.

¹⁶ Mewaliꞌ, onoꞌ miꞌi haneꞌi tiꞌarapongkaiꞌ mampopontaniꞌ tauna i rawana peá. Kehapiꞌ hangkoia kiuliꞌ Kerisitu tauna biásá peá, agáiáná deꞌe-deꞌe tiꞌara piꞌi noꞌonoꞌ pekiringkiꞌ, láwiꞌ Ia melumbuꞌ mani hangko i onoꞌ.

¹⁷ Mewaliꞌ, ane tauna mohintuwuꞌ hai Kerisitu, ia mewaliꞌ tauna to woꞌu. Katueꞌna to hangkoia liu miꞌi, hai ia molámbiꞌ miꞌi katueꞌ to woꞌu.

¹⁸ Pueꞌ Ala to mobábehi upu-upuna iti. Ia to mohuoꞌ mai Kerisitu motangaꞌ-tangaꞌikeꞌ, bona kitaꞌ tauna peisá mohintuwuꞌ hai Pueꞌ Ala. Hai Ia mampoweꞌiangkaiꞌ bágóꞌ mopahaweꞌ bámbári iti i tauna ntániꞌna, bona hira woꞌo peisá mohintuwuꞌ hai Pueꞌ Ala.

¹⁹ Deꞌe miꞌi bámbári to kipahaweꞌ: ánti kanatangaꞌ-tangaꞌina Kerisitu, Pueꞌ Ala mopahintuwuꞌ tauna hai wátáNa haduduáNa, hai tiꞌara piꞌi Napailalu salaꞌraꞌ. Kaiꞌ deꞌe, Naweꞌiangkaiꞌ bágóꞌ moánti bámbári iti i tauna ntániꞌna, bona mohintuwuꞌheꞌ woꞌo hai Pueꞌ Ala.

²⁰ Mewaliꞌ kaiꞌ deꞌe, huoꞌánaꞌangkaiꞌ Kerisitu, onoꞌ miꞌi haneꞌi, ane molaluitaꞌangkaiꞌ i kómu, nodo Pueꞌ Ala haduduána to mampolaluitaꞌákou. Mewaliꞌ kipembiáꞌ ntepuꞌu bona mohintuwuꞌkou hai Pueꞌ Ala, láwiꞌ iti peundeꞌána Kerisitu.

²¹ Kerisitu iti tiꞌara madósá, agáiáná Pueꞌ Ala mohuoꞌ mai mosulewátáikeꞌ bona Ia to mokili upu-upu dósá tauna. Tunggáiána Pueꞌ Ala, bona kitaꞌ to mohintuwuꞌ hai Kerisitu, peisákeꞌ mewaliꞌ manótó i peitána Pueꞌ Ala.