2 Korintu 13 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paturoꞌna Paulu to kahópóꞌána

¹ Deꞌe katáluna miꞌi kánina ina laoaꞌ moweoꞌkou. Nibuhinao apa to teukiꞌ i lalu Sura Magasaꞌ to manguliꞌ: “Ane ara hadua tauna to rasalaꞌi, hangaa-ngaa ara rodua ba tálu tauna to mosabiki katoꞌuna kamasalaꞌna, bona tongawaꞌ kárá-kárána.”

² Tangaꞌkuꞌ hingkakani hai kómu i karongkánina, araheꞌ tauna i oloꞌmi to mobábehi dósá, onoꞌ haneꞌi kuweꞌimoheꞌ laluita. Mewaliꞌ deꞌe-deꞌe, kehapiꞌ karaoꞌ maniaꞌ hangko i kómu, moliu sura deꞌe, kupopaingáꞌiheꞌ tauna iti hai tauna ntániꞌna kaꞌina haweꞌkuꞌ wopiꞌi. Hai ane haweꞌaꞌ, hai tiꞌara maniheꞌ mampenosoꞌi bábehiáraꞌ, ina mahárá polaluitangkuꞌ, tiꞌara mpuꞌu ara hadua to ina tekábáhá hangko i pehuku.

³ Arakou to membiáꞌ bona kupopaitaꞌákou tandaꞌ to mopakanótó Kerisitu molaluita moliu i kódóꞌ. Nipegiá peaꞌ! Ane haweꞌaꞌ i kómu, ina niꞌita ntepuꞌu kuasaꞌ to naweꞌiaꞌ Kerisitu! Kerisitu tiꞌara maledeꞌ, ngkáliꞌna riꞌi maróhó kuasaꞌNa i oloꞌmi.

⁴ Kehapiꞌ maledeꞌ wátána Kerisitu i tempóNa rapakuꞌ i kau mombehape, agáiáná ánti kuasaꞌna Pueꞌ Ala, Ia tueꞌ huleꞌ. Kaiꞌ woꞌo, maledeꞌangkaiꞌ nodo Kerisitu, agáiáná ánti kuasaꞌna Pueꞌ Ala, mohintuwuꞌangkaiꞌ hingkakani hai Kerisitu. Mewaliꞌ halalu-halalu, ane haweꞌaꞌ, ina nihádiá ntepuꞌu kuasaꞌ iti to naweꞌiangkaiꞌ Pueꞌ Ala.

⁵ Halalu-halalu, nipáresáꞌ ntepuꞌu lalumi, ba hintotoꞌ rárá katueꞌmi hai pepoináláimi i Kerisitu ba tiꞌara? Ane nitibaaꞌ pepoináláimi, lempóna Kerisitu Iesu ara i lalumi. Agáiáná ane rárá katueꞌmi tiꞌara hintotoꞌ hai pepoináláimi, lempóna, tiꞌarakou mepoinálái.

⁶ Kupembiáꞌ bona nipáresáꞌangkaiꞌ woꞌo, hai kuhárungá ina tongawaꞌ kamaróhóna pepoináláingkiꞌ i Kerisitu.

⁷ Mekakaeangkaiꞌ i Pueꞌ Ala bona tiꞌarakou mobábehi salaꞌ. Tiꞌarakou kipekakaeá bona tongawaꞌ kamaroꞌangkiꞌ, agáiáná mekakaeangkaiꞌ bona mobábehikou apa to maroꞌa. Kehapiꞌ ara maniheꞌ tauna to mosápuáka oaꞌ kuasaꞌkiꞌ, tiꞌaranto moapa, asalaꞌ mobábehikou oaꞌ apa to maroꞌa.

⁸ Tiꞌara ara to hintotoꞌ rasalaꞌiákou, ane mobábehikou oaꞌ apa to toꞌu, agáiáná kipoinao motulungikou bona mampeuláꞌikou paturoꞌ to toꞌu.

⁹ Góeꞌ lalungkiꞌ ane kaiꞌ to maledeꞌ, hai kómu to maróhó. Hai iti miꞌi to kipekakaeá, bona tiꞌara mpuꞌu ara kamakuraꞌmi i pepoináláimi.

¹⁰ Onoꞌ haneꞌi kuꞌukiꞌámokou sura deꞌe i tempóngkuꞌ mani karaoꞌ hangko i kómu, bona ane haweꞌaꞌ, tiꞌara piꞌi ina mahárá polaluitangkuꞌ i kómu, hai tiꞌara kuparaluu mopakeꞌ kuasaꞌ to naweꞌiaꞌ Pueꞌ mokámbáróákou, láwiꞌ kuasaꞌ iti tiꞌaraꞌaꞌ Naweꞌi bona kupakanawoꞌ pepoináláimi. Ngkáliꞌna riꞌi, Naweꞌiaꞌ bona kupakaróhó pepoináláimi.

Tabeá

¹¹ Kahópóꞌána halalu-halalu, hangaa-ngaa góeꞌkou. Nipakaroꞌa-roꞌa bábehiámi, hai nipailalu paturoꞌkuꞌ. Hangaa-ngaa hampepekirikou hai hangaa-ngaa mohintuwuꞌkou. Pueꞌ Ala ina mamporángákou oaꞌ, mopatongawaꞌ kamaꞌahiꞌNa i kómu, hai mampoweꞌikou roꞌa ngkatueꞌ.

¹² Ane moromu-romukou, mombetabe-tabekou hangko i lalumi ntepuꞌu. Upu-upu jemaꞌa ieneꞌ mopakatu tabeáraꞌ haweꞌ i kómu halalu-halalu.

¹³ Kipembiáꞌ bona Pueꞌ Iesu Kerisitu mowátiꞌkou, Pueꞌ Ala mampokaꞌahiꞌkou, hai Inao to Magasaꞌ mamporángákou upu-upu. Hangko i kódóꞌ, PAULU