2 Korintu 4 - Sura Magasaꞌ: Bahangapa sura Pototowiá to Sae hai Pototowiá to Woꞌu

Tauna to moánti Ngkóráꞌ Marasa hangaa-ngaa manótó bábehiáraꞌ

¹ Hangko i kabulána laluNa, Pueꞌ Ala mopileꞌiangkaiꞌ mewaliꞌ topobágóꞌNa, onoꞌ miꞌi haneꞌi tiꞌaraꞌangkaiꞌ luleꞌ moánti Ngkóráꞌ Marasa.

² Kikaraohi hinángkáꞌ bábehiá to mepakahiliá; tiꞌara ara to kiwuniángi; tiꞌaraꞌangkaiꞌ mopakanawoꞌ tauna; tiꞌaraꞌangkaiꞌ woꞌo mobáliki tunggáiána ngkóráꞌna Pueꞌ Ala. I lindoꞌna Pueꞌ Ala, kipahaweꞌ apa to toꞌu, hai kihárungá upu-upu tauna ina moisá kamaroꞌana bábehiángkiꞌ!

³ Araheꞌ tauna to tiꞌara mau motarima Ngkóráꞌ Marasa to kipahaweꞌ, láwiꞌ tetuko mani pekiriraꞌ. Tauna itimoheꞌ to ina mesuaꞌ i naraka.

⁴ Tiꞌaraheꞌ mepoinálái, láwiꞌ napawuliheꞌ Datu Tokadake to mokuasaꞌi duniáꞌ deꞌe, álána tiꞌaraheꞌ moisá lempóna Ngkóráꞌ Marasa mokana i peawaꞌna tueꞌna Kerisitu, hai Kerisitu iti hibali hai Pueꞌ Ala.

⁵ Tiꞌaraꞌangkaiꞌ mopahaweꞌ bámbári kana i wátángkiꞌ haduduángkiꞌ. To kipahaweꞌ, bámbári to manguliꞌ: Iesu Kerisitu ia miꞌi Pueꞌ, hai Ia to mohuoꞌangkaiꞌ lao motulungikou.

⁶ Pueꞌ Ala to manguliꞌ, “Hangko i kamakáindi, mewaliꞌ miꞌi mabaa!” Ia miꞌi to mopamabaa laluntaꞌ, bona taisá peawaꞌNa moliu Kerisitu.

Kipahaweꞌ Ngkóráꞌ Marasa moliu i kuasaꞌ to kilámbiꞌ hangko i Pueꞌ Ala

⁷ Kaiꞌ peisáꞌangkaiꞌ rapándiriꞌ nodo kori tampoꞌ, agáiáná kori tampoꞌ iti bukeꞌ párewá to masuliꞌ hólóna. Lempóna, kehapiꞌ tauna peangkaiꞌ, kiꞌisá Ngkóráꞌ Marasa to mopamabaa laluraꞌ tauna. Tongawaꞌ kamahilena kuasaꞌna Ngkóráꞌ Marasa mobáliki laluraꞌ tauna, hai kuasaꞌ iti tiꞌara hangko i kaiꞌ haduduángkiꞌ, agáiáná hangko i Pueꞌ Ala.

⁸ Iumbá-umbá peá kalaoángkiꞌ, molámbiꞌangkaiꞌ oaꞌ handaꞌ kapári, agáiáná tiꞌaraꞌangkaiꞌ maꞌala rapakanawoꞌ. Wuliangkaiꞌ, agáiáná tiꞌaraꞌangkaiꞌ mokábáhá pehárungángkiꞌ i Pueꞌ Ala.

⁹ Rapopeahiahiꞌangkaiꞌ, agáiáná Pueꞌ tiꞌaraꞌangkaiꞌ mopálehi. Rapapahái ntepuꞌuangkaiꞌ, agáiáná tiꞌaraꞌangkaiꞌ mate.

