2 Korintu 12 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu mopahaweꞌ apa to napetudeꞌá Pueꞌ i hia

¹ Katoꞌuána, tiꞌara ara bunduꞌna ane motóiáꞌaꞌ wátángkuꞌ haduduángkuꞌ, agáiáná kehapiꞌ noꞌonoꞌ, hangaa-ngaa kupaliliu mokana i apa to napetudeꞌá Pueꞌ i kódóꞌ.

² Hampuloꞌ hai iba parena to liu, raoreꞌaꞌ lao i surugáꞌ to i reá-reá ntepuꞌu, ia miꞌi kaꞌaraꞌána Pueꞌ Ala. Tiꞌara kuisá ba wátángkuꞌ mpuꞌu to raoreꞌ, ba molámbiꞌ peaꞌ pampetudeꞌá, agáiáná Pueꞌ Ala to moisá.

³ To kuisá ntepuꞌu, raoreꞌaꞌ lao i katoroꞌá to melumbuꞌ kamaroꞌana to rahangaꞌ Párádesiꞌ. Hangkani mani kuꞌuliꞌ, tiꞌara kuisá ba raoreꞌ mpuꞌuaꞌ, ba molámbiꞌ peaꞌ pampetudeꞌá. Pueꞌ Ala to moisá.

⁴ Tangaꞌkuꞌ indoreá, kuhádi laluita to maroꞌa ntepuꞌu, to tiꞌara rabuku tauna mohuwárá, hai to tiꞌara peisá rahuwárá tauna.

⁵ Katoꞌuána, hintotoꞌ ntepuꞌu ane kutóiá wátángkuꞌ haduduángkuꞌ ánti apa to kuita iti, agáiáná tiꞌara kuꞌundeꞌ. Ngkáliꞌna riꞌi, kuꞌundeꞌ mani motóiá wátángkuꞌ haduduángkuꞌ mokana i kamaledeꞌkuꞌ.

⁶ Katoꞌuána, ane kekupoinaoi motóiá wátángkuꞌ haduduángkuꞌ, tiꞌaraꞌaꞌ nodo tobebe, láwiꞌ tiꞌaraꞌaꞌ modongkoꞌ. Agáiáná tiꞌara kubábehi noꞌonoꞌ, bona tiꞌara ara to motóiáꞌaꞌ melumbuꞌ hangko i apa to raita hai apa to rahádi miꞌi.

⁷ Mewaliꞌ, ánti kamaroꞌana upu-upu to napetudeꞌá Pueꞌ Ala i kódóꞌ, Ia mampoweꞌiaꞌ kapári, bona tiꞌaraꞌaꞌ maꞌángkáꞌ. Kapári iti peisá rapándiriꞌ nodo dui i wátángkuꞌ ba nodo hadua huoꞌána Datu Tokadake to haweꞌ i kódóꞌ mampopeahiahiꞌaꞌ, bona tiꞌaraꞌaꞌ maꞌángkáꞌ.

⁸ Tálu miꞌi kánina kupembiáꞌ i Pueꞌ bona Nakábáháꞌaꞌ hangko i kapári to mosalemporiaꞌ.

⁹ Agáiáná Nahángáꞌáꞌáꞌaꞌ, “Tiꞌarakoꞌ ina Kukábáhá, agáiáná ina Kutulungikoꞌ. To nuparaluu, mehárungá pekoꞌ i kabulána laluNgkuꞌ, láwiꞌ ina Kupatongawaꞌ kuasaꞌKuꞌ moliu kamaledeꞌmu.” Onoꞌ miꞌi haneꞌi góeꞌ ntepuꞌuaꞌ mampolaluita upu-upu kamaledeꞌkuꞌ, bona kuasaꞌna Kerisitu tongawaꞌ moliu katueꞌkuꞌ.

¹⁰ Mewaliꞌ, ane maledeꞌaꞌ, kupokagóeꞌ ntepuꞌu. Góeꞌaꞌ ane rasasalaꞌiaꞌ ba rapopeahiahiꞌaꞌ, ba molámbiꞌaꞌ kasusa hai kapári ánti peuláꞌkuꞌ i Kerisitu. Láwiꞌ ane maledeꞌaꞌ, i tempó iti, maróhóaꞌ láwiꞌ Kerisitu to motulungiaꞌ.

Masusa laluna Paulu mampekiri toKorintu to mosápuáka mani kuasaꞌna

¹¹ I kamotóiángkuꞌ wátángkuꞌ haduduángkuꞌ nodo hadua to bebe, iti kubábehi ánti kakómuna, láwiꞌ nisápuáka kuasaꞌkuꞌ. Katoꞌuána, kekómu riꞌi halalu-halalu to hangaa-ngaa mampomahileaꞌ. Kódóꞌ deꞌe tiꞌaraꞌaꞌ apa-apa, agáiáná Pueꞌ Ala mopileꞌiaꞌ mewaliꞌ surona Pueꞌ Iesu, hai tiꞌaraꞌaꞌ tepaiwóiꞌá hangko i “suro” to ara i oloꞌmi to mampomahile peheꞌ hangaꞌraꞌ haduduáraꞌ.

