2 Korintu 10 - Sura Magasaꞌ: Bahangapa sura Pototowiá to Sae hai Pototowiá to Woꞌu

Paulu mokámbáróáheꞌ tauna to mosápuáka kuasaꞌna mewaliꞌ suro

¹ Halalu-halalu, kódóꞌ deꞌe Paulu, ara to ina kupahaweꞌ i kómu. Araheꞌ tauna i oloꞌmi to manguliꞌ, “Ane Paulu karaoꞌ hangko i kaiꞌ, laluitana mahárá i lalu surana, agáiáná ane mombelindoꞌkeꞌ, maꞌálusuꞌ ntepuꞌu.” Mewaliꞌ, hangko i lalungkuꞌ to mengkaiwóiꞌ hai maꞌálusuꞌ, nodo laluna Kerisitu,

² kupembiáꞌ halalu-halalu, bona ane haweꞌaꞌ i kómu, tiꞌara paraluu kupatongawaꞌ i kómu kamakasaraꞌkuꞌ. Láwiꞌ ara mani i oloꞌmi to manguliꞌ bábehiángkiꞌ nodo bábehiána tauna to tiꞌara moisá Pueꞌ Ala hai tiꞌara hintotoꞌ i suro.

^3-4 Kaiꞌ, tauna biásá peangkaiꞌ. Agáiáná ane moewaꞌangkaiꞌ tauna {to mosápuáka paturoꞌkiꞌ}, kiewaꞌheꞌ hai kuasaꞌ to hangko i Pueꞌ Ala, tiꞌara hangko i kamapándengkiꞌ peá nodo tauna to tiꞌara moisá Pueꞌ Ala. Kaiꞌ peisá rapándiriꞌ nodo surudadoꞌ to mogero benteraꞌ ewálingkiꞌ. Lempóna, ánti kuasaꞌ to hangko i Pueꞌ Ala, kiewaꞌ pekiri to hangko i tauna peá,

⁵ kinangiheꞌ tauna to moewaꞌ paturoꞌ to toꞌu, to mampepemahile hai to mosalempori ráráraꞌ tauna to mampoinao moisá Pueꞌ Ala. Ánti kuasaꞌ to kilámbiꞌ hangko i Pueꞌ Ala, kibáliki pekiriraꞌ tauna iti, bona mengkoruꞌheꞌ i Kerisitu.

⁶ Mewaliꞌ, ane maroꞌa pengkoruꞌmi i kaiꞌ, ina kihukuheꞌ tauna to mosápuáka maniangkaiꞌ.

⁷ Nipekiri maroꞌa! Ane arai i oloꞌmi to manguliꞌ kakómuna mpuꞌu taunána Kerisitu, hangaa-ngaa nipangákuꞌ woꞌo kakaiꞌna taunáNa.

⁸ Ba niuliꞌ mampepemahileaꞌ? Tiꞌara, láwiꞌ tiꞌara kuꞌundeꞌ mampepemahile. Agáiáná tiꞌaraꞌaꞌ mahili mopakanótó kuasaꞌkuꞌ to naweꞌiaꞌ Pueꞌ. Tiꞌaraꞌaꞌ Naweꞌi kuasaꞌ mopakanawoꞌ pepoináláimi, ngkáliꞌna mopakaróhóraꞌaꞌ pepoináláimi.

⁹ Tiꞌara kuꞌundeꞌ ane nipekiri kutunggáiákou kupopalááꞌ moliu surangkuꞌ to mahárá.

¹⁰ Kuꞌuliꞌ noꞌonoꞌ, láwiꞌ araheꞌ tauna i oloꞌmi to mosasalaꞌiaꞌ, rauliꞌ, “Ane tabásá surana, makuasaꞌ hai kaladu pepaturoꞌna, agáiáná ane arai ieneꞌ hingkakani hai kitaꞌ, ia nodo tauna to maledeꞌ hai laluitana tiꞌara mobunduꞌ!”