¹⁰ Iumbá-umbá peá kalaoángkiꞌ, kiꞌisá babilaꞌ kaiꞌ ina rapapateangkaiꞌ hibali hai Iesu. Agáiáná kehapiꞌ noꞌonoꞌ, kipahaweꞌ oaꞌ Ngkóráꞌ Marasa, bona tongawaꞌ katueꞌna huleꞌ Iesu, hai kuasaꞌna katueꞌNa iti rapatongawaꞌ i lalu wátángkiꞌ.

¹¹ Tangaꞌkiꞌ mani tueꞌ i duniáꞌ deꞌe, handaꞌheꞌ tauna to mampoinao mopapateangkaiꞌ ánti peuláꞌkiꞌ i Pueꞌ Iesu. Agáiáná iti mewaliꞌ bona tongawaꞌ katueꞌna Pueꞌ Iesu i lalu wátángkiꞌ deꞌe to ina mate.

¹² Kaiꞌ molindoꞌangkaiꞌ oaꞌ kapate, agáiáná tiꞌara kipailalu, láwiꞌ ánti pobágóꞌkiꞌ deꞌe mopahaweꞌ Ngkóráꞌ Marasa, kómu molámbiꞌkou katueꞌ to maroꞌa to tiꞌara mokahópóꞌá.

¹³ I lalu Sura Magasaꞌ, teukiꞌ node: “Mepoináláiaꞌ, onoꞌ miꞌi haneꞌi tiꞌaraꞌaꞌ malááꞌ mopahaweꞌ laluitaMu.” Noꞌonoꞌ woꞌo, kaiꞌ mepoináláiangkaiꞌ i Pueꞌ Ala, onoꞌ miꞌi haneꞌi tiꞌaraꞌangkaiꞌ malááꞌ mopahaweꞌ Ngkóráꞌ Marasa.

¹⁴ Pueꞌ Ala mopatueꞌ huleꞌ Pueꞌ Iesu, onoꞌ miꞌi haneꞌi kiꞌisá, hangkani tempó Ia woꞌo ina mopatueꞌangkaiꞌ huleꞌ, hai moántiangkaiꞌ hingkakani hai kómu lao i lindoꞌNa.

¹⁵ Upu-upu kapári to nilámbiꞌ mobunduꞌ ntepuꞌu i kómu, bona kahandaꞌ-handaꞌá tauna ina mohádiá kamaꞌahiꞌna Pueꞌ Ala. Onoꞌ miꞌi haneꞌi kitaꞌ upu-upu ina manguliꞌ handaꞌ kamaroꞌana i Pueꞌ Ala, álána hangaꞌNa rapomahile.

¹⁶ Mewaliꞌ, onoꞌ miꞌi haneꞌi kuꞌuliꞌ tiꞌaraꞌangkaiꞌ mokábáhá pehárungángkiꞌ i Pueꞌ Ala. Kehapiꞌ kamaledeꞌ-ledeꞌá wátángkiꞌ deꞌe, agáiáná alo-alona kilámbiꞌ karóhó lalu to woꞌu hangko i Pueꞌ.

¹⁷ Kapári to kilámbiꞌ deꞌe-deꞌe, manangkoꞌ hai hampaiꞌ peá, hai ane mantahaꞌangkaiꞌ, ina molámbiꞌangkaiꞌ katueꞌ to meawaꞌ ntepuꞌu to tiꞌara ina mokahópóꞌá. Peawaꞌ to ina kilámbiꞌ melumbuꞌ mani kamahilena hangko i kapári to kihampei deꞌe-deꞌe.

¹⁸ Mewaliꞌ, tiꞌaraꞌangkaiꞌ mampekiri apa to peisá tongawaꞌ deꞌe-deꞌe. Ngkáliꞌna riꞌi, to kipekiri, to tiꞌara mani tongawaꞌ i peitána tauna, láwiꞌ to tongawaꞌ i peitána tauna tiꞌara ina mantaha haweꞌ i rue-ruena, agáiáná to tiꞌara mani tongawaꞌ i peitána tauna, iti riꞌi to ina ara oaꞌ duuꞌna i rue-ruena.