2 Korintu 3 - Sura Magasaꞌ: Bahangapa sura Pototowiá to Sae hai Pototowiá to Woꞌu

ToKorintu rapándiriꞌ nodo hambuaꞌ sura to naukiꞌ Kerisitu

¹ Ba nipekiri mampopetóiá wopangkaiꞌ {nodoheꞌ bahangapa guru agama ntániꞌna to haweꞌ i kómu}? Moántiheꞌ sura petóiá hangko i rángáraꞌ bona nitarimaheꞌ, hai ane pohuꞌheꞌ, membiáꞌ wopaheꞌ sura petóiá hangko i kómu! Kaiꞌ, tiꞌaraꞌangkaiꞌ moparaluu sura to noꞌonoꞌ.

² Kómu miꞌi to nodo sura petóiá to teukiꞌ i lalungkiꞌ. {Ánti katebálikina lalumi,} upu-upu tauna to moita katueꞌmi moisá kamaroꞌana pobágóꞌkiꞌ moánti Ngkóráꞌ Marasa i kómu.

³ Iti mopatongawaꞌ i upu-upu tauna wuaꞌna pobágóꞌkiꞌ moánti bámbári kana i Kerisitu i kómu, láwiꞌ kómu nodo hambuaꞌ sura to naukiꞌ Kerisitu. Sura iti tiꞌara Naukiꞌ hai tinta ba i watu poukiꞌá, ngkáliꞌna riꞌi Kerisitu moukiꞌ laluitaNa i lalumi ánti kuasaꞌna Inaona Pueꞌ Ala to tueꞌ.

⁴ Onoꞌ miꞌi haneꞌi peisá kiuliꞌ kómu miꞌi wuaꞌna pobágóꞌkiꞌ, hai kiꞌisá katoꞌuna laluitangkiꞌ iti, láwiꞌ mehárungáꞌangkaiꞌ i Pueꞌ Ala ánti pohintuwuꞌkiꞌ hai Kerisitu.

⁵ Tiꞌara kiuliꞌ kibuku mampopolumao bágóꞌna Pueꞌ hangko i kamapándengkiꞌ haduduángkiꞌ, agáiáná Pueꞌ Ala to mampoweꞌiangkaiꞌ kapánde

⁶ mewaliꞌ topobágóꞌNa to mopaturoꞌ tauna mokana dándiNa to woꞌu. Apa to napeweꞌi Pueꞌ Ala i tauna deꞌe-deꞌe, tiꞌara áturá-áturá to teukiꞌ, agáiáná Inao to Magasaꞌ. Áturá to teukiꞌ iti moántikeꞌ i kapate láwiꞌ tiꞌara tabuku mampeuláꞌi upu-upuna. Agáiáná Inaona Pueꞌ Ala moánti katueꞌ to maroꞌa to tiꞌara mokahópóꞌá.

Melumbuꞌ kamaroꞌana dándina Pueꞌ Ala to woꞌu hangko i dándiNa to sae

⁷ Hangkoia Pueꞌ Ala moukiꞌ HawaꞌNa i watu poukiꞌá hai Naweꞌi nabiꞌ Musa. Ánti peawaꞌna Pueꞌ Ala, lindoꞌna Musa woꞌo mewangkaꞌ, haneꞌi tiꞌara rabuku toSáráeliꞌ motótói lindoꞌna iti. Agáiáná pewangkaꞌna iti hampaiꞌ peá. Áturána Pueꞌ Ala to teukiꞌ i watu iti, moánti kapate i tauna, láwiꞌ tiꞌara tabuku mampeuláꞌi áturá iti. Agáiáná kehapiꞌ noꞌonoꞌ, mahile peawaꞌna Pueꞌ Ala,

⁸ hai melumbuꞌ mani peawaꞌna Pueꞌ Ala i kaNapeweꞌina dándiNa to woꞌu, láwiꞌ hangko i dándiNa to woꞌu iti, Naweꞌimokeꞌ Inao to Magasaꞌ i laluntaꞌ.

⁹ Ane mahile peawaꞌna Pueꞌ Ala i kamampeweꞌiNa podándi to moánti kapate, pelumbuꞌna mani peawaꞌNa i kamampeweꞌiNa dándi to woꞌu to moánti kamanótó i tauna.

¹⁰ Mahile peawaꞌna áturána Pueꞌ Ala to sae {láwiꞌ iti to mopatongawaꞌ peundeꞌáNa i tauna}. Agáiáná ane tapahibali peawaꞌ iti hai peawaꞌna dándiNa to woꞌu, áturáNa to sae iti rarekeꞌ nodo tiꞌara piꞌi ara peawaꞌna.

¹¹ Ane meawaꞌ dándiNa to sae to hampaiꞌ peá, melumbuꞌ ntepuꞌu peawaꞌna dándiNa to woꞌu to tiꞌara ina mokahópóꞌá.

¹² Mewaliꞌ, ánti pehárungángkiꞌ i dándina Pueꞌ Ala to woꞌu, onoꞌ miꞌi haneꞌi tiꞌaraꞌangkaiꞌ malááꞌ mopahaweꞌ Ngkóráꞌ Marasa i katoꞌu-toꞌuána.

¹³ Tiꞌara ara to kiwuniángi. Kaiꞌ tiꞌaraꞌangkaiꞌ nodo nabiꞌ Musa hangkoia to hangaa-ngaa metótóku motuko lindoꞌna bona toSáráeliꞌ tiꞌara moita pewangkaꞌna lindoꞌna to kalao-lao matántá.

¹⁴ Agáiáná ane toSáráeliꞌ hangkoia, tetuko pekiriraꞌ {láwiꞌ tiꞌaraheꞌ moisá tunggáiána Áturána Pueꞌ Ala}. Noꞌonoꞌ woꞌo haweꞌ deꞌe-deꞌe, ane mobásáheꞌ sura podándina Pueꞌ Ala to sae, tetuko mani pekiriraꞌ, láwiꞌ pekiriraꞌ peisá tebungkáhi ane mepoináláiheꞌ i Kerisitu.

¹⁵ Duuꞌna deꞌe-deꞌe, ane mobásáheꞌ sura to naukiꞌ nabiꞌ Musa, tetuko mani laluraꞌ hai pekiriraꞌ,

¹⁶ agáiáná ane mepoináláimoheꞌ i Pueꞌ, bateꞌna tebungkáhi laluraꞌ,

¹⁷ láwiꞌ Pueꞌ ia miꞌi Inao to Magasaꞌ, hai ane Inaona Pueꞌ ara i laluntaꞌ, ina tekábáhákeꞌ hangko i hinángkáꞌna to mampopogááꞌkeꞌ hai Pueꞌ.

¹⁸ Mewaliꞌ, kitaꞌ upu-upu to mepoinálái i Pueꞌ, tiꞌara piꞌi ara to moháláꞌ laluntaꞌ. Taisá peawaꞌna Pueꞌ, hai kuasaꞌNa iti mobáliki laluntaꞌ. Kamarue-rueá, katetátámbáiá peawaꞌna Pueꞌ i lalu katueꞌtaꞌ duuꞌna mewaliꞌkeꞌ hibali hai Ia. Inaona Pueꞌ haduduáNa to mobáliki laluntaꞌ.