¹¹ Mewaliꞌ, hangaa-ngaa nipakanótóáheꞌ tauna iti: nodo kamahárána laluitangkiꞌ i lalu surangkiꞌ, noꞌonoꞌ woꞌo kaꞌina makasaraꞌkiꞌ i kahaweꞌkiꞌ!

Paulu mopakanótó kuasaꞌna mopaturoꞌheꞌ

¹² Tiꞌaraꞌangkaiꞌ pebáiꞌ mampeuláꞌi bábehiáraꞌ bahangapa tauna i oloꞌmi to mampepemahile. Tiꞌaraꞌangkaiꞌ hibali hai hira. Tauna iti, motóiáheꞌ wátáraꞌ haduduáraꞌ. Rauliꞌ maroꞌa ntepuꞌu bábehiáraꞌ, mole bebe ntepuꞌuheꞌ láwiꞌ mouláꞌ peheꞌ pekiriraꞌ haduduáraꞌ, {tiꞌaraheꞌ moisá kamakuraꞌraꞌ}.

¹³ Kaiꞌ tiꞌaraꞌangkaiꞌ noꞌonoꞌ. Ane motóiáꞌangkaiꞌ wátángkiꞌ haduduángkiꞌ, tiꞌara kipopelumbuꞌ hangko i apa to hintotoꞌ. Ane kitóiá wátángkiꞌ haduduángkiꞌ, kipolaluita peá bágóꞌkiꞌ to napakanótóangkaiꞌ Pueꞌ Ala. Hai bágóꞌkiꞌ iti haweꞌ woꞌo i kómu halalu-halalu, {láwiꞌ Pueꞌ Ala mohuoꞌangkaiꞌ moánti Ngkóráꞌ Marasa haweꞌ i kómu}.

¹⁴ Mewaliꞌ, i tempóngkiꞌ mopatongawaꞌ kuasaꞌkiꞌ i kómu, tiꞌaraꞌangkaiꞌ moliungi apa to hintotoꞌ. Ane ketiꞌaraꞌangkaiꞌ haweꞌ i kómu moánti Ngkóráꞌ Marasa, ketiꞌara woꞌo ara kuasaꞌkiꞌ mopaturoꞌkou. Agáiáná ara mpuꞌu kuasaꞌkiꞌ mopaturoꞌkou, láwiꞌ kaiꞌ to rungu-runguna moánti Ngkóráꞌ Marasa i kómu.

¹⁵ Ane kaiꞌ, tiꞌaraꞌangkaiꞌ nodo tauna ntániꞌna. Tiꞌara kipolaluita wuaꞌna pobágóꞌkiꞌ to i rawa hangko i bágóꞌ to naweꞌiangkaiꞌ Pueꞌ Ala. Agáiáná kihárungá halalu-halalu, ane tetámbái kamaróhóna pepoináláimi, ina tetámbái woꞌo wuaꞌna pobágóꞌkiꞌ i oloꞌmi,

¹⁶ duuꞌna kamaeláꞌ-eláꞌá pobágóꞌángkiꞌ, láwiꞌ kipoinao moánti Ngkóráꞌ Marasa i katoroꞌá to karaoꞌ mani hangko i kómu. Tiꞌara kiundeꞌ moánti Ngkóráꞌ Marasa i tauna to mohádimoheꞌ bámbári to maroꞌa iti, bona tiꞌaraꞌangkaiꞌ mampepemahile ánti wuaꞌna pobágóꞌkiꞌ to katoꞌuána rapobágóꞌ tauna ntániꞌna i kaꞌaraꞌána pobágóꞌraꞌ.

¹⁷ Ara to teukiꞌ i lalu Sura Magasaꞌ node: “Heáná to ina mampolaluita apa ntóáꞌna kagóeꞌna laluna hangaa-ngaa mampolaluita kagóeꞌna iti ánti kamaroꞌana Pueꞌ i hia.” (Ieremia 9:24)

¹⁸ Tauna to rauliꞌ ratóiá, ia miꞌi tauna to natóiá Pueꞌ, tiꞌara tauna to motóiá wátána haduduána.