¹² Tangaꞌkuꞌ mani hingkakani hai kómu, kubábehi mpuꞌu tandaꞌ-tandaꞌ to mopatongawaꞌ kakódóꞌna surona Pueꞌ Iesu. Mobágóꞌaꞌ oaꞌ i lalu kapári, mobábehiaꞌ tandaꞌ kuasaꞌ hai tandaꞌ to metingkáráki ánti kuasaꞌ to kulámbiꞌ hangko i Pueꞌ Ala.

¹³ Halalu-halalu, ba niuliꞌ riꞌi tiꞌara mani gáná pobágóꞌkuꞌ i oloꞌmi? Pobágóꞌkuꞌ i kómu hungkuꞌ hibali hai pobágóꞌkuꞌ i jemaꞌa-jemaꞌa to ntániꞌna. Ane i wánuá ntániꞌna, rapoweꞌiaꞌ apa to kuparaluu, agáiáná i kómu halalu-halalu, tiꞌarakou kupamapári. Ba paraluu kupembiáꞌ ámpu i kómu ánti kamasalaꞌkuꞌ iti? Tiꞌara!

¹⁴ Nipehádingi maroꞌa! Ina laoaꞌ moweoꞌkou i katáluna kánina, hai tiꞌara ina kupembiáꞌ ba apa peá hangko i kómu. Tiꞌara párewámi to kupeliꞌ, agáiáná to kupeliꞌ, bona maꞌahiꞌkou i kódóꞌ. Láwiꞌ tiꞌara ánángkóiꞌ to mampeliꞌ pandeꞌna tosaeraꞌ; ngkáliꞌna riꞌi tosae to mampeliꞌ pandeꞌna ánáꞌraꞌ.

¹⁵ Mewaliꞌ, kuꞌundeꞌ mopakeꞌ hinángkáꞌna to ara i kódóꞌ bona motulungikou. Mogalo riꞌi wátángkuꞌ, ane kepeisái, ina kuweꞌikou. Mewaliꞌ ane mahile kamaꞌahiꞌkuꞌ i kómu, moapa riꞌi haneꞌi makuraꞌ ahiꞌmi i kódóꞌ?

¹⁶ Niꞌisá halalu-halalu, tiꞌarakou hangkani kupamapári. Agáiáná araheꞌ tauna to mosasalaꞌiaꞌ. Rauliꞌ kuákálángikou. Rauliꞌ molámbiꞌaꞌ rasiꞌ hangko i kómu ánti podongkoꞌkuꞌ. Iti tiꞌara toꞌu!

¹⁷ Araheꞌ paꞌi tauna to kuhuoꞌ lao i kómu to moákálángikou bona molámbiꞌaꞌ rasiꞌ? Tiꞌara ara!

¹⁸ Hangkoia kupembiáꞌ bona Titu lao moweoꞌkou, hai ara woꞌo hadua halaluntaꞌ to kuhuoꞌ mamporángá. Ba Titu moákálángikou i tempó iti? Niꞌisá ntepuꞌu halalu-halalu, Titu hai kódóꞌ hampepekiri peangkaiꞌ, hibali peá bábehiángkiꞌ.

¹⁹ Ineeꞌ riꞌi nipekiri upu-upu to kiukiꞌ deꞌe, bona mampeámpárái peangkaiꞌ wátángkiꞌ. Halalu-halalu to kipokaꞌahiꞌ! Molaluitaꞌangkaiꞌ i kómu ánti pohintuwuꞌkiꞌ hai Kerisitu. Pueꞌ Ala to mosabiki pobágóꞌkiꞌ. Upu-upu to kipahaweꞌ hai kibábehi, kipahaweꞌ hai kibábehi bona maróhó lalumi.

²⁰ To kupokalááꞌ, ane haweꞌaꞌ i kómu, ina kulámbiꞌ bábehiámi tiꞌara hintotoꞌ hai apa to kuhárungá, hai {bateꞌmi kukámbáróá}. Iti tiꞌara ina hintotoꞌ hai pehárungámi i kódóꞌ. To kupokalááꞌ: ineeꞌ paꞌi kulámbiꞌkou i tempómi mosisalaꞌ hai mombepokahiniꞌ, mombekabukoꞌi hadua hai hadua, mopaioru pekou peundeꞌámi haduduámi, mopakadakekou hángká rángámi, mombeuliꞌ-uliꞌ, hai mampepemahile. Tiꞌara kuꞌundeꞌ ane tiꞌarakou mohintuwuꞌ.

²¹ Hai to kupokalááꞌ woꞌo, i kahaweꞌkuꞌ i kómu, Pueꞌ Ala Pueꞌkuꞌ ina mopaiwóiꞌaꞌ i lindoꞌmi, hai ina teriaꞌaꞌ láwiꞌ handaꞌ tauna i oloꞌmi tiꞌara maniheꞌ menosoꞌ hangko i bábehiáraꞌ to kadake, pebualosiraꞌ hai bábehiáraꞌ ntániꞌna to metitidiꞌi, hai tiꞌaraheꞌ momeeꞌ peundeꞌána laluraꞌ to kadake.